अग्निपथ योजना-भर्ती रैली
भारतीय सेना अग्निपथ योजना के अंतर्गत सैनिक मनके भर्ती रैली अगला महीना ले सुरू होही। सेना डहार ले जारी जोन-वार कारीकरम अनुसार भर्ती रैली मन बारह अगस्त ले सुरू होही अउ दिसंबर तक चलही। एमा देश के जम्मों जिला मन ल सामिल करे जाही। सैन्य पुलिस कोर म केवल महिला अग्निवीर मनके भर्ती करे जाही। सैन्य पुलिस कोर म चरणबद्ध रूप ले एक हजार सात सौ महिला मनके नियुक्ति करे जाय के योजना हे।
केन्द्र सरकार ह पाछु महीना अग्निपथ योजना के घोसना करत केहे रिहीन कि ए साल छियालीस हजार सैनिक मनके भर्ती करे जाही। एमा चालीस हजार रिक्त सेना बर अउ तीन-तीन हजार भारतीय वायुसेना अउ नौसेना बर होही। अवइया कुछ साल मन म अग्निवीर मनके रिक्ती संख्या बढ़ा दे जाही।
कोविड प्रिकॉशन डोज
कोविड-नाइंटीन ले बचाव खातिर टीका के दूसरा डोज अउ प्रिकॉशन डोज के बीच के समय घटाके अब छह महीना कर दे गेहे। अब तक एला नौ महीना के अंतराल म लगाय जात रिहीस। केन्द्रीय स्वास्थ्य मंत्रालय डहार ले जारी नवा निरदेस के आधार म राज्य सासन के स्वास्थ्य विभाग ह जम्मों जिला के मुख्य चिकित्सा अउ स्वास्थ्य अधिकारी अउ जिला टीकाकरण अधिकारी मन ल ए संबंध म परिपत्र जारी कर दे हे। स्वास्थ्य विभाग ह कोविड टीकाकरण म लगे अधिकारी-करमचारी मन ल सूचित करे बर अउ लोगन मनके बीच एखर व्यापक प्रचार-प्रसार के निरदेस दीन हे।
राज्य टीकाकरण अधिकारी डॉक्टर वी.आर. भगत ह किहीन कि अट्ठारह ले उनसठ साल के आयु वर्ग के जम्मों लाभार्थी मन ल कोविड वैक्सीन के दूसरा डोज के छह माह या छब्बीस हफ्ता पूरा होय म निजी कोविड वैक्सीन सेंटर म प्रिकॉशन डोज लगाय जाही। स्वास्थ्य कर्मी, फ्रंटलाइन वर्कर्स अउ साठ बछर ले जादा आयु वर्ग के नागरिक मन ल टीका के दूसरा खुराक के छह माह या छब्बीस हफ्ता पूरा होय म सासकीय कोविड वैक्सीन सेंटर म निःशुल्क प्रिकॉशन डोज लगाय जाही। एखर बर कोविन म जरूरी बदलाव कर दे गेहे।
ट्रेन-परिचालन
दक्षिण पूर्व मध्य रेलवे बिलासपुर मंडल के बुढ़ार-शहडोल सेक्शन के सिंहपुर रेलवे स्टेशन म तीसरा रेललाइन के विद्युतीकरण काम करे जाही। एखर सेती इक्कीस ले तेईस जुलाई तक ए मार्ग म चलने वाला कुछ यात्री गाड़ी मनके परिचालन रद्द कर दे गेहे। एमा बिलासपुर-चिरमिरी-बिलासपुर एक्सप्रेस, उदयपुर-शालीमार-उदयपुर एक्सप्रेस, वलसाड-पुरी-वलसाड एक्सप्रेस, दुर्ग-निजामुद्दीन-दुर्ग एक्सप्रेस, दुर्ग-नौतनवा-दुर्ग एक्सप्रेस, अउ बरौनी-गोंदिया-बरौनी एक्सप्रेस सामिल हे।
