बछर दू हजार इक्कीस बाईस के खरीफ मौसम बर राजीव गांधी किसान न्याय योजना म पहिली किस्त के रूप म सतरा सौ करोड़ रूपिया किसान मनके खाता म जमा करे जाही। एखर बर राज्य सरकार कोति ले पूर्व प्रधानमंत्री राजीव गांधी के पुण्यतिथि म अवइया इक्कीस मई के जम्मों जिला मुख्यालय म कार्यक्रम राखे जाही। आने आने जिला म होवइया ये कार्यक्रम म राज्य सरकार के मंत्री, विधायक, निगम मंडल अउ आयोग के अध्यक्ष माइपहुना के रूप म संगरही।
खबर के मुताबिक पाछू दू बछर म ये योजना के पात्र किसान मन बर बैंक खाता म बारा हजार दू सौ नौ करोड़ रूपिया के भुगतान करे गेहे ।
प्रदेश के लोक निर्माण मंत्री ताम्रध्वज साहू ह कीहिन हे कि विभाग कोति ले चलाये जात निर्माण काम मे गुणवत्ता के विशेष धियान राखे जाना चाही। समीक्षा बइठका म श्री साहू ह कीहिन कि एखर ले जुड़े अधिकारी, कर्मचारी मनके खिलाफ गुणवत्ता म कमी आय ले कड़ा कार्रवाई होही।
ए बेरा म श्री साहू ह बने काम करइया अभियंता मन ल प्रशस्ति पत्र देके सम्मानित करीन। ओमन कोरोना काल के बेरा विभागीय कर्मचारी मन कोति ले अस्पताल अउ गैस पाइप लाइन समेत आने बुनियादी ढांचा ले जुड़े काम ल झटकीन करे जाय के संबंध म प्रसंसा करीन अउ कीहिन कि ये बेरा म कतकोन कर्मचारी संक्रमित घलो होइन फेर विकास काम कोनो किसम ले बाधित नइ होइस।
छत्तीसगढ़ के बारनवापारा अभ्यारण्य के क्षेत्र म सोना के भंडार के खोज म अभी रोक लगा दे गेहे। राष्ट्रीय हरित न्यायाधिकरण ह पांच अधिकारी मनके एक समिति बनाके ए सर्वे ले होवइया नुकसान के रिपोर्ट मांगे हे। ए समिति तीन महीना के भीतरी अपन रिपोर्ट पेस करही। हरित न्यायाधिकरण कोति ले मामला के अगला सुनवाई दू अगस्त के करे जाही।
खबर के मुताबिक बलौदाबाजार-भाटापारा जिला के बारनवापारा अभ्यारण्य म सोनाखान हवय। इंहा पहिली कराय गे सर्वे के आधार म सत्ताईस सौ किलो स्वर्ण भंडार रेहे के अनुमान हे। केंद्र सरकार ह बछर दू हजार सोला म ए खदान के ई नीलामी कराय रीहिस। खदान कार अधिकार मिले एक निजी कंपनी इंहा खनन के पहिली सर्वे कराना चाहथे, जेखर ले स्वर्ण भंडार के सही जगा मालूम करे जा सकय।
छत्तीसगढ़ उच्च न्यायालय के मुख्य न्यायाधीश- न्यायमूर्ति ए.के. गोस्वामी ह काली न्यायमूर्ति सचिन सिंह राजपूत ल अतिरिक्त न्यायाधीश के रूप म शपथ देवइन। ये मउका म न्यायमूर्ति श्री राजपूत ह सर्वोच्च न्यायालय के कॉलेजियम अउ हाइकोर्ट के मुख्य न्यायाधीश बर आभार जतात कीहिन कि ये राज्य के आम लोगन ल बेरा म न्याय देवाय बर अपन पूरा परयास करही।
दंतेवाड़ा जिला म माओवादी दंपत्ति ह पुलिस अधीक्षक सिद्धार्थ तिवारी के आगू आत्मसमर्पण करीन हे। पुलिस अधीक्षक ह बताइन कि ये दूनो उपर सात लाख रूपिया के इनाम घोषित रीहिस अउ ये दूनो माओवादी मलांगीर एरिया कमेटी ले जुड़े रीहिन एखर मन उपर हिंसा, आगजनी समेत कुछएक बड़े माओवादी घटना म शामिल रेहे के आरोप हरय।
हैदराबाद के कोविड वैक्सीन निर्माता कंपनी बॉयलॉजिकल-ईलिमिटेड ह अपन टीका कोरबी वैक्स के कीमत निजी टीकाकरण केंद्र बर आठ सौ चालीस रूपिया ले घटाके ढाई सौ रूपिया कर दे गेहे। कंपनी ह केहे हे कि उपभोक्ता मन ल एक टीका लगवाये बर चार सौ रूपिया के भुगतान करे बर पड़ही। एमा सबो किसम के कर अउ शुल्क शामिल होही। कोरबी वैक्स टीका ल देश म पांच ले बारह बछर के लईका मन ल लगाये के मंजूरी दे गेहे।
आजादी के अमृत महोत्सव उपर आकाशवाणी समाचार डहार ले राष्ट्रीय स्तर म राखे जात प्रश्नोत्तरी म आज के प्रश्न हे –
ओ स्वाधीनता सेनानी के नाव बतावव, जउन मैसूर के गांधी के नाव ले लोकप्रिय रीहिन, वोमन अस्पृश्यता उन्मूलन के वकालत करीन अउ उन्नीस सौ पच्चीस म खद्दर सहकार संघ के शुरूआत करीन।
