कलेक्टर-काॅन्फे्रंस
मुख्यमंत्री भूपेश बघेल ह किहीन हे कि गोधन न्याय योजना के संचालन अउ निगरानी के पूरा जिम्मेदारी जिला कलेक्टर मनके हे। ए योजना के पूरा देस म चरचा हे। अर्थशास्त्री अउ सामाजिक संगठन मनके नजर घलो ए योजना उपर हे। ओमन किहीन कि गोबर एक ठिन कीमती वस्तु बनत हे। जउन तरह ले धान खरीदी, लघु वनोपज के खरीदी अउ तेंदूपत्ता संग्रहण के काम करे जात हे, अवइया बेरा म अइसने बेवस्था गोबर खरीदी अउ एखर ले तैयार वर्मी कम्पोस्ट के मार्केटिंग के करना होही।
श्री बघेल ह आज रईपुर म वीडियो कान्फ्रेंसिंग के माध्यम ले कलेक्टर मन ल संबोधित करत रिहीन। मुख्यमंत्री ह किहीन कि गौठान छत्तीसगढ़ के परंपरा के हिस्सा हरय, जउन ल आधुनिक रूप देके व्यवसाय ले जोड़े जात हे। एखर ले गांव वाले मन ल रोजगार के अवसर मिलही। श्री बघेल ह किहीन कि अवइया बीस जुलाई हरेली तिहार ले गोधन न्याय योजना के प्रदेसभर म सुरूवात होही। राज्य म पूरा हो चुके गौठान मन म बीस जुलाई ले अलग-अलग तारीख म कारीकरम आयोजित होही।
मुख्यमंत्री ह कान्फ्रेंस म फसल मनके गिरदावरी के तैयारी, वृक्षारोपण अभियान के प्रगति, श्रमिक मनके कौशल उन्नयन अउ उंखर रोजगार के स्थिति के संगेसंग क्वारेंटाइन सेंटर म रहइया श्रमिक मन ले संबंधित बिसय के समीक्षा घलो करीन।
गोधन न्याय योजना-प्रतीक चिन्ह
मुख्यमंत्री भूपेश बघेल अउ कृषि मंत्री रविन्द्र चैबे ह आज रईपुर म वीडियो कान्फ्रेंसिंग के माध्यम ले आयोजित कलेक्टर कान्फ्रेंस के दउरान छत्तीसगढ़ सरकार के महत्वाकांक्षी गोधन न्याय योजना के ‘‘प्रतीक चिन्ह-लोगो‘‘ के विमोचन करीन। राज्य सरकार ह अवइया बीस जुलाई हरेली तिहार के दिन ले गोधन न्याय योजना के सुरूवात करही।
उहें, गौसेवा महासंघ प्रतिनिधिमंडल ह काली गौसेवा आयोग के नव-नियुक्त अध्यक्ष महंत रामसुंदर दास के अगुवई म मुख्यमंत्री भूपेश बघेल के अभिनंदन करीन। ए मउका म मुख्यमंत्री ह किहीन कि गोधन न्याय योजना ह गांव के हालत ल सुधारे के संगेसंग ग्रामवासी मन ल स्वावलंबी बनाय म मददगार होही। ओमन बतईन कि योजना के पशुपालक मन ले गोबर के खरीदी घलो करे जाही। एखर ले पशु मनके खुला म चराई म रोक लगही अउ पशुपालन बर लोगन के रूझान बाढ़ही।
कोरोना मरीज
प्रदेस म आज अब तक मिले सूचना के मुताबिक आने-आने जिला ले कोरोना संक्रमित छियासी नवा मरीज के पुष्टि होय हे। एमा ले पचपन मरीज राजधानी रईपुर ले मिले हे। उहें, राजनांदगांव अउ दुरूग ले नौ-नौ, बालोद ले आठ, गरियाबंद ले पांच नवा मरीज के पहिचान होय हे।
राजधानी रईपुर म आज मिले पचपन कोरोना संक्रमित मरीज मन म सांति नगर इलाका म रहइया एके परिवार के अट्ठारह सदस्य सामिल हे। एखर अलावा नगर निगम के पूर्व अधिकारी संग दू झिन पत्रकार घलो कोरोना पाॅजिटिव पाय गेहे। उहें, एसपी कार्यालय म पदस्थ एक झिन हेड कांस्टेबल घलो कोरोना संक्रमित पाय गेहे। राजधानी के मंगल बाजार इलाका हाॅटस्पाॅट बने हे, जिहां ले बड़का संख्या म कोरोना संक्रमित मरीज सामने आवत हे।
ओति, राजनांदगांव जिला म आज कोरोना संक्रमित नौ मरीज मिले हे, जेमा ले तीन आईटीबीपी के जवान हरय। उहें, दू मरीज राजनांदगांव नगर निगम क्षेत्र ले हे अउ एक-एक मरीज मोहला अउ डोंगरगढ़ विकासखंड ले मिले हे।
