भाजपा-बैठक
प्रधानमंत्री नरेन्द्र मोदी के अगुवई म केन्द्र के एनडीए सरकार ह आज अपन आठ बछर पूरा कर लेहे। ए मउका म देसभर म भारतीय जनता पार्टी डहार ले कतकोन कारीकरम कराय जावत हे। इही कड़ी म भाजपा के छत्तीसगढ़ प्रभारी डी. पुरंदेश्वरी ह आज राजधानी रईपुर म प्रदेस भाजपा पदाधिकारी मनके बइठका लीन। बइठका म ओमन किहीन कि केन्द्र सरकार के कल्याणकारी योजना मन ल आम लोगन तक पहुंचाय बर प्रदेसभर म कारीकरम कराय जाही। बइठका म यहू घलो तय करे गीस कि भाजपा पदाधिकारी मन डहार ले प्रदेस के आने-आने क्षेत्र के दउरा करके उहां के लोगन ल केन्द्र सरकार के उपलब्धि के बारे म बताय जाही।
भाजपा के प्रदेस प्रभारी ह किहीन कि पार्टी डहार ले छत्तीसगढ़ के आने-आने क्षेत्र के लोगन ले संपर्क करे जाही। एखरे संग लोगन ल यहू बात बताय जाही कि छत्तीसगढ़ म चलत आने-आने विकास काम बर केन्द्र सरकार डहार ले बड़े पैमाना म पइसा दे जावत हे।
प्रधानमंत्री-ड्रोन महोत्सव
प्रधानमंत्री नरेन्द्र मोदी ह काली बिहनिया नई दिल्ली के प्रगति मैदान म देस के सबले बड़े ड्रोन महोत्सव के उद्घाटन करही। ए भारत ड्रोन महोत्सव के दउरान प्रधानमंत्री ह किसान ड्रोन ल चलइया पायलेट अउ ड्रोन विमान ले जुड़े स्टार्टअप के प्रतिनिधि मन ले गोठबात करही। ओमन ह ड्रोन उड़ान के प्रदर्सन घलो देखही। एमा सत्तर ले जादा भागीदार मन ह अपन ड्रोन प्रदर्सन देखाही। दो दिन के ए ड्रोन महोत्सव म उद्योग जगत के कतकोन हस्ती मन, सरकारी अधिकारी, विदेसी राजनायिक, सार्वजनिक उपक्रम अउ निजी कंपनी मनके प्रतिनिधिम मन भाग लीही।
मुख्यमंत्री-भेंट/मुलाकात-01
मुख्यमंत्री भूपेश बघेल ह जगलदपुर के प्रियदर्शिनी इंदिरा स्टेडियम म प्रदेस के पहिली सिंथेटिक फुटबॉल मैदान के लोकार्पण करीन। ए मैदान के संग खिलाड़ी मनके दउड़े बर एक ठिन सिंथेटिक ट्रैक घलो बनाय गे हवय। ए सिंथेटिक ट्रैक ल फुटबॉल के अंतर्राष्ट्रीय संस्था फीफा ह घलो अपन मानक के अनुसार बताय हे। ए संबंध म फीफा ह प्रियदर्शनी इंदिरा स्टेडियम के फुटबॉल मैदान ल अपन प्रमाण पत्र घलो जारी करे हे। ए मउका म मुख्यमंत्री ह प्रियदर्शनी स्टेडियम म करीबन पैंतालीस करोड़ रूपिया के उन्नीस ठिन विकास काम के लोकार्पण अउ करीबन बारह करोड़ रूपिया के आठ ठन विकास काम के सिलान्यास करीन।
खबर के मुताबिक बस्तर म स्थानीय स्तर म सामुदायिक फुटबॉल ल अउ जादा लोकप्रिय बनाय बर ओड़िसा के फुटबॉल अकादमी ह बस्तर जिला फुटबॉल संघ अउ बस्तर जिला प्रसासन के संग एक ठन समझौता करे हे, जेखर ले बस्तर के खिलाड़ी मन ल राष्ट्रीय स्तर के प्रसिक्षक मिल सकही।
