आज दिनभर के खबर ल अपन गुरतुर छत्तीसगढ़ी भाखा म पढ़व

मुर्मू-नामांकन

राष्ट्रीय जनतांत्रिक गठबंधन-एनडीए के राष्ट्रपति पद के उम्मीदवार द्रौपदी मुर्मू ह आज संसद भवन परिसर म नामांकन दाखिल करीन। ओमन प्रधानमंत्री नरेन्द्र मोदी, केन्द्रीय मंत्री राजनाथ सिंह, अमित शाह, नितिन गडकरी, भाजपा अध्यक्ष जे.पी. नड्डा अउ भाजपा अउ एनडीए सासित राज्य मनके मुख्यमंत्री अउ एनडीए सहयोगी के नेता मनके उपस्थिति म पर्चा भरीन।
श्रीमती मुर्मू ह नामांकन पत्र के चार सेट दाखिल करीन। नामांकन पत्र के पहिली सेट म प्रस्तावक के रूप म हस्ताक्षर करइया वाला मन म प्रधानमंत्री नरेन्द्र मोदी अउ गृहमंत्री अमित शाह सामिल हवय। फेर, दूसर सेट म हस्ताक्षर करइया वाला मन म केन्द्रीय मंत्री राजनाथ सिंह अउ भाजपा अध्यक्ष जे.पी. नड्डा सामिल हवय।
उहें, छत्तीसगढ़ ले प्रस्तावक मन म केन्द्रीय राज्यमंत्री रेणुका सिंह, सांसद रामविचार नेताम, संतोष पांडेय अउ मोहन मंडावी अउ विधायक पुन्नूलाल मोहले, ननकीराम कंवर अउ डमरूधर पुजारी सामिल हवय।
नामांकन दाखिल करे के आखिरी तारीख उनतीस जून हरय। मतदान अट्ठारह जुलाई के होही अउ वोट मनके गिनती इक्कीस जुलाई के करे जाही।

अग्निपथ योजना-पंजीकरण

भारतीय वायुसेना म नवा अग्निपथ योजना के अंतर्गत अग्निवीर मनके पहिली दल के भर्ती बर पंजीकरण के प्रक्रिया आज ले सुरू होगे हे। इच्छुक उम्मीदवार आधिकारिक वेबसाइट अग्निपथ वायु डॉट सीडीएसी डॉट इन म भर्ती प्रक्रिया बर ऑनलाइन आवेदन कर सकत हे। ऑनलाइन परीक्षा चौबीस जुलाई ले इकतीस जुलाई के बीच देशभर के दू सौ पचास केन्द्र मन म आयोजित करे जाही। भर्ती प्रक्रिया ए साल के आखिरी तक पूरा हो जही। थल सेना अउ नौसेना एक जुलाई ले पंजीकरण प्रक्रिया सुरू करही।

मुख्यमंत्री भवन-लोकार्पण

मुख्यमंत्री भूपेश बघेल ह आज नवा रईपुर म छत्तीसगढ़ राज्य वन निगम के अधिकारी-कर्मचारी मन बर करीबन छह करोड़ रूपिया के लागत ले बने पांच मंजिला भवन के वर्चुअल लोकार्पण करीन। ए नवा बने भवन म सोलह प्रकोष्ठ हरय। उहें, चौथा मंजिल म ट्रांजिट हॉस्टल अउ कम्यूनिटी हॉल बने हे। ए मउका म मुख्यमंत्री ह किहीन कि ए भवन के बने ले विभागीय अधिकारी-कर्मचारी मन ल बेहतर आवासीय सुविधा उपलब्ध होही। कार्यक्रम के अध्यक्षता वन मंत्री मोहम्मद अकबर ह करीन।