उहें, दुरूग जिला म घलो आज मंझनिया तक नौ नवा कोरोना पाॅजिटिव मरीज मनके पुष्टि होय हे। एमा ले सात मरीज बीएसएफ के जवान हरय, जउन मन अग्रसेन भवन म क्वारेंटाइन रिहीस।
सिंहदेव-समीक्षा बैठक
स्वास्थ्य मंत्री टी.एस. सिंहदेव ह आज रईपुर म स्वास्थ्य विभाग के बइठका लेके स्वास्थ्य सुविधा के समीक्षा करीन। ए मउका म ओमन ह सबो जिला के स्वास्थ्य केन्द्र के संग आने महत्वपूर्ण बिसय म चरचा करीन।
स्वास्थ्य मंत्री ह चरचा के दउरान अधिकारी मन ल स्वच्छता ल प्राथमिकता देके निरदेस दीन। संगेसंग जउन जिला म चिकित्सा उपकरण के कमी हे, ओमन ल पहिचान करके आगू के कार्ययोजना बनाय बर किहीन। ओमन ह कोरोना संक्रमण के दउरान जनसेवा ले जुड़े चिकित्सक मनके काम के सराहना करत किहीन कि डाॅक्टर मनके निष्ठा अउ समर्पण ले छत्तीसगढ़ ह अच्छा काम करत हे।
एम्स-उपलब्धि
अखिल भारतीय आयुर्विज्ञान संस्थान-एम्स रईपुर म कोरोना संक्रमित भिलाई के नवासी बछर के एक झिन सियान एम.एस. मिश्रा पूरा तरह ले ठीक होय के बाद अपन घर लहुट आय हे। ए छत्तीसगढ़ के सबले जादा उमर के कोरोना संक्रमित मरीज रिहीन, जउन ह कोरोना वायरस ल मात देहे। एखर बर ओमन अउ उंखर परिवार वाले मन ह एम्स के डाॅक्टर मनके अभार जताईन।
एम्स के निदेसक डाॅक्टर नितिन एम. नागरकर ह बतईन कि ए बुजुर्ग मरीज ल उनतीस जून के कोरोना पाॅजिटिव आय के बाद दू जुलाई के एम्स रईपुर म भर्ती कराय गे रिहीस। आठ जुलाई के उंखर दू सैंपल निगेटिव आय के बाद ओमन ल छुट्टी दे दे गीस। ओमन किहीन कि नवासी बछर के श्री मिश्रा के पूरा तरह ले ठीक होके घर लहुटना डाॅक्टर मनके मनोबल ल अउ बढ़ाही।
ओपन स्कूल-असाइनमंेंट परीक्षा
छत्तीसगढ़ राज्य ओपन स्कूल के परीक्षा अब असाइनमेंट पद्धति ले होही। छत्तीसगढ़ राज्य ओपन स्कूल के सचिव प्रोफेसर व्ही.के. गोयल ह बतईन कि बारहवीं के परीक्षा बर परीक्षार्थी मन ल आवंटित परीक्षा केन्द्र के माध्यम ले अवइया बाईस ले उनतीस जुलाई तक असाइनमेंट ल बांटे जाही। अइसने, दसवीं के परीक्षा बर परीक्षार्थी मन ल आवंटित परीक्षा केन्द्र के माध्यम ले अवइया महीना चार ले नौ अगस्त तक असाइनमेंट काम दे जाही।
ओमन बतईन कि परीक्षार्थी मन ल जे दिन असाइनमेंट दे जाही, ओला दू दिन के भीतर संबंधित परीक्षा केन्द्र म जमा करना जरूरी होही। कक्षा बारहवीं बर असाइनमेंट जमा करे के आखिरी तारीख चैबीस ले इकतीस जुलाई तक रइही। उहें, कक्षा दसवीं के परीक्षार्थी मन बर असाइनमेंट जमा करे के आखिरी तारीख छह ले ग्यारह अगस्त तक होही। ए दउरान छुट्टी के दिन म घलो असाइनमेंट लेके अउ जमा करे के काम करे जाही।
खबर के मुताबिक छत्तीसगढ़ राज्य ओपन स्कूल के हाईस्कूल अउ हायर सेकेंडरी के मुख्य अउ अवसर परीक्षा कोरोना वायरस संक्रमण के सेती अभी तक आयोजित नइ हो पाय रिहीस।
भाजपा-जनसंपर्क अभियान
प्रधानमंत्री नरेन्द्र मोदी के अगुवई म केन्द्र सरकार के दूसरा कार्यकाल के एक बछर पूरा होय के मउका म भारतीय जनता पार्टी प्रदेस म जनसंपर्क अभियान चलावत हे। ए दउरान भाजपा के पदाधिकारी अउ कार्यकर्ता गांव-गांव अउ घर घर जाके लोगन ल केन्द्र सरकार के महत्वाकांक्षी योजना अउ उपलब्धि के जानकारी देवत हे। इही कड़ी म आज जांजगीर म विधायक नारायण चंदेल के अगुवई म भाजपा कार्यकर्ता मन ह घर-घर जाके लोगन ले मिलके केन्द्र सरकार के योजना अउ उपलब्धि के जानकारी दीन।
