भेंट-मुलाकात कार्यक्रम-01
मुख्यमंत्री भूपेश बघेल ह किहीन हे कि माओवादी मन संग गोठबात बर राज्य सरकार के दुवारी हर हमेसा खुले हे। फेर ओमन ल भारत के संविधान उपर भरोसा करे बर पड़ही। आज सुकमा म पत्रकार मन ले गोठबात करत मुख्यमंत्री ह किहीन कि संविधान के दायरा म राहत माओवादी जिहां बलाही, उहां जाके सरकार गोठबात कर सकत हे।
खबर के मुताबिक माओवादी संगठन ह पाछु छह मई के जारी करे गे प्रेस विज्ञप्ति म केहे रिहीन कि ओमन सरकार ले गोठबात बर तियार हवय। माओवादी मन के दण्डाकारण्य स्पेशल जोनल कमेटी के प्रवक्ता ह अपन बयान किहीन कि बातचीत बर सरकार बने माहौल तियार करय।
एखर पहिली, मुख्यमंत्री ह आज सुकमा म अधिकारी मनके समीक्षा बइठका लीन। ओमन अधिकारी मन ले किहीन कि जिला के युवा मनके सूची बनाके ओमन ल जादा ले जादा स्व-रोजगार बर प्रेरित करय। ओमन लोगन म भरोसा, विकास अउ सुरक्षा के भाव जगाय के बात किहीन। मुख्यमंत्री ह सुकमा म करीबन छत्तीस करोड़ रूपिया के लागत ले बाईस ठिन विकास काम के लोकार्पण करीन अउ अटठहत्तर करोड़ रूपिया के पैंतालीस ठिन निर्माण काम के सिलान्यास घलो करीन हे।
भेंट-मुलाकात कार्यक्रम-02
जइसन कि खबर दे जा चुके हे कि मुख्यमंत्री भूपेश बघेल ह अभी अपन भेंट-मुलाकात कारीकरम के दूसर चरण म बस्तर संभाग के आने-आने क्षेत्र के दउरा करत हे। एमा आज ओमन बीजापुर जिला के दउरा करीन। कुटरू म भेंट-मुलाकता कारीकरम के बेरा स्वामी आत्मानंद अंग्रेजी माध्यम स्कूल, सामुदायिक स्वास्थ्य केन्द्र सहकारी बैंक अउ सरकारी महाविद्यालय बनाय के संगेसंग मिनी स्टेडियम अउ हाईस्कूल भवन बनाय के घोसना करीन। संगेसंग श्री बघेल ह अड्डावली ग्राम पंचायत खेल मैदान, बेदरे अउ फरसेगढ़ म प्राथमिक स्वास्थ्य केन्द्र स्थापित करे के ऐलान करीन। श्री बघेल ह किहीन कि फरसेगढ़ म जल्दी नवा धान बिसाय के काम सुरू करे जाही। ओमन जैवारम गांव म प्राथमिक स्कूल ल मीडिल स्कूल बनाय के घलो घोसना करीन हे। अपन विजयपुर दउरा के बेरा मुख्यमंत्री ह माता गुड़ी म पूजापाठ करीन अउ भैरमगढ़ म अट्ठाईस ठिन देवगुड़ी के लोकार्पण करीन। संगेसंग पैंतीस ठिन देवगुड़ी बनाय बर भूमिपूजन करे हे।
मलेरिया मुक्त-छत्तीसगढ़ अभियान
मलेरिया मुक्त छत्तीसगढ़ अभियान म लोगन म जागरूकता लाय बर आज कोंडागांव जिला म जिला के मुख्य चिकित्सा अधिकारी डॉक्टर टी.आर. कुंवर अउ जिला मलेरिया अधिकारी डॉक्टर अमृत रोहलेडर ह मलेरिया रथ ल झंडा देखाके रवाना करीन। ए अभियान के संगेसंग टीबी, मोतियाबिंद अउ स्कैबिज रोग के जांच करे जावत हे। ए अभियान म कीटनाशक दवई अउ घोल के छिड़काव के संग जांच के बेरा संक्रमित पाय गे मरीज मन ल मुफत म दवई दे जात हे।
