आज ले पेट्रोल के कीमत साढ़े नौ रूपिया प्रतिलीटर अउ डीजल के कीमत सात रूपिया प्रतिलीटर कम होगे हे। केन्द्र सरकार ह काली पेट्रोल के उत्पाद सुल्क म आठ रूपिया प्रतिलीटर अउ डीजल म छह रूपिया प्रतिलीटर कटौती के घोसना करे रिहीस। केन्द्रीय वित्त मंत्री निर्मला सीतारमण ह काली ट्वीट करके ए जानकारी दीन। वित्त मंत्री ह आम लोगन मन ल राहत पहुंचाय बर राज्य मन ले पेट्रोल अउ डीजल के कीमत म कटौती करे के अपील करे हे। ओमन किहीन कि केन्द्र सरकार प्रधानमंत्री उज्जवला योजना म नौ करोड़ ले जादा लाभार्थी मन ल हरेक बछर बारह सिलेंडर तक प्रति सिलेंडर दू सौ रूपिया के सब्सिडी दीहीं।
उहें, प्रधानमंत्री नरेन्द्र मोदी ह किहीन कि पेट्रोल अउ डीजल के कीमत म कमी करे जाय के फइसला के आने-आने क्षेत्र म सकारात्मक असर पड़ही। श्री मोदी ह एक ठिन ट्वीट म किहीन कि एखर ले नागरिक मन ल राहत मिलही अउ उंखर जीवन आसान होही।
ऐति, छत्तीसगढ़ के पूर्व मुख्यमंत्री अउ भाजपा के राष्ट्रीय उपाध्यक्ष डॉक्टर रमन सिंह अउ प्रदेस भाजपा अध्यक्ष विष्णुदेव साय ह पेट्रोल अउ डीजल के कीमत कम करे म केन्द्र सरकार ल धन्यवाद दीन हे। डॉक्टर सिंह ह राज्य सरकार ले मांग करीन कि केन्द्र सरकार के जइसे राज्य सरकार ह घलो वैट घटावय, जेखर ले छत्तीसगढ़ के जनता ल अउ राहत मिल सकय।
दूसर कोति, मुख्यमंत्री भूपेश बघेल ह पेट्रोल-डीजल के कीमत म कमी करे जाय के केन्द्र सरकार के निर्णय के स्वागत करे हे। ओमन किहीन कि अब केन्द्र सरकार यूपीए सरकार के समय के सेंट्रल एक्साइज दर लागू करय। एखर संगेसंग पेट्रोल-डीजल म लगाय गे सेस ल घलो खतम करे जाना चाही।
कैंसर संस्थान-भूमिपूजन
मुख्यमंत्री भूपेश बघेल ह आज रईपुर स्थित अपन निवास कार्यालय म आयोजित वर्चुअल कारीकरम म बिलासपुर म एक सौ बीस करोड़ रूपिया के लागत ले बनइया अत्याधुनिक राज्य कैंसर संस्थान के भूमिपूजन करीन। ए बेरा म मुख्यमंत्री ह किहीन कि राज्य कैंसर संस्थान नवा-नवा तकनीक ले लैस रइही अउ अवइया एक साल म एखर निर्माण पूरा कर ले जाही। ओमन ह किहीन कि छत्तीसगढ़ के संगेसंग आसपास के कैंसर मरीज मन ल ए संस्थान के माध्यम ले इलाज के बने सुविधा मिलही।
ए मउका म स्वास्थ्य मंत्री टी.एस. सिंहदेव ह किहीन कि राज्य कैंसर संस्थान बर मुख्यमंत्री ह चौंतीस करोड़ रूपिया ले अधिक के रासि के स्वीकृति दे देहे।
बतादन कि राज्य कैंसर संस्थान म जम्मों प्रकार के कैंसर के इलाज के सुविधा एके छत के नीचे मिलही। संस्था म सौ बिस्तर वाले आधुनिक तकनीक कैंसर वार्ड अउ बीस बिस्तर के आईसीयू वार्ड के सुविधा उपलब्ध रइही।
जैव विविधता दिवस
आज अंतर्राष्ट्रीय जैव विविधता दिवस हरय। ए मउका म प्रदेसभर म आने-आने कारीकरम आयोजित करे जावत हे। मुख्यमंत्री भूपेश बघेल ह आज अपन रईपुर स्थित निवास कार्यालय म राखे गे परिचर्चा अउ पुरस्कार वितरण कारीकरम म सामिल होईन। ए मउका म ओमन किहीन कि छत्तीसगढ़ जैव विविधता राज्य के गौरव हरय।
मुख्यमंत्री ह कारीकरम के दउरान जैव विविधिता, पालतू पशु के संरक्षण, जैव सांस्कृतिक विविधता के संरक्षण के क्षेत्र म काम करइया संस्था, व्यक्ति अउ जैव प्रबंधन समिति बर पुरस्कार घोसित करीन। कारीकरम म वीडियो कान्फ्रेंसिंग ले जुड़े वनमंडल अधिकारी डहार ले संबंधित मन ल पुरस्कृत करे गीस।
राष्ट्रीय एकता शिविर
राज्यपाल अनुसुईया उइके ह काली दुरूग जिला के अमलेश्वर म रामचंद्र मिशन आश्रम म सात दिवसीय राष्ट्रीय एकता शिविर के शुभारंभ करीन। ए मउका म राज्यपाल ह किहीन कि ए सिविर प्रधानमंत्री नरेन्द्र मोदी के एक भारत-श्रेष्ठ भारत के सपना ल साकार करे अउ युवा मन ल देस के संस्कृति ले परिचित कराय म बड़का भूमिका निभाही।