उहें, काजीपेट-बल्लारशाह सेक्शन म तीसरा लाइन कनेक्टिविटी के सेती नौ जुलाई के कोरबा-कोचुवेली अउ बारह जुलाई के यशवंतपुर-कोरबा एक्सप्रेस बदले रस्ता ले चलही।
अइसने, रईपुर रेलमंडल म दुर्ग लिंक केबिन-दुर्ग के बीच स्थित रईपुर नाका रेलवे समपार फाटक के मरम्मत के काम काली नौ जुलाई के बिहनिया आठ बजे ले दस जुलाई के संझा छह बजे तक करे जाही। एखर सेती ए रेलवे फाटक ले सड़क यातायात बंद रइही।
इही बीच, शालीमार-कुर्ला-शालीमार एक्सप्रेस के परिचालन फेर सुरू करे जात हे। ए ट्रेन के परिचालन शालीमार ले बारह जुलाई ले अउ कुर्ला ले पन्द्रह जुलाई ले सुरू होही।
भाषायी सर्वे-प्रारंभिक शिक्षा
प्रदेस म भाषायी सर्वे के आधार म प्रारंभिक सिक्षा के योजना बनाय जाही। ए संबंध म रईपुर म समग्र सिक्षा अउ यूनिसेफ के सहयोग ले कार्यसाला राखे गीस। कार्यसाला म समग्र सिक्षा के प्रबंध निदेशक नरेन्द्र दुग्गा ह लइका मनके घर के भासा ल ओमन के औपचारिक सिक्षा म सामिल करे उपर जोर दीन। ओमन किहीन कि सिक्षा ल बेहतर बनाय के सबले अच्छा तरीका लइका मनके पहिली भासा ओमन के घर के भासा ल कई साल तक सिक्षा के माध्यम के रूप म उपयोग करे जाय। संघरा दूसर भासा जइसे राज्य के भासा अउ अंग्रेजी भासा के परिचय दे जाय।
मन की बात
प्रधानमंत्री नरेन्द्र मोदी ह ए महीना के इकतीस तारीख के आकाशवाणी ले मन की बात कारीकरम म अपन विचार साझा करही। प्रधानमंत्री ह लोगन मन ले ओ बिसय मनके बारे म सुझाव देय बर किहीन, जेखर उपर कारीकरम म ए कड़ी म चर्चा होना चाही। लोगन मन नमो ऐप या माई जीओवी ओपन फोरम म अपन विचार साझा कर सकत हे। टोल फ्री नंबर – एक आठ शून्य शून्य एक एक सात आठ शून्य शून्य डायल करके प्रधानमंत्री बर हिन्दी या अंग्रेजी म अपन संदेस रिकॉर्ड करा सकत हे। फोन लाइन मन ए महीना अट्ठाईस तारीख तक खुला रइही। एक नौ दो दो नंबर म मिस कॉल देके एस.एम.एस. ले मिले लिंक ले घलो प्रधानमंत्री बर सुझाव सीधा भेज सकत हे।
माओवादी-मुठभेड़
छत्तीसगढ़ ओड़िसा सीमा म गरियाबंद जिला के कुल्हाड़ीघाट-मेंडाल के डाढ़ीपानी के पहाड़ी म सुरक्षा बल अउ माओवादी मनके बीच मुठभेड़ होय के खबर हे। गरियाबंद जिला के पुलिस अधिकारी मन ए घटना के पुष्टि करत बतईन कि मुठभेड़ ल देखत छत्तीसगढ़ के सीमा म घलो जवान मन ल अलर्ट कर दे गेहे।
जवान-लापता
सुकमा जिला के जगरगुंडा इलाका म गश्त ले लहुटत कोबरा दू सौ दस बटालियन के एक जवान नाला पार करत बेरा बोहा गे, जेखर तलाश करे जात हे।
