आज दिनभर के खबर अपन गुरतुर छत्तीसगढ़ी भाखा म पढ़व

उप राष्ट्रपति-चुनाव

भारत के उप राष्ट्रपति के चुनाव छह अगस्त के होही। निर्वाचन आयोग ह बतईन कि उप राष्ट्रपति पद के चुनाव बर पांच जुलाई के अधिसूचना जारी करे जाही। उन्नीस जुलाई तक नामांकन पत्र भरे जा सकत हे अउ बीस जुलाई के नामांकन पत्र के जांच होही। निर्वाचन आयोग यहू बताय हे कि उप राष्ट्रपति के चुनाव म राज्यसभा के दू सौ तैंतीस निर्वाचित अउ बारह झिन मनोनीत सदस्य संग लोकसभा के पांच सौ तिरालीस निर्वाचित सदस्य भाग लेथे। लोकसभा के महासचिव ए चुनाव म निर्वाचन अधिकारी के भूमिका निभाही। उप राष्ट्रपति एम. वेकैंया नायडू के कार्यकाल दस अगस्त के सिरावत हे।

कोरोना समाचार

केन्द्र सरकार ह राज्य मन ल कोविड महामारी के खिलाफ सतर्क रेहे बर चेताय हे। पाछु कुछेक हफ्ता म कोरोना संक्रमण म बढ़ोतरी ल देखत ए निरदेस दे गेहे। केन्द्रीय स्वास्थ्य सचिव राजेश भूषण ह चौदह ठिन राज्य संग वीडियो कान्फ्रेंसिंग ले कोरोना संक्रमण के समीक्षा करीन।
ऐति, छत्तीसगढ़ म घलो कोरोना के मामला सरलग बढ़वार होवत हे। काली प्रदेस म संक्रमण के एक सौ छियासी ठन नवा मामला मिले हे। दुरूग जिला म सबले जादा सैंतालीस अउ रईपुर म छियालीस मरीज पाय गेहे। राज्य म कोरोना के सक्रिय मरीज के संख्या बाढ़के आठ सौ इंक्यावन होगे हे।
इही बीच, भारत के औषधि महानियंत्रक ह सीरम इंस्टीट्यूट ऑफ इंडिया के कोविड वैक्सीन ‘‘कोवोवैक्स‘‘ ल सात ले बारह बछर के आयु वरग के लइका मन बर आपातकालीन उपयोग के मंजूरी दे देहे।

मंत्री मंडल-ऋण समिति

केन्द्रीय मंत्रिमंडल ह प्राथमिक कृषि ऋण समिति के कम्प्यूटरीकरण ल मंजूरी दे देहे। केन्द्रीय सूचना अउ प्रसारण मंत्री अनुराग ठाकुर ह नई दिल्ली म संवाददाता मन ल बतईन कि मंत्रिमंडल के आर्थिक मामला के समिति ह फइसला करे हे कि तिरसठ हजार समिति के कम्प्यूटरीकरण करे जाही। एखर ले तेरह करोड़ किसान मन ल फायदा मिलही।

मुख्यमंत्री-भेंट मुलाकात

भेंट-मुलाकात कार्यक्रम म मुख्यमंत्री भूपेश बघेल ह कोरिया जिला के गांव कटकोना अउ बैकुंठपुर के दउरा करके लोगन के समस्या सुनीन। ए बेरा म मुख्यमंत्री ह द कटकोना मल्टीयूटिलिटी सेंटर के लोकार्पण करीन। श्री बघेल ह ए सेंटर म आलू के चिप्स बनाय के इकाई ल देखीन। ओमन कटकोना मुख्य रद्दा ले पहाड़पारा अउ पहाड़पारा ले करिछापर तक पक्का रद्दा बनाय, ग्राम पंचायत कौड़ीमार ले पैनारी रद्दा म पूल बनाय के घोसना करीन। संगेसंग कटकोना धान उपार्जन केन्द्र म नवा खातू गोदाम बनाय, चिरमिरी म सासकीय पॉलीटेक्निक कॉलेज अउ नवीन इंडोर स्टेडियम के स्थापना अउ खड़गवां म नवा स्वामी आत्मानंद अंग्रेजी माध्यम स्कूल बनाय के घोसना करीन।
उहें, श्री बघेल ह छोटे कलुवा म बिजली सब स्टेशन अउ ग्राम पंचायत फुनगा ले बेलबहरा रद्दा म पुल बनाय के बात किहीन।

माओवादी-गिरफ्तार

तेलगू देशम पार्टी के विधायक के हत्या समेत कई ठिन माओवादी घटना म सामिल रेहे पांच लाख रूपिया के इनामी माओवादी ल आंध्रप्रदेश पुलिस ह गिरफ्तार करे हे। गिरफ्तार माओवादी छत्तीसगढ़ के सरहदी क्षेत्र म कई ठिन घटना म सामिल रेहे हे। एखर तीर ले पुलिस ह उनचालीस लाख रूपिया नगदी समेत पांच ठिन डेटोनेटर अउ एक ठन पिस्टल बरामद करे हे।
ऐति, बीजापुर जिला के तोयनार थाना क्षेत्र म माओवादी मन कोति ले ग्राम पंचायत मोरमेड़ के सरपंच प्रतिराम कुड़ियम के हत्या करे के मामला आगू आय हे।

कृष्ण कुंज

प्रदेस के जम्मों नगरीय निकाय म अगस्त महीना म कृष्ण कुंज योजना के लोकार्पण होही। एखर बर अपर मुख्य सचिव वन अउ जलवायु परिवर्तन सुब्रत साहू ह राज्य के जम्मों कलेक्टर अउ वनमंडलाधिकारी मन ल चिट्ठी भेजके एखर तैयारी करे के निरदेस देहे। ए योजना म जम्मों नगरीय निकाय म न्यूनतम एक एकड़ के भूईंया म सांस्कृतिक महत्व के अउ जीवन उपयोगी पौधा रोपे जाही। एखर बर तीस जून तक पौधा ल रोपण क्षेत्र तक अमराय के निरदेस दे गेहे।

