मुख्यमंत्री भूपेश बघेल ह बिलासा देवी केंवट हवाई अड्डा चकरभाठा ले बिलासपुर-भोपाल-बिलासपुर हवाई सेवा के सुभारंभ करीन। श्री बघेल ह चकरभाठा म आयोजित ए कारीकरम म कांकेर ले वीडियो कान्फ्रेंसिंग के जरिया ले सामिल होइन अउ हरा झंडा दिखाके विमान ल रवाना करीन।
ए मउका म मुख्यमंत्री ह किहीन कि प्रदेस म नवा हवाई सेवा के विस्तार बर राज्य सरकार डहार ले हरसंभव प्रयास करे जावत रिहीस। पाछु साढ़े तीन बछर म रईपुर के संगेसंग जगदलपुर अउ बिलासपुर ले नवा हवाई सेवा सुरू हें। ओमन किहीन कि बिलासपुर अउ जगदलपुर एयरपोर्ट म नाइट लैंडिंग के सुविधा संग सबो मौसम म हवाई सेवा बर सबो जरूरी व्यवस्था करे जावत हे। श्री बघेल यहू किहीन कि कोरबा म व्यावसायिक हवाई अड्डा के संग कोरिया म नवा हवाई पट्टी के विकास के योजना म काम करे जावत हे। उहें, अंबिकापुर म 43 करोड़ के लागत ले एयरपोर्ट रनवे के विकास करे जावत हे।
विश्व पर्यावरण दिवस-01
आज विश्व पर्यावरण दिवस मनाय जावत हे। एखर उद्देश्य प्रकृति अउ पृथ्वी के संरक्षण के संग पर्यावरण के अनुकूल कदम उठाय बर जागरूकता बगराना हे। ए बछर विश्व पर्यावरण दिवस के बिसय हे – ‘‘केवल एक पृथ्वी‘‘।
ए मउका म आज नई दिल्ली म मृदा संरक्षण आंदोलन के कारीकरम म प्रधानमंत्री नरेन्द्र मोदी ह किहीन कि पर्यावरण संरक्षण म भारत के बहुते बड़का उदिम रेहे हे। भारत ह निर्धारित बेरा ले पांच महिना पहिली पेट्रोल म 10 प्रतिशत एथेनॉल मिश्रण के लक्ष्य हासिल कर लेहे।
प्रधानमंत्री ह किहीन कि सरकार के कतकोन कारीकरम म पर्यावरण संरक्षण के उपाय करे गेहे। किसान मन ल माटी के गुणवत्ता के बारे म जागरूक करे बर बड़का अभियान चलाके मृदा स्वास्थ्य कार्ड उपलब्ध कराय गीस। श्री मोदी ह किहीन कि अब तक 22 करोड़ ले जादा मृदा स्वास्थ्य कार्ड किसान मन ल दे जा चुके हे। उहें, सरकार ह माटी के संरक्षण बर कतकोन उपाय उपर ध्यान दे हे।
विश्व पर्यावरण दिवस-02
ऐति, छत्तीसगढ़ म घलो विश्व पर्यावरण दिवस के मउका म कतकोन कारीकरम आयोजित करे जावत हें। छत्तीसगढ़ पर्यावरण संरक्षण मंडल के डहार ले आज रईपुर म तेलीबांधा के मरीज ड्राईव ले साइकिल रैली निकाले गीस। एखर जरिया ले लोगन ल पर्यावरण संरक्षण के संदेस दे गीस। उहें, स्थानीय नवा विश्राम गृह म पर्यावरण संरक्षण उपर एक ठिन संगोष्ठी के घलो आयोजन करे गीस। एखर संगेसंग राजधानी म कतकोन जघा परिचर्चा, संगोष्ठी अउ पोस्टर प्रतियोगिता आयोजित करे गीस।
ओति, दुरूग म विश्व पर्यावरण दिवस अउ आजादी के अमृत महोत्सव के मउका म सांसद विजय बघेल के अगुवई म हुडको स्थित उद्यान म 75 ठन फलदार अउ औषधीय पौधा लगाय गीस।
