राज्य सरकार ह शहर म ले-आउट पास कराये के अधिकार अब नगर निगम ल देके फैसला करे हे। एखर पहिली ले-आउट पास कराये बर लोगन ल नगर निगम अउ नगर तथा ग्राम निवेश विभाग ले अनुमोदन लेना पड़त रीहिस। ए नवा फैसला ले लोगन ल एके छत के नीचे ले-आउट अनुमोदन के सुविधा मिल सकही।
खबर के मुताबिक मुख्यमंत्री भूपेश बघेल ह नगर-निगम ल ले-आउट के अधिकार दे जाय के घोषणा करे रीहिन, जेखर उपर आवास अउ पर्यावरण विभाग डहार ले अमल करत नगर निगम ल ले-आउट पास कराये के अधिकार देके संबंध म आज अधिसूचना जारी कर दे गेहे। जेखर अनुसार प्रदेश के नौ जिला के बारा नगर पालिका निगम रायपुर, बीरगांव, दुर्ग, भिलाई, चरौदा, रिसाली, राजनांदगांव, रायगढ़, जगदलपुर, अंबिकापुर, बिलासपुर, कोरबा, अउ धमतरी के आयुक्त मन ल नगर तथा ग्राम निवेश विभाग डहार ले उंखर सीमा म अवइया शर्त के संग ले-आउट पास करे बर अधिकृत करे गेहे।
अविश्वास प्रस्ताव
महासमुंद म आज नगर पालिका अध्यक्ष के खिलाफ अविश्वास प्रस्ताव पारित करे गीस। एमा कांग्रेस ह बीस ठन वोट पाके जीत हासिल करे हे, उंहें भाजपा ल तीन वोट मिले हे। फेर छै ठन वोट ल अमान्य कर दे गीस। अविश्वास प्रस्ताव बर उनतीस झन पार्षद म बीस पार्षद मन ह कांग्रेस के पक्ष म मतदान करीन। उंहें भाजपा पार्षद मनके खिलाफ निष्कासन के कार्यवाही करे गीस। भाजपा जिलाध्यक्ष रूपकुमारी चौधरी ह एखर अनुशंसा करीन।
खबर के मुताबिक पाछू दिन नगर पालिका महासमुंद के भाजपा अध्यक्ष प्रकाश चंद्राकर के खिलाफ कांग्रेस पार्षद मन ह जिला निर्वाचन अधिकारी ल अविश्वास प्रस्ताव लाये बर ज्ञापन सौंपे रीहिन। जेखर बाद कलेक्टर निलेश कुमार क्षीरसागर ह आज चुनाव कराये के एलान करीन हे ।
आदिवासी सम्मेलन
मुख्यमंत्री भूपेश बघेल ह कीहिन हे कि पेसा नियम के ड्राफ्ट ल तियार कर ले गेहे। केबिनेट के बइठका म जल्दीच एला मंजूरी दे जाही। ये बात मुख्यमंत्री ह काली कोरिया जिला मुख्यालय बैकुण्ठपुर के मानस भवन म सर्व आदिवासी समाज के सम्मेलन म कीहिन । मुख्यमंत्री ह इंहा जन आकांक्षा के अनुसार एक आगर एक कोरी यानि इक्कीस ठन मांग ल मंजूर करे के घोषणा करीन। मुख्यमंत्री ह बैकुण्ठपुर म सर्व आदिवासी समाज भवन के निर्माण बर पचास लाख रूपिया मंजूर करे के संग उंहा ट्रांजिस्ट हॉस्टल बनाये के घलो एलान करीन।
हर्बल उत्पाद
राज्य सरकार ह छत्तीसगढ़ हर्बल ब्राण्ड डहार ले बने उत्पाद मन ल श्री धन्वंतरी जेनेरिक मेडिकल स्टोर के माध्यम ले विक्रय करे के फैसला लेहे। संगेसंग दूसर ब्राण्ड के अइसने जीनिस ल उंहा ले बेचे म रोक लगा देहे। नगरीय प्रशासन अउ विकास विभाग डहार ले ए बारे म चिट्ठी सबो कलेक्टर मन ल भेजे गे हवय।
मुख्यमंत्री भेंट-मुलाकात
एखरे संग मरवाही म पॉलिटेक्निक कॉलेज शुरू करे के एलान करीन। मुख्यमंत्री ह कीहिन कि दलदली नाला म एनिकट-कम-काजवे बनाये जाही। ओमन मरवाही के कॉलेज परिसर म स्थापित आदिवासी नेता स्वर्गीय डॅाक्टर भंवर सिंह पोर्ते के प्रतिमा के अनावरण करीन।
एखर पहिली मुख्यमंत्री ह कोरिया जिला के बैकुण्ठपुर के विश्रामगृह म अधिकारी मनके समीक्षा बइठका लीन। ए दउरान ओमन कीहिन कि गौठान म स्थानीय जड़ी-बूटी के उपलब्धता के हिसाब से प्रोसेसिंग यूनिट लगवाय जाय। जेखर ले अइसन चीज ल सहेज के किसान अउ वनवासी मन ल जादा फायदा देवाय जा सकय। मुख्यमंत्री ह कीहिन कि वनवासी मन ल पहिलीच ले वन अधिकार पट्टा दे जावत हे। अब उंहा वन धन केंद्र घलो बनाय जाय। ओमन ह वन विभाग के अधिकारी मनले कीहिन कि तेंदूपत्ता के राशि दे म हितग्राही मनले राशि मिले के जानकारी लेवंय।