सरोज पांडेय-बयान

राज्यसभा सांसद डॉक्टर सरोज पांडेय ह किहीन हे कि राज्य सरकार के विकास सिरिफ पाटन क्षेत्र तक सीमटे हवय। पत्रकार मन ले गोठबात करत ओमन सरकार उपर चुनाव के पहिली करे गे वादा ल पूरा नइ करे के आरोप लगईन हे। डॉक्टर पांडेय ह किहीन कि कांग्रेस अग्निपथ योजना के विरोध करके युवा मन ल भटकावत हे। युवा मन बर सशस्त्र बल म सेवा खातिर अग्निपथ योजना क्रांतिकारी अउ परिवर्तनकारी पहल हवय। एखर ले युवक मन ल राष्ट्र सेवा के मउका मिलही। सांसद ह किहीन कि ए योजना ले उंखर क्षमता अउ कौशल के निर्माण होय के संगेसंग देस के रक्षातंत्र मजबूत होही।

बीएसपी-यूनियन मान्यता चुनाव

भिलाई इस्पात संयंत्र म यूनियन मान्यता चुनाव तीस जुलाई के कराय जाय के फइसला ले गेहे। चुनई बर अट्ठारह ठिन बूथ बनाय जाही। वोट डारे बर बिहनिया छह बजे ले संझा चार बजे तक के बेरा तय करे गेहे। उहें, तीस जुलाई के ही रतिहा आठ बजे ले वोट के गनती सुरू हो जही। आम मतदाता सूची के प्रारंभिक प्रकाशन करे गीस अउ अंतिम प्रकाशन पन्द्रह जुलाई के होही। नामांकन पत्र के जांच अट्ठारह जुलाई के करे जाही। नाव वापिस उन्नीस जुलाई तक ले सकत हे। उहें, बीस तारीख के चुनाव चिन्ह बांटे जाही।

थ्रो बॉल-प्रतियोगिता

राजस्थान के पुष्कर शहर म आयोजित पैंतालीसवां सीनियर राष्ट्रीय थ्रो-बॉल प्रतियोगिता म छत्तीसगढ़ के पुरूष वर्ग ह रजत अउ महिला वर्ग ह कांस्य पदक जीते हे। जानकारी के मुताबिक छत्तीसगढ़ के पुरूष टीम ह सेमीफाइनल म मुंबई ल दू-शून्य ले हरा के फाइनल म जघा बनाय हे। उहें, प्रतियोगिता म पंजाब अउ छत्तीसगढ़ के महिला टीम ल संयुक्त रूप ले तीसर स्थान मिले हे।

अउ अब जानबो मौसम के हाल..

प्रदेस म आज कोरिया, सूरजपुर, सरगुजा बलरामपुर, पेण्ड्रा रोड, बिलासपुर, कोरबा, मुंगेली, कबीरधाम, बेमेतरा अउ एखर ले लगे जिला म एक-दू जघा गरज-चमक के संग जोरदरहा बरसा होय के आसार हवय। उहें, कोनों-कोनो जघा म गाज गिरे के चेतावनी दे गेहे।
मौसम विभाग ह दुरूग, राजनांदगांव, रईपुर, बलौदाबाजार, जांजगीर, रायगढ़, महासमुंद, धमतरी, गरियाबंद, बालोद, कांकेर, कोंडागांव, नारायणपुर, बस्तर अउ एखर ले लगे जिला म गरज-चमक संग गाज गिरे अउ अंधड़ चले के संभावना जताय हवय।
इही बीच, जशपुर जिला म गाज गिरे ले तीन झन के मउत होगे। उहें, दू झिन गंभीर रूप ले झूलस गेहे, जउन मन ल अस्पताल म भर्ती कराय गेहे।

अउ अब थोरकुन समाचार सार म-

– छत्तीसगढ़ व्यावसायिक परीक्षा मंडल कोति ले एमएससी नर्सिंग अउ पोस्ट बेसिक नर्सिंग के प्रवेश परीक्षा तीन जुलाई के राखे जाही।

– दक्षिण पूर्व मध्य रेलवे के बिलासपुर मंडल के अनूपपुर-अमलाई सेक्शन म तीसर रेललाइन विद्युतीकरण के काम चलत हे, जेखर सेती आज अउ काली ए रद्दा म बरौनी-गोदिंया एक्सप्रेस रद्द रइही।

– आजादी के अमृत महोत्सव म मुंगेली के जिला कलेक्ट्रेट के मनियारी सभा कक्ष म राजस्व अउ पुलिस विभाग के अधिकारी मन बर विधिक जागरूकता कार्यशाला राखे गीस।

– राजनांदगांव के जिला रोजगार अउ स्वरोजगार मार्गदर्शन केन्द्र परिसर म काली तीस जून के प्लेसमेंट कैम्प राखे जाही, जेमा तेरह सौ पद बर भर्ती होही।

– अंबिकापुर के उदयपुर थाना क्षेत्र म आज बिहनिया ट्रक अउ कार के बीच होय भिड़त म भिलाई के रहवइया एके परिवार के दू झिन के मउत होगे। उहें, तीन झन आने लोगन गंभीर रूप ले घायल होगे हे।

और

– कोंडागांव जिला के कोतवाली पुलिस ह गांजा तस्करी के आरोप म एक मनखे ल गिरफ्तार करे हे। ओखर तीर ले एक लाख रूपिया के गांजा बरामद करे गेहे।