आज दिनभर के ख़बर ल अपन गुरतुर छत्तीसगढ़ी भाखा म पढ़व

स्कूल पाठ्य पुस्तक

स्वामी आत्मानंद उत्कृष्ट अंग्रेजी अउ हिन्दी माध्यम के स्कूल म पहिली ले दसवीं तक पढ़ईया लइका मन ल सासन कोति ले मुफत म पाठ्य-पुस्तक दे जाही। ए किताब ओ स्कूल के पढ़ईया लइका मन ल मिलही, जिहां सीबीएसई अउ एनसीईआरटी के पाठ्यक्रम चलत हे। लोक शिक्षण संचालक ह ए संबंध म जम्मों जिला सिक्षा अधिकारी ल निरदेस जारी कर देहे।
इही बीच, छत्तीसगढ़ माध्यमिक शिक्षा मंडल कोति ले एसो दसवीं अउ बारहवीं बोर्ड परीक्षा बर पुनर्गणना अउ पुनर्मूल्यांकन के नतीजा घोषित कर देहे। मंडल के सचिव प्रोफेसर व्ही.के. गोयल ह बतईन कि ए परिणाम शिक्षा मंडल के वेबसाइट म देखे जा सकथे।

आयकर छापा

केन्द्रीय आयकर विभाग के अधिकारी मन ह आज बिहनिया राज्य सरकार के कुछेक प्रमुख अधिकारी मन समेत एक राजनीतिक दल के पदाधिकारी के ठिकाना म छापामार कार्रवाई करीन। फेर आधिकारिक तौर म ए मामला म कोनों किसम के पुष्टि नइ करे गेहे।
खबर के मुताबिक नागपुर ले बीस ले जादा अधिकारी के दल ह सबले पहिली भिलाई के जुनवानी क्षेत्र म एक प्राईवेट आवासीय परिसर म मुख्यमंत्री सचिवालय के उप सचिव सौम्या चौरसिया के निवास म दबिस दीन। एखर बाद एक राजनीतिक पदाधिकारी के रईपुर अउ महासमुंद के घर अउ दफ्तर म छापा के कार्रवाई करे गीस। उहें, कांग्रेस पदाधिकारी के कोरबा के एक आने सहयोगी के ठिकाना म घलो जांच करे के खबर मिले हे। बताय जात हे कि आयकर विभाग के ए अधिकारी कोलकाता ले आय हे अउ छापा के कार्रवाई आयकर विभाग के सहायक निदेशक के अगुवई म करे जात हे। कार्रवाई के दायरा ल देखत एमा जबलपुर-इंदौर अउ रईपुर के अधिकारी मन ल सामिल करे गेहे।

मुख्यमंत्री-भेंट मुलाकात

प्रदेस के गौठान मन म सबले जादा वर्मी कम्पोस्ट बनइया अउ बेचइया समूह ल इनाम दे जाही। मुख्यमंत्री भूपेश बघेल ह कोरिया जिला के पाराडोल गांव म राखे गे भेंट-मुलाकात कारीकरम के बेरा ए घोसना करीन। कारीकरम म बोलत मुख्यमंत्री ह किहीन कि ए इनाम सबले बने प्रदर्सन करइया तीन समूह ल दे जाही। ए बेरा म श्री बघेल ह हसदेव नदी म उच्च स्तरीय पुल अउ पाराडोल ले भवता गांव तक पक्का रद्दा बनाय समेत आने विकास काम के घोसना करीन। अपन दउरा के बेरा मुख्यमंत्री ह मनेन्द्रगढ़ विधानसभा क्षेत्र म करीबन अस्सी करोड़ रूपिया के लागत के पच्चीस ठिन विकास काम के लोकार्पण अउ भूमिपूजन करीन। एखर पहिली मुख्यमंत्री ह मनेन्द्रगढ़ म अधिकारी मनके समीक्षा बइठका लेवत हाट बाजार क्लीनिक योजना म हितग्राही मन ल सिविर के बेरा बताय बर बने ढंग ले प्रचार-प्रसार करे के निरदेस दीन। ओमन अधिकारी मन ल विभागीय योजना के विकास के निगरानी राखे बर किहीन। उहें, जिला म जाति अउ आय प्रमाण पत्र के लंबित प्रकरण तुरते समाधान करे के निरदेस दीन। मुख्यमंत्री ह नहर के तीर वृक्षारोपण म एके प्रजाति के फल के पौधा रोपण ल प्राथमिकता देके संगेसंग कोयला खदान क्षेत्र म पलायन रोके बर भूमिहीन श्रमिक योजना म जादा ले जादा पात्र लोगन ल जल्दी फायदा देवाय बर किहीन।

