केंद्र सरकार ह अग्निपथ भर्ती योजना बर अधिकतम आयु सीमा इक्कीस ले बढ़ाके तेइस साल कर देहे। रक्षा मंत्रालय ह बताइन कि आयु म छूट केवल एके बार ए साल के प्रस्तावित भर्ती म ही दे जाही। पाछू दू साल म कोनो भर्ती नइ होय के सेती ए निर्णय ले गेहे। सरकार ह कीहिन कि अग्निवीर मन ल केंद्रीय सशस्त्र पुलिस बल अउ राज्य पुलिस के भर्ती म प्राथमिकता दे जाही। ए भरम फैलाय जात हे कि अग्निवीर मनके भविष्य सुरक्षित नइ हे।
सरकार ह कीहिन कि जेन युवा उद्यमी बने के इच्छुक होही ओमन ल वित्तीय पैकेज अउ बैंक ले कर्जा मिलही। अइसन अग्निवीर जेन मन आगू पढ़ई चालू रखही ओमन ल बारहवीं कक्षा के समकक्ष प्रमाण पत्र दे जाही । अग्निपथ योजना के माध्यम ले सशस्त्र बल मन म युवा मन बर जादा अवसर बाढ़ जाही। अवइया साल मन म सशस्त्र बल म मौजूदा भर्ती ले तीन गुना जादा युवा मनके भर्ती होही। बतादन कि केंद्रीय मंत्रिमंडल ह हालेच म अग्निपथ योजना ल स्वीकृति दे रीहिन हे।
ए योजना के माध्यम ले भारतीय युवा मन ल सशस्त्र बल के नियमित कैडर म चार साल बर सेवा करे के मउका मिलही। एखर तहत ए साल छियांलिस हजार ले जादा युवा मनके भर्ती करे जाही। सशस्त्र बल म युवा मनके भागीदारी बढ़ाय बर अग्निपथ योजना ल तैयार करे गेहे।
इही बीच भारतीय सेना के मध्य भारत एरिया के जनरल ऑफिसर कमांडिंग लेफ्टिनेंट जनरल एम.के. दास ह कीहिन कि अग्निपथ योजना सेना म भर्ती के एक अइसे योजना हे जेन ह देश के युवा मनके संगेसंग राष्ट्र के हित म घलो हरय। आज नवा रायपुर स्थित छत्तीसगढ़, ओड़िशा सब एरिया मुख्यालय म पत्रकार मनले चर्चा करत लेफ्टिनेंट जनरल ह कीहिन कि अग्निपथ योजना के तहत जेन युवा भर्ती करे जाही।
चार साल बाद ओमा ले पच्चीस प्रतिशत सर्वश्रेष्ठ युवा मन ल सेना म नियमित नौकरी दे जाही। बाकी के युवा मन घलो चार साल सेना म नौकरी के बाद अनुशासित प्रशिक्षित अउ कुशल होही, एखर सेती ओमन ल भी केंद्रीय सशस्त्र पुलिस बल, राज्य पुलिस या निजी क्षेत्र म नौकरी मिले म कोनो कठिनाइ नइ होही।
लेफ्टिनेंट जनरल ह कीहिन कि ये योजना के तहत देश के हरएक भाग ले युवा मनके भर्ती करे जाही। ओमन बताइन कि छत्तीसगढ़ के आदिवासी बहुल क्षेत्र के युवा मन ल अग्निपथ योजना के तहत सेना म भर्ती होय बर विशेष मार्गदर्शन दे जाही। ए इलाका के इच्छुक युवा मन अपन तीर के सेना भर्ती कार्यालय म अपन नाव अउ मोबाइल नंबर नोट करवा सकत हे। सेना के अधिकारी ओमन ले संपर्क करके भर्ती प्रक्रिया ले जुड़े मार्गदर्शन दीही।
