भेंट-मुलाकात कार्यक्रम
मुख्यमंत्री भूपेश बघेल ह अपन भेंट-मुलाकात कार्यक्रम के दूसर पारी म आजले बस्तर संभाग के दउरा शुरू करीन हे।
आज मुख्यमंत्री ह सुकमा जिला के कोंटा म उंहा के आदिवासी मनले भेंट करीन अउ उंखर समस्या ल जानीन। ए बेरा म मुख्यमंत्री ह सुकमा जिला के जगरगुंडा अउ दोरनापाल ल तहसील बनाये के घोषणा करीन। उंहें कोंटा विकासखंड के बंडागांव अउ जगरगुंडा म विद्युत सबस्टेशन बनाय के बात कीहिन। एखर संगेसंग मुख्यमंत्री ह कोंटा म चलाये जात तीस बिस्तर वाले अस्पताल म तीस ठिन नवा बिस्तर बढ़ाय के घोषणा करीन।
श्री बघेल ह कोंटा सामुदायिक स्वास्थ्य केंद्र म डॅाक्टर अउ चिकित्सा कर्मचारी मनके रेहे बर भवन बनाये के संगेसंग दुब्बाकोटा म खेल मैदान अउ एर्राबोर म मिनी स्टेडियम बनाये के मंजूरी दीन। ओमन छत्तीसगढ़ के सीमा म प्रदेश के दुआर बनाये जाय के घोषणा करीन। अपन दउरा के बेरा मुख्यमंत्री ह छिंदगढ़ म मुसरिया माता के दर्शन करके प्रदेश के लोगन बर सुख-समृद्धि अउ खुशहाली के असीसा लीन। वोमन ए मउका म सुकमा जिला म पांच करोड़ रूपिया के लागत ले सौ ठिन देवगुड़ी के जिर्णोद्धार काम के लोकार्पण करीन संगेसंग दस लाख रूपिया के लागत ले बनइया दू ठिन देवगुड़ी के भूमि पूजन करीन।
जाति प्रमाण पत्र
प्रदेश म अनुसूचित जाति अउ जनजाति वर्ग के मनखे मन बर जारी होवइया जाति प्रमाण पत्र म अंग्रेजी म अधिसूचित जाति ल मान्य करे जाही। ए संबंध म पाछू एक मई के होय मंत्रिपरिषद के बइठका म अनुसूचित जाति अउ जनजाति के मनखे मन ल मात्रात्मक गलती के सेती जाति प्रमाण पत्र ले म आवत कठिनाई ल दूरिहा करे बर ये फैसला लेगे रीहिस।
मंत्रिपरिषद के फैसला के परिपालन म जम्मों जिला कलेक्टर ल चिट्ठी जारी कर दे गेहे। सामान्य प्रशासन विभाग कोति ले कलेक्टर मन ल भेजे गे चिट्ठी म केहे गेहे कि आने-आने जाति अउ समुदाय म हिंदी म उच्चारण भेद के सेती कुछएक जाति के जाति प्रमाण पत्र जारी नइ हो पात हे। ए समस्या ल दूरिहाय बर अंग्रेजी म अधिसूचित जाति ल मान्य करे जाही।
खेल प्रतियोगिता
प्रदेश के नवा खिलाड़ी मन म खेल बर रूचि पैदा करे खातिर जादा ले जादा मउका मिलय, एखर बर खेल प्रतियोगिता राखे जाही। खेल अउ युवा कल्याण विभाग कोति ले ये प्रतियोगिता म विकासखंड अउजिला स्तर म सब जूनियर अउ जूनियर वर्ग म आने-आने खेल के प्रतियोगिता होही। बालक अउ बालिका दूनो वर्ग म होवइया ये प्रतियोगिता म जितइया खिलाड़ी ल इनाम म खेल के जीनिस दे जाही। विकासखंड स्तर म हॉकी, फुटबॉल, कबड्डी, खो-खो, क्रिकेट के संगेसंग एथलेटिक्स, बेडमिंटन अउ कुश्ती प्रतियोगिता होही।
उंहें जिला स्तर म हॉकी, फुटबाल, कबड्डी, खो-खो, क्रिकेट समेत दू ठिन छत्तीसगढ़ पारंपरिक खेल के मुकाबला होही। संगेसंग एथलेटिक्स बैडिंमंटन अउ कुश्ती के प्रतियोगिता घलो होही।
मुख्य सचिव बैठक
