हर घर दस्तक अभियान
केन्द्रीय स्वास्थ्य मंत्रालय ह आज ‘‘हर घर दस्तक अभियान‘‘ के दूसरइया चरण के सुरूवात करीन। दू महीना तक चलइया ए अभियान के उद्देश्य जम्मों पात्र आयु वर्ग म कोविड टीकाकरण म तेजी लाना हे। हर घर दस्तक अभियान इकतीस जुलाई तक चलही। स्वास्थ्य मंत्रालय ह केहे हे कि घर-घर जाके टीकाकरण अभियान के माध्यम ले दूसर खुराक के संग तीसर खुराक खातिर पात्र जम्मों लाभार्थी मनके टीकाकरण उपर बल दे जाही।
त्रिस्तरीय पंचायत-उपचुनाव
प्रदेश म त्रिस्तरीय पंचायत के खाली पद मन म उपचुनाव बर तीन जून ले नामांकन भरे जाही। एखर बर छत्तीसगढ़ राज्य निर्वाचन आयोग ह चुनाव कार्यक्रम जारी कर देहे। राज्य निर्वाचन आयुक्त ठाकुर रामसिंह ह बताइन कि नामांकन जमा करे के आखरी तारीख नौ जून हे, उंहें नामांकन पत्र के जाचं दस जून तक करे जाही। अइसने नाम वापस लेके आखरी तारीख तेरा जून हे। इही दिन मंझनियां तीन बजे के बाद पात्र उम्मदीवार मन ल चुनाव चिन्ह बांटे जाही अउ उम्मीदवार मनके आखरी सूची जारी करे जाही। जउन जगा म चुनाव होही उंहा अठाईस जून बीहनिया सात बजे ले मंझनियां तीन बजे तक वोट डारे जाही। वोट के गिनती अठाईस जून के मतदान सिराय के बाद उही केंद्र मन म करे जाही।
राज्य निर्वाचन आयुक्त हे बताइन कि प्रदेश के सात जनपद पंचायत सदस्य, एक सौ अठारा सरपंच अउ छै सौ तीस पंच ल मिलाके सात सौ पचपन खाली पद मन म उपचुनाव बर संबंधित क्षेत्र मन म निर्वाचक नामावली तियार करके पाछू पच्चीस मई के एखर आखरी प्रकाशन करे गेहे। ओमन बताइन हे कि जनपद पंचायत सदस्य, सरपंच अउ पंच मनके चुनाव एक संग कराय जाही। अइसने ग्राम पंचायत जेखर कार्यकाल छै महीना ले जादा बांचे हे, उंहा पद खाली होय के स्थिति म उपचुनाव कराये जाही। ये चुनाव गैर दलीय आधार म अउ मतपत्र के जरिया ले कराये जाही। चुनाव के बेरा कोरोना ले बचाव बर केंद्र अउ राज्य सरकार डहार ले जारी दिशा-निर्देश के पालन कराये जाही। निर्वाचन कार्यक्रम जारी होय के संगेसंग परिणाम के घोषणा तक संबंधित निर्वाचन क्षेत्र मन म आचार संहिता लागू रीही।
राज्यसभा चुनाव
छत्तीसगढ़ म राज्यसभा के दू ठिन सीट बर होवइया चुनाव के तहत आज नामांकन पत्र के जांच करे गीस। एमा जनता कांग्रेस छत्तीसगढ़ के उम्मीदवार डॅाक्टर हरिदास भारद्वाज के नामांकन अवैध घोषित करे गेहे। खबर के मुताबिक छत्तीसगढ़ म दू सीट बर कांग्रेस उम्मीदवार राजीव शुक्ला अउ रंजीत रंजन ह काली अपन नामांकन दाखिल करे हे ।
विधानसभा सचिवालय के मुताबिक तीन जून तक उम्मीदवार अपन नाम वापस लीही। जरूरत पड़े म दस जून के मतदान कराये जाही। इही दिन मतगणना के बाद विजयी उम्मीदवार के घोषणा करे जाही।
आत्मानंद विद्यालय साक्षात्कार
रायपुर जिला म चलत स्वामी आत्मानंद उत्कृष्ट विद्यालय के शैक्षिक अउ गैर शैक्षिक पद मन बर बड़़ अकन आवेदन मिले के सेती साक्षात्कार के काम आज ले तीन जून तक चलही।
खबर के मुताबिक ए विद्यालय म शैक्षिक अउ गैरशैक्षिक पद मन बर काली साक्षात्कार के आयोजन करे गे रीहिस। ए संबंध म रायपुर के जिला शिक्षा अधिकारी ह बताइन कि जादा संख्या म आवेदन मिले के सेती बांचे अभ्यर्थी मनके इंटरव्यू बर अवइया तीन दिन के बेरा दे गेहे। आज बीहनिया दस बजे ले शिक्षक, समन्वयक अउ परामर्शदाता के संग भृत्य पद बर साक्षात्कार ले गीस। काली दू जून के सहायक शिक्षक अउ सफाईकर्मी पद बर साक्षात्कार ले जाही। उंहें तीन जून के सहायिका के पद बर इंटरव्यू होही।
हीरा जब्त
