भूकंप
अंबिकापुर म आज बिहनिया आठ बजके दस मिनट म दू सेकेंड तक भूकंप के हल्का झटका महसूस करे गीस। रिएक्टर पैमाना म भूकंप के तीव्रता चार दशमलव तीन मापे गेहे। झटका महसूस होवत ही लोगन मन अपन घर ले बाहिर निकल गीस। भूकंप के सेती कोनों तरह के जनहानि नइ होय हे। अंबिकापुर के वरिष्ठ मौसम विज्ञानी ए.एम. भट्ट ह बतईन कि भूकंप के केन्द्र बैकुंठपुर ले पश्चिम उत्तर म सोलह किलोमीटर दूरिहा स्थित रिहीस।
अमरनाथ यात्रा
अमरनाथ यात्रा आज बिहनिया ले फिर सुरू कर दे गेहे। एला अमरनाथ गुफा के तीर बादल फटे के बाद स्थगित कर दे गे रिहीस। श्रद्धालु मन ल अभी पहलगाम के रद्दा ले ही यात्रा बर भेजे जात हे। बालतल रद्दा ले यात्रा अभी सुरू नइ होय हे। फेर, हेलीकॉप्टर सेवा बालतल अउ पहलगाम दूनों रद्दा म उपलब्ध हे।
प्रधानमंत्री-अशोक स्तंभ
प्रधानमंत्री नरेन्द्र मोदी ह आज बिहनिया नवा संसद भवन के छत म राष्ट्रीय प्रतीक चिन्ह अशोक स्तंभ के प्रतिकृति के अनावरण करीन। श्री मोदी ह नवा संसद भवन के निर्माण काम म लगे श्रमिक मन ले घलो गोठबात करीन। नौ हजार पांच सौ किलोग्राम कांस्य ले बने राष्ट्रीय प्रतीक चिन्ह के ऊंचाई साढ़े छह मीटर हे। एला संसद के नवा इमारत के सेंट्रल कक्ष के ऊंचाई म लगाय गेहे।
मछुआ नीति/पेसा कानून
मुख्यमंत्री भूपेश बघेल ह कहिन कि प्रदेस के मछुआ नीति ल कैबिनेट के अवइया बइठका म मंजूरी दे जाही। मछुआ नीति के प्रारूप तैयार कर ले गेहे। ए गोठ मुख्यमंत्री ह रईपुर म आयोजित छत्तीसगढ़ निषाद केंवट समाज के नव-निर्वाचित पदाधिकारी मनके सपथ ग्रहण समारोह म कहिन। ओमन कहिन कि छत्तीसगढ़ म मछली पालन ल कृषि के दर्जा दे गेहे। ए नीति के तहत मछली पालन करइया लोगन ल किसान जइसन बिना ब्याज के ऋण अउ बिजली सुल्क म छूट दे जावत हे।
इही बीच, अखिल भारतीय गोंड़वाना समिति के एक झिन प्रतिनिधिमंडल ह रईपुर म मुख्यमंत्री ले भेंट करके छत्तीसगढ़ जनजातीय सलाहकार परिषद म पेसा कानून प्रस्ताव के अनुमोदन बर आभार जतईन। ए मउका म श्री बघेल ह कहिन कि पेसा कानून लागू होय ले ग्रामसभा के अधिकार बाड़ही।
माओवादी-समर्पण
सुकमा जिला म एक झिन इनामी माओवादी दंपत्ति ह आत्मसमर्पण करे हे। ए माओवादी मन उपर पांच-पांच लाख रूपिया के इनाम घोसित रिहीस। जिला के पुलिस अधीक्षक सुनील शर्मा ह बतईन कि ए माओवादी दंपत्ति छत्तीसगढ़ अउ ओड़िसा सक्रिय रिहीन। आत्मसमर्पित ए माओवादी मन ल राज्य सरकार के पुनर्वास नीति के तहत लाभ दे जाही।
सुरक्षित गुरूवार
