मुख्यमंत्री-बैठक
मुख्यमंत्री भूपेश बघेल ह प्रदेस के जनजाति क्षेत्र म जर्जर छात्रावास, आश्रम अउ स्कूल के भवन के मरम्मत के काम प्राथमिकता ले कराय के निरदेस दीन हे। श्री बघेल ह आज रईपुर म आयोजित छत्तीसगढ़ जनजाति सलाहकार परिषद के बइठका म किहीन कि कोरोना संक्रमण के कारण दू साल बाद स्कूल, छात्रावास अउ आश्रम खुले हे। जिहां-जिहां मरम्मत के जरूरत हे, उहां तत्परता ले काम करे जाय। मुख्यमंत्री ह स्वामी आत्मानंद अंग्रेजी माध्यम स्कूल म पढ़इया लइका मन बर छात्रावास बनाय अउ दर्ज संख्या के आधार म सिक्षक मनके युक्ति-युक्तकरण करे के निरदेस घलो दीन।
बइठका म ओमन ह जनजाति क्षेत्र म टी.आर.आई. के सिविर म जाति प्रमाण पत्र जारी करे म आवत समस्या के अध्ययन कर एखर संबंध म प्रस्ताव केन्द्र सरकार ल भेजे बर किहीन।
परिवहन सुविधा
प्रदेस म परिवहन विभाग कोति ले दे जावत सुविधा ‘‘तुंहर सरकार-तुंहर द्वार‘‘ के तहत अब जम्मों सेवा मन ल फेसलेस कर दे गेहे। एखर ले अब लोगन ह घर बइठे बिना भौतिक सत्यापन के आरटीओ कार्यालय से संबंधित सेवा ले सकथे। बैंक अउ करजा देवइया संस्था मन ल आधार कार्ड ले जुड़े मोबाइल नंबर म आय ओटीपी के माध्यम ले सबो दस्तावेज अउ एनओसी ल डिजिटल रूप ले जमा करना होही, जेखर ले भौतिक दस्तखत के जरूरत नइ पड़ही।
गौठान-जल संसाधन
कृषि अउ पशुधन विकास मंत्री रविन्द्र चौबे ह विभागीय अधिकारी मन ल प्रदेस के सब्बो गौठान म गाय-गरू के हरा चारा के व्यवस्था करे बर चारागाह विकास के काम जरूरी रूप ले कराय के निरदेस दीन हे। श्री चौबे ह मंत्रालय म राखे गे बइठका म सुराजी गांव योजना समीक्षा के दउरान किहीन कि चालू खरीफ सीजन म गौठान म चारागाह विकास बर नेपियन घास समेत हरा चारा के बोआई करे जाय।
उहें, श्री चौबे ह नवा रायपुर के शिवनाथ भवन म आयोजित बइठका म जल संसाधन विभाग के कामकाज के समीक्षा के दउरान किहीन कि राज्य म सिंचाई अउ पीये के पानी के व्यवस्था करना जल संसाधन विभाग के जिम्मेदारी हे।
अमरनाथ गुफा-बचाव कार्य
केन्द्रसासित प्रदेस जम्मू-कश्मीर म श्री अमरनाथजी पवित्र गुफा के तीर म बादल फटे के बाद तलाशी अउ बचाव अभियान म जम्मू कश्मीर पुलिस, एनडीआरएफ, आईटीबीपी अउ अन्य सैन्य बल जुटे हवय। काली संझा बादल फटे ले मारे गे मनखे मनके संख्या बाढ़के पन्द्रह होगे हे।
ऐति, छत्तीसगढ़ सासन कोति ले घलो अमरनाथ हादसा म फंसे राज्य के तीर्थयात्री मनके मदद बर हेल्पलाइन नंबर जारी करे गेहे। एमा नई दिल्ली के छत्तीसगढ़ सदन के रेसीडेंट कमिश्नर गणेश मिश्रा के मोबाइल नंबर – 9 9 9 7 0 6 0 9 9 9 अउ छत्तीसगढ़ सदन के हेल्पलाइन नंबर – 0 1 1 4 6 1 5 6 0 0 0 हवय। आपदा म फंसे तीर्थयात्री या उंखर परिजन मन ह ए नंबर मन म संपर्क करके सूचना दे सकथे।
शहद संग्रहण -प्रशिक्षण
प्रदेस के वन क्षेत्र म सहद उत्पादन के बढ़िया संभावना ल देखत हुए पंरपरागत रूप ले सहद इकट्ठा करइया संग्राहक मन ल आधुनिक वैज्ञानिक तरीका ले सहद संग्रहण के प्रसिक्षण देके काम सुरू कर दे गेहे। पहिली चरण म प्रदेस के ग्यारह जिला यूनियन ल चुने गेहे। एमा नारायणपुर, पूर्व भानुप्रतापपुर, पश्चिम भानुप्रतापपुर, धमतरी, गरियाबंद, कवर्धा, जगदलपुर, बिलासपुर, धरमजयगढ़, कटघोरा अउ मरवाही सामिल हे। एमा ले अभी पांच जिला यूनियन के तीन सौ तेईस सहद संग्राहक मन ल प्रसिक्षण दे जावत हे। एखर तहत अवइया समय म पूरा प्रदेस के एक हजार सहद संग्राहक मन ल वैज्ञानिक तरीका ले संग्रहण के प्रसिक्षण दे जाही।
