राज्यसभा सीट अधिसूचना
भारत निर्वाचन आयोग डहार ले 15 राज्य मन म राज्यसभा के 57 सीट बर आज अधिसूचना जारी करे गीस। एखरे संग राज्यसभा चुनाव बर नामांकन भरे के प्रक्रिया घलो शुरू होगे हे। एमा छत्तीसगढ़ के घलो दू सीट शामिल हे। भाजपा के राज्यसभा सांसद रामविचार नेताम अउ कांग्रेस के छाया वर्मा के कार्यकाल इही साल 29 जून के खतम होही।
निर्वाचन आयोग डहार ले जारी कार्यक्रम के अनुसार 31 मई तक नामांकन दाखिल करे जा सकथे। एक जून के नामांकन पत्र के जांच होही अउ 3 जून तक उम्मीदवार ल नामांकन पत्र वापिस लेके मउका दे जाही। जरूरत पड़े म 10 जून के मतदान कराय जाही। इही बीच मतगणना के बाद विजयी उम्मीदवार के घोषणा कर दे जाही।
उंहें मुख्यमंत्री ह जिला म 97 करोड़ 29 लाख रूपिया के लागत ले बने तीन सौ ले जादा विकास कार्य मनके भूमिपूजन अउ लोकार्पण करीन । एखर ले पहिली भेंट-मुलाकात कार्यक्रम के बेरा मुख्यमंत्री ह आज जिला के चित्रकोट विधानसभा के गांव बड़े किलेपाल पहुंचीन। इंहा मुख्यमंत्री ह 50 करोड़ रूपिया ले जादा के विकास कार्य के लोकापर्ण अउ शिलान्यास करीन।
मुख्यमंत्री ह आज दंतेवाड़ा जिला के कुम्हाररास म कुम्हार मनके हुनर ल निखारे बर बनाये गे माटीकला बोर्ड ग्लेजिंग यूनिट के उद्घाटन करीन। ग्लेजिंग युनिट म लगे आधुनिक मशीन मनके मदद ले कुम्हार मन कम समय म माटी के सुंदर कलाकृति कर पाही। जेला 166 लाख रूपिया के लागत ले बनाय गेहे।
मुख्यमंत्री ह नक्सल समस्या उपर चर्चा करत कीहिन कि ये सिरिफ पुलिस के समस्या नो हय। ये सबके प्रयास ले खतम होही। ओमन कीहिन कि अंदरूनी इलाका तक शासन के योजना पहुंचत हे। लोगन मन ल रोजगार मिलत हे। एखर ले नक्सली समस्या घलो कम होय हे।
मुख्यमंत्री भूपेश बघेल ह दंतेवाड़ा जिला के अधिकारी मनके बइठक लेके विकास के काम अउ योजना मनके प्रगति के समीक्षा घलो करीन।
चुनरी रिकार्ड
मुख्यमंत्री भूपेश बघेल ह दंतेवाड़ा के दंतेश्वरी मंदिर म महिला मन के तैयार करे ग्यारा किलोमीटर लंबा चुनरी ल माता ल अर्पित करीन जउन अपन आप म रिकार्ड हे। ये चुनरी ल दंतेवाड़ा डेनेक्स म काम करइया तीन सौ माइलोगिन मन ह सात दिन के मेहनत ले तैयार करे हे।
सुनइया मन ल बताइन कि झीरम घाटी के शहीद अउ नक्सल हिंसा के शिकार होय सबो लोगन मनके सुरता म हर साल 25 मई के दिन झीरम श्रद्धांजलि दिवस मनाये जाथे। काली प्रदेश के सबो सरकारी अउ अर्ध सरकारी कार्यालय मन म शहीद मनके सुरता म दू मिनट के मौन राखके श्रद्धांजलि दे जाही।
आज के प्रश्न हे – गुरूदेव रविंद्रनाथ टैगोर ह जन गण मन के बांग्ला भाषा ले अंग्रेजी म अनुवाद कोन जगा म करे रीहिन ?
श्रोता मन अपन उत्तर वाट्सअप नंबर – आठ आठ दू छै पांच चार छै दो छै दो – या ई-मेल आई डी – अमृत महोत्सव क्विज एट द रेट प्रसार भारती डॅाट जीओवी डॅाट इन म भेज सकथे।
भाग्यशाली प्रतिभागी ल विजेता के रूप म चुने जाही अउ काली के समाचार प्रभात म विजेता के नाव के घोषणा करे जाही। विजेता ल ई-प्रमाण पत्र अउ सांकेतिक पुरस्कार दे जाही।
निगम वार्डवार राशि मंजूर
प्रशासन ह प्रदेश के सबो नगर निगम मन म पहिली बार वार्ड के अनुसार राशि मंजूर करे हे। नगरीय प्रशासन अउ विकास विभाग डहार ले एखर बर पहिली चरण म नगर निगम मन बर 66 करोड़ रूपिया ले जादा के राशि स्वीकृत करे हे। विभाग ह सबो नगर निगम मनके आयुक्त ल एखर जानकारी देत अधोसरंचना विकास के काम के प्रस्ताव भेजे बर केहे हे। नगर निगम के सबो वार्ड मन बर 15 लाख रूपिया के मान से साढे़ 10 करोड़ रूपिया मंजूर करे गेहे ।
दक्षिण पूर्व मध्य रेलवे-एसईसीआर ह छत्तीसगढ़ ले होत जवइया ट्रेन मन ल रद्द कर देहे। एमा एक्सप्रेस अउ पेसेंजर ट्रेन शामिल हे। कोयला के आपूर्ति करे बर एसईसीएल ह एक महीना बर ये ट्रेन मनके परिचालन बंदक र देहे। जेन एक्सप्रेस ट्रेन मन ल रद्द करे गेहे। ओमा बिलासपुर-भोपाल एक्सप्रेस, अंबिकापुर -जबलपुर, भुवनेश्वर-एलटीटी, भगत की कोठी अउ बीकानेर एक्सप्रेस जइसे कतके ट्रेन शामिल हे।
उंहें रद्द होवइया पेसेंजर ट्रेन मन म बिलासपुर-रायगढ़, बिलासपुर-शहडोल, डोंगरगढ़-रायपुर, झारसुगुड़ा-रायगढ़, गोंदिया-इतवारी, जइसे ट्रेन शामिल हे । एखर अलावा गेवरारोड-इतवारी एक्सप्रेस, कोरबा-गेवरारोड के बीच नइ चलय।
संस्कृत विद्यामंडलम परिणाम
स्कूल शिक्षा मंत्री डॅाक्टर प्रेमसाय सिंह टेकाम ह आज छत्तीसगढ़ संस्कृत विद्यामंडलम डहार ले आयोजित हाईस्कूल अउ हायर सेकण्डरी के वार्षिक परीक्षा के परिणाम घोषित करीन। ए साल 96 प्रतिशत ले जादा लईका मन पास होइन। कक्षा 12वीं म जांजगीर चांपा जिला के अकलतरा के कुमारी अन्नपूर्णा ह पहिली स्थान पाय हे । उंहें 10वीं के परीक्षा म इही जिला के सपिया स्कूल के कृष्णकांत राठौर पहिली स्थान पाय हे।