मुख्यमंत्री-बैठक

मुख्यमंत्री भूपेश बघेल ह इंदिरा संगीत अउ कला विश्वविद्यालय खैरागढ़ अंतर्गत रायगढ़ म घलो संगीत अउ नृत्य महाविद्यालय खोले के प्रस्ताव तियार करे के निरदेस देहे। ए बात श्री बघेल ह आज रईपुर म राखे गे छत्तीसगढ़ संस्कृति परिषद के बइठका के अध्यक्षता करत किहीन। बइठका म परिषद के अवइया कार्ययोजना उपर विचार-विमर्श करे गीस। उहें, साहित्य अकादमी, कला अकादमी, आदिवासी अउ लोककला अकादमी, छत्तीसगढ़ फिल्स विकास निगम, छत्तीसगढ़ राजभाषा आयोग अउ छत्तीसगढ़ सिन्धी अकादमी के आने-आने कारीकरम बर करीबन पांच करोड़ रूपिया के रासि स्वीकृत करे गीस।

हाईकोर्ट-शिक्षक प्रमोशन

शिक्षक मनके प्रमोशन मामला के अगला सुनवाई बारह जुलाई के होही। छत्तीसगढ़ उच्च न्यायालय म आज ए मामला के सुनवाई सुरू होईस। आज कोर्ट ह ए संबंध म मामला के पूरा जानकारी लीन। ओखर बाद अगला सुनवाई बर बारह जुलाई के तारीख तय करीन। तब तक स्टे लगे रइही अउ सिक्षक मनके प्रमोशन के प्रक्रिया बाधित रइही।

मुंगेली-प्रशिक्षण

मुंगेली म जिला प्रशासन के मार्गदर्शन म युवा मन ल प्रतियोगी परीक्षा अउ सैन्य बल भर्ती परीक्षा के तियारी बर छह सौ युवा मन ल प्रशिक्षण दे जात हे। जिला प्रसासन अउ बी..आर. साव धर्मादा ट्रस्ट डहार ले ए युवा मन ल निःशुल्क टी-शर्ट बांटे गीस। संघरा प्रशिक्षक मन ल टी-शर्ट, लोवर अउ ट्रैकसूट दे गीस। ट्रस्ट डहार ले प्रशिक्षण प्राप्त करत युवा मन ल जरूरी सामान खरीदे बर करीबन तीन लाख रूपिया के चेक प्रदान करे गीस।

कोरोना समाचार

प्रदेस म कोरोना संक्रमण के मामला फेर बाढ़े लगे हे। काली प्रदेस म नौ हजार आठ सौ चौसठ सैंपल मनके जांच म एक सौ चौदह मनखे मन संक्रमित पाय गीन। सबले जादा छब्बीस मरीज काली रईपुर जिला म मिलीस। उहें, बलौदाबाजार जिला म इक्कीस, जशपुर म उन्नीस और कोरिया जिला म तेरह ठिन नवा मरीज आगू अईन। ए बेरा प्रदेस म कोरोना के छह सौ बत्तीस मरीज मनके इलाज आने-आने अस्पताल अउ होम आइसोलेशन म चलत हे। प्रदेस म काली कोरोना संक्रमण ले एक मनखे के मउत होगे हे।
इही बीच, कोरोना के बाढ़त मामला ल देखत रईपुर नगर निगम सतर्क होगे हे। निगम ह कॉन्टेक्ट ट्रेसिंग, होम आइसोलेशन जइसे काम बर बारह सदस्य के टीम बनाय हे। अपर आयुक्त अभिषेक अग्रवाल ल ए टीम के नोडल अधिकारी बनाय गेहे। ए टीम कोरोना संक्रमित मनखे ल अस्पताल पहुंचाय, कोविड जांच अउ रिपोर्टिंग, होम आइसोलेशन म रहइया मरीज मनके ट्रेकिंग अउ कोविड केयर सेंटर म जरूरी समन्वय बर काम करही।