हसदेव अरण्य-मेधा पाटकर

देस के जाने-माने सामाजिक कार्यकर्ता अउ नर्मदा बचाव आंदोलन के प्रमुख मेधा पाटकर के कहना हे कि सरगुजा जिला के हरियपुर गांव म हसदेव अरण्य बचाय बर चलत धरना-प्रदर्शन के ओमन समर्थन करथे। ओमन बतईन कि ए आंदोलन ल देस के पन्द्रह ठिन राज्य ले आय आने सामाजिक कार्यकर्ता मनके समर्थन मिलत हे। आज रईपुर म पत्रकार मन ले गोठबात करत ओमन किहीन कि प्रदेस म आदिवासी मनके जल, जंगल, जमीन बचाय के मुहिम म राज्य सरकार ल संवेदनशील होना चाही। ओमन किहीन कि राज्य के मंत्री टी.एस. सिंहदेव, कोरबा के सांसद ज्योत्सना महंत अउ लोरमी के विधायक धर्मजीत सिंह समेत कुछेक आने नेता आदिवासी मन बर समर्थन दे हे।

राज्यपाल व्हाइट कोट-समारोह

राज्यपाल अनुसुईया उइके काली एक जुलाई के राजधानी रईपुर के पंडित जवाहर लाल नेहरू चिकित्सा महाविद्यालय के व्हाइट कोर्ट समारोह म संघरही। ए बेरा म एम.बी.बी.एस. पाठ्यक्रम के पहिली बछर म भर्ती लेवइया पढ़ईया लइका मन ल चिकित्सा आचार संहिता के शपथ देवाय जाही।

भाजपा-अग्निपथ योजना

केन्द सरकार के अग्निपथ योजना ले युवा मन ल होवइया फायदा के जानकारी दे बर प्रदेस भाजपा के आने-आने मोर्चा कोति ले जनसंपर्क अभियान चलाय जात हे। एमा राजनांदगांव के भाजपा सांसद संतोष पांडेय ह पार्टी कार्यालय म पत्रकार मन ले गोठबात करत ए योजना के बिसेसता बतईन। ओमन किहीन कि अग्निपथ योजना म युवा मनके सुघ्घर भविष्य हवय। ए केन्द्र सरकार के ऐतिहासिक फइसला हे। ओमन किहीन कि ए योजना ले युवा मन ल राष्ट्र सेवक के रूप म काम करे के मउका मिलही। उहें, अग्निपथ योजना के संबंध म कांग्रेस उपर दुष्प्रचार करे के आरोप लगईन।
भाजपा के बड़का नेता अउ विधायक पुन्नूलाल मोहले ह मुंगेली के जिला भाजपा कार्यालय म पत्रकार मन ले गोठबात करत किहीन कि कांग्रेस कोति ले अग्निपथ योजना के जउन किसम ले विरोध करत जात हे, ओ लोकतंत्र के हित म ठीक नइ हे।
मुंगेली म ही भारतीय जनता युवा मोर्चा के प्रदेस अध्यक्ष अमित साहू ह किहीन कि सेना म भर्ती होय के सपना देखइया युवा मन बर अग्निपथ योजना बहुत लाभ के हवय। ओमन ए योजना ल लेके कांग्रेस उपर युवा मन ल गुमराह करे के आरोप लगईन।

