खरीफ फसल के सुरक्षा बर ए बछर घलो प्रदेसभर म रोका-छेका अभियान आज ले सुरू होगे हे। ए दउरान फसल ल चरे ले बचाय बर मवेसी मन ल रोजीना गौठान म लाय बर हाका पराय गीस। एखर संगे गौठान म पशु चिकित्सा शिविर लगा के मवेसी मनके स्वास्थ्य के जांच पशु नस्ल सुधार बर बधियाकरण, कृत्रिम गर्भाधान अउ टीका लगाय गीस।
ए मउका म मुख्यमंत्री भूपेश बघेल ह किहीन कि रोका-छेका ह जुन्ना परंपरा हरय। राज्य म पाछु कई बछर ले ए अभियान चलाय जात हे, जेखर नतीजा बर-बढ़िया मिले हे, जेला ध्यान म राखत ए बछर घलो बीस जुलाई तक ले ए अभियान चलाय जाही। मुख्यमंत्री ह एखर सफलता बर सब्बो किसान अउ पशुपालक मन ले सहयोग के अपील करे हे।
केन्द्र-सहकारिता
केन्द्र सरकार ह देस के सबो प्राथमिक कृषि ऋण सहकारी समिति यानि पैक्स ल कम्प्यूटरीकृत करे के योजना बनाय हे। ए काम बर हर समिति ल चार लाख रूपिया दे जाही।
केन्द्रीय सहकारिता मंत्री अमित शाह सौवां अंतर्राष्ट्रीय सहकारी सम्मेलन म बोलत किहीन कि सहकारिता मंत्रालय डहार ले प्राथमिक कृषि ऋण सहकारी समिति मन ल उंखर रोजीना के काम के संगे पेट्रोलियम उत्पाद के डीलरशिप लेवई, अस्पताल अउ स्कूल-कालेज बनई असन गतिविधि खातिर मसौदा तैयार करे गेहे। एखर मसौदा तैयार करके राज्य सरकार ल पठोय गेहे, जेखर बर उंखर सुझाव अवइया उन्नीस जुलाई तक मांगे गेहे।
भारतीय जनता पार्टी सहकारिता प्रकोष्ठ के प्रदेस संयोजक शशिकांत द्विवेदी ह बतईन कि केन्द्र सरकार के ए निर्णय ले प्रदेस के सबो सहकारी समिति के किसान मन ल फायदा मिलही।
शतरंज ओलंपियाड
सतरंज ओलंपियाड टॉर्च रिले अवइया सोलह जुलाई के रईपुर पहुंचही। ए जानकारी काली सतरंज ओलंपियाड टॉर्च रिले के तियारी बारे म बनाय गे समिति के बइठका म दे गीस। बइठका म कारीकरम के आयोजन बर अधिकारी मन ल जिम्मेदारी सौंपे गीस। सतरंज ओलंपियाड के पंचानवां साल के इतिहास म भारत ल पहिली बेर ओलंपियाड के मेजबारी मिले हे, जेमा एक सौ अट्ठायासी ठिन देस सामिल होही। आजादी के अमृत महोत्सव म पचहत्तर ठिन सहर म ए सतरंज ओलंपियाड रैली निकाले जावत हे। ए ह भारत म होवइया अब तक ले सबले बड़का खेल आयोजन होही।
इहां ए बतादन कि चवालीसवां शतरंज ओलंपियाड टॉर्च रिले के आयोजन उन्नीस जून ले सुरू होय हे, जउन ह अट्ठाईस जुलाई तक चलही। छत्तीसगढ़ म सतरंज ओलंपियाड टॉर्च रिले अवइया सोलह जुलाई के आगमन बिहनिया स्वामी विवेकानंद एयरपोर्ट म होही। ए ओलंपियाड मसाल ह रईपुर सहर के भ्रमण करत पंडित दीनदयाल उपाध्याय ऑडिटोरियम पहुंचही।
बोरवेल-राहुल
जांजगीर-चांपा जिला के गांव पिहरीद के बोरवेल म गिरे सफलतापूर्वक बाहिर निकाले म राहुल के परिवार वाले अउ जांजगीर-चांपा के ग्रामीण मन काली मुख्यमंत्री भूपेश बघेल ले भेंट करत उंखर आभार प्रकट करीन। ए मउका म मुख्यमंत्री ह किहीन कि राहुल के स्पीच थैरेपी अउ ओखर सिक्षा के पूरा जिम्मेदारी राज्य सरकार के हे। ओमन राहुल के परिवार के आर्थिक परिस्थित ल ध्यान राखत पांच लाख रूपिया के आर्थिक मदद देके घोसना घलो करीन। मुख्यमंत्री ह राहुल के परिवार ल रोजगार देके घलो निरदेस दीन।
कोरोना समाचार
प्रदेस म कोरोना संक्रमण के मामला सरलग बाढ़त हे। काली प्रदेस म कोरोना संक्रमण के दू सौ अंठावन ठिन नवा मामला आगू आय हे। दुरूग जिला म सबले जादा पैंतालीस अउ रईपुर म चालीस मरीज मिले हे। एखर संगे राज्य म कोरोना के सक्रिय मरीज के संख्या बाढ़के एक हजार चार सौ पचपन होगे हे। ए बेरा राज्य के पॉजीटिविटी रेट दू दशमलव पांच-तीन प्रतिसत (2.53 प्रतिसत) हे।
बारिश