राज्य के स्कूल मन म कोरोना महामारी ले बचाव खातिर सुरक्षित गुरूवार कारीकरम चलाय जात हे। स्कूल सिक्षा मंत्री डॉक्टर प्रेमसाय सिंह टेकाम ह रईपुर ले ए कारीकरम के सुरूवात करीन। ए मउका डॉक्टर टेकाम ह कहिन कि ए कारीकरम के माध्यम ले लइका मन ल सिखाय जाही कि कोन तरह सुरक्षित व्यवहार के माध्यम ले अपन आप ल अउ परिवार ल सुरक्षित राखय।
खबर के मुताबिक सुरक्षित गरूवार सत्रह सप्ताह के एक ठिन कारीकरम हरय, जेमा लइका मन ल कोविड महामारी ले बचाव खातिर धाथ धुलाई, मास्क के सही उपयोग अउ टीकाकरण जइसन गतिविधि के जानकारी दे जाही।
आई.आर.सी.टी.सी.-हवाई यात्रा
पर्यटन ल बढ़ावा दे खातिर भारतीय रेलवे खानपान अउ पर्यटन निगम लिमिटेड-आई.आर.सी.टी.सी. लोगन ल देस-बिदेस के हवाई यात्रा घलो कराही। ए जानकारी आज रईपुर म होय एक ठिन प्रेसवार्ता म आई.आर.सी.टी.सी. के एरिया मैनेजर राजीव कुमार ह दीन। ओमन बतईन कि पर्यटक मन ल शिरडी के संग महाराष्ट्र के दू ज्योतिर्लिंग – कनार्टक के मैसूर अउ कुर्ग गोवा संग विदेश यात्रा म थाइलैंड के बैंकाक पटाया के सैर कराय जाही। श्री कुमार ह बतईन कि छत्तीसगढ़ के पर्यटन स्थल बर आने-आने डेली टूर पैकेज घलो लांच करे जाही।
अमृत महोत्सव प्रश्नोत्तरी
आजादी के अमृत महोत्सव उपर आकाशवाणी समाचार डहार ले राष्ट्रीय स्तर म राखे जात प्रश्नोत्तरी के तहत आज के प्रश्न हे-
– मद्रास प्रेसिडेंसी म वंदेमातरम आंदोलन चलइया स्वदेश मित्रन समाचार पत्र के स्थापना कोन करे रिहीन।
श्रोता मन अपन उत्तर वाट्सअप नंबर – आठ आठ दू छै पांच चार छै दू छै दू – या ई-मेल आई डी – अमृत महोत्सव क्विज एट द रेट प्रसार भारती डॅाट जीओवी डॅाट इन म भेज सकत हे।
भाग्यशाली प्रतिभागी ल विजेता के रूप म चुने जाही अउ काली के समाचार प्रभात म विजेता के नाव के घोषणा करे जाही। विजेता ल ई-प्रमाण पत्र अउ सांकेतिक पुरस्कार दे जाही।
कपिलदेव पांडेय-श्रद्धांजलि
शहीद लेफ्टिनेंट कर्नल कपिलदेव पांडेय ल भिलाई नगर अउ भिलाई के अलग-अलग जघा मन म श्रद्धांजलि अर्पित करे गीस। शहीद पांडे के अंतिम संस्कार सैन्य सम्मान के संग नई दिल्ली म करे गीस। अंतिम संस्कार कारीकरम म शहीद जवान के परिजन घलो सामिल होईन। एखर बाद उंखर परिजन जब माना एयरपोर्ट पहुंचीन त लोगन के भीड़ उमड़ पड़ीस। ए लोगन शहीद के परिजन के संग भिलाई तक गीस, जिहां नेहरू नगर म पुष्पांजलि कारीकरम के आयोजन करे गीस। ए दउरान जिला कलेक्टर पुष्पेन्द्र कुमार मीणा अउ पुलिस अधीक्षक डॉक्टर अभिषेक पल्लव संग कतकोन आने वरिष्ठ अधिकारी, जनप्रतिनिधि अउ गणमान्य लोगन ह शहीद लेफ्टिनेंट कर्नल ल श्रद्धांजलि अर्पित करीन।
