केन्द्रीय सूक्ष्म, लघु अउ मध्यम उद्यम राज्यमंत्री भानूप्रताप सिंह वर्मा ह आज राजनांदगांव जिला पंचायत के सभाकक्ष म विभागीय योजना मनके समीक्षा करीन। ए बेरा ओमन अधिकारी मन ले किहीन कि सासन के कल्याणकारी योजना मनके क्रियान्वयन बर सबो झन ल मिलके काम करना होही। ओमन किहीन कि योजना के लाभ आखिरी मनखे तक पहुंचे, ए लक्ष्य होना चाही। श्री वर्मा ह किहीन कि सूक्ष्म, लघु अउ मध्यम उद्यम के अंतर्गत छोटे-छोटे यूनिट सरलग काम करत हे, जेखर अंतर्गत हुनरमंद कारीगर मन ल ऋण देके फायदा पहुंचाय जात हे। लोगन मन तक सासन के योजना मन ल पहुंचाय बर समन्वित तरीका ले काम करे के जरूरत हे।
मुख्यमंत्री-भेंट मुलाकात
मुख्यमंत्री भूपेश बघेल के भेंट-मुलाकात कार्यक्रम के तीसर चरण के सुरूवात आज जशपुर जिला के पत्थलगांव विधानसभा क्षेत्र के गांव बंटईकेला म जुन्ना शिव मंदिर म पूजा-पाठ करके करीन। मुख्यमंत्री ह बंटईकेला गांव म चौपाल लगईन अउ गांव वाले मन ले योजना के फीडबैक लीन। संगेसंग उंखर समस्या घलो सुनीन।
श्री बघेल ह बागबाहर के नायब तहसीलदार उदयराज सिंह ल जाति प्रमाण पत्र बनाय म लापरवाही बरते के सिकईत म तुरते निलंबित कर दीस। उहें, धान खरीदी म अनियमितता के आरोप म कोटबा सोसायटी के कर्मचारी मन ल घलो निलंबित कर दीस।
उहें, मुख्यमंत्री ह गांव वाले मनके मांग म प्रेम नगर म घुघरी नदी अउ महादेवमुड़ा म एनीकट बनाय बर अउ डोकड़ा गांव म 32 केवी के बिजली उपकेन्द्र स्थापित करे के घोसना करीन। एखर अलावा कांसाबेल ब्लॉक म इंडोर स्टेडियम, खुटेला गांव म नवा स्कूल भवन निर्माण अउ महादेव डांड म पुलिस चौकी स्थापित करे के घोसना करीन।
नशामुक्ति केन्द्र शुभारंभ
महिला अउ बाल विकास मंत्री अनिला भेंड़िया ह काली बालोद म एकीकृत नशामुक्ति अउ पुनर्वास केन्द्र के सुरूवात करीन। ए मउका म श्रीमती भेंड़िया ह किहीन कि नशामुक्ति केन्द्र म नशा के लत ल खतम करे बर नसा ले छूटकारा देवाय बर अउ एखर ले दूरिहा रेहे के परामर्श दे जाथे। ए केन्द्र के खुले ले नशा के लत ले प्रभावित लोगन मन ल नशापान ले छुटकारा पाय म मदद मिलही।
केन्द्र म निःशुल्क स्वास्थ्य जांच के संग योगाभ्यास, मेडिटेशन, संगीत, व्यायाम, इंडोर गेम सहित आने सुविधा दे जाही। एखर ले पहिली श्रीमती भेंड़िया ह बालोद जिला के गांव झलमला म जिला निःशक्त पुनर्वास केन्द्र के सुरूवात करीन। ओमन किहीन कि अब जिला म पुनर्वास केन्द्र के सुविधा होय ले जरूरतमंद मन ल बाहिर जाय बर नइ पड़ही। जिला के दिव्यांगजन मन ल हर सुविधा मिलही।
नया शिक्षा सत्र
प्रदेश म अवइया 16 जून ले नवा शैक्षणिक सत्र सुरू होही। स्कूल सिक्षा मंत्री डॉक्टर प्रेमसाय सिंह टेकाम ह ए संबंध म सबो मंत्री, संसदीय सचिव, सांसद विधायक, नगरीय निकाय अउ पंचायत के प्रतिनिधि मन ल चिट्ठी लिखके केहे हे कि ओमन शाला प्रवेश उत्सव म सामिल होवय। ओमन किहीन कि सबो जनप्रतिनिधि स्कूल मन म नियमित उपस्थिति बर विशेष प्रोत्साहन अउ मार्गदर्शन देवय। संगे-संग यहू सुनिश्चित करे कि कोन्हों लइका स्कूल झन छोड़य।
