डिजिटल इंडिया सप्ताह
प्रधानमंत्री नरेन्द्र मोदी काली गुजरात के गांधीनगर म डिजिटल इंडिया सप्ताह 2022 के उद्घाटन करही। ए दउरान ओमन कतकोन डिजिटल कारीकरम के सुरूवात करही, जेखर उद्देश्य प्रौद्योगिकी तक पहुंच बढ़ाना, जीवनयापन ल सरल बनाय बर सेवा परिदान प्रणाली ल सुचारू बनाय के संग स्टार्टअप ल बढ़ावा देना हे।
श्री मोदी ह डिजिटल इंडिया भाषिणी के घलो सुभारंभ करही, जेखर ले आवाज आधारित पहुंच समेत भारतीय भासा म इंटरनेट अउ डिजिटल सेवा तक पहुंच आसान होही अउ भारतीय भासा म विषय-वस्तु तैयार करे बर मदद मिलही। प्रधानमंत्री ह टियर-दू अउ टियर-तीन सहर म स्टार्टअप के खोज, सहायता, ओमन ल आगे बढ़ाय के संग सफल बनाय बर एक ठन राष्ट्रीय गहन प्रौद्योगिकी स्टार्टअप मंच डिजिटल इंडिया जेनेसिस के सुभारंभ घलो करही।
भाजपा हैदराबाद
केन्द्रीय गृहमंत्री अमित शाह ह किहीन कि प्रधानमंत्री नरेन्द्र मोदी के अगुवई म देश के बाहिरी अउ आतंरिक सुरक्षा मजबूत होय हे। भारतीय जनता पार्टी के राष्ट्रीय कार्यकारिणी के बइठका म श्री शाह ह किहीन कि रक्षा क्षेत्र म बडे़ सुधार होय हे। उहें, भाजपा के वरिष्ठ नेता अउ असम के मुख्यमंत्री हिमंत बिस्व सरमा ह बतइन कि कार्यकारिणी बइठका के पहिली दिन आर्थिक संकल्प उपर चर्चा होईस।
केन्द्रीय मंत्री-कोरबा प्रवास
केन्द्रीय ग्रामीण विकास अउ पंचायती राज मंत्री गिरिराज सिंह ह काली चार जुलाई ले सात जुलाई तक कोरबा दउरा म रइही। ओमन पांच जुलाई के बिहनिया दस बजे कोरबा जिला भाजपा कार्यालय म आयोजित बइठका म सामिल होही। केन्द्रीय मंत्री 6 जुलाई के जिला पंचायत कार्यालय म केन्द्र सरकार के योजना के हितग्राही मन ले गोठबात करही। ओखर बाद जिला प्रसासन के बड़का अधिकारी मनके संग योजना के क्रियान्वयन के समीक्षा घलो करही। 6 जुलाई के ही केन्द्रीय मंत्री ह कटघोरा जाही अउ रचकम्मा गांव के लोगन अउ कार्यकर्ता मन ले गोठबात करही। उहें, सात जुलाई के जिला म कई विकास कारज के जघा मनके दउरा घलो करही। एखर बाद आने कारीकरम म हिस्सा लीहीं अउ संझाकुन दिल्ली लहुट जाही।
अमरनाथ श्राइन बोर्ड
श्री अमरनाथजी श्राइन बोर्ड ह एसो पवित्र गुफा के दर्शन बर नइ पहुंच पाय श्रद्धालु मन बर ऑनलाइन पूजा, हवन अउ प्रसाद के सेवा सुरू करे के घोसना करे हे। बोर्ड ह केहे कि उंखर वेबसाइट डब्ल्यू.डब्ल्यू.डब्ल्यू. डॉट श्री अमरनाथजी श्राइन डॉट कॉम के माध्यम ले ऑनलाइन सेवा के लाभ ले जा सकत हे। ऑनलाइन सेवा श्राइन बोर्ड के मोबाइल एप के माध्यम ले घलो प्राप्त करे जा सकत हे।
कोरोना समाचार
छत्तीसगढ़ म कोरोना संक्रमण के मामला सरलग बाढ़त हे। काली प्रदेस म 11 हजार 585 सैंपल के जांच होईस, जेमा 18 जिला के 161 मनखे कोरोना संक्रमित पाय गीन। दुरूग जिला म सबले जादा 37, रईपुर म 29 अउ बिलासपुर म 18 मरीज मिले हे। एखर संगे राज्य म कोरोना के सक्रिय मरीज के संख्या बाढ़के 1 हजार 40 होगे हे। हाल बेरा प्रदेस के कोराना संक्रमण दर 1.39 प्रतिसत हवय।
मुख्यमंत्री-भेंट मुलाकात
