प्रधानमंत्री-राष्ट्रीय शिक्षा नीति
प्रधानमंत्री नरेंद्र मोदी ह कीहिन हे कि नवा राष्ट्रीय शिक्षा नीति ह सबो झन ल शिक्षा मे समानता, समावेशिता अउ गुणवत्ता के उद्देश्य ले लागू करे जात हे। नई दिल्ली म श्री मोदी ह नवा राष्ट्रीय शिक्षा नीति के कार्यान्वयन के समीक्षा करीन। श्री मोदी ह स्कूल मन म हाइब्रिड शिक्षा प्रणाली के महत्तम उपर जोर दीन। ओमन पढ़ईया लइका मन ल टेक्नॉलाजी के बहुत जादा बोझा ले बचाये खातिर रेगुलर क्लास अउ ऑनलाइन क्लास म संतुलन बनाये के जरूरत उपर बल दीन। ए मउका म सुझाव दे गीस कि आंगनबाड़ी केंद्र मनके डेटाबेस ल स्कूल मनके डेटाबेस ले एकीकृत करना चाही। टेक्नालॉजी के सहायता ले स्कूल मन म लइका मनके मेडिकल जांच घलो होनाचाही।
उंहें प्रधानमंत्री ह यहू सुझाव दीन कि विज्ञान प्रयोगशाला वाले माध्यमिक स्कूल मन ल अपन क्षेत्र के किसान मन संग गोठबात करके माटी के परीक्षण ले जोड़ना चाही, जेखर ले माटी के गुणवत्ता बारे म तीर तखार मन ल जागरूक करे जा सकय।
मुख्यमंत्री भेंट मुलाकात
मुख्यमंत्री भूपेश बघेल ह कीहिन हे कि दौरा बेरा जमीनी स्तर म योजना मनके सुघ्घर क्रियान्वयन दिखत हे। अधिकतर अधिकारी कर्मचारी मन, मन लगाके काम करत हे। जउन अधिकारी अउ कर्मचारी काम बर लापरवाह हे, ओखर मन खिलाफ अनुशासनात्मक कार्रवाई घलो करे जात हे। श्री बघेल ह अधिकारी मनले कीहिन कि आज भेंट-मुलाकात कार्यक्रम के दौरान जमीन ले जुड़े अउ कब्जा वाले सिकइत जादा मिलत हे। एला अधिकारी मन गंभीरता ले लेवयं। उंहें ओमन पानी के समस्या बर नरवा कार्यक्रम के माध्यम ले जल संरक्षण अउ भू जलस्तर ल बढ़ाय बर जोर देबर कीहिन। संगे यहू कीहिन कि रेनवाटर हार्वेस्टिंग के व्यवस्था घलो होवय। मुख्यमंत्री ह आवर्ती चरई म अवइया गौठान मन ल बेरा भीतरी पूरा करे के निर्देस घलो दीन।
मुख्यमंत्री ह भेंट-मुलाकात कार्यक्रम के पांचवा दिन आज सूरजपुर जिला के प्रेमनगर विकासखंड के तीन ठिन ग्राम पंचायत म करोड़ो रूपिया के विकास काम के सौगात दीन। ओमन राजस्व प्रकरण के तुरते निपटारा बर उमरेस्वरपुर म उप तहसील बनय अउ लो वोल्टेज के समस्या ल दूरिहाय बर बिजली सब स्टेसन लगाय के घोषणा करीन। एखर संगे मुख्यमंत्री ह प्रेमनगर उच्चतर माध्यमिक स्कूल के नवा बिल्डिंग बनाय के स्वीकृति देके संगे गेज नदी उपर नवा पुलिया बनाय के घोसना घलो करीन।
उंहें मुख्यमंत्री ह सुमेपरपुर म छप्पन करोड़ रूपिया ले जादा के निर्माण काम खातिर लोकार्पण अउ शिलान्यास करीन।
सुरक्षा जवान-विमान सेवा
बस्तर संभाग के माओवाद प्रभावित क्षेत्र मन म तैनात सुरक्षा बल के जवान अउ अधिकारी मन बर काली ले विशेष हवाई सेवा शुरू होगे हे। ए विशेष हवाई सेवा ले विमान ह मां दंतेश्वरी विमानतल जगदलपुर ले काली संझा करीबन पौने पांच बजे पहिलइया उड़ान भरीस। ए विमान ले पहिली दिन सैंतीस झिन जवान रवाना होइन। जेमन ल विमानतल म हारफूल पहिनाके रवाना करे गीस। ए हवाई सेवा ल छुट्टी म जवइया जवान अउ अधिकारी मन बर शुरू करे गेहे। विमानसेवा के तहत एक ठिन निजी एयरलाइंस के बहत्तर सीटर विमान ह हफ्ता म तीन दिन- बुधवार, शनिचर अउ इतवार के जगदलपुर ले रायपुर होवत दिल्ली तक उड़ान भरही। हरएक उड़ान म साठ झिन जवान मन ल यात्रा के सहूलियत मिलही। जेमा केंद्रीय रिजर्व पुलिस बल बर बीस, सीमा सुरक्षा बल अउ भारतीय तिब्बत सीमा पुलिस बर पंद्रह-पद्रह , केंद्रीय औद्योगिक सीमा सुरक्षा बल बर तीन , सशस्त्र सीमा बल बर चार, आई.बी. बर एक, अउ असम रायफल्स बर दू ठिन सीट रिजर्व रीही।
ए विमान सेवा ह सिरिफ नक्सल मोर्चा म तैनात अर्द्धसैनिक बल के जवान अउ अधिकारी मन बर ही रही।
नीट पीजी परीक्षा