एक्सीलेंस अवॉर्ड
दंतेवाड़ा जिला ल स्कील डेवल्पमेंट के क्षेत्र म अच्छा काम करे बर एक्सीलेंस अवॉर्ड ले सम्मानित करे गेहे। ए पुरस्कार बर छत्तीसगढ़ ले दंतेवाड़ा अउ महासमुंद के चयन करे गे रिहीस। नई दिल्ली म आयोजित एक समारोह म जिला पंचायत के सीईओ ह ए अवॉर्ड ल ग्रहण करीन।
माओवादी-गिरफ्तार
बेमेतरा के एक निजी अस्पताल म इलाज कराय के बेरा गिरफ्तार करे गे इनामी माओवादी जयराम कुरूटी ल पुलिस ह काली न्यायालय म पेस करीस, जिहां ले ओमन ल न्यायिक रिमांड म जेल भेज दे गीस। उहें, माओवादी के मददगार के रूप म एक झिन 10 साल के लइका अउ अस्पताल के डॉक्टर ले पूछताछ करे जात हे।
सुनइया मन ल बतादन कि बेमेतरा पुलिस ह दू दिन पहिली जिला मुख्यालय के एक निजी अस्पताल म इलाज करात एक माओवादी अउ ओखर सहयोगी ल गिरफ्तार करे रिहीस।
ओति, बीजापुर जिला म बासागुड़ा थाना क्षेत्र के तर्रेम अउ उसूर क्षेत्र ले सुरक्षा बल मनके टीम ह एक इनामी सहित तीन माओवादी मन ल गिरफ्तार करे हे।
बातों-बातों-में
प्रादेशिक समाचार एकांश डहार ले समसामयिक विषय उपर आधारित हमर साप्ताहिक कार्यक्रम ‘‘बातों-बातों-में‘‘ म ए बखत प्रधानमंत्री नरेन्द्र मोदी के अगुवई म केन्द्र के एनडीए सरकार डहार ले बीते 8 साल म हासिल करे गे उपलब्धि मन उपर केन्द्रित रही। ए संबंध म आकाशवाणी समाचार ह छत्तीसगढ़ के पूर्व मुख्यमंत्री अउ भाजपा के राष्ट्रीय उपाध्यक्ष डॉक्टर रमन सिंह ह बातचीत करीन। एखर प्रसारण आकाशवाणी के रायपुर केन्द्र डहार ले काली बिहनिया 9 बजके 30 मिनट म करे जाही, जेला छत्तीसगढ़ के जम्मों आकाशवाणी केन्द्र रिले करही।
जिले की चिट्ठी
बोरवेल-हादसा
जांजगीर-चांपा जिला के पिहरीद गांव म बोरवेल म फंसे 11 साल के लइका ल बाहिर निकाले बर पाछु 20 घंटा ले रेसक्यू काम जारी हे। अभी तक लगभग 60 फूट खोदई करे जा चुके हे। मउका म एन.डी.आर.एफ. अउ एस.डी.आर.एफ के टीम के संग सेना के विशेषज्ञ मन मौजूद हे। कलेक्टर अउ पुलिस अधीक्षक बचाव कार्य के निगरानी करत हे।
इही बीच, मुख्यमंत्री भूपेश बघेल ह वीडियो कॉल के माध्यम ले बोरवेल म फंसे लइका के परिजन मन ले गोठबात करीन अउ किहीन कि ओमन बिल्कुल चिंता झन करय। लइका ल जल्दी ही सकुशल बाहिर निकाल ले जही। ओमन किहीन कि पूरा सासन-प्रशासन लइका के सकुशल वापसी म लगे हे। श्री बघेल ह लइका ल जल्दी ले जल्दी बोरवेल ले बाहिर निकाले बर सूरत के रोबेट विशेषज्ञ ले घलो संपर्क करे के निरदेस अधिकारी मन ल देहे।
सुपेबेड़ा-मौत
गरियाबंद जिला के सुपेबेड़ा म किडनी ले मउत के सिलसिला रूके के नाव नइ लेवत हे। आज किडनी के बीमारी ले पीड़ित एक अउ मनखे के मउत होगे। मृतक तुकाराम ह पेरिटोनियल डायलिसिस म रिहीस अउ एम्स रायपुर म एखर इलाज चलत रिहीस। एला मिलाके गांव म अब तक किडनी के बीमारी ले 77 लोगन के मउत होगे हे।
जानकारी बर बतादन कि तीन दिन पहिली ही स्वास्थ्य मंत्री टी.एस. सिंहदेव ह सुपेबेड़ा के दउरा करके स्थिति के जायजा ले रिहीन।
