निशुल्क गणवेश
राज्य सरकार ह कीहिन हे कि शिक्षा के अधिकार अधिनियम-आर.टी.ई. के तहत प्रायवेट स्कूल मन म भर्ती लेवइया पढ़ईया लइका मन ल निशुल्क पुस्तक, डरेस, अउ पढ़े लिखे के सामान देवाना जरूरी हे। संचालक लोक शिक्षण ह जम्मों संभागीय संयुक्त संचालक मन ल अपन अधीनस्थ जिला म अउ जिला शिक्षा अधिकारी मन ल निर्देशित करे हे कि जिला म चलत प्रायवेट स्कूल मन म जिहां आरटीई के तहत छात्र मन ह पढ़त हे, ओ स्कूल के देखरेख करे के संग शासन के निर्देश के कड़ाई ले पालन करे जाये।
प्रदेस के स्कूल मन म विद्यार्थी मन डहार ले प्रार्थना सभा के शुरूआत राज्यगीत ले करे जाही। स्कूल शिक्षा विभाग डहार ले प्रदेस के स्कूल मन म शैक्षणिक सत्र दू हजार बाईस-तेईस बर प्रार्थना सभा के संबंध म ये निर्देश जारी करे गेहे। एखर तहत प्रार्थना सभा म राज्यगीत खातिर एक मिनट पंद्रह सेकण्ड, शपथ बर एक मिनट, प्रेरणा गीत बर दू मिनट, समाचार पत्र पढ़े बर पांच मिनट, नैतिक अउ प्रेरक कहानी बर पांच मिनट अउ राष्ट्रगान बर बावन सेकण्ड के बेरा तय करे गेहे।
प्रार्थना सभा के आयोजन तय करे गे बेरा म शाला के बड़े कक्षा म पढ़ईया ओ पांच लईका मन ले करे जाही, जेन मन मासिक आकलन म अपन कक्षा म सबले जादा नंबर पाय हे। इही आधार म हरएक महीना म प्रार्थना सभा के आयोजन बर विद्यार्थी मनके चयन करे जाही।
उंहे शाला नायक डहार ले विद्यार्थी मन ल देश अउ प्रदेश के एकता समृद्धि बर शपथ देवाय जाही। विद्यार्थी मन डहार ले कोनो भी एक ठिन प्रेरणा गीत गाये के संगेसंग राष्ट्रगान के संग प्रार्थना सभा के समापन करे जाही।
प्रधानमंत्री, काली वाराणसी म अखिल भारतीय शिक्षा समागम के उद्घाटन करहीं। शिक्षा मंत्रालय ह विश्वविद्यालय अनुदान आयोग अउ बनारस हिंदू विश्वविद्यालय के मदद ले ए समागम के आयोजन करे जाही। आकाशवाणी ले गोठबात म शिक्षाविद् डॅाक्टर संत कुमार चौधरी ह कीहिन कि ये सम्मेलन देश के उच्च शैक्षणिक संस्थान बर राष्ट्रीय शिक्षा नीति दू हजार बीस ल लागू करे अउ विचार-विमर्श करे बर एके मंच दे जाही।
देश ह आज डॅाक्टर श्यामाप्रसाद मुखर्जी के एक सौ इक्कीसवीं जयंती म ओमन ल सुरता करत हे। उपराष्ट्रपति एम. वैंकेया नायडू अउ प्रधानमंत्री नरेंद्र मोदी ह डॅाक्टर श्यामाप्रसाद मुखर्जी के जयंती म ओमन ल श्रद्धाजंलि दीन।
श्री नायडू ह कीहिन कि डॅाक्टर मुखर्जी एक कुशल राजनेता, दूरदर्शी विचारक, विख्यात शिक्षाविद् अउ महान राष्ट्रवादी रीहिन। उंहें श्री मोदी ह कीहिन कि भारत के विकास, विशेष रूप ले वाणिज्य अउ उद्योग क्षेत्र म उंखर योगदान के बड़ सराहना करे जात हे। भारतीय जनता पार्टी के राष्ट्रीय अध्यक्ष जगत प्रकाश नड्डा ह डॅाक्टर मुखर्जी के जयंती म उंखर नीति के बड़ई करीन। उंहें सांसद, पूर्व सांसद अउ जम्मों नेता, कार्यकर्ता मन घलो ओमन ल श्रद्धाजंलि दीन।
एति छत्तीसगढ़ विधानसभा परिसर स्थित सेंट्रल हॉल म नेता प्रतिपक्ष धरमलाल कौशिक अउ विधायक बृजमोहन अग्रवाल ह डॅाक्टर श्यामाप्रसाद मुखर्जी के तैल फोटो उपर फूल-माला चढ़ाके श्रद्धाजंलि दीन।
कोयला मंत्रालय ह स्पष्ट करे हे कि आपसी सहमति ले तुरते अपन गैर कार्यकारी कार्यबल के वेतन समझौता के निपटारा करना चाहत हे। मंत्रालय केहे हे कि कोल इंडिया लिमिटेड अब तक राष्ट्रीय कोयला वेतन समझौता के तहत पांच ठिन बइठका कर डरे हे।
मंत्रालय ह यहू केहे हे कि कोल इंडिया लिमिटेड देश म कोयला क्षेत्र के महत्व ल धियान म राखत कइसनो हड़ताल ल टाले बर अपन मजदूर संगठन मनके संग बने संबंध बनाए राखना चाहत हे। कोयला मंत्रालय के मुताबिक कोल इंडिया लिमिटेड देश के पहिली केंद्र सरकार के सार्वजनिक क्षेत्र के इकाई हे, जउन पाछू तीन वेतन समझौता के बने ढंग ले निपटारा करे हे।
