छत्तीसगढ़ उच्च न्यायालय ह राज्य सरकार डहार ले बनाये गे नवा झीरम घाटी जांच आयोग के सुनवई उपर रोक लगा देहे। न्यायालय ह राज्य सरकार अउ आयोग ल नोटिस जारी करके चार जुलाई तक जवाब मांगे हे। मामला के अगला सुनवाई चार जुलाई के होही। उच्च न्यायालय म मुख्य न्यायाधीश अरूप कुमार गोस्वामी के डिवीजन बेंच म आज ये मामला के सुनवाई होइस।
झीरम घाटी म माओवादी मन डहार ले कांग्रेस के बड़का नेता मनके हत्या के मामला के जांच करे बर राज्य सरकार डहार ले नवा झीरम घाटी जांच आयोग गठित करे गेहे। एखर वैधानिकता ल उच्च न्यायालय म नेता प्रतिपक्ष धरमलाल कौशिक ह चुनौती दे रीहिन। ओमन कीहिन कि पहिली के राज्य सरकार ह झीरम घाटी के जांच बर उच्च न्यायालय के न्यायाधीश प्रशांत मिश्रा के अध्यक्षता म जांच आयोग बनाये रीहिस अउ पाछू आठ साल ले ये आयोग ह ये मामला के सुनवाई करत रीहिस।
न्यायमूर्ति प्रशांत मिश्रा ह जांच पूरा करके एखर रिपोर्ट सरकार ल सौंप दे रीहिन। राज्य सरकार ल कानून के मुताबिक विधानसभा म जांच रिपोर्ट ल पेस करना रीहिस, फेर राज्य सरकार अइसन नइ करके ये मामला के जांच बर नवा जांच आयोग बना लेहे। जनहित याचिका म यहू केहे गेहे कि एक जांच आयोग ह जउन मामला के जांच कर चुके हे, ओला दुबारा जांच बर नवा आयोग नइ बनाये जा सके। याचिका म न्यायमूर्ति प्रशांत मिश्रा आयोग के जांच रिपोर्ट ल विधानसभा म राखे अउ एला सार्वजनिक करे के मांग करे गीस।
भाजपा के राष्ट्रीय उपाध्यक्ष अउ पूर्व मुख्यमंत्री डॅाक्टर रमनसिंह ह हाइकोर्ट डहार ले नवा झीरम घाटी जांच आयोग के सुनवाई उपर रोक लगाये के निर्णय ल सही बताय हे
उच्चतम न्यायालय ह आदेश देहे कि भारतीय दंड संहिता के धारा एक सौ चौबीस-ए के तहत एक सौ बावन साल जुन्ना देशद्रोह कानून ल प्रभावी ढंग ले तब तक बर स्थगित करे जाना चाही। जब तक कि केंद्र सरकार ह ए प्रावधान उपर एक घांव फेर विचार नइ करही।
शीर्ष न्यायालय के एक ठिन अंतरिम आदेश म केंद्र अउ राज्य सरकार मनले ए प्रावधान उपर विचार होय तक कोनो भी प्राथमिकी दर्ज नइ कराय के बात केहे हे। प्रधान न्यायाधीश एम.वी. रमन्ना, न्यायमूर्ति सूर्यकांत अउ न्यायमूर्ति हिमा कोहली के पीठ ह ए मामला ले जुड़े अपील अउ कार्यवाही ल स्थगित राखे बर केहे हे।
छत्तीसगढ़ उच्च न्यायालय ह हसदेव जंगल भूमि म आबंटित परसा कोल ब्लॉक के अधिग्रहरण के खिलाफ लगाये गे जम्मों पांच याचिका ल खारिज कर देहे। मुख्य न्यायाधीश अरूप कुमार गोस्वामी अउ न्यायाधीश आर.सी.एस. सामंत के डबल बेंच ह ए मामाल के सुनवाई करीप। याचिकाकर्ता मन म ह अदालत के आगू परसा म कोल ब्लॉक के आवंटन के फैसला ल अवैधानिक बताइन
