मन की बात
प्रधानमंत्री नरेन्द्र मोदी ह किहीन हे कि वैश्विक कोविड महामारी होय के बाद भी देस म स्टार्टअप म बढ़ोतरी होना बड़ गर्व के बात हे। आकाशवाणी ले ‘‘मन की बात‘‘ कारीकरम म श्री मोदी ह किहीन कि देस म यूनिकार्न के संख्या अब तक 100 ले जादा होगे हवय। ओमन किहीन कि देस म यूनिकार्न के औसत वार्षिक वृद्धि दर अमेरिका, ब्रिटेन अउ आने-आने देस मन ले जादा हवय। विशेसज्ञ मनके मानना हवय कि अवइया समय म एखर संख्या तेजी ले बाढ़ही। श्री मोदी ह खुसी जतावत किहीन कि भारत के स्टार्टअप तंत्र सिर्फ बड़का सहर मन तक सीमिति नइ हवय, फेर छोट-छोट सहर अउ कस्बा मन म घलो कारोबारी मन अपन व्यवसाय फइलावत हे।
श्री मोदी ह ‘‘मन की बात‘‘ कारीकरम के श्रोता मन ले अपन क्षेत्र म ‘‘महिला स्वयं सहायता समूह‘‘ मनके पता लगाय अउ उंखर उत्पाद मनके बारे म सूचना जुटाय के आग्रह करीन।
पीएम केयर्स फंड
प्रधानमंत्री नरेन्द्र मोदी ह पीएम केयर्स फंड ले देसभर म लइका मन खातिर चलाय जावत योजना म आने-आने लाभ ल काली वर्चुअल माध्यम ले वितरित करहीं। संगेसंग प्रधानमंत्री ह पढ़ईया लइका मन बर छात्रवृत्ति उंखर मनके खाता म घलो डालही। ए कारीकरम के दउरान लइका मन ल ‘आयुष्मान भारत- प्रधानमंत्री जन आरोग्य योजना‘ के चलत छात्रवृत्ति अउ स्वास्थ्य कार्ड के पासबुक जारी करही।
राज्यसभा चुनाव
राज्यसभा चुनाव के तहत छत्तीसगढ़ म खाली होवइया दू ठिन सीट बर 10 जून के मतदान होही। एखर बर भारत निर्वाचन आयोग डहार ले पाछु 24 मई के अधिसूचना जारी कर दे गे हवय। छत्तीसगढ़ खातिर राज्यसभा के कुल 5 ठिन सीट म दू राज्यसभा सदस्य भाजपा के राज्यसभा सांसद रामविचार नेताम अउ कांग्रेस के छाया वर्मा के कार्यकाल इही बछर 29 जून के खतम होवत हवय।
निर्वाचन आयोग डहार ले जारी करे गे कारीकरम के अनुसार 31 मई तक नामांकन दाखिल करे जा सकही। 01 जून के नामंकन पत्र मनके जांच होही अउ 03 जून तक उम्मीदवार मन ल नामांकन पत्र वापिस करे के मउका दे जाही। जरूरत पड़े म 10 जून के मतदान करवाय जाही। इही दिन मतगणना के बाद जीते उम्मीदवार के नाव के घोसना कर दे जाही।
भेंट-मुलाकात कारीकरम
मुख्यमंत्री भूपेश बघेल ह भेंट-मुलाकात कारीकरम के चलत आज कोंडागांव जिला के टाटामारी गांव म 146 करोड़ रूपिया ले जादा के 171 विकास कार्य मनके लोकार्पण अउ सिलान्यास करीन। उहें, गांव टाटामारी म पर्यटक मनके सुविधा अउ कोंडागांव जिला के पर्यटन स्थल मनके बारे म जानकारी देके उद्देश्य ले बनाय गे टूरिस्ट इन्फार्मेंशन सेंटर के सुभारंभ मुख्यमंत्री ह स्थानीय बिहान समूह के माईलोगिन मन ले करईन। ए मउका म मावा कोंडानार पर्यटन सर्किट के विमोचन घलो करे गीस, जउन ल विकसित करे जावत हे अउ इहां तीन दिन अउ दू रात के पर्यटक मन बर पैकेज तैयार करे गे हवय, जेखर ले पर्यटक मन ल प्रकृति के करीब उहां के मनोरम वादी, बीस ले जादा जलप्रपात, आदिवासी सभ्यता-संस्कृति अउ कोंडागांव के अनोखा संस्कृति ल जाने के मउका मिल सकही।
मुख्यमंत्री-पत्रकारवार्ता
मुख्यमंत्री भूपेश बघेल ह किहीन हे कि बस्तर म तेजी ले बदलाव दिखत हवय। किसान मन नवाचार अपनावत हवय, जेखर ले उंखर मनके आय बाढ़े हवय। डीबीटी योजना के जरिया खाता मन म पइसा जावत हे, एखर ले उहां के रहइया लोगन मन डहार ले बैंक साखा खोले के मांग करे जावत हे। आज कोंडागांव जिला के टाटामारी म आयोजित पत्रकारवार्ता म मुख्यमंत्री ह किहीन कि बस्तर म पर्यटन के विकास बड़ तेजी ले बाढ़त हवय। डेनेक्स जइसन संस्था डहार ले रोजगार के मउका आगू आवत हे। ओमन किहीन कि सांति बहाली म जवान मनके बड़ सुघ्धर भूमिका हवय। बस्तर म अधिकारी-करमचारी मन घलो मन लगा के कामबूता करत हवय।