अइसने, भिलाई कल्याण कॉलेज के एनसीसी कैडेट मन घलो ग्राम कोटनी म जागरूकता रैली निकालीन अउ ग्रामीण मन ले भेंट करके पर्यावरण के प्रति जागरूक रेहे बर संदेस दीन।
ऐति, धमतरी म कृषि अउ ग्राम विकास विभाग अउ प्रजापति ब्रम्हकुमारी ईश्वरी विश्वविद्यालय के संग मिलके विधायक रंजना साहू अउ कलेक्टर ह पौधारोपण अभियान ‘‘कल्पतरू‘‘ के डिजिटल सुभारंभ करीन। ए मउका म ग्रामीण मन मोबाइल म ‘‘कल्पतरू‘‘ ऐप डाउनलोड करके एक-एक ठन पौधा रिजस्टर्ड करीन।
उहें, राजनांदगांव म घलो बाबा साहेब अंबेडकर बाल धम्म सभा के लइका मन रैली निकाल के पर्यावरण बचाय के संदेस दीन।
गोधन न्याय योजना-समीक्षा बैठक
मुख्यमंत्री भूपेश बघेल ह आज कांकेर म वीडियो कॉन्फ्रेंसिंग के माध्यम ले आयोजित कारीकरम म गोधन न्याय योजना के हितग्राही मन ल 15 करोड़ 37 लाख रूपिया के रासि ऑनलाइन जारी करीन। ए मउका म ओमन किहीन कि गोधन न्याय योजना जम्मों राज्य के समृद्धि बर नवा रद्दा खोलत हे। ए योजना गांव म खुसहाली लेके आय हे, योजना ल अउ आगू बढ़ाय के जरूरत हे।
एखर ले पहिली मुख्यमंत्री ह अधिकारी मनके बइठका लेके राज्य सरकार के योजना के क्रियान्वयन के समीक्षा करीन। समीक्षा के दउरान मुख्यमंत्री ह नरवा विकास ले जुड़े कोरर अउ चारामा क्षेत्र फेस-वन म होय कारज के संग वन, राजस्व अउ जल संसाधन विभाग के सर्वें के आधार म भू-जल के जानकारी लीन। उहें, मुख्यमंत्री ह नाला परियोजना म वैज्ञानिक ढंग ले कारज करे बर अधिकारी मन ल निरदेस दीन।
मुख्यमंत्री भेंट-मुलाकात
भेंट-मुलाकात कारीकरम के तहत मुख्यमंत्री भूपेश बघेल कांकेर जिला के दउरा म हें। मुख्यमंत्री ह आज अंतागढ़ विधानसभा क्षेत्र म 109 करोड़ रूपिया के 88 विकास कार्य के भूमिपूजन अउ लोकार्पण करिन।
उहें, मुख्यमंत्री ह कांकेर विधानसभा के बादलपुर गांव म चौपाल लगाय के कतकोन महत्वपूर्ण घोसना करीन। ओमन ग्राम डूमरपानी म 33 किलोवॉट के विद्युत सब स्टेशन, कंकनाल पुलिया निर्माण, सुरही नदी म नवा पुलिया बनाय के संग सरोना म पुलिस थाना स्थापित करे के घोसना करिन। एखर अलावा अमोड़ा म जिला सहकारी बैंक के साखा खोले जाही। उहें, डूमरपानी अउ सांईमुड़ा गांव ल दुधावा योजना म सामिल करे के ऐलान करिन।
लिमदरहा मिडवे-लोकार्पण