श्रोता मन अपन उत्तर वाट्सअप नंबर – आठ आठ दू छै पांच चार छै दो छै दो – या ई-मेल आई डी – अमृत महोत्सव क्विज एट द रेट प्रसार भारती डॅाट जीओवी डॅाट इन म भेज सकथे।
भाग्यशाली प्रतिभागी ल विजेता के रूप म चुने जाही अउ काली के समाचार प्रभात म विजेता के नाव के घोषणा करे जाही। विजेता ल ई-प्रमाण पत्र अउ सांकेतिक पुरस्कार दे जाही।
गौरेला-पेण्ड्रा-मरवाही जिला म मध्यप्रदेश सीमा तीर आज बीहनिया बिलासपुर-कटनी पेसेंजर ट्रेन म हाइटेंशन तार टूटके गिरगे। ये घटना अमलई स्टेशन के पहिली संजयनगर तीर होइस। हाइटेंशन लाइन के तार चलत ट्रेन उपर गिरे ले पेसेंजर गाड़ी झटका ले रूक गे। बोगी के उपर तेज आवाज संग चिंगारी गिरे लगीस, जेखर ले यात्री मन ट्रेन ले कूदके भागे लगीन। हादसा म कोनो किसम के जनहानी होय के खबर नइ हे।
बताये जात हे कि ये घटना के सेती करीबन घंटा भर तक ट्रेन रूके रीहिस। बने बात ये हे कि तार म लगे चिनी मिट्टी के पेनल कोच ले टकराय रीहिस, जेखर ले चिंगारी निकले रीहिस। कहूं सोझे तार के बोगी ले टकरातीस त बड़े हादसा हो सकत रीहिस हे। रेलवे के बड़का अधिकारी मन कोति ले हाइटेंशन तार गिरे के कारण के पता करे जात हे।
खबर के मुताबिक नजदीकी स्टेशन म रेलवे के तकनीकी टीम कोति ले हाइटेंशन तार ल सुरक्षित अलग करे के बाद पेसेंजर ट्रेन ल कटनी बर रवाना कर दे गीस।
दक्षिण पूर्व मध्य रेलवे ह कोयला परिवहन के दबाव कमती करे बर काली पहिली घांव दू सौ बत्तीस डिब्बा ल जोड़के सोला हजार टन कोयला भेजे के नवा कीर्तिमान बनाय हे। चार ठिन मालगाड़ी ल जोड़के ये मालगाड़ी तियार करे गेहे, जेला सुपर शेषनाग के नाव दे गेहे। एमा चार इंजन, चार ब्रेकयान के संग बारह सदस्य सामिल रीही। ये मालगाड़ी कोरबा ले कोयला लेके नागपुर बर रवाना करे गीस।
खबर के मुताबिक देश के आने आने ताप बिजलीघर म कोयला के बाढ़त मांग ल पूरा करे खातिर रेलवे कोति ले एक विशेष अभियान म डब्बा जोड़के मालगाड़ी ले कोयला के आपूर्ति करे जात हे।
राष्ट्रीय डेंगू दिवस के मउका म काली रायपुर म जिला स्तरीय कार्यशाला राखे गीस। एसो राष्ट्रीय डेंगू दिवस के उद्देश्य वाक्य रीहिस – डेंगू से बचा जा सकता है आओ हाथ मिलाएं – कार्यशाला म बोलत मलेरिया उन्मूलन कार्यक्रम के जिला नोडल अधिकारी डॅाक्टर विमल रॉय ह कीहिन कि डेंगू एक संचारी रोग हे, ये एडिज मच्छर के काटे ले होथे। डेंगू ल रोके बर लोगन ल जागरूक करना जरूरी हे।
राजधानी रायपुर के डुमरतराई क्षेत्र म पाछू रतिहा नौ झिन आरोपी मन ह एक अनाज कारोबारी उपर हमला करके पचास लाख रूपिया लूट लीन। घटना के सूचना मिलतेच पुलिस के अधिकारी मन ह मउका म पहुंचगे अउ घायल कारोबारी ल अस्पताल पहुंचाइन। आरोपी ल पकड़े बर तीरतखार के जम्मों रद्दा म नाकाबंदी करे गेहे।
ये घटना ओ बखत होइस जब अनाज कारोबारी काली रतिहा अपन दुकान बंद करेके बाद दुपहिया गाड़ी ले घर लहुटत रीहिस अउ पइसा ले भरे झोला अपन दुपहिया गाड़ी के आगू लटकाय रीहिस। थोरिक दूरिया जाय के बादे तीन झिन फटफटी सवार मन ह व्यापारी ल रोक लीन अउ राड ले हमला करके घायल कर दीन अउ पइसा ले भरे झोलो लेके फरार होगे।
रायपुर के वरिष्ठ पुलिस अधीक्षक प्रशांत अग्रवाल ह बताइन कि सीसीटीवी कैमरा ले आरोपी मनके संबंध म सुराग मिले हे । जानकारी के आधार म जांच करे जात हे ।
अवइया चौबीस घंटा म प्रदेश के कुछएक जगा म छुटपुट बरसा होय या फेर गरज चमक के संग छीटा बौछार पड़े के संभावना हवय। उंहें गरियाबंद, धमतरी, कोण्डागांव, कांकेर, बस्तर दंतेवाड़ा अउ तीर तखार के जिला म कोनो-कोनो जगा म हवा-गरेर, अंधड़ चले के चेतावनी दे गेहे।
मौसम विभाग के मुताबिक पश्चिमी विदर्भ ले केरल तक एक द्रोणिका बने हे । उंहें राजस्थान ले असम तक एक आने द्रोणिका घलो सक्रिय हवय। जेखर प्रभाव ले प्रदेश के अधिकतम तापमान म गिरावट आय के संभावना हवय।