मुख्यमंत्री भेंट-मुलाकात
मुख्यमंत्री ह राजस्व विभाग के कामकाज म नीचे के स्तर ले काम करे उपर जरूरत बताय हे। ओमन राजस्व रिकार्ड ल ठीकठाक करे अउ नामांतरण, बंटवारा, सीमांकन, ल बने ढंग ले बेरा म पूरा करे के निर्देश देहे। एखर अलावा मुख्यमंत्री ह कीहिन कि वन अधिकार के पट्टा बांटे म ए बात के धियान राखे जाय कि हितग्राही मन ल वास्तविक कब्जा उपर पट्टा मिलय अउ वास्तविक हितग्राही मन ल ही वन अधिकार पट्टा बांटे जाय। ये निर्देश मुख्यमंत्री ह भेंट-मुलाकात अभियान के दउरान आज सूरजपुर म अधिकारी मनके संग समीक्षा बइठका के दउरान दीन।
कृष्ण कुंज
छत्तीसगढ़ के जम्मों नगरीय निकाय मन म कृष्ण कुंज बनाय जाही। जेमा अवइया कृष्ण जन्माष्टमी के दिन ले कृष्ण कुंज म पौधरोपण के शुरूआत करे जाही। ए बारे म मुख्यमंत्री ह जम्मों जिला कलेक्टर मनले वन विभाग के एक एकड़ भुंइया आबंटित करे के निर्देश देहे।
सूरजपुर सीईओ
आदि उत्सव
केंद्रीय जनजातीय कार्य राज्यमंत्री रेणुका सिंह ह कीहिन हे कि केंद्र सरकार ह अपन कल्याणकारी योजना के माध्यम ले जनजातीय समाज ल सिरिफ ओखर अधिकार नइ देहे, भलुक ओमन ल समाज के मुख्यधारा ले घलो जोड़े हे। ओमन कीहिन कि सरकार ह पाछू डेढ़ दशक के दउरान जनजातीय समाज के हक म कतकोन कल्याणकारी फैसला लेके उंखर जिनगी ल सरल बनाय हे। ये बात केंद्रीय राज्यमंत्री ह मध्यप्रदेश म मंडला जिला के रामनगर म राखे गे आदि उत्सव म कीहिन ।
बस्तर फाइटर्स भर्ती प्रक्रिया
बस्तर संभाग के दूर दराज वाले वनांचल क्षेत्र मन म युवा मन ल शांति, सुरक्षा अउ विकास काम म भागीदार बनाय अउ रोजगार के जादा ले जादा मउका देके उद्देश्य ले बस्तर फाइटर्स बर भर्ती प्रक्रिया शुरू होगे हे। कोंडागांव जिला बर बस्तर फाइटर्स के तीन सौ पद मंजूर करे गेहे। जेमा जम्मों पद ह जिला के मुल निवासी मन बर हवय।
उंहें कांकेर जिला म बस्तर फाइटर्स के तीन सौ ले जादा पद म भर्ती होना हे। एखर बर पंद्रह हजार ले जादा अर्जी आय हे। जेमा नोनी मनके संग थर्ड जेंडर के उम्मीदवार मन घलो शामिल हे।
कोविड टीका
प्रदेश म पहिली अउ दूसर डोज ल मिलाके कोरोना टीकाकरण के आंकड़ा चार करोड़ तक पहुंच गेहे। राज्य म अठारा साल ले जादा के सत्यासी प्रतिशत अउ पंद्रह ले अठारा साल के इंक्यावन प्रतिशत लोगन मन ल दूनों टीका लगाये जा चुके हे। उंहें प्रदेश म बारा साल ले चौदा साल के एक लाख अठहत्तर हजार ले जादा लईका मन ल दूनों टीका लगाये गेहे।
अमृत महोत्सव प्रश्नोत्तरी
आजादी के अमृत महोत्सव उपर आकाशवाणी समाचार डहार ले राष्ट्रीय स्तर म राखे जात प्रश्नोत्तरी के तहत आज के प्रश्न हे।
आज के प्रश्न हे – तमिलनाडु के ओ स्वतंत्रता सेनानी के नाम बतावव जउन मन श्रीनिवास गांधी निलयम के स्थापना करे रीहिन ? अरकम्मा के नाव ले जाने जात स्वतंत्रता सेनानी ह असहयोग अांदोलन म बड़का भूमिका निभाइन अउ विदेशी जीनिस के बहिष्कार करीन।
श्रोता मन अपन उत्तर वाट्सअप नंबर – आठ आठ दू छै पांच चार छै दो छै दो – या ई-मेल आई डी – अमृत महोत्सव क्विज एट द रेट प्रसार भारती डॅाट जीओवी डॅाट इन म भेज सकथे।
प्रधानमंत्री सुरक्षा बीमा योजना
प्रधानमंत्री सुरक्षा बीमा योजना, प्रधानमंत्री जीवन ज्योति बीमा योजना, अउ अटल पेंशन योजना ल आज सात बछर पूरा होगे । प्रधानमंत्री नरेंद्र मोदी ह नौ मई दू हजार पंद्रह के कोलकाता म ए योजना मनके शुभारंभ करे रीहिन। प्रधानमंत्री जीवन ज्योति बीमा योजना के तहत बारा करोड़ ले जादा नामांकन हो चुके हे अउ पांच लाख ले जादा दावा बर ग्यारा हजार पांच सौ बाईस करोड़ रूपिया के भुगतान करे जा चुके हे।
आकर्षि कश्यप-उबेर कप
अंतर्राष्ट्रीय बैडमिंटन खिलाड़ी आकर्षि कश्यप ह उबेर कप म खेले गे एक ठिन मुकाबला म कनाडा के खिलाड़ी ल हरइन। दुर्ग के रहइया आकर्षि ह महिला एकल मुकाबला म वेन यु झेंग ले सतरा-इक्कीस, इक्कीस-अठारा, इक्कीस-सतरा ले कनाडा के खिलाड़ी ले ये मैच ल जितके भारत ल दू-एक के बढ़त दिलाय हे। अगला राउण्ड म आकर्षि के मुकाबला अमेरिका के खिलाड़ी ले होही।
मौसम
दक्षिण-पूर्व बंगाल के खाड़ी म बने चक्रवात असानी ह जादा मजबूत होके तूफान म बदल गेहे अउ उत्तरी आंध्रप्रदेश-ओड़िशा के तट डहार बाढ़त हे।
अउ अब थोरकुन समाचार सार म-
– जांजगीर-चांपा जिला के तिलई गांव म एक झिन माइलोगिन के मउत ले गुस्साये लोगन मन डहार ले चक्काजाम करे के मामला म पुलिस ह गांव के सरपंच अउ उप सरपंच के संगेसंग बारा झिन जवान मनके खिलाफ मामला दर्ज करे हे।
अउ
– दुर्ग जिला के पद्मनाभपुर चौकी क्षेत्र म तेज रफ्तार कार के चपेट म आय ले एक झिन मनखे के मउत होगे अउ तीन झिन आने लोगन मन घायल होगे।