केन्द्रीय मंत्री-स्मृति ईरानी-01
केन्द्रीय महिला अउ बाल विकास मंत्रालय के सब जोनल मीटिंग आज राजधानी रईपुर म राखे गीस। ए बइठका के अगुवई केन्द्रीय महिला अउ बाल विकास मंत्री स्मृति ईरानी ह करीन। कारीकरम म ओमन किहीन कि राष्ट्र ह आज के नइ फेर भविष्य म जनम लेवइया संतान के घलो चिंता करथे। ओमन बतईन कि प्रधानमंत्री मातृ वंदना योजना म ढाई करोड़ माईलोगिन मन ल दस हजार करोड़ रूपिया ले जादा के पइसा सीधा उंखर बैंक खाता म भेजे गे हवय, जेखर ले माईलोगिन मन गर्भावस्था के दउरान जांच अउ टीकाकरण बर जावय त उंखर मन उपर ध्यान दे जा सकय।
केन्द्रीय मंत्री ह किहीन कि प्रधानमंत्री नरेन्द्र मोदी ह अभिनंदन के पात्र हे। जउन ह सिरिफ बछर दू हजार अट्ठारह म पोषण अभियान के सुरूवात करीन अउ सबो आंगनबाड़ी मन म मोबाइल-ग्रोथ मॉनिटरिंग डिवाइस के सुविधा घलो देवईन, जेखर ले सबो माईलोगिन अउ लइका मनके पोषण ले जुड़े जानकारी ले जा सकय। श्रीमती ईरानी ह बतईन कि निर्भया फंड म सरकार ह नौ हजार करोड़ रूपिया ले जादा के रासि बेटी मनके सुरक्षा बर दे हवय। ए फंड के माध्यम ले एमेरजेंसी रिस्पांस सिस्टम के संगेसंग पुलिस थाना मन म महिला डेस्क बनाय के अउ मानव तस्करी रोके बर बिसेस व्यवस्था करे गे हवय।
केन्द्रीय मंत्री-स्मृति ईरानी-02
कारीकरम म छत्तीसगढ़ के महिला अउ बाल विकास मंत्री श्रीमती अनिला भेंड़िया ह आंगनबाड़ी भवन बनाय बर, आंगनबाड़ी कार्यकर्ता अउ सहायिका मनके मानदेय म बढ़ोतरी अउ मॉडल आंगनबाड़ी भवन बर केन्द्रीय सहयोग के मांग करीन। ओमन ह योजना मन ल बने ढंग ले चलाय बर केन्द्रीय सहातया के जरूरत बतईन। ए बइठका म छत्तीसगढ़ पश्चिम बंगाल अउ ओड़िसा के प्रतिनिधि, सांसद, बड़े अधिकारी अउ लाभार्थी मन ह भाग लीन।
केन्द्रीय महिला अउ बाल विकास मंत्री स्मृति ईरानी ह आज अपन छत्तीसगढ़ प्रवास के दउरान रईपुर के तीर उपरवारा गांव के आंगनबाड़ी केन्द्र के अवलोकन करीन अउ परिसर म वृक्षारोपण घलो करीन।
केन्द्रीय कानून मंत्री-छत्तीसगढ़
केन्द्रीय कानून अउ न्याय मंत्री किरेन रिजिजू ह आज अपन छत्तीसगढ़ प्रवास के दउरान नया रईपुर म आयकर अपीलीय अधिकरण के नवा भवन के सुरूवात करीन। ए परिसर ह केन्द्रीय सचिवालय अटल नगर म हवय। कारीकरम म केन्द्रीय मंत्री ह किहीन कि आम आदमी अउ न्याय के बीच म कोनों दूरी नइ होना चाही। ओमन किहीन कि सबो भासा म काम होना चाही, लोगन ल न्याय मिलय यही हमर प्राथमिकता हे। समय म न्याय जरूरी हे। देरी ले न्याय मिले के कोई फायदा नइ होवय। केन्द्रीय मंत्री ह किहीन कि लोगन के तीर जाके न्याय मिलय अइसन व्यवस्था होना चाही, तेखरे बर सरकार ह ई-कोर्ट के व्यवस्था उपर काम करत हे।
