प्रदेश के जम्मों सरकार स्कूल मन ह आज ले खुल गे। मुख्यमंत्री ह आज अपन रायपुर स्थित निवास कार्यालय ले वचुअर्ल माध्यम ले शाला प्रवेश उत्सव के शुभारंभ करीन। मुख्यमंत्री ह बस्तर संभाग के बंद होय दू सौ आठ स्कूल मन ल एक घांव फेर खोले के शुरूआत करीन। अब बीजापुर जिला के एक सौ अंठावन, सुकमा के संतानबे, नारायणपुर के चार अउ दंतेवाड़ा जिला के एक ठिन स्कूल ल एक घांव फेर खोले गेहे।
जानबा के मुताबिक पंद्रह साल पहिली माओवाद प्रभावित बस्तर म चार सौ ले जादा स्कूल मन ल बंद कर देगे रीहिस अउ ए जगा म रहइया लोगन मन ल सलवा जुडूम अभियान के दउरान शिविर म रेहे के सुविधा देगे रीहिस। ए जम्मों परिवार अब अपन घर म लहुट गेहे। मुख्यमंत्री ह नवा प्रवेश करइया लईका मन ल शुभकामना देवत कीहिन कि शिक्षा के क्षेत्र म नवाचार अपनाय के ए सिलसिला ह आगू घलो चलही।
उंहें कार्यक्रम म शामिल स्कूल शिक्षा मंत्री प्रेमसाय सिंह टेकाम ह जम्मों लइका मन ल नवा शिक्षा सत्र अउ शाला प्रवेश उत्सव के शुभकामना दीन।
जांजगीर-चांपा जिला के गांव पिहरिद के बोरवेल म फंसे लइका राहुल साहू के रेस्क्यू ऑपरेशन म बड़का भूमिका देवइया एनडीआरएफ, एसडीआरएफ सेना अउ पुलिस के जवान मनके संगेसंग जिला प्रशासन के लोगन मन ल मुख्यमंत्री ह रायपुर म सम्मानित करीन। ए मउका म मुख्यमंत्री ह कीहिन कि जांजगीर चांपा जिला के बोर म फंसे लइका ल निकाले बर चलाये गे रेस्क्यू ऑपरेशन उपर डॅाक्यूमेंट्री फिल्म बनाना चाही, जेखर ले रेस्क्यू टीम के ए अनुभव ल प्रदेश अउ देश के लोगन मन घलो समझ सके।
मुख्यमंत्री ह कीहिन कि रेस्क्यू टीम के लोगन मन ह जउन लगन अउ समर्पण भाव ले काम करीन, ओह प्रशंसा के बात हरय। मुख्यमंत्री ह बताइन कि राहुल के पढ़ई लिखई अउ इलाज के पूरा खर्चा ल राज्य शासन उठाही।
मुख्यमंत्री ह कीहिन हे कि रूरल इंडस्ट्रीयल पार्क ले महात्मा गांधी के ग्राम स्वराज अउ स्वावलंबी गांव के सपना साकार होही। गौठान मन ल इंडस्ट्रीयल पार्क के रूप म विकसित करे बर उंहा आर्थिक ढंग ले चलाये के जरूरत हे। ए मउका म मुख्यमंत्री ह किसान अउ गांव के लोगन मन ल रोका-छेका अभियान म मदद करे के बात कहिन।
मुख्यमंत्री ह आज रायपुर स्थित अपन निवास म राखे गे एक ठिन कार्यक्रम म वचुअर्ल माध्यम ले गोधन न्याय योजना के तहत पशुपलइया, गौठान के महिला समूह अउ गौठान समिति मन ल दस करोड़ नब्बे लाख रूपिया के भुगतान करीन। ए योजना ले प्रदेश के दू लाख ग्यारा हजार ले जादा ग्रामीण पशुपालक अउ किसान मनल फायदा होवत हे।
प्रधानमंत्री नरेंद्र मोदी के अगवई म केंद्र के एनडीए सरकार के कामकाज के आठ बछर पूरा होय के मउका म आज राजनांदगांव म एक ठिन कार्यक्रम राखे गीस। जेमा पूर्व मुख्यमंत्री अउ भाजपा के राष्ट्रीय उपाध्यक्ष डॅाक्टर रमनसिंह अउ सांसद संतोष पांडे शामिल होइन।
ए मउका म राखे गे गरीब कल्याण जनसभा ल संबोधित करत डॅाक्टर रमनसिंह ह कीहिन कि मोदी सरकार ह आठ साल म जोरदरहा मेहनत करके गरीब, किसान, माइलोगिन अउ जम्मों वर्ग के कल्याण करत हे।
नेता प्रतिपक्ष धरमलाल कौशिक ह राज्य सरकार ले विधानसभा के मानसून सत्र के बेरा ल दस दिन ले जादा करे के मांग करे हे। पत्रकार मनले गोठबात करत ओमन ले कीहिन कि राज्य सरकार ह सत्र के बेरा ल सीमित कर देहे। जेखर सेती जरूरी विषय उपर गोठबात नइ हो पाय ।