ए मउका म विधायक नारायण चंदेल ह किहीन कि केन्द्र के नरेन्द्र मोदी सरकार ह अपन पहिली कार्यकाल म कीर्तिमान रचे के संग गरीब मनके हित म कतकोन योजना बनाय हे। दूसरा कार्यकाल म घलो गरीब मनके हित म कतकोन फइसला ले गेहे, जेखर ले ओखर आर्थिक स्थिति सुधरे हे।
रोजगार कैम्प
प्रवासी मजदूर मन ल रोजगार ले जोड़े खातिर बिलासपुर जिला के जनपद पंचायत मस्तूरी म रोजगार कैम्प के आयोजन करे गीस। ए कैम्प म मस्तूरी अउ तीर-तखार के गांव – कर्रा, टिकारी, भदौरा, पेण्ड्री, लिमतरा अउ मुड़पार के करीबन अड़तालीस प्रवासी मजदूर मन ह भाग लीन। ए दउरान आने-आने उद्योग मन म तेरह श्रमिक मनके चयन करे गीस।
सड़क दुर्घटना
कबीरधाम जिला म आज होय एक सड़क दुर्घटना म दू झिन मनखे के मउत होगे। उहें, एक झिन मनखे गंभीर रूप ले घायल होगे हे, जउन ल जिला अस्पताल म भर्ती कराय गेहे।
हमर संवाददाता ले मिले जानकारी के मुताबिक रईपुर रोड के दुल्लापुर अउ सोनपुरी के तीर मेटाडोर अउ ट्रक के बीच टक्कर होगे, जेमा मेटाडोर के ड्राईवर अउ कंडेक्टर के मउका म मउत होगे। उहें, ट्रक ड्राईवर गंभीर रूप ले घायल होगे।
राजनांदगांव-रेलवे कार्य
रेलवे डहार ले राजनांदगांव ले बोरतालाब रेलवे स्टेसन तक तीसरा लाईन बिछाय के काम तेजी ले चलत हे। पूर्ण लाॅकडाउन के दउरान ए काम करीबन महीनाभर बंद रिहीस। राजनांदगांव बाकल अउ डोंगरगढ़ ले जटकन्हार तक बेस बनाय के बाद अब पटरी बिछाय के काम करे जात हे। मोतीपुर-रामनगर क्षेत्र म घलो तीसरा रेललाइन के काम सुरू होगे हे।
रेलवे के अधिकारी मन बतईन कि तीसरा लाइन के काम दुरूग ले राजनांदगांव तक पूरा हो चुके हे। बोरतालाब तक एखर विस्तार करे जात हे। अधिकारी मन बतईन कि साल के आखिरी तक तीसरा लाइन म ट्रेन चलना सुरू हो जही।
वन विभाग-ऐप
वन मंत्री मोहम्मद अकबर ह काली रईपुर म वन विभाग के अधिकारी मनके समीक्षा बइठका लीन। ए दउरान श्री अकबर ह वन विभाग के काम म कसावट लाय के संगेसंग अधिकारी अउ करमचारी मनके उपस्थिति दरज करे के संबंध मोबाइल एप्लीकेशन के जांच करीन। ओमन मोबाइल ऐप म विभागीय अमला के सत-प्रतिसत रजिस्ट्रेसन पूरा करके एखर सुघ्घर संचालन बर निरदेस दीन।
खबर के मुताबिक ए मोबाइल ऐप के माध्यम ले वन विभाग के लगभग छह हजार सात सौ अमला के क्षेत्रीय गतिविध मन आॅनलाईन करे जाही।
सिंधी अकादमी-स्वायत्तता
छत्तीसगढ़ सिंधी अकादमी के अस्तित्व ल खतम करे के बात गलत हे। राज्य सरकार डहार ले सिंधी भासा अउ संस्कृति संबंधी गतिविधि मनके संचालन बर पूरा अधिकार दे जात हे।
खबर के मुताबिक संस्कृति विभाग के तहत छत्तीसगढ़ सिंधी अकादमी के गठन करे गेहे। ए संबंध म चार जून दो हजार सात के छत्तीसगढ़ राजपत्र म विधिवत अधिसूचना के प्रकासन घलो होय हे। राज्य सासन के संस्कृति नीति अउ छत्तीसगढ़ संस्कृति परिषद के उद्देश्य के अनुरूप छत्तीसगढ़ म सिंधी भासा अउ साहित्य के संरक्षण अउ विकास बर छत्तीसगढ़ सिंधी अकादमी काम करही। वर्तमान म छत्तीसगढ़ सिंधी अकादमी के उपलब्ध बजट, सबो चल-अचल संपत्ति अउ अधिकार म कोनों बदलाव नइ होय हे। समाज ल चिंता करे जरूरत नइ हे।