आयकर अपीलीय अधिकरण जेला आई.टी.ए.टी. घलो कहे जाथे, एक ठिन अर्द्धन्यायिक संस्थान हवय। केन्द्र सरकार ह बछर दू हजार तेरह म रईपुर म एक ठिन पीठ के स्थापना घलो करे रिहीस, जेखर अधिकार क्षेत्र म पूरा छत्तीसगढ़ राज्य आथे। रईपुर म आई.टी.ए.टी. के नवा कार्यालय परिसर म सबो जरूरी सुविधा जइसे बड़े कोर्ट रूम, आधुनिक रिकॉर्ड रूम, पुस्तकालय कक्ष, बार कक्ष अउ सम्मेलन कक्ष जइसन सुविधा मौजूद हे। रईपुर पीठ ल सुघ्घर बनाय खातिर नवा परिसर म मजबूत कनेक्टिविटी सुविधा के संग ई-कोर्ट घलो बनाय गे हवय।
बातों-बातों-में
प्रादेशिक समाचार एकांश डहार ले समसामयिक विषय उपर आधारित हमर साप्ताहिक कारीकरम ‘‘बातों-बातों-में‘‘ म ए बखत प्रधानमंत्री नरेन्द्र मोदी के अगुवई म केन्द्र के एनडीए सरकार के आठ बछर के दउरान करे गे कार्यकाल उपर केन्द्रित रइही। ए बिसय म अउ जादा जानकारी ले बर आकाशवाणी समाचार ह बात करे हे वरिष्ठ पत्रकार शशांक शर्मा ले। एखर प्रसारण आकाशवाणी के रईपुर केन्द्र डहार ले काली बिहनिया नौ बजके तीस मिनट म करे जाही, जेला छत्तीसगढ़ के जम्मों आकाशवाणी केन्द्र मन ह एके संघरा रिले करही।
प्रधानमंत्री-मिट्टी बचाओ आंदोलन
प्रधानमंत्री नरेन्द्र मोदी ह विश्व पर्यावरण दिवस के मउका म काली ग्यारह बजे विज्ञान भवन म मिट्टी बचाओ यानि ‘‘सेव सॉइल‘‘ म राखे गे कारीकरम म सामिल होही। ए मउका म ओमन ह लोगन संग गोठबात करही।
‘‘मिट्टी बचाओ‘‘ वैश्विक आंदोलन हे जेखर उद्देश्य मिट्टी के सेहत बर जागरूकता बढ़ाना अउ ओखर सुधार बर लोगन ल जागरूक करना हे। ए आंदोलन के सुरूवात सद्गुरू जग्गी वासुदेव ह मार्च म करीन।
विश्व पर्यावरण दिवस के मउका म राज्यपाल अनुसुईया उइके ह देस-प्रदेस के सबो नगारिक मन ले आह्वान करीन हे कि पर्यावरण ल स्वच्छ बनाय म अपन योगदान देवय। संगेसंग एला सहेजे बर एकजुट होके परयास करय। कम होवत भू-जल स्तर बर चिंता जतावत ओमन ह पानी ल सहेजे बर जतना ले आग्रह करीन हे।
ए मउका म काली प्रदेस म कतकोन कारीकरम होही।
मुख्यमंत्री-समीक्षा
मुख्यमंत्री भूपेश बघेल ह अधिकारी मन ल केहे हे कि ओमन ह आम लोगन ल राज्य सरकार के कल्याणकारी योजना मनके फायदा देवाय बर संवेदनशीलता के संग काम करय। आज कांकेर जिला के भानूप्रतापपुर म राखे गे समीक्षा बइठका म मुख्यमंत्री ह शासकीय योजना मनके काम के समीक्षा करीन। बइठका म मुख्यमंत्री ह स्वामी आत्मानंद अंग्रेजी माध्यम स्कूल मन म सोलह जून तक सिक्षक मनके भर्ती अउ स्कूल मन म समय ले पहिली किताब-कॉपी बाटे के निरदेस दीन।
