प्रधानमंत्री नरेन्द्र मोदी ह अवइया डेढ़ बछर म दस लाख लोगन के भर्ती मिशन मोड म करे के निरदेस देहे। श्री मोदी ह आज सबो विभाग मन म अउ मंत्रालय मन म मानव संसाधन मनके स्थिति के समीक्षा करीन।
ए निर्णय बर केन्द्रीय गृहमंत्री अमित शाह ह प्रधानमंत्री ल धन्यवाद दीन हे। श्री शाह ह ट्वीट म किहीन कि ए निर्णय ले युवा मन म नवा आसा अउ विश्वास जागे हे।
उहें, केन्द्रीय सूचना अउ प्रसारण मंत्री अनुराग ठाकुर ह किहीन हे कि प्रधानमंत्री श्री मोदी ह पाछु कुछ बछर म सरकार ल अधिक जवाबदेह अउ सुशासन ल जन केन्द्रित बनाय हे। सरकार के अवइया डेढ़ बछर म दस लाख लोगन मनके भर्ती वाले प्रधानमंत्री कार्यालय के ट्वीट ल साझा करत हुए श्री ठाकुर ह किहीन कि आत्मनिर्भर भारत के दृष्टिकोण के दिशा म ये ह एक ठन अउ बड़े कदम आय।
केन्द्रीय सड़क परिवहन अउ राजमार्ग मंत्री नितिन गडकरी अउ शिक्षा मंत्री धर्मेन्द्र प्रधान ह घलो प्रधानमंत्री के ए फइसला के सराहना करीन।
अग्निपथ योजना
केन्द्र सरकार ह सैन्य मन म युवा मनके भर्ती बर अग्निपथ योजना ल मंजूरी दे देहे। केन्द्रीय रक्षा मंत्री राजनाथ सिंह ह बतईन कि ए योजना के अंतर्गत चुने गे युवा मन ल अग्निवीर केहे जाही। ओमन बतईन कि अग्निवीर मन ल आकर्षक मासिक पैकेज अउ तीनों सेना मन म लागू जोखिम अउ कठिनाई भत्ता दे जाही। उंखर कार्यकाल पूरा होय ले उनला एकमुश्त सेवानिधि पैकेज घलो दे जाही। ए योजना ले देशभक्त युवा मन ल सशक्त बल मन म चार साल सेवा करे के अवसर मिलही।
वायुसेना अध्यक्ष चीफ मार्शल वी.आर चौधरी ह किहीन कि ए योजना ले प्रतिभाशाली युवा मन ल वायुसेना म सेवा प्रदान करे के अवसर प्राप्त होही। उहें, नौसेना प्रमुख एडमिरल आर. हरिकुमार ह किहीन कि अग्निपथ योजना नवा युग के परिकल्पना आय। ओमन किहीन कि एखर से सैन्य बल मनके मानव संसाधन प्रबंधन म सकारात्मक प्रभाव पड़ही। एडमिरल हरिकुमार ह बतईन कि एमा महिला मनके नियुक्ति घलो करे जाही। उहें, सेना प्रमुख जनरल मनोज पांडेय ह किहीन कि अग्निपथ योजना सेना अउ देस बर एक रूपांतरण सुधार आय।
अग्नि वीर मन बर आयु सीमा सत्रह बछर पांच महीना ले इक्कीस बछर तक रखे गेहे। जनरल ड्यूटी सैनिक बर शैक्षिक योग्यता दसवीं निर्धारित करे गेहे।
विश्व रक्तदाता दिवस
आज विश्व रक्तदाता दिवस आय। रक्त के आवश्यकता अउ सुरक्षित रक्त चढ़ाय के बारे म जागरूकता बढ़ाय के उद्देश्य ले ए दिवस ल हर बछर चौदह जून के मनाय जाथे। ए बछर के स्लोगन आय – ‘‘रक्तदान करना एकजुटता का कार्य है। प्रयास में शामिल हो और जीवन बचाय‘‘।
विश्व रक्तदाता दिवस के अवसर म राजधानी रईपुर सहित प्रदेस के अलग-अलग जिला मन म कई ठिन कारीकरम आयोजित कर लोगन मन ल रक्तदान के प्रति जागरूक करे जात हे। राज्यपाल अउ इंडियन रेडक्रास सोसायटी छत्तीसगढ़ शाखा के अध्यक्ष अनुसुईया उइके ह आज राजभवन म प्रदेस के अलग-अलग जिला ले आय करीब साठ झन स्वैच्छिक रक्तदाता अउ स्वयंसेवी संस्था मनके प्रमुख मन ल सम्मानित करीन। ए अवसर म बीजापुर जिला बर एक ठिन एम्बुलेंस प्रदान करे गीस।
ये मउका म राज्यपाल ह लोगन ले आग्रह करीन कि ओमन स्वैच्छिक रक्तदान करे बर आगू आवय अउ ये कार्य म रेडक्रॉस सोसायटी ल सहयोग करय। ओमन किहीन कि शैक्षणिक संस्था मन ल अपन परिसर म कैम्प लगा के सबो विद्यार्थी मनके रक्त परीक्षण कर उंखर रक्त समूह अउ टेलीफोन नंबर के एक समग्र सूची बनाना चाही, जेखर ले जरूरतमंद ल जरूरत पड़े म रक्त मिल सकय। राज्यपाल ह किहीन कि रक्तदान के प्रति लोगन मन ल अउ अधिक जागरूक करे आवश्यकता हे।
उहें, रईपुर स्थित सर्किट हाउस म जूनियर डॉक्टर्स एसोसिएशन डहार ले आम लोगन मन ल रक्तदान के प्रति जागरूक करे बर शिविर के आयोजन करे गीस।
अमृत महोत्सव प्रश्नोत्तरी
पहलइया असमिया टी प्लान्टर के रूप म जाने, जाने वाला ओ सहीद के नाम बातवव, जेन ह 1857 म असम के युवा मन ल अंग्रेज मनके खिलाफ लड़ाई म सामिल होय के आह्वान करीन अउ क्रांतिकारी मनके एक ठिन दल घलो बनईन ?