राजनांदगांव म भारतीय जनता पार्टी डहार ले राखे गे तीन दिन के प्रशिक्षण शिविर के दूसर दिन आज बड़का नेता मन ह कार्यकर्ता मन ल व्यक्तित्व विकास, देश के ज्वलंत समस्या अउ देशकाल परिस्थिति उपर विस्तार पूर्वक बात बताइन। पूर्व मंत्री बृजमोहन अग्रवाल ह कीहिन कि हरएक कार्यकर्ता भाजपा के जनाधार बढ़ाये, अइसे व्यक्तित्व के निर्माण करय। हरएक कार्यकर्ता अपन बाहरी प्रदर्शन ले जादा अपन आंतरिक प्रदर्शन उपर ध्यान देवय अउ अपन व्यक्तित्व के विकास परिक्रमा ले नही, बल्कि पराक्रम ले करे। ओमन कीहिन कि देश ल उच्च शिखर म ले जाये बर भाजपा प्रतिबद्ध हे।
शिविर के राष्ट्रीय स्वयं सेवक संघ के विभाग प्रचारक हेमंत नाग ह संघ परिवार के विसय ल कार्यकर्ता मन ल बताइन । ओमन बताइन कि सामाजिक जीवन के हर क्षेत्र म संघ के विचारधारा ल लेके कोनो न कोनो संगठन काम करत हे। शिविर म भाजपा पदाधिकारी मन ह आने आने विसय उपर कार्यकर्ता मनके मार्गदर्शन करीन।
मुख्यमंत्री भूपेश बघेल ह पूर्व सांसद स्वर्गीय रामाधार कश्यप के जीवन संघर्ष, व्यक्तित्व अउ कृतित्व उपर आधारित पुस्तक ‘पृथक छत्तीसगढ़ आंदोलन के दुर्धर्ष नायक – रामाधार कश्यप – के विमोचन अउ लोकार्पण करीन। छत्तीसगढ़ विधानसभा के अध्यक्ष डॅाक्टर चरणदास महंत ह ए कार्यक्रम के पगरैती करीन। कार्यक्रम के आयोजन प्रभादेवी मेमोरियल वेल फेयर सोसायटी बिलासपुर डहार ले करे गीस।
कांकेर जिला म आज दू झिन इनामी माओवादी मन ह पुलिस अधीक्षक शलभ सिन्हा के आगू आत्मसमर्पण कर दीन। एमा एक झिन माइलोगिन माओवादी घलो सामिल हे। एखर उपर आठ लाख रूपिया के इनाम घोषित रीहिस हे। उंहें पुरूष माओवादी उपर पांच लाख रूपिया के इनाम राखे गे रीहिस। पुलिस के मुताबिक ये दूनो माओवादी हत्या, आगजनी अउ पुलिस-माओवादी मुठभेड़ समेत कतकेन वारदात म सामिल रीहिन।
इंदिरा गांधी कृषि विश्वविद्यालय के कुलपति डाक्टर गिरिश चंदेल ह कीहिन कि छत्तीसगढ़ म कृषि अउ लघु वनोपज आधारित स्टार्टअप्स स्थापित करे के बड़ संभावना हे। ओमन कृषि विश्वविद्यालय के विद्यार्थी अउ आने युवा मनले आह्वान करीन हे कि ओमन कृषि अउ लघु वनोपजन उत्पाद अउ न्यूट्री केयर उत्पाद उपर आधारित स्टार्टअप्स लगाये बर आगू आवंय अउ छत्तीसगढ़ समेत देश के विकास म सहभागी बनय।
डॅाक्टर चंदेल आज इंदिरा गांधी कृषि विश्वविद्यालय डहार ले राष्ट्रीय कृषि विकास योजना के मदद ले संचालित एग्री बिजनेस इन्क्यूबेशन कार्यक्रम के चौथा चरण अभिनव अउ उद्भव के शुभारंभ समारोह म ये बात कीहिन।
कार्यक्रम के पहुना राष्ट्रीय कृषि अउ ग्रामीण विकास बैंक-नाबार्ड के मुख्य महाप्रबंधक सुपर्णा टण्डन ह कीहिन कि बैंक छत्तीसगढ़ म कृषि विकास अउ किसान मन बर सरलग परयास करत हे। सुश्री टण्डन ह कीहिन कि नाबार्ड इंदिरा गांधी कृषि विश्वविद्यालय के संग दीर्घकालीन साझा कायर्कम संचालित करना चाहत हे। जेमा कृषि विश्वविद्यालय डहार ले तकनीकी मार्गदर्शन अउ मदद दे जाही, संगेसंग वित्तीय मदद नाबार्ड डहार ले देवाय जाही।
प्रर्वतन निदेशालय-ईडी डहार ले काली चीनी स्मार्टफोन विनिर्माता कंपनी वीवो अउ ओखर ले जुड़े आने-आने फर्म के खिलाफ मनी लॉन्ड्रिंग के मामला म देश के चवालिस जगा म छापामार के कार्रवाई करे गीस।
एति रायपुर के तेलीबांधा स्थित वीवो कंपनी म घलो ईडी के अधिकारी मन ह तलाशी लेके दस्तावेज के जांच अउ जब्ती के कार्रवाई करीन।