मुख्यमंत्री ह ओरछा म लीची के नर्सरी लगाय बर वन विभाग के अधिकारी मन ल निरदेस घलो दीन।
मुख्यमंत्री-पत्रकारवार्ता
आज भानुप्रतापपुर म राखे गे एक ठिन पत्रकारवार्ता म मुख्यमंत्री भूपेश बघेल ह किहीन हे कि बस्तर संभाग म आदिवासी मनके जीवन स्तर म बदलाव दिखत हे। राज्य सरकार ह उंखर कल्याण बर कतकोन योजना चलावत हे। ओमन किहीन कि ए इलाका मन म धान खरीदी केन्द्र के संख्या बढ़ाय जाही। संगेसंग मांग के अनुसार बैंक घलो खोले जाही। ओमन किहीन कि सिक्षा के क्षेत्र म स्वामी आत्मानंद अंग्रेजी माध्यम स्कूल ह मील के पत्थर साबित होही।
भेंट-मुलाकात कारीकरम म मुख्यमंत्री ह भानूप्रतापपुर म उनचालीस करोड़ पचहत्तर लाख रूपिया के लागत के एक सौ छह विकास काम के लोकार्पण अउ भूमिपूजन करीन। ओमन ह उहां पत्रकार भवन निर्माण बर पन्द्रह लाख रूपिया दे जाय के घोसना करीन। संगेसंग ओमन ह ‘‘हमर लैब‘‘ के उद्घाटन घलो करीन। ए आधुनिक लैब म एक सौ चार प्रकार के जांच हो सकही।
माओवादी-गिरफ्तार
कांकेर जिला के एक झन हार्डकोर इनामी माओवादी ल डीआरजी के टीम ह धमतरी म गिरफ्तार करे हे। ए माओवादी उपर दू लाख रूपिया के इनाम रिहीस। धमतरी जिला के पुलिस अधीक्षक प्रशांत ठाकुर ह बतईन कि ए माओवादी ह इलाज कराय बर रईपुर जावत रिहीस। इही दउरान डीआरजी के टीम ह ए माओवादी ल दौड़ पंडरीपानी के जंगल ले गिरफ्तार कर लीस। ए माओवादी उपर कांकेर जिला म कतकोन माओवादी घटना म सामिल रेहे के आरोप हे।
जिले की चिट्ठी
आकाशवाणी समाचार डहार ले काली संझा छह बजके तीस मिनट म ‘‘जिले के चिट्ठी‘‘ कारीकरम के प्रसारण करे जाही। ए कारीकरम आकाशवाणी के रायपुर केंद्र डहार ले प्रसारित होही। जेला जम्मों केंद्र मन ह एके संघरा रिले करही। ए बखत के अंक म ‘‘कोंडागांव‘‘ जिला के गतिविधि मनके बारे म जानकारी दे जाही।
मौसम
प्रदेस म काली एक-दू जघा म ग्रीष्म लहर चले के या वइसन स्थिति बने के संभावना हे। मौसम विभाग के अनुसार एक ठिन उपरी हवा के चक्रीय चक्रवाती घेरा पूर्वी उत्तर प्रदेस के उपर बने हे। संगेसंग एक ठिन द्रोणिका पूर्वी उत्तरी प्रदेस ले नागालैंड म बने हे। एखर असर ले प्रदेस के पूर्वी भाग म गरज-चमक के संग हल्का बरसा हो सकत हे। एखर अलावा प्रदेस के बाकी जघा म मौसम के सुष्क रेहे के संभावना हे।