श्रोता मन अपन उत्तर वाट्सअप नंबर – आठ आठ दू छै पांच चार छै दो छै दो – या ई-मेल आई डी – अमृत महोत्सव क्विज एट द रेट प्रसार भारती डॅाट जीओवी डॅाट इन म भेज सकथे।
भाग्यशाली प्रतिभागी ल विजेता के रूप म चुने जाही अउ काली के समाचार प्रभात म विजेता के नाव के घोषणा करे जाही। विजेता ल ई-प्रमाण पत्र अउ सांकेतिक पुरस्कार दे जाही।
अंतर्राष्ट्रीय योग दिवस
आठवां अंतर्राष्ट्रीय योग दिवस इक्कीस जून के मनाय जाही। इही कड़ी म केन्द्रीय सूचना अउ प्रसारण मंत्रालय के क्षेत्रीय लोकसंपर्क कार्यालय रईपुर डहार ले भिलाई म इक्कीस जून के आजादी के अमृत महोत्सव अउ अंतर्राष्ट्रीय योग दिवस उपर कारीकरम के आयोजन करे जाही। उहें, बाईस अउ तेईस जून के केन्द्र सरकार के योजना मन उपर आधारित प्रदर्सनी लगाय जाही, जेखर सुभारंभ सांसद विजय बघेल करही।
मुंगेली-पत्रकारवार्ता
केन्द्र सरकार डहार ले धान सहित चौदह खरीफ फसल मनके न्यूनतम समर्थन मूल्य म बढ़ोतरी करे जाय ले प्रदेस के किसान मन म बड़ उछाह देखे जात हे। आज मुंगेली स्थित भाजपा कार्यालय म भारतीय जनता पार्टी के किसान मोर्चा के पदाधिकारी राकेश तिवारी ह किहीन कि धान के समर्थन मूल्य म सौ रूपिया के वृद्धि होय हे। ओमन किहीन कि केन्द्र सरकार ह पाछु आठ बछर के दउरान किसान मनके हित म कई ठिन फइसला लेहे, जेखर लाभ छत्तीसगढ़ के किसान मन ल घलो मिलत हे। ओमन राज्य सरकार उपर किसान मन से भेदभाव करे के आरोप लगाय हे।
उहें, केन्द्र के मोदी सरकार के कार्यकाल के आठ बछर पूरा होय के उपलक्ष्य म मुंगेली जिला म भारतीय जनता पार्टी अनुसूचित जाति मोर्चा के युवा मन ह बाईक रैली निकालीन। ए अवसर म विधायक अउ पूर्व मंत्री पुन्नूलाल मोहले सहित बड़ संख्या म कार्यकर्ता मन उपस्थित रिहीन।
राज्यपाल-उद्यानिकी विवि
राज्यपाल अनुसुईया उइके ह महात्मा गांधी उद्यानिकी अउ वानिकी विश्वविद्यालय ले जुड़े कॉलेज मन म काम ल उचित ढंग से संचालित करे के निरदेस अधिकारी मन ल दीन। राजभवन म आयोजित बइठका म राज्यपाल ह किहीन कि उद्यानिकी विश्वविद्यालय ले जुड़े महाविद्यालय मन म लंबित कार्य मन ल जल्द पूरा करे जाय। संगेसंग विद्यार्थी अउ शोधार्थी मन ल घलो उचित सुविधा दे जाय। राज्यपाल ह विश्वविद्यालय म रजिस्ट्रार नियुक्त करे के निरदेस घलो दीन।
रन फॉर यूनिटी
आजादी के अमृत महोत्सव के तहत रायपुर रेल मंडल डहार ले काली ‘रन फॉर यूनिटी‘ कारीकरम के आयोजन करे गीस। ए कारीकरम म मंडल रेल प्रबंधक संजय कुमार गुप्ता के संग रेलवे सुरक्षा ले जुड़े अधिकारी अउ कर्मचारी मन सामिल होईन। ए मउका म रईपुर मंडल के अलग-अलग स्टेसन मन म निःशुल्क जल के वितरण करे गीस।
मौसम
प्रदेस म काली कई जगह म हल्का ले मध्यम बरसा होय या गरज-चमक के संग छींटा पड़े के संभावना हे। मौसम विभाग के अनुसार एक द्रोणिका पूर्वी उत्तरप्रदेश ले मणिपुर तक स्थित हे। उहें, एक दूसरइया द्रोणिका दक्षिण पूर्व उत्तरप्रदेश ले दक्षिण छत्तीसगढ़ तक बने हुए हे। एखर प्रभाव ले काली गरज-चमक के संग अंधड़ चले अउ आकाशीय बिजली गिरे के संभावना हे।
इही बीच, कोरिया जिला के छरछा बस्ती म आज आकाशीय बिजली गिरे ले पांच झिन लोगन मन झुलस गे, जेन मन ल जिला अस्पताल म भर्ती कराय गेहे।