खबर के मुताबिक राज्य म आठ ले दस करोड़ रैली कोसा कोकुन के पैदावारी होथे अउ प्रमुख रूप ले एखर संग्रहण ल बस्तर संभाग के सात ठन जिला म करे जाथे।
मुख्यमंत्री भूपेश बघेल ह आज भेंट-मुलाकात कार्यक्रम के दउरान सरगुजा जिला म लुण्ड्रा विधानसभा के सहनपुर गांव के दउरा करीन। ये दउरान ओमन सहनपुर म उप स्वास्थ्य केंद्र खोले, मीडिल स्कूल ल हायस्कूल म बदले, अउ साप्ताहिक बाजार बर शेड अउ चबूतरा बनाये के घोषणा करीन। संगेसंग ओमन धौरपुर गांव म अनुविभागीय अधिकारी राजस्व के कार्यालय के संगेसंग सरकारी महाविद्यालय खोले अउ स्टेट बैंक के शाखा खोले के घोषणा घलो करीन।
उंहें श्री बघेल ह सरकारी उच्चतर माध्यमिक विद्यालय करौली, रघुनाथपुर, बरगीडीह के भवन निर्माण के मंजूरी दीन। मुख्यमंत्री भूपेश बघेल ह भेंट-मुलाकात के दउरान इंहा के लइका मनले घलो भेंट करीन अउ नवा राजधानी, मुख्यमंत्री निवास अउ जंगल सफारी घुमाय के वादा घलो करीन।
कोंडागांव जिला म पुलिस डहार ले ए समय कई ठन गांव मन म चलित थाना लगाके लोगन मन ल जागरूक करे जात हे। खबर के मुताबिक पुलिस के टीम ह बड़ेकनेरा, कमेला अउ बेड़मा गांव म चलित थाना लगाके साइबर अपराध अउ यातायात नियम के बारे म गांव वाले मन ल जरूरी जानकारी दीन। संगेसंग माइलोगिन मन ल अभिव्यक्ति एप के बारे म घलो बताइन। एखर अलावा माइलोगिन अउ लईका मनले जुड़े अपराध मनके बारे म जानकारी दे गीस। ए दउरान जवान लईका मन ल खेल सामग्री बांटे गीस।
राज्य के टीकाकरण अधिकारी डॅाक्टर वी.आर. भगत ह कीहिन कि जनम ले लेके सोला बछर के लईका मन ल जम्मों टीका लगाना बहुते जरूरी हे। ओमन कीहिन कि टीका ह लईका मनके जिनगी अउ उखर भविष्य ल सुरक्षित रखे बर सुरक्षा कवच के काम करथे। ओमन बताइन कि लईका मन ल बीसीजी, ओपीवी, हेपेटाइटिस बी, के टीका लगाना जरूरी हे। ओमन कीहिन कि ए जम्मों टीका लगाये ले लईका मन ल गंभीर बीमारी ले बचाये जा सकत हे।
देश के जाने माने संतूर वादक अउ सुप्रसिद्ध संगीतकार पंडित शिवकुमार शर्मा के आज बीहनिया मुंबई म दिल के दौरा पड़े ले निधन होगे। ओमन चौरासी बछर के रीहिन अउ पाछू कुछ महीना ले अस्पताल म उंखर इलाज चलत रीहिस हे। प्रधानमंत्री नरेंद्र मोदी ह श्री शर्मा के निधन म दुख प्रकट करीन। ओमन कीहिन कि शर्मा ह बहुत बढ़िया संतूर बजावय अउ बहुत सुघ्घर संगीत देवय। उखर निधन ह संगीत जगत बर एक ठन बहुत बड़े क्षति हरय।
प्रदेश के राज्यपाल अनुसुइया उइके अउ मुख्यमंत्री भूपेश बघेल ह घलो श्री शर्मा के निधन म दुख जताइन हे। राज्यपाल ह कीहिन कि श्री शर्मा के निधन ह भारतीय संगीत जगत बर एक बहुत बड़े क्षति हरय। उंहें श्री भूपेश बघेल ह कीहिन कि संगीत जगत म शिवहरी के नाम ले जनइया पंडित जी अउ श्री हरिप्रसाद चौरसिया जी के जोड़ी के कमी ह हमन ल हमेशा खलही।
आजादी के अमृत महोत्सव उपर आकाशवाणी समाचार डहार ले राष्ट्रीय स्तर म राखे गे प्रश्नोत्तरी के तहत आज के प्रश्न हे। आंध्र प्रदेश के ओ लोकप्रिय गायक के नाम बतावव, जेला अंग्रेज मन ह भारत छोड़े आंदोलन के दौरान देशभक्ति गीत गाये म गिरप्तार करे रीहिन। सन् 1970 म ए गायक ल पद्मश्री ले सम्मानित करे गीस। अपन उत्तर वाट्सअप नंबर – आठ आठ दू छै पांच चार छै दो छै दो – या ई-मेल आई डी – अमृत महोत्सव क्विज एट द रेट प्रसार भारती डॅाट जीओवी डॅाट इन म भेज सकथे।