खबर के मुताबिक मलेरिया मुक्त छत्तीसगढ़ अभियान के छठवां चरण पाछु सत्रह मई ले बस्तर संभाग म सुरू होगे हे, जउन सोलह जून तक चलही।
हसदेव अभ्यारण्य-प्रदर्शन
हसदेव अभ्यारण्य ल कोयला खनन बर प्राईवेट कंपनी ल आवंटित करे जाय म छत्तीसगढ़ किसान यूनियन ह गुस्सा जतईन हे। ए संबंध म किसान यूनियन के धमतरी इकाई के सदस्य मन ह आज धमतरी म कलेक्टर पी.एस. एल्मा ले मिलके ज्ञापन सौंपीन। ए ज्ञापन म किसान यूनियन ह हसदेव अभ्यारण्य के जंगल ल छत्तीसगढ़ के धरोहर बतावत एला बचाय के मांग करीन हे। यूनियन के धमतरी इकाई के जिला अध्यक्ष घनाराम साहू ह किहीन कि हसदेव अभ्यारण्य सत्तर हजार एकड़ म फइले हे, इहां करीबन दस हजार आदिवासी परिवार रहिथे। संगेसंग ए वन क्षेत्र म आने-आने प्रजाति के पशु-पक्षी हवय। ओमन किहीन कि कोयला खनन बर अभ्यारण्य के जम्मों क्षेत्र दे ले आदिवासी समूह अउ जंगल के पशु-पक्षी मन ल खतरा हो सकत हे।
आकाशवाणी समाचार-उपलब्धि
आकाशवाणी समाचार ह सोशल मीडिया म एक महत्ता के उपलब्धि पाय हे। आकाशवाणी समाचार के ट्वीटर हैंडल ‘‘एआईआर न्यूज एलर्ट्स‘‘ के तीस लाख फॉलोअर होगे हे। आकाशवाणी ल लोगन ले मिले ए भरोसा ले साइबर जगत म ए माध्यम के लोकप्रियता देखे जा सकत हे। आकाशवाणी ले प्रसारित होवइया समाचार के सच्चई अउ निष्पक्षता ल ट्वीटर म जादा ले जादा लाइक मिलत हे। आकाशवाणी के प्रधान महानिदेशक एन.वी. रेड्डी ह श्रोता मन कोति ले आकाशवाणी समाचार म भरोसा जताय म आभार मानीन हे। ओमन किहीन कि ए समाचार सेवा प्रभाग के सामुहिक प्रयास के ही परिणाम हवय। संगेसंग ए उपलब्धि सुनइया मनके बीच आकाशवाणी समाचार के भरोसा ल बताथे।
खबर के मुताबिक आकाशवाणी के समाचार सेवा प्रभाग सतहत्तर भारतीय भासा अउ बोली के संग बारह ठिन विदेसी भासा म समाचार प्रसारित करत हे। ऑल इंडिया रेडियो के स्थापना बछर उन्नीस सौ छत्तीस म होय रिहीस। ए विश्व के सबले बड़े रेडियो नेटवर्क हे। बदलत बेरा के संगेसंग आकाशवाणी समाचार ह साइबर जगत म घलो अपन जघा बना लेहे अउ जादा ले जादा श्रोता मन तक पहुंचे बर आकाशवाणी कोति ले सोशल मीडिया प्लेटफॉर्म बउरे जावत हे।
मिट्टी तेल-आवंटन
खाद्य विभाग ह प्रदेस के आने-आने जिला म पहुंचविहीन क्षेत्र के एक सौ तिरानवे ठन उचित मूल्य दुकान बर करीबन ढाई सौ किलोलीटर माटी तेल के आवंटन जारी करे हे। ए सबो क्षेत्र म तीस मई तक माटी तेल के भंडारण सुनिश्चित करे बर केहे गेहे।
भाजपा-बैठक