मिले जानकारी के अनुसार काली रतिहा कोबरा बटालियन के जवान मुकुर कैम्प ले सर्चिंग म निकले रिहीस, जिहां ले लहुटत बेरा आज बिहनिया नाला पार करे के समय सूरज आर. नाम के ए जवान नाला के तेज बहाव म बोहा गीन। ग्रामीण मनके सहयोग ले जवान मन ओमन ल ढूंढत हे।
दुर्घटना
रायगढ़-बिलासपुर राष्ट्रीय राजमार्ग क्रमांक-उनचास म होय एक सड़क दुर्घटना म दू मनखे मनके मउत होगे। उहें, पांच झिन दूसर लोगन मन घायल होगीन, जेमा ले तीन के हालत गंभीर बताय जात हे।
हमर संवाददाता ह बतईन कि कोरबा जिला के बालको थाना क्षेत्र के बेलाकछार गांव ले कुछ लोगन मन कार म बइठ के बिहाव कारीकरम सामिल होय बर रायगढ़ जिला के गांव उलदा जात रिहीन। इही दउरान ओमन के कार रायगढ़-बिलासपुर रद्दा उपर बरगढ़ स्थित बोराई नाला पुल के रेलिंग ले टकरा गीस। ए हादसा म एक मनखे के मउकाच म मउत होगे। जबकि एक झिन दूसर मनखे ह अस्पताल म इलाज के दउरान दम तोड़ीस। हादसा म घायल पांच झिन दूसर लोगन मन ल सक्ती के स्वास्थ्य केन्द्र म भर्ती कराय गेहे।
ऐति, कोरबा जिला के हरदी बाजार इलाका म एक तेज रफ्तार ट्रेलर ह घर के बाहिर चबूतरा उपर बइठे तीन मनखे मन ल अपन चपेट म ले लीस। ए दुर्घटना म एमन गंभीर रूप ले घायल होगे अउ ओमन ल अस्पताल म भर्ती कराय गेहे।
हरेली पर्व-गेड़ी प्रतियोगिता
मुख्यमंत्री भूपेश बघेल ह राज्य के जम्मों स्कूल मन म अवइया अट्ठाईस जुलाई के हरेली परब के मउका म विद्यार्थी मनके बीच गेड़ी नृत्य अउ गेड़ी प्रतियोगिता के आयोजन करे के निरदेस दीन हे। एखर उद्देश्य छत्तीसगढ़ के कला अउ संस्कृति ल प्रोत्साहित करना अउ आगू बढ़ाना हे। काली राज्य मंत्रिमंडल के बइठका म मुख्यमंत्री ह हरेली परब ल राज्य म परंपरागत रूप ले मनाय बर विस्तार ले चरचा करीन।
अउ अब थोरकुन समाचार सार म-
– जिला अउ सत्र न्यायालय रायपुर डहार ले सहायक ग्रेड-तीन के रिक्त पद उपर भर्ती बर नौ अउ दस जुलाई के बिहनिया नौ बजे ले रईपुर स्थित परीक्षा केन्द्र म कौशल परीक्षा आयोजित करे जाही।
– राजनांदगांव पुलिस अधीक्षक संतोष सिंह ह प्रेस क्लब म लाइब्रेरी के उद्घाटन करीन। ए दउरान ओमन एक सौ पांच पुस्तक भेंट करीन।
– बिलासपुर रेलवे सुरक्षा बल ह गोंदिया-बरौनी ट्रेन ले रईपुर ले बिहार भागत छै झिन लइका मन ल रेस्क्यू करके पेंड्रा स्टेशन म उतार के चाइल्ड लाइन बिलासपुर ल सौंप देहे।
अउ
– बलौदाबाजार म कृषि विभाग ह रासायनिक खाद के दुकान मन म अनियमितता मिले के सेती छै ठिन दुकान मन ल सील कर देहे। उहें, सात दुकानदार मन ल नोटिस जारी करे गेहे।