इही बीच, मुख्यमंत्री ह अपन भेंट-मुलाकात कारीकरम के दउरान आज बस्तर विधानसभा क्षेत्र के भैंसगांव म सौरागांव तक पक्का सड़क बनाय जाय के घोसना करीन। ओमन ह सौरापाल के माध्यमिक स्कूल ल हाईस्कूल बनाय के अउ बस्तर के जिला सिक्षण प्रशिक्षण संस्थान-डाईट म चलत डी.एड. पाठ्यक्रम ल अउ आगू बढ़ाके बीएड म कराय के घोसना घलो करीन। श्री बघेल ह चोकर गांव म विद्युत उपकेन्द्र, नंदीसागर म सहकारी बैंक अउ बड़े चकवागांव म मिनी स्टेडियम बनाय जाय के घलो घोसना करीन।
मुख्यमंत्री-भेंट/मुलाकात-02
बस्तर के जिला मुख्यालय जगदलपुर म पुलिस अधिकारी अउ करमचारी मन बर ‘‘आमचो कुटुम्ब‘‘ आवासीय परिसर बनाय गे हवय। मुख्यमंत्री भूपेश बघेल ह काली एखर लोकार्पण करीन। ए परिसर म अराजपत्रित अधिकारी मनके संग प्रधान आरखक अउ आरक्षक वर्ग के पुलिसकर्मी मन बर अड़तालीस-जी टाईप अउ एक सौ बीस-एच टाईप मकान बनाय गे हवय। ए मउका म मुख्यमंत्री ह बस्तर संभाग के सातों ठन जिला म आमचो पुलिस कैंटीन बनाय जाय के घलो घोसना करीन। ओमन किहीन कि पुलिस जवान मनके मेहनत अउ त्याग ले बस्तर म सांति हवय।
भाजपा-निष्कासित
प्रदेस भाजपा ह मुंगेली नगर पालिका म क्रॉस वोटिंग के मामला म पार्टी के पांच झन पार्षद मन ल छह बछर बर निष्कासित कर दे हवय। पार्टी के प्रदेस संगठन महामंत्री पवन साय ह अपन आदेस म नगर पालिका उपाध्यक्ष मोहन मल्लाह के संगेसंग पार्षद मोहित बंजारे, संतोषी मोना नागरे, सोनी जांगड़े अउ मोतिम बाई सोनकर ल पार्टी ले बाहिर कर दे हवय। उहें, एक आने युवा भाजपा नेता ल कारण बताओ नोटिस घलो जारी करे गेहे।
वन संसाधन-मान्यता पत्र
ओड़िसा के बाद छत्तीसगढ़ ह देस के दूसर राज्य होही, जिहां राष्ट्रीय वन क्षेत्र म रहइया लोगन ल वन संसाधन मान्यता पत्र दे जाही। एखर ले वनवासी मन ल रोजगार के संग आमदनी बढ़ाय के जादा ले जादा मउका मिलही। ए घोसना मुख्यमंत्री भूपेश बघेल ह काली जगदलपुर विधानसभा क्षेत्र के मंगलपुर म राखे गे भेंट/मुलाकात कारीकरम म करीन। ओमन ह मावलीपदर, नेतानार, पंडरीपानी अउ माड़पाल म आदर्श देवगुड़ी बनाय जाय के घलो घोसना करीन। ए मउका म मुख्यमंत्री ह दिव्यांग नोनी काम्या ल ट्राईसिकल घलो दीन। मुख्यमंत्री ह ए मउका म लोगन ल सुझाव दीन कि ओमन ह जाली लगाके जंगल के चीज़ ल सकलही त एखर ले वनोपज के नुकसान कम होही अउ ओमन ल जादा कीमत घलो मिलही।