प्रदेश म महात्मा गांधी राष्ट्रीय ग्रामीण रोजगार गांरटी योजना मनरेगा के संग आने-आने विभाग के योजना म जादा ले जादा विकास काम ल सामिल करे जाही। ए संबंध म प्रदेश के मुख्य सचिव अमिताभ जैन ह पंचायत अउ ग्रामीण विकास विभाग के अधिकारी मन ल जरूरी निर्देश दीन हे। विभागीय समीक्षा बइठका म मुख्य सचिव ह कीहिन कि गा्रमीण विकास ले जुड़े कतकोन योजना ल मनरेगा म शामिल करत विकास काम के योजना बनाय जाही।
बइठका म मछली पालन, कृषि, सिंचाई, उद्यानिकी, ग्रामोद्योग अउ वन विभाग के आने-आने योजना के समीक्षा करे गीस। संगेसंग ग्रामीण आजीविका मिशन अउ स्वच्छता मिशन समेत, प्रधानमंत्री आवास योजना, नरवा विकास कार्यक्रम म करे गे काम के जायजा ले गीस।
विश्व संग्रहालय दिवस
आज विश्व संग्रहालय दिवस हे। ए मउका म केंद्रीय संस्कृति मंत्रालय के भारतीय पुरातत्व सर्वेक्षण के रायपुर परिक्षेत्र कोति ले मस्तूरी विकासखंड के मल्हार म भीमकीचक मंदिर परिसर म जागरूकता कार्यक्रम राखे गीस।
कार्यक्रम के माइपहुना अउ राष्ट्रीय सेवा योजना के राज्य अधिकारी डॅाक्टर समरेंद्र सिंह ह कीहिन कि राज्य के रूप म छत्तीसगढ़ भले नवा हे फेर इंहा के सांस्कृतिक जड़ गहरा अउ प्राचीन हवय। ओमन कीहिन कि मल्हार म राखे गे ये जागरूकता कार्यक्रम लोगन म पुरातत्व संबंधी जगा बर जागरूकता लाही।
कार्यक्रम म बोलत भारतीय पुरातत्व सर्वेक्षण के अधीक्षण पुरातत्व विद् डॅाक्टर करबी साहा ह बताइन कि केंद्रीय संस्कृति मंत्रालय कोति ले लोगन म पुरातत्व संग्रहालय बर जागरूक करे खातिर देशभर म कतकोन जगा म कार्यक्रम होवत हे। एमा मल्हार ल चुने गेहे। कार्यक्रम के अगवई भारतीय पुरातत्व सर्वेक्षक के सहायक पुरातत्व विद् डॅाक्टर नित्यानंद ह करीन। ये बेरा म राष्ट्रीय सेवा योजना के कार्यकर्ता मन ह लोगन ल ये मंदिर के पुरातत्व के जानकारी देवत मंदिर अउ तीर तखार के क्षेत्र म पैदल यात्रा करीन। एखर बाद चित्रकला प्रतियोगिता होइस संगेसंग युवा कलाकार मन ह सांस्कृतिक कार्यक्रम करीन।
बस्तर लौह अयस्क
प्रदेश के परिवहन मंत्री मोहम्मद अकबर ह बस्तर क्षेत्र म लौह अयस्क के परिवहन म आवत परसानी ल दूरिहा करे बर जरूरी कदम उठाय के भरोसा देवइन हे। ए संबंध म बस्तर कोरापुट परिवहन संघ के प्रतिनिधि मंडल ह काली राजधानी म परिवहन मंत्री ले मिलके अपन समस्या बताय रीहिन। प्रतिनिधि मंडल के सदस्य मनह कीहिन हे कि बस्तर क्षेत्र म टरक ल लौह अयस्क बर तय करे गे लोड देके संबंध म परिवहन संघ के संग होय समझौता के पालन नइ कराय जात हे।
रेणु जोगी बीमार
छत्तीसगढ़ के पूर्व मुख्यमंत्री अजीत जोगी के पत्नि अउ कोटा विधायक डॅाक्टर रेणु जोगी के काली संझा तबियत बिगड़े म ओमन ल राजधानी रायपुर के प्रायवेट अस्पताल म भर्ती कराय गेहे।
जनता कांग्रेस छत्तीसगढ़ के अध्यक्ष अमित जोगी ह अपन ट्वीट संदेस म जानकारी देत बताइन कि उच्च रक्तचाप के सेती रेणु जोगी ल अस्पताल लाये गेहे। जिहां उख्ांर हालत स्थिर बताये जात हे। इही बीच प्रदेश के स्वास्थ्य मंत्री टी.एस. सिंहदेव ह डॅाक्टर रेणु जोगी के स्वास्थ्य के जानकारी लेत उंखर जल्दी स्वस्थ होय के कामना करीन हे ।