मुख्यमंत्री भूपेश बघेल ह काली सात करोड़ रूपिया के लागत ले निर्माण करे गे लिमदरहा मिडवे रिसॉर्ट के लोकार्पण करीन। बतादन कि ए रिसॉर्ट ह कोंडागांव जिला के खाल्हे मुरवेंड म बनाय गेहे, जउन छत्तीसगढ़ के पहिली जम्मों सुविधा वाला मिडवे रिसॉर्ट हे, जिहां राष्ट्रीय अउ अंतर्राष्ट्रीय स्तर के व्यंजन उपलब्ध होही। जिला प्रसासन डहार ले बनवाय गे ए रिसॉर्ट म यात्री मन बर स्वादिष्ट भोजन उपलब्ध रइही। एखर संगे स्थानीय लोगन ल जादा ले जादा रोजगार घलो देवाय जा सकही। बतादन कि खाल्हेमुरवेंड गांव ह रईपुर ले 160 अउ जगदलपुर ले 140 किलोमीटर दूरिहा म हे।
भाजयुमो-बाईक रैली
केन्द्र के मोदी सरकार के 8 बछर पूरा होय के मउका म छत्तीसगढ़ भाजपा युवा मोर्चा ह राज्य के सब्बो विधानसभा क्षेत्र म ‘‘विकास तीर्थ‘‘ बाईक रैली निकाले के फइसला करे हे। ए दउरान युवा प्रतिभागी मनके सम्मान करे जाही। कारीकरम ह काली ले सुरू होके 15 जून तक चलही।
भाजपा युवा मोर्चा के प्रदेस अध्यक्ष अमित साहू ह बतईन कि देस ह 8 बछर म प्रधानमंत्री नरेन्द्र मोदी के अगुवई म सबो क्षेत्र म कतकोन उपलब्धि हासिल करे हे।
मनरेगा कर्मचारी-इस्तीफा
नियमितीकरण के मांग ल लेके पाछु दू महीना ले आंदोलन करइया मनरेगा करमचारी मन सामुहिक इस्तीफा दे दीन। बतादन कि मनरेगा कर्मी मन 21 झन सहायक परियोजना अधिकारी के सेवा खतम करे के आदेस ले नाराज रिहीन अउ रैली निकाल के विरोध प्रदर्सन करीन। मनरेगा कर्मी मनके कहना हे कि जब तक उंखर मांग पूरा नइ होही, तब तक आंदोलन जारी रइही।
दुर्घटना
महासमुंद जिला म दू अलग-अलग सड़क हादसा म तीन लोगन के मउत होगे। उहें, एक आने मनखे घायल होगे हे।
जानकारी ले दूनों युवक कार म सवार रिहीन। इही दउरान कार ह अनियंत्रित होके सड़क तिर खेत म जाके पलटे हादसा होगे।
उहें, पिथौरा के तीर मोटरसाइकिल सवार ल ट्रक ह टक्कर मार दीस, जेमा महिला के मउत, अउ एक झिन घायल होगे।
ओति, राजनांदगांव जिला के चिचोला के तीर तेज रफ्तार कार पलट गीस, जेमा एक युवती के मउका म होगे। उहें, दू आने लोगन घायल होगें
संक्षिप्त समाचार
– बीजापुर म आवापल्ली थाना क्षेत्र म रतिहा माओवादी मन सड़क निर्माण म लगे मसीन समेत दू ट्रैक्टर म आगी लगा दीन।
– धमतरी के परेवाडीह गांव म जंगली सुअर ह खेत म बूता करत किसान उपर हमला कर दीस, जेखर ले एक किसान के मउका मउत अउ दू झन घायल होगे।
– जांजगीर-चांपा के कोतवाली पुलिस ह दस लाख के ठगी करइया एक झन आरोपी ल गिरफ्तार करे हे। ए आरोपी ह सीएसआर मद देवाय के नाव म ठगे रिहीस हे।
– कोरिया जिला के केल्हारी पुलिस ह तिलोखन गांव म 48 मवेसी के संग चार झिन आरोपी ल गिरफ्तार करे हे।
अउ
– महासमुंद के बसना पुलिस ह कार ले 1 कुंटल गांजा बरामद करके तीन झिन आरोपी ल गिरफ्तार करीस।