मानसून

दक्षिण-पश्चिम मानसून के छह जुलाई तक पूरा देस म पहुंच के संभावना हवय। मौसम विभाग ह किहीन कि मानसून सामान्य रूप ले आठ जुलाई तक पूरा देस म पहुंचथे।
ऐति, छत्तीसगढ़ म काली आने-आने जगह मन म हल्का ले मध्यम बरसा होय के अथवा गरज-चमक के संग छींटा पड़े के संभावना हवय। मौसम विभाग के अनुसार एक चक्रवाती घेरा दक्षिण पूर्व उत्तरप्रदेश के उपर फइले हे। उहें, एक ठिन दूसर चक्रीय चक्रवाती घेरा झारखंड ले विदर्भ तक बने हे। एखर सेती प्रदेस म एक-दू जघा मन म गरज-चमक के संग गाज गिरे के अउ भारी बरसा होय के संभावना हरय।

भाजपा घेराव

आज भारतीय जनता पार्टी के पार्षद मन पार्टी के जिला अध्यक्ष श्रीचंद सुंदरानी अउ नगर निगम म नेता प्रतिपक्ष मीनल चौबे के अगुवई म रईपुर नगर-पालिका निगम कार्यालय के घेराव करीन। ए दउरान ओमन केन्द्र ले स्मार्ट सिटी योजना के अलावा प्रधानमंत्री आवास योजना म भ्रष्टाचार अउ अमृत मिशन योजना म स्तरहीन काम के आरोप लगईन।

रेलवे अधिकारी-मौत

बिलासपुर कटनी मार्ग म अनूपपुर-शहडोल के बीच चलत नॉन इंटरलॉकिंग काम के दउरान रेलवे के क्षेत्रीय प्रबंधक योगेन्द्र सिंह भाटी ट्रेन के चपेट म आ गे, जेखर ले ओमन के मउत होगे। ओमन दक्षिण-पूर्व मध्य रेलवे के बिलासपुर डिवीजन अंतर्गत बैकुंठपुर म पदस्थ रिहीन।
मुख्यमंत्री भूपेश बघेल ह दू हजार अट्ठारह बैच के भारतीय रेलवे सेवा के अधिकारी श्री भाटी के अचानक निधन उपर गहरा सोक व्यक्त करत ओमन ल श्रद्धांजलि दीन हे।

संक्षिप्त समाचार

– मुख्यमंत्री भूपेश बघेल ह आज अपन निवास कार्यालय म रानी दुर्गावती के बलिदान दिवस म ओमन के चित्र उपर फूलमाला चढ़ाके ओमन ल श्रद्धांजलि दीन। श्री बघेल ह किहीन कि वीरांगना रानी दुर्गावती के साहस अउ बलिदान हमेसा देसवासी मन ल प्रेरित करत रिही।

– राजनांदगांव जिला के डोंगरगढ़ थाना म पदस्थ सहायक उप निरीक्षक तुलाराम बांक ल राष्ट्रपति रामनाथ कोविंद ह ओमन के अच्छा काम बर प्रशस्ति पत्र देके सम्मातन करीन।

– छत्तीसगढ़ म आयुष डहार ले हरेक गुरूवार के लगाय जाने वाला सियान जतन क्लीनिक विशेष ओपीडी म काली प्रदेसभर म नौ हजार ले जादा सियान मनके निःशुल्क इलाज करे गीस।

– जनसंघ के संस्थापक डॉक्टर श्यामाप्रसाद मुखर्जी के पुण्यतिथि म भारतीय जनता पार्टी के अल्पसंख्यक मोर्चा ह काली राजनांदगांव म समता वृद्ध आश्रम जाके सियान मन ल फल बांटीन।

– डॉक्टर खूबचंद बघेल कृषक रत्न पुरस्कार बछर दू हजार बाईस बर किसान मन ले इकतीस जुलाई तक आवेदन मंगाय गेहे।

और

– कोंडागांव जिला के फरसगांव थाना पुलिस ह अंतर्रार्ज्यीय गांजा तस्कर ल गिरफ्तार करके उंखर करा ले लगभग पांच लाख रूपिया के गांजा बरामद करे हे।