मुख्यमंत्री भूपेश बघेल कोरिया जिला के दउरा म हे। मुख्यमंत्री ह आज भेंट-मुलाकात कारीकरम के तहत बैकुंठपुर विधानसभा क्षेत्र के लोगन ले भेंट करीन। ए मउका म मुख्यमंत्री ह बैकुंठपुर के पोड़ी अउ पटना म कतकोन विकास कार्य के सौगात दीन। श्री बघेल ह बचरा-पोड़ी म नवा महाविद्यालय खोले के संग स्वामी आत्मानंद अंग्रेजी स्कूल, सकरिया म नवा बिजली घर के स्थापना के घोसना करीन हें। एखरे संग पोड़ी म सहकारी बैंक के साखा खोले अउ घनुहर नाला म नवा पुलिया बनाय के ऐलान करीन। उहें, पोड़ी के प्राथमिक स्वास्थ्य केन्द्र ल सामुदायिक स्वास्थ्य केन्द्र म उन्नयन अउ पुलिस सहायता केन्द्र ल पुलिस चौकी म उन्नयन करे के घलो घोसना करीन हे।
भाजपा-प्रशिक्षण शिविर
भारतीय जनता पार्टी के तीन दिवसीय प्रशिक्षण सिविर काली ले राजनांदगांव जिला म आयोजित करे जाही। ए सिविर म संगठन के प्रदेस स्तर के पदाधिकारी मन कार्यकर्ता मन ल संबोधित करही।
राजनांदगांव जिला भाजपा अध्यक्ष मधुसूदन यादव ह बतइन कि जिला भाजपा कार्यालय म आयोजित होवइया ए सिविर म आत्मनिर्भर भारत अभियान के संबंध म सांसद संतोष पांडेय कार्यकर्ता मन ल मार्गदर्शन करही। एखर संगे सांसद विजय बघेल, प्रदेस भाजपा उपाध्यक्ष शिवरतन शर्मा अउ प्रवक्ता संजय श्रीवास्तव घलो कार्यकर्ता मन ल संबोधित करहीं।
राज्यपाल-व्हाइट कोट सेरेमनी
राज्यपाल अनुसुईया उइके ह काली 04 जुलाई के रईपुर के पंडित जवाहर लाल नेहरू चिकित्सा महाविद्यालय के व्हाइट कोट सेरेमनी म सामिल होहीं। बतादन कि चिकित्सा महाविद्यालय डहार ले एम.बी.बी.एस. पाठ्यक्रम म दाखिल प्रथम वर्ष के छात्र मन ल चिकित्सा आचार संहिता के सपथ देवाय बर हर बछर व्हाइट कोट सेमेमनी के आयोजन करे जाथे।
महिला हॉकी
छत्तीसगढ़ सिविल सर्विसेस महिला हॉकी टीम ह भोपाल म खेले गे प्रतियोगिता म कांस्य पदक जीते हे। ए प्रतियोगिता 21 जून ले 30 जून खेले गीस। बतादन कि बीते बछर छत्तीसगढ़ ले घलो महिला हॉकी टीम ह ए प्रतियोगिता म भाग ले रिहीस हे अउ टीम ल फेयर प्ले अवॉर्ड मिले रिहीस।
अउ अब पेस हे मौसम के हाल…..
छत्तीसगढ़ के कतकोन जघा म काली हल्का ले मध्यम बरसा होय या गरज-चमक के संग छींटा पड़े के संभावना हे।
मौसम विभाग के अनुसार उपरी हवा के चक्रवाती घेरा दक्षिण झारखंड अउ तिर-तखार म बने हे। एखर परभाव ले अवइया चौबीस घंटा म प्रदेस म हल्का ले मध्यम बरसा होय के संभावना हे। उहें, एक-दू जघा म भारी बरसा अउ गरज-चमक के संग गाज गिरे के घलो चेतावनी दे गेहे।
इही बीच, राजनांदगांव के सुरगी कृषि विज्ञान केन्द्र के वरिष्ठ वैज्ञानिक अउ प्रमुख डॉक्टर बीरबल सिंह राजपूत ह गाज ले बांचे बर लोगन ल तेज बारिस अउ गरज-चमक के बेरा खुल्ला जघा या बाहिर नइ निकले के सलाह दे हे। ओमन किहीन कि हो सके त रूख-राई के खाल्हे झन रूकंय अउ टिन ले बने छत, दरवाजा या खंभा ले दूरिहा रेहे के गोठ किहीन हें। वैज्ञानिक बीरबल सिंह ह किहीन कि कहूं गरज-चमक के संग खुल्ला जघा म रूकना पड़त हे त लोगन अपन ऐड़ी ल जोड़ लेवंय अउ कान बंद करके उखरू बइठ जांय।
अउ अब थोरकुन समाचार सार म-
– मुख्यमंत्री भूपेश बघेल ह पूर्व विधायक भजन सिंह निरंकारी के निधन म सोक जतइन हे। श्री बघेल ह अपन सोक संदेस म किहीन हे कि दिवंगत निरंकारी ह सदा गरीब मनके हित बर संघर्ष करीस।
– राजनांदगांव जिला के एकीकृत बाल विकास सेवा परियोजना के तहत आंगनबाड़ी केन्द्र म कार्यकर्ता अउ सहायिका मनके भर्ती करे जाना हे, जेखर बर 15 जुलाई तक आवेदन करे जा सकथे।
अउ
– बलरामपुर जिला कलेक्टर विजय दयाराम के. ह अधिकारी मनके समीक्षा बइठका म ग्रामीण इलाका म स्वास्थ्य सुविधा के संग लोगन ल स्वास्थ्य के प्रति जागरूक करे बर जोर देके बात किहीन हे।