खबर के मुताबिक भिलाई के रहइया लेफ्टिनेंट कर्नल कपिलदेव पांडेय मणिपुर म कुछेक दिन पहिली होय भू-स्खलन म सहीद होगे रिहीन। सेना के गोरख राइफल्स म तैनात लेफ्टिनेंट कर्नल कपिलदेव पाछु तीन बछर ले मणिपुर के नोनी जिला के तुपूल इलाका म पदस्थ रिहीन।
बिलासपुर-डायरिया
बिलासपुर जिला म मस्तूरी क्षेत्र के सरसेनी संग आने कुछेक गांव बीते पन्द्रह दिन ले ग्रामीण उल्टी-दस्त के चपेट म आवत हे। ए इलाका मन ले अब तक डायरिया के अट्ठारह मरीज मिले हे, जेखर इलाज अस्पताल म चलत हे। स्वास्थ्य विभाग डहार ले प्रभावित गांव मन म पानी के सैम्पल के जांच कराय गेहे, जेमा बैक्टीरिया पाय गेहे, जेखर बाद गांव के चार हैंडपंप ल बंद करा दे गेहे अउ जल स्त्रोत म क्लोरीन डाले जात हे। आसंका जताय जात हे कि बरसा के मौसम म गंदा पानी पीये के सेती ग्रामीण मनके तबीरय बिगड़े हे।
बारिश
पाछु दू दिन ले बस्तर संभाग संग राज्य के कुछेक आने जघा मन म होवत भारी बारिस के सेती नदी-नाला उफान म हे। एखर ले आमजीवन घलो प्रभावित होय हे।
सुकमा जिला म काली ले सरलग होवत बरसा के सेती नदी-नाला के जलस्तर बढ़ गेहे। मुकरम नाला म पानी भरे के सेती दोरनापाल-जगरगुंडा रद्दा म अवई-जवई बंद होगे हे। जिला प्रसासन के टीम ल मउका म रवाना करे गीस। संगेसंग लोगन ले डुबान क्षेत्र म स्थित रिहायशी इलाका ल खाली करे के अउ उफनत नदी-नाला ल पार नइ करे के अपील करे गेहे।
अउ अब थोरकुन समाचार सार म-
– आज विश्व जनसंख्या दिवस हरय। ए दिन हर बछर ग्यारह जुलाई के मनाय जाथे। एखर उद्देश्य दुनियाभर म आबादी ले जुड़े मुद्दा उपर लोगन के जागरूकता बढ़ाना हरय। विश्व जनसंख्या दिवस के सुरूवात उन्नीस सौ नवासी म संयुक्त राष्ट्र विकास कारीकरम के संचालन परिषद ह करे रिहीस।
– राष्ट्रीय परीक्षा एजेंसी ह जेईई मेन्स के परिणाम घोसित कर देहे। बछर दू हजार बाईस के पहिली सत्र के परीक्षा परिणाम आधिकारिक वेबसाइट म उपलोड कर दे गेहे।
– प्रदेस के हाईस्कूल अउ हायर सेकेंडरी स्कूल मन म हरेक बछर जमा क्रीडा शुल्क के रासि के बीस प्रतिशत रासि अब संभागीय संयुक्त संचालक सिक्षा कार्यालय म जमा होही। पहिली ए रासि खेल जोन मुख्यालय म जमा करे के निरदेस दे गे रिहीस, जेमा आंसिक संसोधन करे गेहे।
अउ
– छत्तीसगढ़ लोक सेवा आयोग डहार ले चिकित्सा सिक्षा विभाग के तहत जनरल ड्यूटी मेडिकल ऑफिसर के बारह पद म भर्ती बर उम्मीदवार मनके दस्तावेज सत्यापन पन्द्रह जुलाई के करे जाही।