भाग्यशाली प्रतिभागी ल विजेता के रूप म चुने जाही अउ काली के समाचार प्रभात म विजेता के नाव के घोषणा करे जाही। विजेता ल ई-प्रमाण पत्र अउ सांकेतिक पुरस्कार दे जाही।
माओवादी गिरप्तार
बीजापुर जिला म सुरक्षा बलके टीम डहार ले तीन झन माओवादी ल गिरप्तार करे गेहे। मिले खबर के मुताबिक केंद्रीय रिजर्व पुलिस बल कोबरा बटालियन अउ जिला पुलिस बल के टीम ह तलाशी अभियान म निकले रीहिन तभे पामेड़ क्षेत्र के एमपुर के जंगल ले ये तीनो झन माओवादी ल गिरप्तार करे गीस। गिरप्तार करे गे माओवादी उपर माओवादी गतिविधि म शामिल होय के आरोप हे।
दुर्ग के अंतर्राष्ट्रीय बैडमिंटन खिलाड़ी आकर्षि कश्यप ह उबेर कप म महिला एकल प्रतियोगिता म अमेरिका के एस्थेर शी. ल हरा दीन। आकर्षि ह ये मैच ल इक्कीस-अठारा, इक्कीस-ग्यारा, ले जीतिन । उंहें पी.वी. सिंधू ह जेनी गेई ल इक्कीस-दस, इक्कीस-ग्यारा, ले हराके भारत के जीत के शुरूआत करीन। एखर बाद युगल स्पर्धा म तनिषा क्रास्टो अउ त्रिसा जाली ह अपन प्रतिद्धंदी ल इक्कीस-उन्नीस, इक्कीस-दस ले हरा दीन।
एति बैंकाक म आज बीहनिया खेले गे प्रतियोगिता म भारतीय महिला टीम ह ग्रुप-डीके मुकाबला म अमेरिका ल चार-एक ले हराके उबेर कप बैडमिंटन के क्वार्टर फायनल म पहुंच गे । पहिली मैच म कनाडा ल चार-एक ले हरइया भारतीय टीम के ये ह सरलग दूसरा जीत हरय। जेखर ले ग्रुप म भारतीय टीम ह सबले उपर हवय। भारतीय टीम ह काली आखरी ग्रुप मैच कोरिया ले खेलही।
प्रदेश म चालू वित्तीय बछर म करीबन सात लाख मानक बोरा तेंदूपत्ता सकेले गेहे। जउन ह तय करे गे लक्ष्य ले एक तिहाई हवय। एखर सकेले के काम ल सात लाख इक्यासी हजार ले जादा तेंदूपत्ता संग्राहक मन डहार ले करे गेहे। खबर के मुताबिक गरियाबंद वनमंडल म सबले जादा इकहत्तर हजार पांच सौ छिहत्तर मानक बोरा तेंदूपत्ता ल सकेले गेहे। आधिकारिक जानकारी के मुताबिक तेंदूपत्ता सकलइया मन ल दू सौ उन्यासी करोड़ रूपिया के भुगतान करे जाही।
मौसम
भीषण चक्रवात असानी के अवइया चौबीस घंटा म कमजोर होके चक्रवाती तूफान के रूप लेके संभावना हे। ए चक्रवात के सेती छत्तीसगढ़ के मौसम म बदलाव घलो आ सकत हे। राज्य म हवा के दिशा म बदलाव होय अउ बंगाल के खाड़ी ले अवइया ठंडा हवा के सेती तापमान म गिरावट आ सकत हे। असानी तूफान के असर ले राज्य के कुछएक जगा मन म बूंदाबांदी हो सकत हे।
– गौरेला-पेण्ड्रा-मरवाही जिला के विकासखंड मरवाही के लिटिया गांव म एक झन गुरूजी के खिलाफ पास्को एक्ट के तहत मामला दरज करे के बाद ए शिक्षक ल निलंबित कर दे गीस।
– भिलाई के नेहरू नगर अंडरब्रिज के तीर आगी लगे ले शेड ह जलगे। आगी लगे के कारण के पता लगाये जात हे। फेर ए आगजनी म कोनो परकार जनहानी के खबर नइ हे।
अउ
– राजनांदगांव जिला जनसंपर्क कार्यालय म फोटोग्राफी अउ वीडियाग्राफी करे खातिर स्थानीय स्टूडिया ले कोटेशन मंगाय गेहे। आवेदक मन ह उन्नीस मई तक आवेदन पत्र के संगेसंग कोटेशन जमा कर सकत हे।