कैबिनेट बइठका-01
राज्य सरकार ह किसान मनके आमदनी अउ राज्य म दलहन फसल के पैदावार बढ़ाय के दिसा म बड़े फइसला लेहे। एमा प्रदेस म समर्थन मूल्य म खरीफ विपणन बछर दू हजार बाईस-तेईस म अरहर, उड़द अउ मूंग के फसल ल खरीदे जाही। एखर बर दिसा-निरदेस जारी कर दे गेहे। ए फइसला मुख्यमंत्री भूपेश बघेल के अगुवई म होय राज्य मंत्रिमंडल के बइठका म ले गीस।
बइठका म इलेक्ट्रिक गाड़ी मन ल बढ़ावा दे बर छत्तीसगढ़ राज्य इलेक्ट्रिक वाहन दू हजार बाईस के अनुमोदन करे गीस। एमा राज्य म दुपहिया, तिपहिया, चारपहिया, मालवाहक, यात्री वाहन अउ दूसर श्रेणी के इलेक्ट्रिक गाड़ी के खरीदी म बिसेस छूट दे जाही। एखरे संग इलेक्ट्रिक वाहन के आसार चार्जिंग के सुविधा बर चार्जिंग स्टेशन के नेटवर्क बनाय जाही। बइठका म निवास प्रमाण पत्र के बनाय के प्रक्रिया बारे म फइसला करे गीस, जेखर ले राज्य के बाहिर के लोगन एखर फायदा झन उठा सकय। उहें, छत्तीसगढ़ निजी विश्वविद्यालय विधेयक दू हजार बाईस के प्रारूप के अनुमोदन घलो करे गीस।
उहें, बइठका म बिजली बिल हाफ योजना ल बढ़ावत एमा नरवा, गरूवा, घुरवा, बाड़ी योजना म बनाय जावत गौठान अउ ग्रामीण औद्योगिक पार्क ल घलो सामिल करे के फइसला ले गे हवय। घरेलू उपभोक्ता मन ल चार सौ यूनिट तक विद्युत के खपत म बिजली बिल आधा करे जाय के योजना ल बढ़ावत राज्य विद्युत वितरण कंपनी डहार ले दे गे बिजली कनेक्शन बर बिजली बिल म पचास प्रतिसत के छूट दे जाय के फइसला ले गे हवय।
कैबिनेट बैठक-02
उहें, शहरी क्षेत्र म रहइया लोगन ल सासकीय भूमि के आवंटन अतिक्रमित भूमि के व्यवस्थापन के संग गैर रियायती अउ रियायती स्थायी पट्टा ल भूमि स्वामी अधिकार म बदलत खानी दे जाने वाला रासि के आधार म स्टाम्प शुल्क, पंजीयन शुल्क अउ नगरीय निकाय शुल्क म छूट के अवधि ल इकतीस मार्च दू हजार बाईस ले बढ़ा के इकतीस मार्च दू हजार तेईस करे गेहे। संगेसंग राज्य म मेगा अउ अल्ट्रा मेगा प्रोजेक्ट ल बढ़ावा दे बर औद्योगिक नीति दू हजार उन्नीस-चौबीस म इस्पात उद्योग म निवेस बर बिसेस प्रोत्साहन पैकेज बनाय के फइसला ले गे हवय।
बइठका म यहू फइसला ले गीस कि ए बछर राईस मिल ल दे जाने वाला प्रोत्साहन रासि के पचास प्रतिसत भुगतान कस्टम मिलिंग शुल्क के संग करे जाही। बाकी पचास प्रतिसत के भुगतान केन्द्रीय पुल म तय करे गे लक्ष्य के पूरा मात्रा जमा होय के बाद करे जाही। उहें, राज्य प्रशासनिक सेवा के दू हजार तेरह बैच के अधिकारी मन ल वरिष्ठ श्रेणी वेतनमान म प्रवर श्रेणी वेतनमान ल क्रमोन्नति करे के फइसला ले गे हवय।
तबादला
राज्य सरकार ह भारतीय पुलिस सेवा के नौ अधिकारी मनके प्रभार म फेरबदल करे हे। एमा छह जिला के एसपी घलो बदले गेहे।
जारी आदेस के अनुसार राजनांदगांव जिला के पुलिस अधीक्षक संतोष सिंह ल कोरबा के एसपी बनाय गेहे। उहें, गौरेला-पेण्ड्रा-मरवाही के एसपी त्रिलोक बंसल ल कोरिया, कोरबा के एसपी भोजराम पटेल ल महासमुंद अउ कोरिया के एसपी प्रफुल्ल ठाकुर ल राजनांदगांव के पुलिस अधीक्षक नियुक्त करे गेहे। एखर अलावा जशपुर के एसपी राजेश कुमार अग्रवाल ल जांजगीर-चांपा म सेनानी ग्यारहवां वाहिनी छत्तीसगढ़ सशस्त्र बल अउ महासमुंद के एसपी विवेक शुक्ला ल सेनानी पन्द्रहवां वाहिनी छत्तीसगढ़ सशस्त्र बल बीजापुर म पदस्थ करे गेहे। अइसने, सूरजपुर म पदस्थ दसवां वाहिनी छत्तीसगढ़ सशस्त्र बल के सेनानी डी. रविशंकर ल जशपुर के पुलिस अधीक्षक बनाय गे हवय। उहें, जांजगीर-चांपा जिला के ग्याहवां वाहिनी छत्तीसगढ़ सशस्त्र बल के सेनानी इंदिरा कल्याण एलेसेला ल गौरेला-पेण्ड्रा-मरवाही के एसपी बनाय गे हवय। बीजापुर के पन्द्रहवां वाहिनी छत्तीसगढ़ सशस्त्र बल के सेनानी सुजीत कुमार ल सूरजपुर म दसवां वाहिनी छत्तीसगढ़ सशस्त्र बल सेनानी के पद म पदस्थ करे गे हवय।