मुख्यमंत्री ह कालीच बस्तर चेम्बर ऑफ कॉमर्स डहार ले जगदलपुर म बनाय गे मानव सेवा केन्द्र के भूमिपूजन करीन। ओमन ह एखर भवन निर्माण बर एक करोड़ रूपिया दे जाय के घोसना करीन। ए केन्द्र ले लोगन ल एम्बुलेंस अउ सव वाहन के सुविधा दे जाही। संगेसंग इहां नसा मुक्ति केन्द्र घलो चलाय जाही।
माओवादी-मौत
बिहार के गया म चौरासी लाख रूपिया के इनामी माओवादी संदीप यादव के मउत होगे। पुलिस ह गया जिला के लुटुआ थाना क्षेत्र के जंगल ले ए माओवादी के सव ल बरामद करे हे। पुलिस के अनुसार माओवादी संदीप यादव के खिलाफ छत्तीसगढ़, झारखंड, ओड़िसा, पश्चिम बंगाल, आंधप्रदेश संघरा कतकोन राज्य म पांच सौ ले जादा मामला दर्ज हे। पुलिस ह माओवादी संदीप यादव ल धोखा ले जहर देके मारे जाय के आसंका जतईन हे। पचपन बछर के ए माओवादी ह बाबूरामडीह गांव के रहइया रिहीस।
आईजी-दौरा
रईपुर रेंज के पुलिस महानिरीक्षक ओ.पी. पाल ह माओवाद परभावित क्षेत्र के खल्लारी अउ मेचका थाना के आकस्मिक निरीक्षण करीन। ए दउरान धमतरी जिला के पुलिस अधीक्षक प्रशांत ठाकुर घलो मौजूद रिहीन। ए मउका म श्री पाल ह थाना, चौकी अउ कैम्प म सुरक्षा बर बनाय गे पोस्ट अउ गार्ड के निरीक्षण करीन। पुलिस महानिरीक्षक ह जिला के माओवाद परभावित अंदरूनी इलाका म तलाशी अभियान जारी राखे बर किहीन।
जशपुर-सामुदायिक स्वास्थ्य केन्द्र
जशपुर के कलेक्टर रितेश कुमार अग्रवाल ह जिला के दुलदुला सामुदायिक स्वास्थ्य केन्द्र म डॉक्टर मनके संग आज अउ काली अस्पताल म होय कथित दुर्व्यवहार अउ झड़प के घटना के जांच बर अपर जिला मजिस्ट्रेट आई.एल. ठाकुर के अध्यक्षता म दल बनाय हे। एमा जिला के मुख्य चिकित्सा अधिकारी रंजीत टोप्पो के अलावा दू झन दूसर अधिकारी मन घलो सामिल हे। कलेक्टर ह दल ल मामला के जांच करके जल्दी ले जल्दी रिपोर्ट दे बर किहीन हे। प्रसासन ल ए कथित घटना के सिकायत सोसल मीडिया अउ समाचार पोर्टल ले मिले रिहीस।
मौसम
प्रदेस म अवइया चौबीस घंटा के दउरान एक-दू जघा म हल्का बरसा होय या गरज-चमक के संग बौछार पड़े के संभावना हे। मौसम विभाग के अनुसार ए समय राजस्थान ले ओड़िशा अउ मध्यप्रदेश तक एक ठिन द्रोणिक सक्रिय हे। एखरे साथ उत्तरी बिहार अउ ओखर तीर-तखार के जघा म एक ठिन चक्रीय चक्रवाती घेरा घलो बने हे। एखर असर ले प्रदेस म एक-दू जघा म गरज-चमक के संग अंधड़ चले के घलो संभावना हे। आज मंझनिया कुन रईपुर संघरा आसपास के इलाका म तेज बरसा होईस। एखर सेती लोगन ल गर्मी राहत घलो लागिस।
इही बीच, दक्षिण-पश्चिम मानसून ह अरब सागर के कुछेक हिस्सा म आगू बढ़ गे हवय। अवइया चौबीस घंटा के दउरान एखर अउ आगू बढ़े बर परिस्थिति बनेच हवय।