प्रधानमंत्री-संवाद
प्रधानमंत्री नरेन्द्र मोदी ह आजादी के अमृत महोत्सव के चलत मंगलवार 31 मई के नौ ठिन मंत्रालय अउ विभाग मन ले जुडे़ 16 ठिन योजना अउ कारीकरम के लाभ पवइया मनखे मनके संग गोठबात करही। गरीब कल्याण सम्मेलन नाम ले ए आयोजन सिमला म राखे गे हवय, जिहां लाभ पवइया मन वीडियो कान्फ्रेंसिंग के जरिया उंखर ले जुड़हीं। ए मउका म प्रधानमंत्री ह किसान सम्मान निधि के 11वां किस्त म 21 हजार करोड़ रूपिया ले अधिक के रासि जारी करही। ए कारीकरम राज्य मनके राजधानी, जिला मुख्यालय अउ किसान विकास केन्द्र मन म घलो एके संघरा आयोजित करे जाही, जिहां लाभ पवइया मन मुख्यमंत्री, केन्द्र अउ राज्य के मंत्री, संसद सदस्य, विधानसभा सदस्य अउ जनप्रतिनिधि मनके संग गोठबात करही।
केन्द्रीय मंत्री प्रहलाद सिंह पटेल रायपुर म अउ केन्द्रीय राज्यमंत्री रेणुका सिंह ह मैनपाट म आयोजित कारीकरम म सामिल होही।
राज्यपाल-बाल रक्षा दिवस
राज्यपाल अनुसुईया उइके ह अंतर्राष्ट्रीय बाल रक्षा दिवस के मउका म आयोजित कारीकरम म सामिल होईन। कारीकरम म सुश्री उइके ह दिव्यांग समाजसेवी लक्ष्मी साहू समेत समाजसेवा के क्षेत्र म कार्य करइया पन्द्रह झिन लोगन मन ल सम्मानित करीन।
ए मउका म राज्यपाल ह किहीन कि अइसन कारीकरम लइका मनके अधिकार के रक्षा अउ उंखर सुघ्घर विकास खातिर जरूरी हवय। ओमन किहीन कि कोरोना महामारी ह बड़ पैमाना म लइका मनके जिनगी ल परभावित करे हवय, जेखर ले बड़ संख्या म लइका मन अपन दाई-ददा ल गंवा दे हवय। अइसन लइका मनके भविष्य ल संवारे खातिर सासन ले लेके व्यक्तिगत स्तर म सहायता पहुंचाय के जरूरत हवय।
मानसून-प्रवेश
दक्षिण-पश्चिम मानसून अइसन त केरल राज्य म एक जून तक आथे। फेर अपन आय के बेरा के तीन दिन पहिली ही आज केरल पहुंच गीस। एखर ले पहिली मौसम विभाग ह 27 मई के मानसून के आय के भविष्यवाणी करे रिहीस। केरल के आने-आने जघा म पाछु कुछ दिन ले हल्का ले तेज वर्षा होवत हे।
ऐति, छत्तीसगढ़ म उपरी हवा म बने चक्रवात के असर ले कहूं-कहूं हल्का ले मध्यम बारिस होवत हवय। संगेसंग बादल घलो छाय हवय। मौसम विभाग के मुताबिक अवइया चौबीस घंटा के दउरान प्रदेस म कुछु-कुछु जघा मन म हल्का बारिस के संग अंधड़ चले के संभावना घलो हवय।
वट सावित्री
आज वट सावित्री तिहार हवय। ए तिहार म सुहागिन माईलोगिन मन अखंड सौभाग्य अउ अपन लइका मनके सलामत रेहे खातिर उपवास राखथे। ए व्रत हर बछर ज्येष्ट मास के अमावस्या के राखे जाथे। आज राजधानी रईपुर समेत प्रदेस के आने-आने जघा मन म महिला मन व्रत राखके अखंड सौभाग्य अउ अपन-अपन परिवार के खुसहाली खातिर वट वृक्ष के नीचे म बइठ के पूजा-अर्चना करीन। संगेसंग वट वृक्ष के चारो ओर घूमके सत्यवान अउ सावित्री के कथा ल सुनीन।
संक्षिप्त समाचार
– अंतर्राष्ट्रीय योग दिवस के उपलक्ष्य म भारतीय सेना के छत्तीसगढ़ अउ ओड़िसा सब एरिया मुख्यालय डहार ले 30 मई के नवा रईपुर स्थित सत्य सांई संजीवनी अस्पताल म एक ठिन कारीकरम के आयोजन करे जाही।
– भाजपा पिछड़ा वर्ग मोर्चा के राष्ट्रीय महामंत्री अउ सांसद संगम लाल गुप्ता काली ले छत्तीसगढ़ के दू दिवसीय प्रवास म रइही। ए दउरान ओमन महासमुंद अउ रईपुर म पिछड़ा वर्ग मोर्चा के पदाधिकारी मनके बइठका घलो लीहीं।
अउ
– जांजगीर चांपा जिला के नगर पंचायत राहौद के अध्यक्ष के खिलाफ अश्विवास प्रस्ताव म काली 30 मई के फेर मतदान होही। पामगढ़ के एसडीएम के उपस्थिति म अश्विस प्रस्ताव के प्रक्रिया संचालित करे जाही।