प्रधानमंत्री फसल बीमा योजना के चलत किसान सिंचित अउ असिंचित धान अरहर, मूंग, उड़द, मक्का, अउ उद्यानिकी फसल के बीमा पंद्रह जुलाई तक करा सकही। मुख्यमंत्री भूपेश बघेल ह प्रदेश के सबो किसान मनले खरीफ अउ उद्यानिकी फसल के बीमा कराय के अपील करीन हे।
ओमन ह बताइन कि किसान मन ल फसल बीमा के सुविधा प्रीमीयम राशि म उपलब्ध कराय जात हे। खरीफ फसल के बीमा बर किसान मन ल प्रीमीयम राशि के दू प्रतिशत अउ उद्यानिकी फसल के बीमा बर प्रीमीयम राशि के पांच प्रतिशत अंशदान के रूप म देना होथे। ओमन ह कीहिन कि किसान मन थोरकुन राशि जमा करके अपन फसल ल प्राकृतिक आपदा ले होवइया नुकसान ले बचाये जा सकत हे।
बूस्टर डोज-कोरोना
देश म अठारा बछर ले जादा उमर के सबो लोगन मन ल पंद्रह जुलाई ले कोरोना के बूस्टर डोज मुफ्त म लगाये जाही। केंद्रीय मंत्रिमंडल के बइठका म आज ए प्रस्ताव ल मंजूरी दे गेहे। केंद्रीय सूचना अउ प्रसारण मंत्री अनुराग ठाकुर ह पत्रकार मन ल बताइन कि देश के स्वतंत्रता के पचहत्तर बछर पूरा होय के उपलक्ष्य म अवइया पचहत्तर दिन तक लोगन मन ल बूस्टर डोल निशुल्क लगाये जाही।
बारिश 01
बासागुड़ा, सिलगेर, फारसेगढ़ अउ गंगालूर समेत सैकड़ों गांव टापू बन गेहे। ए जगा म बाढ़ जइसे स्थिति बने हुए हे। अइसने बेरा म ग्रामीण मन ल आपातकालीन चिकित्सा सुविधा के जरूरत होय म सेना के जवान अपन हौसला दिखावत हे। कैका ग्राम पंचायत के घुमरा गांव के एक झिन गर्भवती माइलोगिन ल जवान मन ह मोटरबोट के मदद ले नदिया पार कराके अस्पताल पहुंचाइन।
उंहें नारायणपुर जिला म अतिवृष्टि के सेती कई जगा म बाढ़ के स्थिति बन गेहे। जिला के अंतिम छोर म बसे कड़ेमेटा कैम्प के आगू पानी के जादा बहाव के सेती डायवर्सन ह टूट गेहे।
एति गरियाबंद जिला म पाछू चौबीस घंटा ले सरलग होत तेज बरसा ले पैरी अउ सोंढूर नदी के जलस्तर बाढ़ गेहे। उंहें नदिया नाला म उफान के सेती बीस ले जादा गांव के संपर्क टूट गेहे।
बारिश 02
उंहें, धमतरी जिला म पाछू दू दिन ले होत बारिश के सेती चालीस ले जादा गांव के संपर्क जिला मुख्यालय ले टूट गेहे। भारी बरसा होय ले आठदाहरा, सीतानदी, अउ सेंदूर नदी उफान म हे। एखर ले ओडिशा राज्य ल जोड़ईया सिहावा, बोराई, धमतरी ले नगरी अउ केरेगांव ले गट्टासिल्ली रद्दा म अवई-जवई बंद हे।
पाछू रतिहा बंदबगौद गांव के एक झिन ग्रामीण ह पानी के तेज बहाव ले नाला म बोहागे। जेखर खोजबीन चलत हे। रूद्री बैराज ले घलो पानी छोड़े के स्थिति बन गेहे।
दुर्ग जिला म घलो पाछू तीन दिन ले बरसा होवत हे। एखर चलत महमरा गांव अउ दुर्ग के संपर्क कट गेहे। ग्रामीण क्षेत्र म मुनादी कराके एनीकट वाले रद्दा ल झन बउरे के अपील करे गेहे। अइसने चिनाब नदिया म कोर्टनी-नगपुरा मार्ग म बने पुलिया ह घलो टूट गेहे। कैचमेंट एरिया ले पानी आय के सेती अवइया दिन म नदी अउ नाला के जलस्तर अउ जादा बाढ़े के संभावना हे।
राष्ट्रपति चुनाव-मतदान शांति
अवइया अठारा जुलाई के भारत के सोलहवां राष्ट्रपति बर होवइया चुनई बर मतदान होही। ए चुनई बर छत्तीसगढ़ के अधिकारी मन ह नई दिल्ली स्थित भारत निर्वाचन आयोग ले मतपेटी अउ आने जीनिस ले लेहे। सहायक रिटर्निंग अधिकारी दिनेश त्रिवेदी अउ उप मुख्य निर्वाचन पदाधिकारी विनय कुमार अग्रवाल ह ए जम्मों जीनिस ल लेके आज रतिहा नियमित विमान ले रायपुर पहुंचही।
निर्वाचन आयोग डहार ले सामग्री के सुरक्षा व्यवस्था सुनिश्चित करे गेहे। रायपुर विमानतल पहुंचे म मतदान सामग्री ल राज्य पुलिस डहार ले विधानसभा भवन के स्ट्रांग रूम तक सुरक्षित पहुंचाय जाही। ए सामग्री ल मतदान होय तक स्ट्रांक रूम म सुरक्षित राखे जाही।
