दंतेवाड़ा-डेनेक्स यूनिट
मुख्यमंत्री भूपेश बघेल ह आज दंतेवाड़ा जिला के कटेकल्याण म नवाचार डेनेक्स के नवा यूनिट के सुभारंभ करीन। नवा यूनिट म सौ झिन माईलोगिन मन ह गारमेंट्स बनाही अउ संगेसंग छिंदनार म खुलइया डेनेक्स के पांचवां यूनिट के घलो एमओयू होईस। ए मउका म मुख्यमंत्री ह माईलोगिन मन ल बधाई दीन अउ किहीन कि दंतेवाड़ा म ए नवाचार के देसभर म चर्चा होवत हे। ए दउरान मुख्यमंत्री ह कटेकल्याण म चौदह करोड़ तीस लाख रूपिया के लागत ले बने एक सौ तिरालीस देवगुड़ी परिसर के सौंदर्यीकरण काम के लोकार्पण करीन अउ संगेसंग ओमन मिनी स्टेडियम बनाय, बिजली सब स्टेशन के स्थापना, मोकपाल गांव म मंगलभवन जइसन कामकाज के घोसना करीन। एखर अलावा आश्रित गांव लखारास म एनीकट बनाय अउ कुंआकोंडा म पोस्ट मैट्रिक छात्रावास खोले के घलो घोसना करीन।
जानबा के मुताबिक अपन टेक्सटाईल यूनिट के सेती दंतेवाड़ा के गोठबात पूरा देस म चलत हे। इहां के बने कपड़ा के मांग पूरा देस म सुरू होगे हे।
अमृत सरोवर योजना
मिशन अमृत सरोवर योजना म अब तरिया बनाय बर स्वाधीनता सेनानी अउ शहीद मनके गांव म प्राथमिकता दे जाही। राज्य मनरेगा आयुक्त मोहम्मद कैसर अब्दुल हक ह बतईन कि राज्य के हरेक जिला म कम ले कम पचहत्तर अमृत सरोवर के काम चलत हे। ओमन किहीन कि कम ले कम एक एकड़ क्षेत्र म तरिया बनाय जाही। मनरेगा आयुक्त ह बतईन कि स्वाधीनता सेनानी या उंखर परिवार के सदस्य या फेर आजादी के बाद शहीद होय सैनिक मनके परिवार मन ल पद्म पुरस्कार ले सम्मानित करे गेहे, त उही मन ल अमृत सरोवर के काम के सुभारंभ करे के मउका दे जाही। जिहां अमृत सरोवर बनाय जाही, उहां के मेढ़ म नीम, पीपल, बरगद जइसन रूख लगाय जाही।
प्रदर्शन
भाजपा छत्तीसगढ़ किसान मोर्चा के सदस्य मन ह आज प्रदेस के आने-आने जिला मन म सोसायटी मन डहार ले गोबर खातू ल किसान मन ल खरीदे बर मजबूर करे के सेती सोसायटी मन म प्रदर्सन करीन। त उहें, धमतरी जिला म छत्तीसगढ़ किसान यूनियन के सदस्य मन ह खातू के बाढ़े कीमत ल वापिस लेके संगेसंग अपन छह ठिन मांग ल लेके कलेक्ट्रेट पहुंचीन। सदस्य मन ह आरोप लगईन कि सोसायटी मन म डीएपी खातू के भाव म एक सौ पचास रूपिया प्रति बोरी अउ पोटास खातू म सात सौ रूपिया प्रति बोरी के बढ़ोतरी करे गेहे।
हसदेव अभ्यारण्य-बसपा विरोध
बहुजन समाज पार्टी के छत्तीसगढ़ इकाई के सदस्य मन ह हसदेव अभ्यारण्य ल कोयला खनन बर प्राईवेट कंपनी ल देके विरोध करे हे। सदस्य मन ह आरोप लगाय हे कि कोयला निकाले ले आदिवासी समूह अउ जीव-जंतु मन उपर खतरा बाढ़ जही। धमतरी जिला म पार्टी के सदस्य मन ह कलेक्टर ले मिलके ए बारे म राज्यपाल के नाव ज्ञापन सौंपीन।
अंतर्राष्ट्रीय योग दिवस
अंतर्राष्ट्रीय योग दिवस इक्कीस जून के मनाये जाही। बड़का कार्यक्रम मैसूर म होही। जिहां प्रधानमंत्री नरेंद्र मोदी ह सामूहिक योग कार्यक्रम के अगवई करही। आज नई दिल्ली म संवाददाता मनले गोठबात म आयुष मंत्री, सर्बानंद सोनोवाल ह कीहिन कि ए बेरा अंतर्राष्ट्रीय योग दिवस ह आजादी के अमृत महोत्सव वाले साल म होवत हे। जेखर सेती देश के पचहत्तर ठिन प्रमुख जगा मन म योग दिवस मनाये जाही।
अराजपत्रित पत्र-सीईटी परीक्षा
केन्द्रीय कार्मिक अउ लोक शिकायत मंत्री डॉक्टर जितेन्द्र सिंह ह किहीन हे कि एसो ले अराजपत्रित पद मन म भर्ती बर सामान्य पात्रता परीक्षा-सीईटी के आयोजन करे जाही। कार्मिक अउ प्रशिक्षण विभाग-डी.ओ.पी.टी. म जम्मों छह ठिन स्वायत्त निकाय मनके काली नई दिल्ली म बइठका होईस, जेमा केहे गीस कि ए परीक्षा मन ल बने ढंग ले कराय के तियारी सुरू होगे हे। हरेक जिला मन म कम ले कम एक ठिन परीक्षा केन्द्र होही। परीक्षा हिन्दी अउ अंग्रेजी भासा के संगेसंग बारह ठिन भासा मन म होही।
