गृह मंत्रालय-अग्निवीर
केन्द्रीय गृह मंत्रालय ह अग्निवीर मन ल केन्द्रीय सशस्त्र पुलिस बल अउ असम राइफल्स म भर्ती बर दस प्रतिशत आरक्षण दे जाय के फइसला ले हवय। कार्यालय ह ट्वीट म बताय हे कि आरक्षण के अलावा ओमन ल आयु सीमा म तीन बछर के छूट घलो दे जाही। एखर पहिली बैच बर आयु सीमा म पांच बछर के छूट होही।
इही बीच, नेहरू युवा केन्द्र संगठन ह ए अभियान चलाके देसभर के युवा मन ले मिलही अउ ओमन ल नवा सुधार योजना अग्निपथ के प्रमुख बिसेसता के जानकारी दीहीं।
नेता प्रतिपक्ष-बयान
नेता प्रतिपक्ष धरमलाल कौशिक ह मुख्यमंत्री भूपेश बघेल के अग्निपथ योजना बर दे गे बयान उपर आपत्ति जतईन हे। ओमन किहीन कि मुख्यमंत्री के बयान अफसोस जनक हे अउ ओमन ह बिना कोई तथ्य ल जाने कुछु भी कहत हे। श्री कौशिक ह किहीन कि युवा पीढ़ी म राष्ट्र भक्ति के भाव ल मजबूत बनाय बर अग्निपथ अभियान के सुरूवात करे गेहे।
उहें, नेता प्रतिपक्ष ह काली बिलासपुर जिला के ग्राम परसदा म अमृत सरोवर अभियान के भूमिपूजन करीन।
एनडीए सरकार-आठ वर्ष
प्रधानमंत्री नरेन्द्र मोदी के अगुवई म केन्द्र के एनडीए सरकार के कार्यकाल के आठ बछर पूरा होय के मउका म भाजपा रायपुर शहर जिला इकाई डहार ले गरीब कल्याण जनसभा के आयोजन करे गीस। ए मउका म पूर्व मुख्यमंत्री अउ भाजपा के राष्ट्रीय उपाध्यक्ष डॉक्टर रमन सिंह ह किहीन कि पाछु आठ बछर म मोदी सरकार ह जनभागीदारी ल प्रमुखता दीन।
कारीकरम म बिलासपुर सांसद अरूण साव, रईपुर सांसद सुनील सोनी, पूर्व मंत्री बृजमोहन अग्रवाल संघरा पार्टी के पदाधिकारी अउ कार्यकर्ता मन मौजूद रिहीन।
छत्तीसगढ़ महतारी-चित्र
प्रदेस म अब सबो सासकीय कार्यक्रम म छत्तीसगढ़ महतारी के चित्र ल स्थान दे जाही। मुख्यमंत्री भूपेश बघेल ह ए संबंध म ट्वीट करके किहीन हे कि छत्तीसगढ़ के वैभव अउ संपन्नता किसान मन ले हवय। उंखर खुसहाली म छत्तीसगढ़ महतारी के आशीर्वाद हे। राज्य सरकार ह छत्तीसगढ़ महतारी के चित्र ल सबो सासकीय कार्यालय म जगह दे जाय के फइसला लीन हे, जेखर ले लोगन ल अपन माटी के गौरवसाली इतिहास अउ संस्कृति के सुरता राहय।
फ्लाई ओवर/अंडरब्रिज लोकार्पण
मुख्यमंत्री भूपेश बघेल ह काली राजधानी रईपुर के कमल विहार, नेशनल हाइवे तीर बने आठ सौ इकतीस मीटर लंबा फ्लाई ओव्हर के उद्घाटन करीन। एखरे संग मुख्यमंत्री ह सत्ताईस करोड़ रूपिया ले जादा के दूसर निर्माण काम के भूमिपूजन घलो करीन। ए मउका म ओमन किहीन कि रईपुर सहर के जनजीवन ल अउ जादा सुविधाजनक बनाय बर सरकार ह सरलग काम करत हे।
उहें, मुख्यमंत्री ह रईपुर के अग्रसेन चउक ले रामनगर रद्दा म तेलघानी नाका के तीर रेलवे अंडर ब्रिज के लोकार्पण घलो करीन। एखर सुरू होय ले समता कॉलोनी, अग्रेसन चउक ले गुढ़ियारी, रामनगर अउ हीरापुर जवइया मन ल सुविधा मिलही।
बोरवेल-दिशा-निर्देश
राज्य सरकार ह सुरक्षा ल देखत प्रदेस म अनुपयोगी अउ खुल्ला बोरवेल ल तुरते ढाके के निरदेस दीन हे। एखर बर कलेक्टर मन ल पत्र जारी करके अनुपयोगी बोरवेल, ग्रेबल पैक बोरवेल, सामान्य बोरवेल, नवीन नलकूप खनन, रिंगवेल अउ ओपन वेल के सेती होवइया दुर्घटना के रोकथाम के बारे म सुरक्षा के उपाय करे बर निरदेस दे गे हवय।
भोरमदेव-योग
आठवां अंतर्राष्ट्रीय योग दिवस इक्कीस जून के मनाय जाही। ए मउका म देस के पचहत्तर चिन्हांकित ऐतिहासिक, पर्यटन अउ धार्मिक महत्व के जगह म योग प्रदर्सन के आयोजन करे जाही। एमा छत्तीसगढ़ के कबीरधाम जिला के चौरा गांव के भोरमदेव मंदिर के घलो चुनाव करे गेहे। ए आयोजन केन्द्रीय जनजातीय कार्य मंत्रालय के सहयोग ले करे जाही। ए बछर अंतर्राष्ट्रीय योग दिवस के थीम हवय – ‘‘योगा फॉर ह्यूमेनिटी‘‘। ए मउका म देस के प्रतिष्ठित जघा ल देखावत विश्व स्तर म ब्रांड इंडिया उपर ध्यान दे जाही।