देश के कुछ इलाका मन म ए योजना के विरोध म होय हिंसा के बारे म लेफ्टिनेंट जनरल दास ह कीहिन कि युवा मन ल योजना के बारे म पहिली पूरा जानकारी हासिल करना चाही अउ कोनो भी हिंसक प्रदर्शन ले दू रहना चाही। काबर कि कहूं ए प्रदर्शन म सामिल होय ले पुलिस म मामला दर्ज होही त ओमन भर्ती प्रक्रिया खुदे बाहिर हो जाही।
प्रधानमंत्री नरेंद्र मोदी ह कीहिन कि भारत के उत्कृष्ट युवा अधिकारी मन ल आकांक्षी जिला मन म तैनात किया जाना चाही। जेखर ले ओमन अपन रचनात्मक अउ नवा विचार मनके जरिया उंहा ठोस बदलाव ला सकय । श्री मोदी काली हिमाचल प्रदेश के धर्मशाला म मुख्य सचिव मनके तीन दिन के राष्ट्रीय सम्मेलन के अध्यक्षता करत रीहिन।
धर्मशाला म पंद्रह ले सतरा जून तक राखे गे मुख्य सचिव मनके राष्ट्रीय सम्मेलन म छत्तीसगढ़ के मुख्य सचिव अमिताभ जैन घलो शामिल होइन। ओमन शिक्षा, कृषि अउ नगरीय विकास के छत्तीसगढ़ मॉडल के बारे म जानकारी दीन। सम्मेलन म छत्तीसगढ़ के कृषि उत्पादन आयुक्त डॅाक्टर कमलप्रीत सिंह, नगरीय प्रशासन विभाग के सचिव अलरमेल मंगई डी., स्कूल शिक्षा विभाग के सचिव डॅाक्टर एस. भारतीदासन, दंतेवाड़ा कलेक्टर दीपक सोनी अउ गरियाबंद जिला के कलेक्टर प्रभात मलिक घलो शामिल होइन।
हिमाचल प्रदेश म राखे गे वेटलिफ्टिंग रैंकिंग के राष्ट्रीय प्रतियोगिता म छत्तीसगढ़ ले राजनांदगांव के वेटलिफ्टर ज्ञानेश्वरी यादव ह एक घांव फेर स्वर्ण अउ रजत पदक जीतके प्रदेश के नाम रौशन करे हे। प्रतियोगिता के जूनियर वर्ग म उनचास किलोग्राम म ज्ञानेश्वरी यादव गोल्ड मेडल जीत के देश के नंबर वन वेटलिफ्टर बन गेहे। उंहें ओमन सीनियर वर्ग म रजत पदक प्राप्त करीन हे।
ए उपलब्धि म मुख्यमंत्री भूपेश बघेल, खेलमंत्री उमेश पटेल अउ राजनांदगांव कलेक्टर तारण प्रकाश सिन्हा ह ज्ञानेश्वरी यादव ल बधाई अउ शुभकामना दीन हे।
मुख्यमंत्री भूपेश बघेल ह कीहिन हे कि लइका मन ल नशा ले दूर राखे बर खेल अउ व्यस्त दिनचर्या ले जोड़ना चाही। ए बात ओमन छत्तीसगढ़ बाल संरक्षण आयोग के स्थापना दिवस म रायपुर म – बच्चों का नशे के आदत से बचाव चुनौतियां और समाधान – विसय उपर राखे गे कार्यशाला म कीहिन। ओमन कीहिन कि लइका मन म नशा के आदत न सिरिफ उंखर बचपन छिनत हे फेर जीनगी ल घलो नुकसान पहुंचावत हे।
ए मउका म मुख्यमंत्री ह आयोग के नवा वेबसाईट ल लांच करीन। ओमन आम लोगन मन म नशा के प्रति जागरूकता लाये बर ब्रोशर अउ लईका मनके गोठ पुस्तिका के विमोचन घलो करीन। ए मउका म श्री बघेल ह प्रतिभाशाली लइका मन ल आने-आने क्षेत्र म ओमन के विशेष उपलब्धि बर प्रशस्ति पत्र घलो दीन। मुख्यमंत्री ह नशा के खिलाफ रायपुर, बिलासपुर अउ सूरजपुर म चलत अभियान ल पूरा प्रदेश म लागू करे के आवश्कता घलो बताइन।