याचिकाकर्ता मन ह कीहिन कि एक ठिन प्रायवेट कंपनी ल फायदा पहुंचाय बर भूमि ले जात हे अउ एखर उपर रोक लगाये के मांग करे गीस। कोर्ट ह ए मामला के सुनवाई करत कोल ब्लॉक आवंटन अउ भूमि अधिग्रहण उपर केंद्र सरकार के फैसला ल सही मानीन अउ कीहिन कि जम्मों अनुमति नियम के मुताबिक दे गेहे। जानबा के मुताबिक उच्च न्यायाल ह परसा कोल ब्लॉक अधिग्रहण के बारे म तीस अप्रैल अउ चार मई के सुनवाई के बाद फैसला ल सुरक्षित राखे रीहिन।
आज राष्ट्रीय प्रौद्योगिकी दिवस हरय। ए दिन ल उन्नीस सौ अंठानबे म पोकरण म परमाणु परीक्षण के वर्षगांठ के रूप म मनाये जाथे । उप राष्ट्रपति एम. वेंकैया नायडू ह राष्ट्रीय प्रौद्योगिकी दिवस के मउका म वैज्ञानिक मन ल बधाई दे हवय। प्रधानमंत्री नरेंद्र मोदी ह बछर उन्नीस सौ अंठानबे म सफल पोकरण परीक्षण बर राष्ट्र के वैज्ञानिक अउ ओखर प्रयास उपर आभार जताय हे।
ए बेरा गर्मी के मौसम म पीलिया संक्रमण के मरीज जादा मिलथे। ये रोग के प्रमुख कारण दूषित खाये पीये के जीनिस के संगेसंग दवा मनके साइड इफेक्ट, आने बीमारी अउ साफ सफई के अभाव हरय।
शासकीय आयुर्वेद कॉलेज रायपुर के सह प्राध्यापक डॅाक्टर संजय शुक्ला ह बताइन कि गर्मी के मौसम म लोगन मन ह ठंडा पीये बर बाजार म बिकइया बरफ मिले वाले पेय पदार्थ के सेवन करथे अउ कभू कभू दूषित पानी ले बने बरफ अउ खराब फल के सेती पीलिया बीमारी हो जथे। ओमन कीहिन कि पीलिया एक ठिन गंभीर बीमारी हरय। एखर बर मरीज मन ल विशेषज्ञ डॅाक्टर ले संपर्क करना चाही। डॅाक्टर शुक्ला ह लोगन मनले कीहिन कि लोगन मन गर्मी के मौसम म बाहिर के खाये पीये ले बांचय अउ ए बीमारी ले बचाव बर साफ सफई के विशेष ध्यान राखे अउ रोजे व्यायाम करय।
मौसम विभाग के मुताबिक चक्रवाती तूफान असानी ह आंध्रप्रदेश अउ ओडिशा पहुंच गेहे। जेखर सेती ओडिशा ले लगे छत्तीसगढ़ के कतकोन जगा म घलो चक्रवात के असर देखे जात हे। एखर प्रभाव ले आज राज्य के उत्तरी जगा म हल्का ले मध्यम बरसा होय के समाचार मिले हे। राजधानी रायपुर म घलो आज दिनभर बादल छाये रीहिस। रायपुर स्थित मौसम विज्ञान केंद्र के मुताबिक काली प्रदेश म एक दू जगा म गाज गिरे के संसो जताय गेहे।
पुलिस के मुताबिक रायपुर के एक झिन मनखे ह पाटन थाना म लूट के रिपोर्ट दर्ज कराय रीहिन। पुलिस ह ए मामला म ड्राईवर ले पूछताछ करीन तब पूरा मामला आगू आइस।
– कांग्रेस के प्रदेश निर्वाचन अधिकारी हुसैन दलवई ह आज रायपुर स्थित प्रदेश कांग्रेस मुख्यालय म जिला निर्वाचन अधिकारी के बइठका लीन। जेमा संगठन चुनाव के कार्यक्रम उपर गोठबात करे गीस। बइठका म प्रदेश कांग्रेस अध्यक्ष मोहन मरकाम समेत कतकोन बड़का पदाधिकारी मन मौजूद रीहिन।
अउ
– रायपुर जिला कौशल विकास प्राधिकरण डहार ले लाईवलीहुड कॉलेज जोरा म काली बारा मई के प्लेसमेंट कैंप के आयोजन करे जाही। ए कैंप के माध्यम ले प्रायवेट संस्थान मनके आने आने पद के चयन बर साक्षात्कार ले जाही।