राष्ट्रीय पात्रता परीक्षा
विश्वविद्यालय अनुदान आयोग-यूजीसी के राष्ट्रीय पात्रता परीक्षा-नेट बर ऑनलाइन अरजी के आखिरी तारीख तीस मई तक बढ़ा दे गेहे। यूजीसी के अध्यक्ष एम. जगदीश कुमार ह ट्वीट म बतईन कि पहिली अरजी करे के आखिरी तारीख बीस मई राखे गे रिहीस। फेर अरजी करइया मनके बिनती के बाद तारीख ल बढ़ाय गेहे। यूजीसी नेट दिसंबर-दू हजार इक्कीस अउ जून-दू हजार बाईस के परीक्षा बयासी ठिन बिसय मन म ऑनलाइन माध्यम ले होही।
डिजीलॉकर सेवा
सरकारी सेवा ल अउ जादा सरल अउ पारदर्शी बनाय बर माई जीओव्ही हेल्प डेस्क ह कतकोन बड़का काम करत हे। अब वाट्सअप म घलो माई जीओव्ही प्लेटफार्म के परयोग करके डिजी लॉकर सेवा के फायदा ले सकथे।
एमा जरूरी दस्तावेज, पेनकार्ड ड्राइविंग लाइसेंस, वाहन पंजीकरण दस्तावेज, ल वाट्सअप के माध्यम ले डाउनलोड कर सकथे। वाट्सअप नंबर नौ एक नौ शून्य एक तीन एक पांच एक पांच एक पांच म नमस्ते या हाय भेज के डिजी लॉकर सेवा तक पहुंचे जा सकथे।
राष्ट्रीय पात्रता परीक्षा
विश्वविद्यालय अनुदान आयोग-यूजीसी के राष्ट्रीय पात्रता परीक्षा-नेट बर ऑनलाइन अरजी के आखिरी तारीख तीस मई तक बढ़ा दे गेहे। यूजीसी के अध्यक्ष एम. जगदीश कुमार ह ट्वीट म बतईन कि पहिली अरजी करे के आखिरी तारीख बीस मई राखे गे रिहीस। फेर अरजी करइया मनके बिनती के बाद तारीख ल बढ़ाय गेहे। यूजीसी नेट दिसंबर-दू हजार इक्कीस अउ जून-दू हजार बाईस के परीक्षा बयासी ठिन बिसय मन म ऑनलाइन माध्यम ले होही।
मुख्यमंत्री-बालोद
मुख्यमंत्री ह अर्जुंदा महाविद्यालय के नाव ल शहीद दुर्वासा निषाद के नाव म राखे के घोसना करे हे। मुख्यमंत्री ह काली बालोद जिला के डौंडी विकासखंड के गांव घोटिया म राखे गे निषाद समाज के वार्षिक अधिवेशन म सामिल होईन। ए मउका म घोटिया म मंगल भवन बनाय के संगेसंग कालेज खोले के घोसना करीन।
अंतर्राष्ट्रीय जैव विविधता दिवस
अंतर्राष्ट्रीय जैव विविधता दिवस के मउका म काली जशपुर नगर म मैराथन दउड़ राखे गे रिहीस। संसदीय सचिव यू.डी. मिंज अउ जशपुर विधायक विनय भगत ह ए दउड़ के सुभारंभ करीन। ए मउका म वनमंडल परिसर म फोटू प्रदर्सनी घलो लगाय गे रिहीस। त उहें, मुंगेली जिला म घलो जैव विविधता दिवस के मउका म कतकोन कारीकरम राखे गे रिहीस। ए दउरान हिरण बचाव दल के गठन घलो करे गीस।
खेल-प्रतियोगिता
प्रदेस म गांव अउ नगरीय क्षेत्र मन म हरेक विकासखंड के संगेसंग जिला स्तर मन म खेल प्रतियोगिता कराय के फइसला ले गेहे। ए खेल प्रतियोगिता बालक अउ बालिका वर्ग बर सब जूनियर अउ जूनियर वर्ग म राखे जाही। प्रतियोगिता म हॉकी, फुटबॉल, कबड्डी, खो-खो, क्रिकेट के संगेसंग एथलेटिक, बैडमिंटन अउ कुश्ती जइसन स्पर्धा होही। जानबा के मुताबिक राज्य के नवा खिलाड़ी मन म रूचि पैदा अउ खेल प्रतियोगिता के माध्यम ले जादा मउका देवाय के उद्देश्य ले ए प्रतियोगिता राखे जात हे।
मौसम
मौसम विभाग ह अवइया चार घंटा के दउरान प्रदेस के कोरिया, सूरजपुर, बलरामपुर, सरगुजा, जशपुर, पेण्ड्रा रोड, बिलासपुर, कोरबा, रायगढ़ अउ एखर ले लगे जिला मन म एक-दू जघा म गरज-चमक के संग जोरदरहा हवा गरेर चले के संभावना जताए हे। उहें, कोनों-कोनों जघा म करा गिरे के संगेसंग पानी घलो गिर सकथे।
संक्षिप्त समाचार
– बेमेतरा जनपद पंचायत म अध्यक्ष पद बर होय उपचुनई म रेवती साहू ल अध्यक्ष चुने गेहे।
– खरसिया ले जशपुर जावत एक ठिन बस ह डूमरबहार-सराईटोला के तीर कर्राघाट म अनते-तनते होके पलट गे। ए घटना म बारह ले जादा यात्री मन ह घायल होय हे, जेमा ले तीन के हालत गंभीर बताय जात हे।
अउ
– रायगढ़ जिला म पाछु संझा महानदी के कलमा बैराज के तीर एक झिन माईलोगिन के बुड़े ले मउत होगे।