माओवादी-मुठभेड़

दंतेवाड़ा जिला के कटेकल्याण क्षेत्र म आज सुरक्षा बल संग होय मुठभेड़ म तीन झिन माओवादी मारे गीन। पुलिस के मुताबिक एमा एक माओवादी कटेकल्याण एरिया कमेटी के जनमिलिशिया कमांडर रिहीस।

कोरोना समाचार

आगामी कुछेक महीना म होवइया आयोजन अउ उत्सव म बड़ संख्या म लोगन के संघरे के संभावना ल देखत राज्य सरकार ह कोरोना संक्रमण ले बचाव बर जरूरी कदम उठाय के निरदेस दीन हे। खबर के मुताबिक देस के कुछ राज्य म कोरोना संक्रमण के बाढ़त मामला ल देखत केन्द्रीय स्वास्थ्य मंत्रालय ह जम्मों राज्य सरकार ल निरदेस जारी करे हे। ए निरदेस के अनुपालन म सामान्य प्रशासन विभाग के सचिव डॉक्टर कमलप्रीत सिंह ह सबो विभाग के सचिव संभागा आयुक्त अउ कलेक्टर ल चिट्ठी लिखे हे। चिट्ठी म अवइया उत्सव अउ आयोजन ल धियान म राखत अभी ले कोरोना म नियंत्रण बर जरूरी कदम उठाय के निरदेस दे गेहे। एखर बर कोरोना जांच के संख्या बढ़ाय के संगेसंग तुरते इलाज, टीकाकरण ल अपनाय बर केहे गेहे।

रथ यात्रा

काली भगवान जगन्नाथ के रथयात्रा निकलही। पाछु कुछे दिन ले प्रदेस म कोराना संक्रमण के बाढ़त मामला ल देखत राज्य सरकार ह एसो घलो रथयात्रा के बेरा होवइया धार्मिक आयोजन म बिसेस सावधानी राखे के निरदेस दीन हे। राज्यपाल अनुसुईया उइके अउ मुख्यमंत्री भूपेश बघेल ह भगवान जगन्नाथ के रथयात्रा के मउका म प्रदेसवासी मन ल बधाई अउ सुभकामना देवत किहीन कि रथयात्रा हमर आस्था अउ संस्कृति ले जुड़े परब हे।

अउ अब पेस हे मौसम के हाल…

प्रदेस म अवइया चौबीस घंटा के बेरा आने-आने जघा म हल्का ले मध्यम बरसा होय अउ गरज-चमक के संग छींटा-बौछार पड़े के संभावना हे। मौसम विभाग के मुताबिक अभी पंजाब ले बंगाल के खाड़ी तक एक द्रोणिका बने हे, जेखर प्रभाव ले प्रदेस म एक-दू जघा म गरज-चमक संग गाज गिरे अउ भारी बरसा होय के चेतावनी दे गेहे। पाछु चौबीस घंटा म राजधानी रईपुर समेत प्रदेस के आने-आने जघा म जोरदरहा बरसा होय के समाचार हवय।
इही बीच, जांजगीर-चांपा जिला के बालपुर गांव म गाज गिरे ले एक मनखे के मउत होगे। उहें, एक आने मनखे झूलस गीस, जिखर इलाज चांपा अस्पताल म होवत हे।
उहें, मुख्यमंत्री ह जशपुर जिला के सन्नाबाजार ढांढ क्षेत्र म काली गाज गिरे ले तीन झन के मउत होय म दुख जतावत मउत होय लोगन के परिवार मन ल चार-चार लाख रूपिया के आर्थिक सहायता मंजूर करे हे। स्थानीय विधायक विनय भगत ह आज सन्नाबाजार ढांढ म गाज गिरे ले परभावित तीनों के परिजन के घर जाके मुआवजा राशि के चेक सौंपीन।