राजधानी रायपुर के पंढरी स्थित हाट बाजार म ए दिन म जगार मेला के आयोजन करे जात हे। मुख्यमंत्री भूपेश बघेल ह काली मेला जाके उंहा लगाये गे आने-आने स्टॉल मनके अवलोकन करीन अउ शिल्पकार अउ बुनकर मनके कलाकृति के सराहना करीन। ए मउका म श्री बघेल ह बने शिल्पी मन ल बछर दू हजार उन्नीस-बीस अउ दू हजार बीस-इक्कीस के राज्य स्तरीय पुरस्कार ले सम्मानित करीन। उन्नीस जून तक चलइया ए मेला म छत्तीसगढ़ समेत बारा ठिन राज्य मनके एक सौ चालीस स्टॅाल लगाये गेहे।
प्रदेश म चिटफंड कंपनी मनके खिलाफ सरलग कार्रवाई चालू हे । एखर तहत ए कंपनी मनके संपत्ति जब्ती कर निवेशक मन ल ओमन के राशि लहुटाय जात हे। ए कड़ी म आज रायपुर के मेडिकल कॉलेज ऑडिटोरियम म निवेशक न्याय कार्यक्रम के आयोजन करे गीस। ए दउरान मुख्यमंत्री ह अनियमित वित्तीय कंपनी देव्यानी प्रॉपर्टी लिमिटेड के नौ हजार आठ सौ छियासठ निवेशक मन ल ओमन के राशि लहुटाइन।
मुख्यमंत्री भूपेश बघेल ह आज बछर दू हजार बीस म करे गे तेंदूपत्ता संग्रहण काम बर संग्राहक मन ल चौंतीस करोड़ इकतालिस लाख रूपिया के प्रोत्साहन राशि प्रदान करीन। एमा चार सौ बत्तीस समिति मनके चार लाख बहत्तर हजार संग्राहक शामिल हरय। ए राशि ओमन के बैंक खाता म अंतरित करे गीस। ए मउका म मुख्यमंत्री ह वन वृत्त स्तर म रायपुर, बिलासपुर, कांकेर, जगदलपुर अउ सरगुजा म वनोपज अउ उत्पाद मनके परीक्षण बर स्थापित प्रयोगशाला मनके लोकार्पण घलो करीन।
खाद्यमंत्री अमरजीत भगत के तबियत खराब होय के सेती ओमन ल अंबिकापुर के एक निजी अस्पताल म भर्ती कराय गेहे, जिहां डॅाक्टर मनके निगरानी म ओमन के इलाज चलत हे। मिले जानकारी के अनुसार श्री भगत के तबियत काली संझा ले बिगड़त रीहिस। देर रात जादा परेसानी होय म ओमन ल अस्पताल म भर्ती कराये गीस।
प्रदेश के स्वास्थ्य मंत्री टी.एस. सिंहदेव के नाव अउ ओमन के फोटो के उपयोग करके अधिकारी कर्मचारी मनले ठगी के प्रयास के मामला आगू आय हे। श्री सिंहदेव ह ए मामला के शिकायत रायपुर स्थित सिविल लाइन थाना म दर्ज कराइन हे ।
मिले जानकारी अनुसार वाट्सअप के माध्यम ले श्री सिंहदेव के नाव अउ ओमन के फोटो के दुरूपयोग करत दू ठिन फर्जी मोबाईल नंबर ले वाणिज्यिक कर विभाग के अधिकारी कर्मचारी मन ल मैसेज भेजके ठगी के प्रयास करे जात रीहिस। ए संबंध म जानकारी मिले के बाद श्री सिंहदेव ह थाना म रिपोर्ट दर्ज कराइन जेखर बाद पुलिस ह मामला के जांच म जूट गेहे।