सिंहदेव-हसदेव अरण्य
हसदेव के जंगल ल काटे ले बचाय बर आंदोलन करइया लोगन ल पंचायत अउ ग्रामीण विकास मंत्री टी.एस. सिंहदेव ह भरोसा देवईन हे कि ओमन ह उंखर मनके साथ हे। श्री सिंहदेव काली परसाकोल ब्लॉक परियोजना के तीर धरना म बइठे आंदोलनकारी मन ले भेंट करीन। ओमन ह खनन प्रभावित क्षेत्र घाटबर्रा, हरियरपुर, साल्ही अउ बासेन के दौरा करीन, जिहां ग्रामीण मन ले भेंट करे के बाद ओमन ह वन विभाग डहार ले काटे गे जंगल के निरीक्षण करीन।
मीडिया ले बात करत श्री सिंहदेव ह आरोप लगईन कि परियोजना स्थल म कोल खनन बर तय करे गे मापदंड के पालन नइ करे जात हे। ओमन किहीन कि कोयला खनन सुरू करे के पहिली जघा-जघा जउन गढ्ढा करे गेहे, ओमन ल अभी तक पाटे नइ गेहे। न ही ए जघा म पौधा लगाय गे हवय। पंचायत मंत्री ह यहू आरोप लगईन कि स्थानीय जिला प्रसासन डहार ले मुख्यमंत्री ल सही स्थिति नइ बताय गेहे, जेखर ले मुख्यमंत्री घलो भ्रमित हवय। श्री सिंहदेव ह किहीन कि ओमन ह इहां के बारे म कांग्रेस हाईकमान अउ मुख्यमंत्री भूपेश बघेल ल जानकारी दीहीं।
खबर के मुताबिक उदयपुर के हसदेव अरण्य क्षेत्र ल परसाकोल ब्लॉक बर दे गे हवय अउ एखर विरोध म स्थानीय मन पाछु तीन महीना ले हरियरपुर म आंदोलन करत हे।
सिंहदेव-सुपेबेड़ा
स्वास्थ्य मंत्री टी.एस. सिंहदेव ह आज गरियाबंद जिला के सुपेबेड़ा म बैसठ लाख रूपिया के लागत ले बनइया प्राथमिक स्वास्थ्य केन्द्र के भवन निर्माण काम के भूमिपूजन करीन। ओमन ह सुपेबेड़ा म चलत वैकल्पिक प्राथमिक स्वास्थ्य केन्द्र के निरीक्षण करके उहां मिलत दवई अउ दूसर सुविधा के बारे म जानकारी लीन। स्वास्थ्य मंत्री ह सुपेबेड़ा म किडनी के बीमारी ले प्रभावित लोगन के समस्या सुनीन। ओमन किहीन कि प्रदेस के दूसर गांव जइसे जल जीवन मिशन म सुपेबेड़ा म घलो शुद्ध पीये के पानी के बेवस्था कराय जाही।
टेली-मेडिसिन सप्ताह
राज्य के सबो हेल्थ एंड वेलनेस सेंटर्स म लोगन ल बने इलाज देवाय के उद्देश्य ले काली ले टेली-मेडिसीन सप्ताह मनाय जाही। राज्य के नोडल अधिकारी डॉक्टर सुरेन्द्र पामभोई ह बतईन कि पहिली दिन काली सामान्य बीमारी अउ मानसिक बीमारी के तेरह हजार ले जादा लोगन के जांच करके उंखर इलाज करे गीस। ग्यारह जून तक चलइया ए सप्ताह के दउरान सेंटर म बिहनिया ग्यारह बजे ले संझा पांच बजे तक इलाज के सुविधा दे जाही।
पूरक परीक्षा-समय सारिणी
छत्तीसगढ़ माध्यमिक शिक्षा मंडल ह दसवीं अउ बारहवीं पूरक परीक्षा के समय-सारिणी जारी कर देहे। दसवीं के पूरक परीक्षा चार जुलाई ले बारह जुलाई के बीच होही। उहें, बारहवीं के परीक्षा चार जुलाई ले सुरू होके सोलह जुलाई तक चलही। ए परीक्षा बिहनिया नौ बजे ले मंझनिया सवा बारह बजे तक चलही।
रेलवे-टिकट बुकिंग
भारतीय रेलवे ह आई.आर.सी.टी.सी. के वेबसाइट अउ ऐप के माध्यम ले ऑनलाइन टिकट बुकिंग के अधिकतम सीमा बढ़ा देहे। रेल मंत्रालय ह बतईस कि आधार ले जुड़े यूजर आईडी ले एक महीना म जादा ले जादा टिकट के बुकिंग के सीमा छह ले बढ़ाके बारह कर दे गेहे। फेर, आधार ले जुड़े यूजर आईडी ले एक महीना म अब बारह के बजाय चौबीस रेलवे टिकट बुक कराय जा सकत हे।
अमृत महोत्सव प्रश्नोत्तरी
आजादी के अमृत महोत्सव उपर आकाशवाणी समाचार डहार ले राष्ट्रीय स्तर म राखे जात प्रश्नोत्तरी के तहत आज के प्रश्न हे।
कोन स्वतंत्रता सेनानी ह गांधीजी ल राजी करे रिहीन कि नमक आंदोलन ल सिरिफ पुरूष मन तक ही सीमित नइ राखे जाय ?