मुख्यमंत्री ह अधिकारी मन ल आंगनबाड़ी म सुपोषण युक्त भोजन देके अउ बरसा के दउरान स्कूल म लईका मनके हाजरी रहाय अउ पाठ्यक्रम ह घलो बेरा म पूरा हो जाय ए बात म ध्यान देबर कीहिन । उंहें मुख्यमंत्री ह बैकुण्ठपुर विधानसभा क्षेत्र म करीबन सत्यासी करोड़ रूपिया के लागत ले कुल उन्नीस ठन विकास काम के लोकार्पण अउ भूमिपूजन करीन। एमा प्राकृतिक सौंदर्य के टापू, झुमका आइलैण्ड के लोकार्पण घलो शामिल हे।
सैन्य अधिकारी शहीद
मुख्यमंत्री भूपेश बघेल ह मणिपुर लैण्डस्लाइड म शहीद होय लेफ्टिनेंट कर्नल कपिलदेव पांडेय ल श्रद्धाजंलि देवत उंखर परिवार वाला मन बर संवेदना जताइन हे।
खबर के मुताबिक भिलाई के रहइया लेफ्टिनेंट कर्नल कपिलदेव पांडेय ह मणिपुर म कुछ दिन पहिली होय भू-स्खलन म शहीद होगे हवय। सेना के गोरखा रायफल्स म तैनात कपिलदेव ह पाछू तीन बछर ले मणिपुर के नोनी जिला के तुपुल इलाका म पदस्थ रीहिन। इंहा रेलवे ट्रेक अउ स्टेशन बनाये के काम चलत हे। पांच दिन पहिली होय भू-स्खलन के बाद ले ओमन लापता रीहिन। काली उंखर शव ल बरामद कर ले गेहे।
एस्पायरिंग लीडर-पुरस्कार
केंद्रीय वाणिज्य अउ उद्योग मंत्री पीयूष गोयल ह नई दिल्ली म छत्तीसगढ़ ल प्रदेश म स्टार्टअप इको सिस्टम बढ़ाय बर एस्पायरिंग लीडर के रूप म सम्मानित करीन।
केंद्रीय मंत्री ह स्टार्टअप क्षेत्र म विशेष योगदान बर प्रदेश के तीन अधिकारी वाणिज्य अउ उद्योग विभाग के विशेष सचिव अनुराग पांडेय, अपर संचालक प्रवीण शुक्ला अउ सहायक संचालक सुमन देवांगन ल सम्मानित करीन। केंद्रीय उद्योग संवर्धन अउ आंतरिक व्यापार विभाग डहार ले आज स्टेट्स स्टार्टअप रैकिंग के घोषणा करे गीस।
मुख्यमंत्री भूपेश बघेल अउ उद्योग मंत्री कवासी लखमा ह ये उपलब्धि बर उद्योग विभाग के अधिकारी कर्मचारी मन ल बधाई दीन हे । खबर के मुताबिक छत्तीसगढ़ के वर्तमान औद्योगिक नीति म स्टार्टअप इकाई ल फायदा देवाय बर स्टार्टअप पैकेज लागू करे हे। राज्य म कुल सात सौ अड़तालिस स्टार्टअप पंजीकृत हे।
अउ अब पेस हे मौसम के हाल –
उंहें रायपुर अउ दुर्ग संभाग म घलो एक दू जगा म गरज-चमक के संग भारी बरसा अउ वज्रपात होय के संभावना हे। मौसम विभाग के अनुसार उपरी हवा के चक्रीय चक्रवाती घेरा दक्षिण झारखंड अउ ओखर तीर विस्तारित हे। एखर प्रभाव ले अवइया चौबीस घंटा के दउरान एक ठन निम्न दाब के क्षेत्र बने के संभावना हे।
अउ अब थोरकुन समाचार सार म-
– राजनांदगांव के कोतवाली पुलिस ह प्रधानमंत्री आवास देवाय के नाव म धोखाधड़ी करइया एक झन माइलोगिन संगरा दू झन आरोपी मन ल गिरफ्तार करे हे।
– मुंगेली म आंगनबाड़ी कार्यकर्ता मन ह सुपरवाइजर के खाली पद म भर्ती, मिनी आंगनबाड़ी ल पूर्ण आंगनबाड़ी बनाय के अउ राज्य सरकार के अतिरिक्त मानदेय ल केंद्र सरकार जइसन ऑनलाइन करे जाय के मांग करीन हे ।
अउ
– जांजगीर-चांपा जिला के पामगढ़ के पनगांव म नाला म नहावत खानी दू झन युवक मन बह गीन। जेमा ले एक झन ल गांव के रहइया मनके मदद ले बचा ले गीस अउ दूसर के खोजबीन चलत हे।