कृषि मंत्री-पत्र
राज्य के कृषि मंत्री रविन्द्र चौबे ह रासायनिक उर्वरक के कम आपूर्ति के बारे म केन्द्रीय रसायन अउ उर्वरक मंत्री डॉक्टर मनसुख मांडविया अउ केन्द्रीय कृषि मंत्री नरेन्द्र सिंह तोमर ल चिट्ठी लिखे हे। श्री चौबे ह अपन चिट्ठी म खरीफ सीजन बर अप्रैल अउ मई महीना के सप्लाई प्लान के अनुसार छत्तीसगढ़ ल उर्वरक प्रदाय के मात्रा के कमी ल ए महीना पूरा करत सप्लाई प्लान म संसोधित करे के आग्रह करीन।
यूपीएससी टॉपर अनुभव साझा
यूपीएससी म चयन बर जगह, भासा अउ कोचिंग के संग प्रतिष्ठित शैक्षणिक संस्था मनके घलो बाधा नइ हे। ए गोठ हाल ही म यूपीएससी ले चयनित छत्तीसगढ़ के पांच टॉपर मन ह किहीन। ओमन किहीन कि अपन पसंद के विषय चुनो अउ पढ़ो।
बीआईटी दुर्ग के युवा मन बर आयोजित एक कार्यशाला म रायपुर ले यूपीएससी टॉपर श्रद्धा शुक्ला ह किहीन कि ओमन कोचिंग नइ करीन अउ रईपुर ले ही पढ़ई करीन। उहें, पूजा ह बतईन कि ओमन मगरलोड ले हे अउ पढ़ई बर तीन साल तक सोशल मीडिया ले दुरिहा रिहीन। ओमन किहीन कि पहिली दू प्रयास म ओमन असफल रिहीन। फेर, हिम्मत नइ हारीन अउ आखिरी म सफलता हासिल करीन। अभिषेक अग्रवाल, अक्षय पिल्ले अउ दीपांजली ह घलो अपन-अपन अनुभव साझा करीन। कार्यशाला म कलेक्टर डॉक्टर सर्वेश्वर नरेन्द्र भूरे अउ पुलिस अधीक्षक डॉक्टर अभिषेक पल्लव ह घलो अपन अनुभव बतईन।
मौसम
मौसम विभाग ह प्रदेस म काली एक-दू जघा म गरज-चमक के संग बिजली गिरे के अउ अंधड़ चले के चेतावनी देहे। संगेसंग कुछु जगह मन म गरज-चमक के संग छींटा पड़े के संभावना हे।
मौसम विभाग के अनुसार प्रदेस म पश्चिम ले ठंडा अउ नमीयुक्त हवा आत हे, जेखर सेती अधिकतम तापमान म गिरावट देखे जात हे।
ऐति, जशपुर म तेज हवा के संग मूसलाधार बरसात होय के खबर हे, जेखर ले लोगन मन ल गर्मी ले राहत मिले हे।
संक्षिप्त समाचार
– राज्यपाल अनुसुईया उइके काली 12 जून के कबीरधाम जिला के भोरमदेव म आयोजित बैगा जनजातीय समाज के महासम्मेलन म सामिल होही।
– छत्तीसगढ़ राज्य ओपन स्कूल डहार ले आयोजित हाईस्कूल अउ हायर सेकेंडरी परीक्षा के आयोजन बर कार्ययोजना तैयार कर डरे हे।
– शिक्षा सत्र 2022 ले 24 बर बी.एड. अउ एम.एड. विभागीय परीक्षार्थी मनके प्रवेस प्रक्रिया सुरू होगे हे। परीक्षार्थी मन अवइया 25 जून तक एन.सी.आर.टी. के वेबसाइट म ऑनलाइन आवेदन भर सकथे।
– राजधानी रायपुर के छत्तीसगढ़ पंडरी हाट परिसर म जगार प्रदर्शनी मेला के सुरूवात होगे हे, जउन 19 जून तक चलही। ए मेला म छत्तीसगढ़ सहित आने राज्य मनके 124 स्टॉल लगाय गेहे।
– महासमुंद जिला के सिंघोड़ा थाना क्षेत्र म पुलिस ह एक ट्रक ले भारी मात्रा म गांजा बरामद करे गेहे। जेखर कीमत 1 करोड़ 42 लाख रूपिया बताय जात हे। ए मामला म ट्रक चालक ल गिरफ्तार करे गेहे।
अउ
– जांजगीर-चांपा जिला म संचालित चिटफंड कंपनी के एक डायरेक्टर ल कलकत्ता ले गिरफ्तार करे गेहे। ए मामला म अब तक 12 लोगन मनके गिरफ्तार करे जा चुके हे। अभी घलो 3 आरोपी फरार हे।