भारतीय जनता पार्टी के राष्ट्रीय पदाधिकारी मनके दू दिवसीय बइठका जयपुर म काली सुरू होवत हे। एमा छत्तीसगढ़ भाजपा के बड़का नेता अउ पदाधिकारी सामिल होही। बइठका म प्रदेस प्रभारी डी. पुरंदेश्वरी, प्रदेस के पूर्व मुख्यमंत्री डॉक्टर रमन सिंह अउ संगठन महामंत्री पवन साय सामिल होही।
जाति/निवास प्रमाण पत्र
धमतरी जिला म पढ़ईया लइका मन ल उंखर स्कूल म ही जाति अउ निवास प्रमाण पत्र बना के देके काम सुरू होगे हे। जिला शिक्षा अधिकारी डॉक्टर रजनी नेल्सन ह बतईन कि जिला के सबो सरकारी अउ प्राईवेट स्कूल मन म छठवीं ले बारहवीं कक्षा के पढ़ईया लइका मन ल स्कूल म ही सिविर लगाके जाति प्रमाण पत्र दे जाना हे। एखर बर जरूरी दस्तावेज एकट्ठा करे के काम काली ले तेईस मई तक अभियान चलाके पूरा करे जाही।
अध्यक्ष-अविश्वास प्रस्ताव
जांजगीर-चांपा जिला के राहौद नगर पंचायत अध्यक्ष के खिलाफ बारह पार्षद मन ह अविश्वास प्रस्ताव बर कलेक्टर ल ज्ञापन दीन हे। ए प्रस्ताव म तीस मई के मतदान होही। अश्विस प्रस्ताव म वोट डारे के काम ल पूरा कराय बर कलेक्टर ह पामगढ़ के अनुविभागीय दण्डाधिकारी ल पीठासीन अधिकारी बनाय हे।
पैन इंडिया मास्टर्स-गेम
भिलाई इस्पात संयंत्र के क्रेन ऑपरेटर गंगेश्वर देवांगन ह पाछु ग्यारह ले पन्द्रह मई तक बेंगलुरू म राखे गे पहिली पैन इंडिया मास्टर्स गेम म आठ सौ मीटर अउ पन्द्रह सौ मीटर के दउड़ म अव्वल आय हे। ओमन पचपन बछर ले जादा आयु वरग के मुकाबला म ए उपलब्धि पाय हे। गंगेश्वर देवांगन ह एखर पहिली बछर दू हजार बीस म होय नेशनल मास्टर्स गेम म आठ सौ मीटर दउड़ प्रतियोगिता म स्वर्ण पदक जीते रिहीन।
मौसम
अवइया चौबीस घंटा म प्रदेस म एक-दू जघा म गरज-चमक संग छींटा बौछार होय के संभावना हवय। मौसम विभाग के मुताबिक मध्यप्रदेश ले तमिनाडु तक एक द्रोणिका बने हे, जेखर परभाव ले प्रदेस म कतकोन जघा हवा गरेर अउ अंधड़ चले के चेतावनी दे गेहे। उहें, प्रदेस के कतकोन जघा म अधिकतम तापमान म थोरबहुत बड़वार होय के संभावना हवय।
संक्षिप्त समाचार
– रायगढ़ जिला के कोतरा रोड म फटफटी अउ कार चोरी करइया के संग गांजा तस्करी म सामिल तीन झिन आने आरोपी ल पुलिस ह गिरफ्तार करे हे।
– महासमुंद पुलिस ह एक कार म करीबन साढ़े तीन लाख रूपिया के अट्ठारह किलो गांजा अउ नगद रासि के संग तीन झिन आरोपी ल गिरफ्तार करे हे।
– भिलाई म कार के टक्कर ले फटफटी म सवार एक मनखे के मउकाच म मउत होगे अउ एक गंभीर रूप ले घायल होगे हे।
अउ
– कोरिया जिला के मनेन्द्रगढ़ म आंगनबाड़ी कार्यकर्ता अउ सहायिका मन ले ठगी करइया एक झिन आरोपी ल पुलिस ह गिरफ्तार करे हे।