स्कूल-नई पहल
प्रदेस के स्कूल मन म अब लइका मन ह हरेक सनिच्चर के खेल-खेल म पढ़ाई करही। स्कूली सिक्षा ल मजेदार, व्यावहारिक अउ अपन तीर-तखार के माहौल ले जोड़े बर स्कूल सिक्षा विभाग डहार ले ए कदम ल उठाय गेहे। एमा प्रायमरी अउ मिडिल स्कूल के लइका मन एक दिन बिना बस्ता के स्कूल जाही। सनिवार के स्कूल म योग, व्यायाम, खेलकूद, सांस्कृतिक गतिविधि कराय जाही। स्कूल म अइसन पहल करे के उद्देश्य लइका मन म स्कूल आय बर रूचि जागृत करना अउ ओमन ल स्कूल ले जोड़े रखना हवय।
मुख्यमंत्री-वर्चुअल कार्यक्रम
मुख्यमंत्री भूपेश बघेल ह आज रईपुर के अपन निवास कार्यालय म राखे गे वर्चुअल कारीकरम म गोधन न्याय योजना म गोबर बेचइया पशुपालक, ग्रामीण, गौठान ले जुड़े महिला समूह अउ गौठान समिति मन ल दस करोड़ चौरासी लाख रूपिया के रासि ऑनलाइन जारी करीन। संगेसंग मुख्यमंत्री ह राज्य डेयरी उद्यमिता विकास योजना म पच्चीस हितग्राही मन ल तेरह करोड़ तिरसठ लाख रूपिया के अनुदान राशि दीन।
कोयला-छापा
राज्य सरकार के आने-आने विभाग डहार ले काली कोरबा, बिलासपुर, जांजगीर-चांपा अउ रायगढ़ के कोलवाशरी अउ कोल डिपो के उन्नीस ठिन ठिकाना म छापेमार कार्रवाई करे गीस। ए सबो जघा म काली रतिहा जांच-पड़ताल करे गीस। अवैध खनन अउ टैक्स चोरी के सरलग मिलत सिकायत के सेती राज्य सरकार के खनिज, राजस्व, पुलिस अउ जीएसटी विभाग के अधिकारी मनके संयुक्त टीम डहार ले ए कार्रवाई करे गीस। ए दउरान अधिकारी मन ह दबिश देके कोयला के स्टॉक संघरा आवक-जावक, पर्यावरण नियम के उल्लंघन, भूमि ले जुड़े दस्तावेज म कमी अउ दूसर कतकोन बात ल ध्यान म राख के जांच-पड़ताल करे गीस। खनिज विभाग डहार ले राज्य के कोलवाशरी अउ कोल डिपो के जांच बर दस ठन राज्य स्तरीय टीम बनाय गेहे, जेमा खनिज विभाग के पचास झन अधिकारी मन सामिल हे।
कैट-पत्रकारवार्ता
कंफेडरेशन ऑफ इंडिया ट्रेडर्स-कैट ह मार्का लगे खाद्य पदार्थ मन ल जीएसटी के दायरा म लाय के विरोध करे हे। आज रईपुर म होय एक ठिन पत्रकारवार्ता म कैट के राष्ट्रीय अध्यक्ष बी.सी. भर्तिया ह बतईन कि मार्का लगे खाय-पीये के चीज़ जइसे अनाज, बटर, लस्सी आदि ल जीएसटी के दायरा म लाय ले आम लोगन ल बहुत परेसानी होही। संगेसंग छोटे व्यापारी मन ल घलो तकलीफ होही। ओमन किहीन कि एखर बर केन्द्र सरकार के आग्रह करे गेहे।
करंट-मौत
रायगढ़ जिला म करंट के चपेट म आय ले तीन झिन लोगन के मउत होगीस। बताय जात हवय कि पूंजीपथरा थाना क्षेत्र अउ तराईमाल के बीच जंगल म ए तीनों झन मवेसी मनके सिकार करे बर हाईटेंशन वायर ले कनेक्शन लेके झाड़ी मनके नीचे करेंट बिछाय रिहीन, जेखर चपेट म एमन खुदे आगीन अउ एखर सेती मउकाच म उंखर मनके मउत होगे। उहें, करेंट के चपेट म आय ले एक झिन हिरण के घलो मउत होगे हवय। सूचना मिले के बाद पुलिस अउ वन विभाग के टीम ह मउका म पहुंच के मामला के जांच करत हे।
बाल अपराधी-फरार
दंतेवाड़ा जिला मुख्यालय के बाल सुधार गृह ले नौ झन बाल अपराधी मन फरार होगे हवय। मिले जानकारी के अनुसार काली रतिहा बाल सुधार गृह के नौ झन लइका मन ह उहां के सुरक्षा गार्ड के पिटाई करे के बाद ओला रस्सी ले बांध दे रिहीन अउ सबो झन फरार होगीन। लइका मन अपन संग चौकीदार के मोबाइल ल घलो ले गीन। घटना के सूचना मिलते साथ कोतवाली पुलिस ह ए लइका मनके तलाश सुरू कर देहे।
अउ अब पेस हे मौसम के हाल…
मौसम विभाग ह अवइया चौबीस घंटा म प्रदेस के बस्तर संभाग म एक-दू जघा म गरज-चमक के संग भारी ले अतिभारी बरसा होय के या आकाशीय बिजली गिरे के चेतावनी दीन हे। उहें, रईपुर, बिलासपुर अउ दुरूग संभाग के कुछेक जिला म एक-दू जघा म गरज-चमक के संग भारी बरसा अउ वज्रपात होय के संभावना हे।