श्री कौशिक ह एक ठिन सवाल के जवाब म कीहिन कि प्रदेश के किसान मन ल खुल्ला बाजार म जादा भाव म खाद बिसाय बर मजबूर होना पड़त हे। प्रदेश म खाद के कालाबाजारी होवत हे। ओमन किसान मन ल सही भाव म खाद देवाय के मांग राज्य सरकार ले करे हे।
देश म एसो जनगणना के काम नइ करे जाय। भारत के रजिस्ट्रार जनरल कार्यालय ह प्रशासनिक सीमा ल फ्रीज करे के बेरा ल इकतीस दिसंबर तक बढ़ा देहे। पहिली ए बेरा तीस जून तक राखे गे रीहिस।
जानबा के मुताबिक कोरोना महामारी के सेती ए अभियान ल नइ कराय जात हे। जनगणना ले पहिली अधिसूचित जिला गांव, कस्बा, अउ आने प्रशासकि इकाई जइसे तहसील पुलिस स्टेशन मनके संख्या म बदलाव के बारे म राज्य मन डहार ले रजिस्ट्रार जनरल ल जानबा देना जरूरी होथे।
विश्व के सबले बड़का मीडिया नेटवर्क आकाशवाणी ल एक घांव फेर देश म सबले जादा विश्वास वाले इलेक्ट्रॉनिक मीडिया संगठन चुने गेहे। रायटर्स इंस्टीट्यूट डहार ले हालेच म छियालिस ठिन देश मन म कराय गे सर्वेक्षण के बाद जारी रिपोर्ट के मुताबिक आकाशवाणी अउ दूरदर्शन उपर लोगन मन म सबले जादा विश्वास हवय।
सर्वेक्षण के मुताबिक आकाशवाणी समाचार के विश्वसनीयता अउ प्रामाणिकता बहत्तर प्रतिशत त उंहें दूरदर्शन समाचार के इकहत्तर प्रतिशत हवय । आकाशवाणी अउ दूरदर्शन समाचार कोति लोगन मनके बिश्वास ह सरलग बाढ़त हे अउ एखर पहुंच घलो बाढ़ गेहे।
बस्तर म रेल सुविधा के विस्तार करे के मांग ल लेके इंहा के युवा मन ह काली रेल रोको आंदोलन करीन। ए दउरान स्टेशन म जाके आंदोलनकारी मन ह आरपीएफ अउ जिला पुलिस बल के संग थोरबहुत झुमा-झटकी करीन। रेलवे अधिकारी मन ह इंखर मनके प्रदर्शन ल देखत पांच ठिन मांग ल पूरा करे के लिखित आश्वासन दीन। जेखर बाद आंदोलन ल खतम करे गीस।
एति कोरिया जिला के जैती गांव म काली गाज गिरे ले दू झिन लइका के मउत होगे। ए दूनो लइका मन बाड़ी म खेलत रीहिन, इही दउरान गाज गिरगे। उंहें बालोद जिला के डौंडी लोहारा म पाछू रतिहा गाज गिरे ले अठाइस ठिन बकरा-बकरी के मउत होगे।
एति कोंडागांव जिला म कलेक्टर के अगवई म होय बइठका म फैसला ले गेहे कि बरसा के दउरान लोगन मन ल रेनवाटर हार्वेस्टिंग के माध्यम ले बरसा के जल ल सकेले बर पड़ही। जिला प्रशासन के टीम ह घरोघर जाके एखर जांच करही।
– दंतेवाड़ा जिला के कुंआकोंडा थाना क्षेत्र म कथित माओवादी मन डहार ले घर म लूटपाट के शिकायत इंहा के लोगन मन ह करे हे।
– रायपुर स्थित पंडित जवाहरलाल नेहरू सभागार म काली सतरह जून के देव्यानी प्रापर्टी लिमिटेड के निवेशक मनके पइसा ल दे जाही ।
– जशपुर जिला के तपकरा पुलिस ह गांजा तस्करी के मामला म तीन झिन लोगन मन ल गिरप्तार करे हे। ओखर मन तीर ले एक कुंटल गांजा जब्त करे गेहे, जेखर कीमत दस लाख रूपिया बताय जात हे ।
– महासमुंद जिला के एसडीएम कार्यालय म पदस्थ कर्मचारी ल एक झिन मनखे ले तीस हजार रूपिया के रिश्वत लेके आरोप म कलेक्टर ह निलंबित कर देहे।
– ऑल इंडिया सिविल सर्विसेस राष्ट्रीय हॉकी प्रतियोगिता म भाग लेबर प्रदेश के दल के गठन करे गेहे। खिलाड़ी मनके चयन काली करे जाही।
अउ
– जांजगीर-चांपा के पटवारी के खिलाफ एफआईआर दर्ज करे के विरोध म रायगढ़ जिला के पटवारी मन ह अनिश्चितकालिन हड़ताल करत हे।