बतादन कि केन्द्र सरकार के युवा कारीकरम अउ खेल मंत्रालय, राष्ट्रीय सेवा योजना के संग पंडित रविशंकर शुक्ल विश्वविद्यालय के तत्वावधान म आयोजित ए सिविर म देस के इकतीस आने-आने राज्य के स्वयंसेवक पहुंचे हे।
मन की बात
प्रधानमंत्री नरेन्द्र मोदी ह किहीन हे कि ओमन ल अवइया हफ्ता के ‘‘मन की बात‘‘ कारीकरम बर आने-आने विचार अउ सुझाव मिलत हे। एक ट्वीट म श्री मोदी ह किहीन कि ओमन बड़ संख्या म युवा मनके विचार साझा करे ले खुस हंवय।
डीजी मुलाकात
सीआरपीएफ के पुलिस महानिदेशक कुलदीप सिंह ह आज सुकमा जिला के माओवादी प्रभावित एलमागुंडा कैम्प के निरीक्षण करीन। ए दउरान ओमन कोबरा बटालियन अउ एसटीएफ के जवान मन ले मुलाकात करके उंखर हौसला बढ़ईन। श्री सिंह ह प्रत्येक जवान अउ अधिकारी मन ले व्यक्तिगत मुलाकात करके उंखर हालचाल जानीन। ए मउका म सीआरपीएफ के डीआईजी योज्ञान सिंह अउ पुलिस अधीक्षक सुनील शर्मा मौजूद रिहीन।
अमृत महोत्सव-तिरंगा यात्रा
आजादी के अमृत महोत्सव के तहत क्रीडा भारती डहार ले आज देसभर म दू सौ बीस ले जादा जघा म एक साथ तिरंगा यात्रा निकाले गीस। दुरूग जिला म ए तिरंगा यात्रा दुरूग के नाना-नानी पार्क ले बिहनिया नौ बजे ले सुरू होईस, जउन दुरूग-भिलाई होवत राजधानी रईपुर के तेलीबांधा तरिया म खतम होईस। ए राष्ट्रव्यापी आयोजन म आज उन्नीस हजार किलोमीटर के दूरी तय करे गीस।
ए कारीकरम के मुख्य अतिथि हेमचंद यादव विश्वविद्यालय के कुलपति डॉक्टर नरेन्द्र दीक्षित अउ अंतर्राष्ट्रीय हॉकी खिलाड़ी नीता डूमरे ह तिरंगा यात्रा ल हरा झंडी दिखाके रवाना करीन।
गांजा बरामद
नारकोटिक्स कंट्रोल ब्यूरो-एनसीबी के टीम ह स्थानीय पुलिस के मदद ले आज कबीरधाम जिला के सीमा म स्थित दशरंगपुर म गांजा ले भरे एक ट्रक ल बरामद करे हे। जब्त गांजा के अनुमानित कीमत करीबन तीन करोड़ इक्कीस लाख रूपिया बताय जात हे। ए मामला म छह झिन मनखे ल गिरफ्तार करे गेहे। संगेसंग तस्करी म इस्तेमाल करे जाय वाले कार ल घलो जब्त कर ले गेहे। आरोपी चाउर के आड़ म गांजा के तस्करी करत रिहीन हे।
खेल समाचार
खेल अउ युवा कल्याण विभाग डहार ले बिलासपुर के खेल प्रशिक्षण केन्द्र बहतराई म एथलेटिक्स अउ कबड्डी के खिलाड़ी मन बर खेल अकादमी सुरू करे जावत हे। एखर बर खिलाड़ी मनके चयन करे जावत हे। ए सिलसिला म बेमेतरा के साईंस कॉलेज मैदान म काली चयन प्रतियोगिता के आयोजन करे जाही।
हाथी हमला-मौत
कोरिया जिला के मनेन्द्रगढ़ वनमंडल के जनकपुर वन परिक्षेत्र स्थित ग्राम बेलगांव म पाछु रतिहा हाथी मनके हमला ले बाप-बेटी के मउत होगे। हाथी मनके दल ह घर ल घलो तोड़ दीस। सूचना मिले के बाद वन विभाग के टीम ह घटनास्थल म पहुंच के हाथी मन ल जंगल कोति भगईस।
मौसम
प्रदेस म काली एक-दू जघा म हल्का पानी गिरे अउ गरज-चमक के संग हवा-गरेर चले के संभावना हे। मौसम विभाग ले मिले जानकारी के अनुसार एक ठिन द्रोणिका दक्षिण-पश्चिम राजस्थान ले झारखंड तक बने हे। उहें, तटीय ओड़िसा के तीर एक चक्रवाती घेरा बने हे, जेखर प्रभाव ले प्रदेस म बदली-बारिस के स्थिति बनत हे।
खेल समाचार
खेल अउ युवा कल्याण विभाग डहार ले बिलासपुर के खेल प्रशिक्षण केन्द्र बहतराई म एथलेटिक्स अउ कबड्डी के खिलाड़ी मन बर खेल अकादमी सुरू करे जावत हे। एखर बर खिलाड़ी मनके चयन करे जावत हे। ए सिलसिला म बेमेतरा के साईंस कॉलेज मैदान म काली चयन प्रतियोगिता के आयोजन करे जाही।