बस्तर संभाग म पाछु कई दिन ले होवत बरसा ले सामान्य जनजीवन अस्त-व्यस्त होगे हे। कई ठिन जिला म नरवा-नंदियां उफनावत हे। उहें, जिला मुख्यालय ले कई ठिन गांव के सड़क संपर्क टूट गे हवय।
हमर संवाददाता ले मिले जानकारी मुताबिक बीजापुर जिला म रजरजहा पानी गिरे के सेती नान्हें अउ बड़का सबो नरवा-नंदियां पूरा चलत हे। भोपालपट्टनम के गांव मेटूपल्ली-पमगाल तीर नाला पीडीएस के चाउर ले भरे एक ठिन टरक ह बोहा गे। एखर सूचना मिलते एसडीएम, तहसीलदार अउ खाद्य विभाग के अधिकारी मन घटना जघा म पहुंच के हालत के जायजा लीन। एखर दू दिन आगू सीआरपीएफ के एक ठिन जवान के नरवा म बोहाय ले मउत घलो होगे रिहीस।
ओति, राज्य के सीमा ले लगे महाराष्ट्र के गढ़चिरौली म घलो पानी पाय के बाढ़ आ गेहे।
बस्तर-मलेरिया नियंत्रण
स्वास्थ्य विभाग ह बस्तर क्षेत्र म मलेरिया अउ डेंगू के बाढ़त मामला ल देखत बस्तर संभाग के सबो जिला मन म ए बीमारी मनके रोकथाम बर कड़ा कदम उठाय के निरदेस देहे। महामारी नियंत्रण संचालक डॉक्टर सुभाष मिश्रा ह बतईन कि स्वास्थ्य विभाग ह गंवई जघा म साफ-सफई के निरीक्षण अउ गंवई के मनखे मन ल ए बीमारी ले बांचे खातिर जानकारी देके निरदेस दीन हे। संगे जिला म स्थानीय प्रसासन के जरिया ले जन-जागरूकता अभियान म मेडिकेटेड मच्छरदानी लगई, घर के तीर-तखार म पानी झन सकलाय संगे घर म मच्छर प्रतिरोधी स्प्रे अउ आने बचाव के जरूरी उपाय बारे म घलो जानकारी दे बर किहीन हे।
जशपुर-हत्या
जशपुर जिला म अज्ञात मनखे मन एक झिन दंपत्ति के गोली मारके हत्या कर दीस। मिले जानकारी मुताबिक जिला के कांसाबेल दोकड़ा चौकी जघा के गंवई नवाटोली म बीते रतिहा तीन झन अज्ञात मनखे मन एक ठिन घर भीतरी अमा के संदीप पन्ना नाव के मनखे अउ ओखर गोसईन ल गोली मार दीस, जेखर ले मउकाच म ए दंपत्ति के मउत होगे। घटना के जानकारी मिलतेच पुलिस के टीम ह मउका म पहुंच के जांच करत हे।
इही बीच, नेता प्रतिपक्ष धरमलाल कौशिक ह प्रदेस म बाढ़त अपराध उपर संसो करत जशपुर जिला के ए घटना उपर दुख व्यक्त करत किहीन कि अइसन घटना मन उपर अंकुश लगाय बर ठोसहा कदम उठाना चाही। ओमन गृह मंत्री ताम्रध्वज साहू ले मांग करीन हे कि तुरते समीक्षा बइठक लेके ओमन ठोस निर्णय लेवय।
ईद-उल-अजहा
ईद-उल-अजहा के तिहार आज छत्तीसगढ़ समेत देसभर म श्रद्धा भक्ति संग मनाय जात हे। त्याग अउ बलिदान के ए तिहार म मुस्लिम समुदाय के मनखे आज ईदगाह अउ मस्जिद मन म नमाज अदा करत हे। राजधानी रईपुर समेत प्रदेस के आने जिला मन म घलो मुस्लिम समाज के मनखे मन ईद के नमाज अदा करीन।
राष्ट्रपति रामनाथ कोविंद, उपराष्ट्रपति एम. वेंकैया नायडू अउ प्रधानमंत्री नरेन्द्र मोदी ह देसवासी मन ल ईद-उल-अजहा के सुभकामना देहे।
उहें, छत्तीसगढ़ के राज्यपाल अनुसुईया उइके मुख्यमंत्री भूपेश बघेल अउ राज्य हज कमेटी के चेयरमैन मोहम्मद असलम खान ह घलो ईद-उल-अजहा म मुस्लिम समुदाय के लोगन मन ल मुबारकबाद दीन हे।
अउ अब थोरकुन समाचार सार म-
– राजनांदगांव जिला के बागनदी ले लगे दीवानटोला नाला पुलिया तीर सुरक्षा बल के टीम ह आईईडी बरामद करीस, जेला मउकाच म निष्क्रिय कर दे गीस।
– अंबिकापुर के बाल संप्रेषण गृह ले दू दिन आगू भगाय तीन झिन अपचारी लइका मन ल पुलिस ह गिरफ्तार कर लेहे।
– दुरूग तीर शिवनाथ नदी के महमरा एनीकट म नहाय बर गे चौदह बछर के एक झिन लइका के बुड़े ले मउत होगे।
अउ
– जशपुर जिला के तपकरा पुलिस ह उनचालीस किलो गांजा संग दू झिन आरोपी ल गिरफ्तार करे हे। उहें, राजनांदगांव जिला के खैरागढ़ थाना क्षेत्र म पुलिस ह फटफटी सवार दू झिन मनखे ल बत्तीस किलो गांजा संग गिरफ्तार करे हे।