केंद्र सरकार ह केहे हे कि स्नातकोत्तर पाठ्यक्रम बर राष्ट्रीय मेडिकल प्रवेश परीक्षा-नीट पीजी ल स्थगित नइ करे गेहे। ए परीक्षा ल तय कार्यक्रम मुताबिक इक्कीस मई के ही होही। पत्र सूचना कार्यालय ह राष्ट्रीय परीक्षा बोर्ड के नाव ले निकले ओ नोटिस ल फर्जी बताय हे जेमा नीट पीजी के परीक्षा स्थगित होय के दावा करे गेहे।
बस्तर फाइटर्स-भर्ती प्रक्रिया
बस्तर फाइटर्स बर भर्ती प्रक्रिया चालू होगे हे। काली नौ मई के बस्तर संभाग के सबो जिला मुख्यालय मन म बस्तर फाईटर्स बर अभ्यर्थी मनके दस्तावेज ल जांचे जाही। उंहें प्रदेश म एसआई भर्ती परीक्षा के रास्ता साफ होगे हे। एसआई , सूबेदार अउ प्लाटून कमांडर भर्ती परीक्षा के उम्मीदवार मन ल चौदा मई ले प्रवेश पत्र दे जाही। ओमन अपन प्रवेश पत्र डाउनलोड कर सकत हे।
डी. पुरंदेश्वरी-पत्रकारवार्ता
भारतीय जनता पार्टी के प्रदेश प्रभारी डी. पुरंदेश्वरी ह कीहिन हे कि राज्य सरकार ह हर मोर्चा म विफल हे। काली दुर्ग म एक ठिन पत्रकारवार्ता म आरोप लगाइन कि राज्य सरकार अपन वादा निभाय म असफल रेहे हे। गरीब मनखे, माइलोगिन, अउ जवान लइका मनले करे गे वायदा अब तक ले पूरा नइ होय हवय। श्रीमती पुरंदेश्वरी ह कीहिन कि भाजपा ह अवइया विधानसभा चुनाव बर पूरा तरह ले तियार हे। अउ पार्टी ह अच्छा परफारमेंस देवइया जवान मनखे अउ नवा चेहरा ल आगू लाही।
मदर्स डे/रेडक्रास दिवस
आज अंतराष्ट्रीय मदर्स डे हरय। ए दिन हरकोई सुघ्घर पाले पोसे खातिर अपन महतारी ल सहराथें। उप राष्ट्रपति एम.वेंकैया नायडू ह ए मउका म सबो महतारी मन ल सुभकामना देहें। ट्वीट संदेस म श्री नायडू ह कीहिन कि महतारी ह आदर्श, मया, दया, अउ निस्वार्थ सेवा के चिन्हारी होथे।
एति छत्तीसगढ़ म घलो मदर्स डे के मउका म कई ठिन कार्यक्रम होवत हे। राज्यपाल अनुसुइया उइके अउ मुख्यमंत्री भूपेश बघेल ह मदर्स डे के मउका म प्रदेशवासी मन ल सुभकामना दीन हे।
उंहें आज विश्व रेडक्रास दिवस घलो हवय। एला रेडक्रास के काम बर जागरूकता बढ़ाय खातिर हरएक बछर मनाये जाथे। आज ले अंतर्राष्ट्रीय रेडक्रास समिति के संस्थापक हेनरी ड्यूनेंट के जयंती घलो हरय।
दुर्घटना
जशपुर जिला के कुनकुरी तीर होय एक ठिन रोड एक्सीडेंट म पति-पत्नि के मौत होगे, उंहें दू झिन लइका मन ह घायल होगे। जेमन ल रांची के अस्पताल म भर्ती कराय गेहे।
मिले जानकारी मुताबिक जिला के कुनकुरी म रहवइया एक झन व्यवसायी ह अपन गोसइन अउ दू झिन लइका संग रतिहा बेरा ढाबा ले खाना खाके लहुटत रीहिस, तभे सलियाटोली तीर एक ठिन तेज रफ्तार हाइवा ह कार ल टक्कर मार दीस। ए हादसा म गोसइया के मउकाच म मउत होगे। उंहें अस्पताल ले जावत बेरा ओखर गोसइन के रद्दा म मउत होगे।
मौसम
बंगाल के खाड़ी म आये तूफान ह आज आसानी चक्रवात म बदल गे । जेखर रफ्तार पचहत्तर किलोमीटर प्रति घंटा ले जादा हे। जउन ह अउ तेज हो सकत हे। मौसम विभाग के मुताबिक आसानी चक्रवात के असर छत्तीसगढ़ म थोर बहुत हो सकत हे। जेखर ले हवा के दिसा ह बदलही अउ अधिकतम तापमान म गिरावट घलो होही।
संक्षिप्त समाचार
– छत्तीसढ़ व्यावसायिक परीक्षा मंडल डहार ले आज उप अभियंता सिविल भर्ती परीक्षा राज्य के जम्मों संभागीय मुख्यालय के अंठावन केंद्र म राखे गे रीहिस, जेमा करीबन बीस हजार परीक्षार्थी शामिल होइन।
– बेमेतरा के प्रथम अतिरिक्त सत्र न्यायाधीश पंकज कुमार सिन्हा ह नवागढ़ थाना क्षेत्र के गांव बोरतरा म होय हत्या के आरोप म एके परिवार के आठ झिन मनखे ल आजीवन करावास के सजा सुनाए हे।
– जांजगीर-चांपा म जिला म जिला पंचायत के सीईओ ह सरकारी काम म लापरवाही करे के आरोप म ग्राम पंचायत रोहदा अउ रगजा के सचिव ल सस्पेंड कर देहे।
अउ
– जशपुर जिला के बगीचा पुलिस ह रौनीघाट तीर रांची ले बस चोरी करके भागत एक झिन मनखे ल गिरप्तार करे हे।