ओति, दक्षिण पूर्व मध्य रेलवे डहार ले आज ले बिलासपुर म योगा प्रशिक्षण सुरू करे गीस, जउन ह अवइया बीस जून तक चलही।
जिले की चिट्ठी
सुनइया मन ल बतादन कि आकाशवाणी समाचार डहार ले काली संझा छह बजके तीस मिनट म ‘‘जिले की चिट्ठी‘‘ कार्यक्रम के प्रसारण करे जाही। ए कार्यक्रम आकाशवाणी के रायपुर केंद्र डहार ले प्रसारित होही। जेला जम्मों केंद्र मन ह एके संघरा रिले करही। ए बखत के अंक म ‘‘रायगढ़‘‘ जिला के गतिविधि मनके बारे म जानकारी दे जाही।
भाजयुमो-बैठक
भारतीय जनता युवा मोर्चा-भाजयुमो के बइठका काली जांजगीर-चांपा म प्रदेस सह प्रभारी नितिन नबीन के अगुवई म राखे गीस। बइठका म श्री नबीन ह किहीन कि छत्तीसगढ़ सरकार ह युवा मन ल छले के काम करत हे। युवा मोर्चा ह युवा मनके हक म लड़ाई लड़े बर तैयार राहय। ओमन ह बूथ स्तर अउ शक्ति केन्द्र स्तर म काम करइया युवा मन ल सुझाव दीन। बइठका म संगठन महामंत्री पवन साय ह युवा मन ले लक्ष्य प्राप्त करे बर समय प्रबंधन, परस्पर समन्वय अउ समान भाव ले काम करे के सलाह दीन।
एसीबी-कार्रवाई
एंटी करप्शन ब्यूरो के टीम ह पाछु रतिहा कोंडागांव म पदस्थ सिंचाई विभाग के कार्यपालन अभियंता रामबहादुर सिंह, अनुविभागीय अधिकारी रामबरन चौरसिया अउ सब इंजीनियर डी.के आर्या ले रिश्वत लेवत रंगेहाथों गिरफ्तार करीन। ए सबो आरोपी मन ल आज कोंडागांव जिला न्यायालय म पेस करे गीस, जिहां ले उंखर जमानत अर्जी खारिज करके तीन दिन के रिमांड म जेल भेज दे गीस।
बातों-बातों-में
सुनइया मन ल बतादन कि प्रादेशिक समाचार एकांश डहार ले समसामयिक विषय उपर आधारित साप्ताहिक कार्यक्रम ‘‘बातों-बातों-में‘‘ म ए बखत अवइया इक्कीस जून के होवइया आठवां अंतर्राष्ट्रीय योग दिवस उपर केन्द्रित रही। ए संबंध म आकाशवाणी समाचार ह गोठबात करीस छत्तीसगढ़ योग आयोग के अध्यक्ष ज्ञानेश शर्मा ले। एखर प्रसारण आकाशवाणी के रायपुर केन्द्र डहार ले काली बिहनिया नौ बजके तीस मिनट म करे जाही। एला छत्तीसगढ़ के जम्मों आकाशवाणी केन्द्र रिले करही।
कर्मचारी राज्य बीमा-टोल फ्री नंबर
राज्य सासन डहार ले श्रम विभाग म करमचारी राज्य बीमा सेवा म बीमित हितग्राही मनके सुविधा बर संचालनालय स्तर म टोल फ्री नंबर- एक आठ शून्य शून्य दो तीन तीन एक तीन पांच एक बनाय गे हवय। ए नंबर के माध्यम ले कार्यालयीन दिवस म बिहनिया ग्यारह बजे ले संझा पांच बजे तक योजना मनके बारे म जानकारी ले जा सकत हे।
आकाशीय बिजली-मौत
जशपुर जिला म लोदाम चौकी क्षेत्र के ग्राम पतराटोली म आकाशीय बिजली गिरे ले दू झन माईलोगिन मनके मउत होगे। उहें, दू झन दूसर माईलोगिन मन झुलस गे हवय, जिंखर इलाज अस्पताल म चलत हे।
ओति, बेमेतरा जिला के ग्राम घाठोली म घलो आकाशीय बिजली के चपेट म आय ले एक झिन युवक के मउत होगे अउ दू झन गंभीर रूप ले झुलस गे।
अइसने, कोरिया जिला के बैकुंठपुर म पैलेस तीर महुआ बीने बर गे एक झन मनखे के आकाशीय बिजली गिरे ले मउकाच म मउत होगे।
सामुदायिक पुलिसिंग
सामुदायिक पुलिसिंग अउ एक्शन प्रोग्राम म बलरामपुर जिला के माओवाद परभावित क्षेत्र चुनचुना म जिला अउ पुलिस प्रसासन के अधिकारी मनके जनचौपाल लगाके लोगन के समस्या सुनीन अउ ओला जल्दी निपटाय के बात किहीन। जनचौपाल म पुलिस महानिरीक्षक अजय कुमार यादव, कलेक्टर कुंदन कुमार, पुलिस अधीक्षक मोहित गर्ग अउ जिला अउ पुलिस विभाग के टीम के अलावा झारखंड सरकार डहार ले घलो पुलिस के दल पहुंचे रिहीस। ए मउका म ग्रामीण मन ल साड़ी, लुंगी, गमछा, लइका मनके कापी-किताब अउ युवा मन ल खेल सामग्री बांटे गीस।