कवर्धा-बैगा जनजाति
कबीरधाम जिला म साला संगवारी के रूप म चयनित बैगा जनजाति के एक सौ ग्यारह युवा मन ल कलेक्टर कार्यालय के कारीकरम म प्रमाण पत्र बांटे गीस। ए मउका म वन मंत्री मोहम्मद अकबर ह किहीन कि राज्य सरकार कोति ले विशेष पिछड़ी जनजाति मनके पढ़े-लिखे युवा मन ल चतुर्थ अउ तृतीय श्रेणी के पद म सरकारी नौकरी म सीधा भर्ती के निर्णय ले गेहे।
बातों-बातों-में
प्रादेशिक समाचार एकांश डहार ले समसामयिक विषय उपर आधारित साप्ताहिक कार्यक्रम ‘‘बातों-बातों-में‘‘ म ए बखत कृषि के क्षेत्र म नवाचार करइया जांजगीर-चांपा जिला के किसान रामाधार देवांगन अउ दीनदयाल यादव ले करे गे गोठबात के प्रसारण होही। एखर प्रसारण आकाशवाणी के रायपुर केन्द्र डहार ले काली बिहनिया नौ बजके तीस मिनट म करे जाही। एला छत्तीसगढ़ के जम्मों आकाशवाणी केन्द्र रिले करही।
जिले की चिट्ठी
आकाशवाणी समाचार डहार ले काली संझा छह बजके तीस मिनट म ‘‘जिले की चिट्ठी‘‘ कार्यक्रम के प्रसारण करे जाही। ए कार्यक्रम आकाशवाणी के रायपुर केंद्र डहार ले प्रसारित होही। जेला जम्मों केंद्र मन ह एके संग रिले करही। ए बखत के अंक म ‘‘रायपुर‘‘ जिला के गतिविधि मनके बारे म जानकारी दे जाही।
भाजपा-राज्यपाल ज्ञापन
जांजगीर-चांपा जिला म होय दुष्कर्म के घटना के विरोध म भारतीय जनता पार्टी डहार ले चौदह जुलाई के राजभवन म राज्यपाल ल ज्ञापन सौंपे जाही। एखर पहिली, भाजपा के पदाधिकारी अउ कार्यकर्ता मन ह एकात्म परिसर ले राजभवन तक पैदल मार्च करही। भाजपा महिला मोर्चा के राष्ट्रीय महासचिव दीप्ति रावत भारद्वाज ह प्रदेस के कांग्रेस सरकार के उपर आरोप लगाय हे कि इंखर सरकार म माईलोगिन मन ह सुरक्षित नइ हे।
कौशिक-बयान
नेता प्रतिपक्ष धरमलाल कौशिक ह कोरबा के कुसमुंडा एसईसीएल कॉलोनी म एक झिन माईलोगिन अउ उंखर बेटी के हत्या म दुख जतात हुए किहीन हे कि पूरा प्रदेस म कानून व्यवस्था ह चरमरा गेहे। ओमन किहीन कि छत्तीसगढ़ म लूट, हत्या, बलात्कार, अपहरण, मानव तस्करी के घटना आय दिन होवत हे अउ राज्य सरकार ह एला रोके म असफल हे। श्री कौशिक ह मुख्यमंत्री अउ गृह मंत्री ले प्रदेस म कानून व्यवस्था के समीक्षा करके जनता के सुरक्षा बर ठोस कदम उठाय के मांग करे हे।
बाहुड़ा यात्रा
ओड़िशा म विश्व प्रसिद्ध बाहुड़ा या वापसी रथ यात्रा ह आज पवित्र सहर पुरी म आयोजित करे जावत हे। गुंडीचा मंदिर म थोरकिन दिन बिताय के बाद भगवान जगन्नाथ, उंखर बड़का भाई बलभद्र अउ बहिनी सुभद्रा के विग्रह ह पुरी के जगन्नाथ मंदिर म वापस लउटथे। भगवान जगन्नाथ, बलभद्र अउ सुभद्रा के तीनों रथ तैयार हे अउ भारी संख्या म श्रद्धालु मन तीनांं रथ म अपन इष्ट देवता मन ल वापस लाय के अगोरा म हे।
ऐति, छत्तीसगढ़ म घलो राजधानी रायपुर सहित आने-आने जगह म बहुड़ा यात्रा चलत हे।
अउ अब पेस हे मौसम के हाल..
मौसम विभाग ह अवइया चौबीस घंटा के दउरान प्रदेस के आने-आने जघा म गरज-चमक के संग भारी बरसा अउ गाज गिरे के चेतावनी दे हे। बीजापुर, बस्तर, दंतेवाड़ा, सुकमा अउ नारायणपुर जिला के एक-दू जघा म गरज-चमक के संग जोरदरहा बरसा हो सकत हे।
इही बीच, राजधानी रईपुर समेत आने-आने जघा म आज बिहनिया ले रूक-रूक के बारिस होवत हे।