राष्ट्रपति निर्वाचन बर छत्तीसगढ़ के विधानसभा परिसर म मतदान केंद्र बनाय गेहे। जिहां राज्य के नब्बे विधानसभा क्षेत्र के विधायक मन बर मतदान के व्यवस्था करे गेहे। मत के गिनती इक्कीस जुलाई के नई दिल्ली म होही।
ट्रेन मासिक सीजन टिकट
दक्षिण पूर्व मध्य रेलवे डहार ले शुरू करे गे मासिक सीजन टिकट के सुविधा तुरते लागू कर दे गेहे। यात्री मनके मांग ल देखत दक्षिण पूर्व मध्य रेलवे डहार ले मासिक सीजन टिकट वाला मन ल लंबा दूरिहा के तेईस ठिन ट्रेन के अनारक्षित कोच म यात्रा करे के सुविधा दे जात हे ।
एमा अमरकंटक एक्सप्रेस म रायपुर ले बिलासपुर के बीच, विशाखापट्नम-कोरबा लिंक एक्सप्रेस म रायपुर ले कोरबा, छत्तीसगढ़ एक्सप्रेस म बिलासपुर ले दुर्ग, अहमदाबाद-हावड़ा एक्सप्रेस म नागपुर ले गोंदिया, नौतनवा-दुर्ग एक्सप्रेस म बिलासपुर ले दुर्ग साउथ बिहार म रायगढ़ ले दुर्ग अउ गोंडवाना एक्सप्रेस ट्रेन म रायगढ़ ले गोंदिया के बीच यात्रा करे जा सकत हे।
विशेष योगाभ्यास कार्यक्रम
यूनिसेफ अउ छत्तीसगढ़ योग आयोग डहार ले राज्य म गर्भवती माइलोगिन मन बर बिसेस योगाभयास कार्यक्रम शुरू करे जात हे । पायलेट प्रोजेक्ट के रूप म ए कार्यक्रम कोंडागांव जिला म छियांलिस हेल्थ एंड वेलनेस सेंटर म चलाये जाही। एखर संगेसंग आंगनबाड़ी केंद्र म घलो योग प्रेरक माइलोगिन मन ल योगा सिखाये जाही।
शतरंज ओलंपियाड
शतरंज ओलंपियाड टॉर्च रिले सोला जुलाई के रायपुर पहुंचइया हे। शतरंज ग्रेण्ड मास्टर प्रवीण थिप्से चेस ओलंपियाड टॉर्च लेके आही अउ पंडित दीनदयाल ऑडिटोरियम म आयोजित मुख्य समारोह म मुख्यमंत्री भूपेश बघेल ल दीही।
मुख्य समारोह के कार्यक्रम ले पहिली ए ओलंपियाड मशाल रायपुर शहर के भ्रमण करही अउ तेलीबांधा चौक, नगरघड़ी चौक म एखर स्वागत करे जाही। ए मशाल रिले के अगवाई खेल अउ युवा कल्याण विभाग छत्तीसगढ़ ओलंपिक एसोसिएशन अउ राज्य शतरंज संघ ह मिलके करही।
जानबा के अनुसार शतरंज ओलंपियाड के पंचानबे बछर के इतिहास म भारत ल पहिली घांव एखर मेजबानी मिले हे। जेमा एक सौ अठ्यासी देश ह शामिल होही। आजादी के अमृत महोत्सव के चलत पचहत्तर ठिन शहर म ए शतरंज ओलंपियाड रैली ल निकाले जात हे। भारत देश म होय वाले अब तक के सबले बड़े ए ह खेल आयोजन होही। एखर बर टॉर्च रिले के आयोजन उन्नीस जून ले शुरू हो चुके हे, जउन के अठाईस जुलाई तक चलही।
गुरू पूर्णिमा
आज गुरू पूर्णिमा हे। एला व्यास पूर्णिमा घलो कहे जाथे । ए बेरा म लोगन मन ह अपन ओ जम्मों गुरू मन ल सुरता करथे जेखर मार्गदर्शन अउ आर्शीवाद ले उंखर जीवन संवर गेहे।
राज्यपाल अनुसुइया उइके अउ मुख्यमंत्री भूपेश बघेल ह ए अवसर म प्रदेशवासी मन ल बधाई अउ शुभकामना दीन हे। अपन संदेश म राज्यपाल ह कीहिन कि गुरू ह कोनो भी मनखे के जिनगी म सबले जादा महत्वपूर्ण होथे। हमन ल जिनगी म गुरू के दिखाये के रद्दा ले सफलता मिलथे।
प्रधानमंत्री ग्राम सड़क योजना
प्रधानमंत्री ग्राम सड़क योजना के चलत कामबुता के गुणवत्ता परीक्षण बर राष्ट्रीय गुणवत्ता समीक्षक मन ह छत्तीसगढ़ आवत हे। ओमन ह बस्तर, कोण्डागांव, नारायणपुर, बीजापुर, राजनांदगांव अउ बेमेतरा जिला के दौरा करके योजना के चलत बनाये जात रद्दा के परीक्षण करही। संबंधित जिला के राष्ट्रीय गुणवत्ता समीक्षक मनले ओमन के मोबाइल नंबर म गोठबात करके बनत रद्दा के गुणवत्ता के संबंध म शिकायत करे जा सकत हे।