श्रोता मन अपन उत्तर वाट्सअप नंबर – आठ आठ दू छै पांच चार छै दो छै दो – या ई-मेल आई डी – अमृत महोत्सव क्विज एट द रेट प्रसार भारती डॅाट जीओवी डॅाट इन म भेज सकथे।
भाग्यशाली प्रतिभागी ल विजेता के रूप म चुने जाही अउ काली के समाचार प्रभात म विजेता के नाव के घोषणा करे जाही। विजेता ल ई-प्रमाण पत्र अउ सांकेतिक पुरस्कार दे जाही।
सिंहदेव-मनरेगाकर्मी
पंचायत अउ ग्रामीण विकास मंत्री टी.एस. सिंहदेव ह आंदोलन करइया मनरेगा करमचारी मन ले किहीन हे कि काम म लहुटे के बादेच उंखर मन ले बात करे जाही। ओमन किहीन कि ए आंदोलन के सेती गरीब श्रमिक मन ल करीबन सात सौ करोड़ रूपिया के नुकसान होय हे। गरियाबंद दउरा के दौरान श्री सिंहदेव ह मनरेगाकर्मी, शिक्षक संघ अउ दूसर लोगन के समस्या सुनीन।
खबर के मुताबिक राज्यभर के मनरेगाकर्मी मन ह अपन मांग ल लेके पाछु दू महीना ले आंदोलन म बइठे हे।
शक्कर कारखाना-कीर्तिमान
कबीरधाम जिला म चलत दू ठन सहकारी शक्कर कारखाना ह रिकवरी दर म राष्ट्रीय स्तर म नवा कीर्तिमान रचे हे। एमा पंडरिया के सरदार वल्लभभाई पटेल सहकारी शक्कर कारखाना अउ कवर्धा के राम्हेपुर के भोरमदेव सहकारी शक्कर कारखाना सामिल हे। ए शक्कर कारखाना म रिकवरी दर जादा होय ले जिला के अट्ठारह हजार ले जादा किसान मन ल तिरपन करोड़ रूपिया ले जादा के रासि मिलही।
हादसा
गरियाबंद म सड़क सुरक्षा जागरूकता बर निकाले गे रैली म सामिल छह झिन चारपहिया गाड़ी के चपेट म आय ले घायल होगे हवय, जेमा ले चार के हालत गंभीर बताय जात हवय। मिले जानकारी के अनुसार ब्रम्हकुमारी संस्था डहार ले सड़क सुरक्षा जागरूकता बर जिला म रैली निकाले गे रिहीस। रैली के दउरान चार मोटर साइकिल मन ल एक पिकअप गाड़ी ह टक्कर मार दीस, जेखर सेती छह झिन मनखे घायल होगीन। उंखर मनके इलाज अस्पताल म चलत हे। घटना के बाद इंदागांव पुलिस ह ड्रायवर ल गिरप्तार कर लेहे।
उंहें कबीरधाम जिला म रायपुर जबलपुर राष्ट्रीय राजमार्ग म आज तेज रप्तार टरक के चपेट म आय ले फटफटी म बइठे एक झिन लइका के मउत होगे अउ एक झिन माइलोगिन गंभीर रूप ले घायल होगिन हे। बताय जात हवय कि ए माइलोगिन ह अपन लइका ल स्कूल म भर्ती कराय बर लेगत रीहिस, तभे ये हादसा होगे।
एति कोरिया जिला के ग्राम पंचायत चनवारीडांड म तलाब म नहाय बर गे दू झिन नोनी मनके डूबे ले मउत होगे।
हाथी हमला-मौत
जशपुर जिला के कुनकुरी के कंडोरा गांव म जंगली हाथी के हमला म एक झिन ग्रामीण अउ गिदाबहार म एक झिन माईलोगिन के मउत होगीस। बताय जात हवय कि एक महीना के भीतर कुनकुरी वन परिक्षेत्र म हाथी ले मौत के ए ह तीसरा घटना हे, जेमा अभी तक चार झिन के मउत होगे हवय। हाथी मन पाछु रतिहा आवासीय इलाका म घुसर गीन अउ लोगन उपर हमला कर दीन।
संक्षिप्त समाचार
– सुकमा जिला के एल्मागुंडा इलाका म चलत विकास काम ल नकसान पहुंचाय बर माओवादी मन डहार ले लगाये गे दू ठन आईईडी बरामद करे गेहे। सुरक्षा बलके जवान मन ह गश्त के दउरान ये विस्फोटक ल बरामद करीन।
– बिलासपुर जिला के देवकिरारी गांव म गुपचुप खाये के बाद पच्चीस ले जादा लोगन मन बीमार होगीन। एमा ले एक झन नोनी के इलाज के दउरान मउत होगीस, उंहें एक झिन दूसर नोनी के हालत गंभीर हावय।
– बेमेतरा जिला के उमरिया के सेवा सहकारी समिति म निजी कंपनी ल खाद बेचे के मामला म सोसायटी प्रबंधक संघरा पांच झन के खिलाफ मामला दर्ज करे गेहे।
अउ
– राजनांदगांव जिला म कनेरी गांव के तीर लोहा ले भरे टरक अंते तंते होके सड़क के बीचोबीच पलट गीस। हादसा म ड्रायवर अउ कंडक्टर ल थोरबहुत चोट लगे हे। फेर दुर्घटना के बाद ए रद्दा म करीबन दू घंटा तक अवई जवई प्रभावित रीहिस।