गरियाबंद पुलिस ह हीरा के तस्करी रोके के मामला म अब तक के सबले बड़े कार्रवाई करत सात सौ पैंतालिस नग हीरा के संग दू झिन आरोपी ल गिरप्तार करे हे। जब्त करे गे हीरा के कीमत करीबन पचास लाख रूपिया बताये गेहे। पकड़े गे दूनो आरोपी बाप-बेटा हरय।
पुलिस ल मुखबिर ले सूचना मिले रीहिस कि शोभा थाना क्षेत्र के अंतर्गत पायलीखंड खदान क्षेत्र ले दू झिन मनखे मन अवैध रूप ले हीरा लेके ओडिशा जात रीहिन। पुलिस ह तुरते नाकाबंदी करके कुशियार बरछा अउ कचना धुरवा के बीच आरोपी मन ल पकड़ लीन। पूछताछ के बेरा दूनों आरोपी ह बताइन कि ओमन ओडिशा म बारसुंडी टोला गांव के निवासी हरय। पुलिस ह तलाशी के बेरा आरोपी मन तीर ले सात सौ पैंतालिस नग हीरा बरामद करे हे।
फर्नेस ब्लास्ट-मजदूर मौत
भिलाई इस्पात संयंत्र के एक ठिन ब्लॉस्ट फर्नेस म आज मरम्मत के बेरा वेल्डिंग करत दू झिन ठेका मजदूर गंभीर रूप ले झुलस गे। एमा ले एक मजदूर के मउकाच म मउत होगे, उंहें करीबन नब्बे प्रतिशत जले अवस्था म दूसर मजदूर ल सेक्टर-नौ के अस्पताल म भर्ती कराय गेहे। संयंत्र प्रबंधन ह बताइन कि घटना के कारण के जांच करे जात हे।
उंहें भिलाई के जामुल थाना क्षेत्र म स्थित एक आने निजी संयंत्र म काली देर रतिहा आगी लगे ले उंहा रखे करीबन तीन करोड़ रूपिया के सामान जलगे। अग्निशमन दल के कर्मचारी मन ह आगी म काबू पा लीन । पुलिस ह आगी लगे के कारण के जांच करत हे।
माकपा-प्रदर्शन
मार्क्सवादी कम्युनिस्ट पार्टी ह केन्द्र सरकार ले पेट्रोलियम पदार्थ म उत्पाद सुल्क खत्म करे के मांग करीन हे। पार्टी ह पाछु पच्चीस ले इकतीस मई तक देसभर म मंहगाई अउ बेरोजगारी के खिलाफ प्रदर्सन करीन। इही कड़ी म राजधानी रईपुर म पार्टी पदाधिकारी मन ह डंगनिया क्षेत्र ले रैली निकालीन अउ आमसभा के आयोजन करीन।
विश्व तंबाकू निषेध दिवस
विश्व तंबाकू निषेध दिवस के मउका म काली अखिल भारतीय आयुर्विज्ञान संस्थान-एम्स रायपुर के ओपीडी म अवइया रोगी अउ उंखर परिवार वाला मन ल तंबाकू खाये ले होय खतरा के प्रति जागरूक करे गीस। ए कार्यक्रम म पांच सौ ले जादा रोगी अउ उंखर परिवार वाले मन भाग लीन। कार्यक्रम म शामिल डॅाक्टर मनके कहना रीहिन कि तंबाकू खाये ले स्वास्थ्य के संगेसंग आर्थिक नुकसान घलो होथे। विश्व स्वास्थ्य संगठन के मुताबिक दुनियाभर म अस्सी लाख ले जादा लोगन मनके मउत तंबाकू खाये के सेती होथे।
विश्व साइकिल दिवस
विश्व साइकिल दिवस के मउका म अउ आजादी के अमृत महोत्सव के तहत रईपुर म तीन जून के राज्यस्तरीय साइकिल रैली के आयोजन करे जाही। ए साइकिल रैली रईपुर के कलेक्ट्रेट परिसर ले बिहनिया आठ बजे निकल के तेलीबांधा म सिराही। ए रैली के आयोजन नेहरू युवा केन्द्र संगठन अउ केन्द्रीय खेल युवा कारीकरम मंत्रालय डहार ले करे जावत हे। ए रैली म आने-आने युवा मंडल के सदस्य, राष्ट्रीय सेवा योजना के स्वयंसेवक के संगेसंग खेल संघ के खिलाड़ी अउ पदाधिकारी मन सामिल होही।
नेहरू युवा केन्द्र संगठन के राज्य निदेशक श्रीकांत पांडेय ह बतईन कि देसभर म जम्मों राज्य के राजधानी सहित पचहत्तर बिसेस जघा अउ जिला मन म साइकिल रैली के आयोजन करे जावत हे। श्री पांडेय ह बतईन कि ए रैली के माध्यम ले लोगन मन ल स्वस्थ रेहे अउ गाड़ी मन ले होवइया प्रदूषण ल दूरिहा करे बर जागरूक करे जाही।
अकबर कार्यशाला
राजधानी रायपुर के विकास ल धियान म राखत रायपुर विकास योजना यानि मास्टर प्लान तियार करे के काम चलत हे। एखर तहत काली रायपुर म एक ठिन कार्यशाला के आयोजन करे गीस। आवास अउ पर्यावरण मंत्री मोहम्मद अकबर के अगवई म आयोजित ए कार्यशाला म शामिल विशेषज्ञ मन ह रायपुर के विकास बर पेयजल, बिजली, सड़क अउ पार्किंग के संग आने जनसुविधा के बारे म सुझाव दीन।