मुख्यमंत्री भेंट/मुलाकात
राज्य सरकार ह दसवीं अउ बारहवीं के परीक्षा म जिला म टॉप करइया विद्यार्थी मन ल हेलिकॉप्टर राइड कराही। ये घोषणा राजपुर म पत्रकार मनले गोठबात करत मुख्यमंत्री ह कीहिन। संगेसंग श्री बघेल ह गौ-मूत्र ले के खरीदी शुरू करे के घोषणा घलो कीहिन। ओमन ह कीहिन कि गौ-मूत्र ले दवई बनाए जाही, जेखर ले माइलोगिन अउ गांव वाले मन ल आय के एक अउ जरिया मिलही।
मुख्यमंत्री भूपेश बघेल काली ले भेंट-मुलाकात कार्यक्रम म विधानसभा क्षेत्र मनके दौरा करत हे। ए कार्यक्रम के दूसर दिन मुख्यमंत्री ह बलरामपुर जिला के राजपुर पहुंचीन। ये मउका म श्री बघेल ह राजपुर म इकतीस करोड़ रूपिया ले जादा के बीस विकास काम मनके शिलान्यास अउ लोकार्पण करीन। राजपुर प्रवास के दउरान मुख्यमंत्री ह तहसील कार्यालय के जांच करके नक्शा अउ अभिलेख ल दुरूस्त करे के निर्देश दीन। संगेसंग लंबित काम के जल्दीच निराकरण करे बर कीहिन।
रापजपुर म राखे गे कार्यक्रम म मुख्यमंत्री ह गोधन न्याय योजना के तहत तिरालिसवां किश्त के रूप म पशुपालक, ग्रामीण गौठान ले जुड़े महिला समूह अउ गौठान समिति मन ल दस करोड़ सत्तर लाख रूपिया के राशि ऑनलाइन जारी करीन। ए मउका म श्री बघेल ह कीहिन कि राज्य सरकार के वादा के मुताबिक गोधन न्याय योजना के राशि के भुगतान नियमित रूप ले करे जावत हे।
मुख्यमंत्री भेंट/मुलाकात 02
राजपुर दौरा के बाद मुख्यमंत्री श्री बघेल रामानुजगंज विधानसभा क्षेत्र के डौरा गांव पहुंचीन। ए मउका म ओमन ह डौरा म स्वामी आत्मानंद अंग्रेजी माध्यम स्कूल अउ रनहत म महाविद्यालय खोले के घोषणा करीन। एखर अलावा ओमन डौरा अउ गणेश मोड़ के बीच विद्युत सब स्टैशन के स्थापना करे के घलो बात कीहिन। मुख्यमंत्री ह सासु नदी अउ दलधोवा ले सरस्वती पुल के बीच पुलिया बनाये के घलो घोषणा करीन।
उंहें जिला के पौनी-पेण्ड्री के गांव वाले मनके मांग म मुख्यमंत्री ह सड़क बनाये के निर्देश दीन। रामानुजगंज के डौरा म एक झिन सियान माइलोगिन ह मुख्यमंत्री ले राशनकार्ड बनवाये के बात कीहिन, जेखर उपर तुरते कार्रवाई करत श्री बघेल के निर्देश म तुरते राशनकार्ड बनाके दे गीस।
एखर पहिली, मुख्यमंत्री ह काली सामरी विधानसभा क्षेत्र के कुसमी अउ शंकरगढ़ के बाद बरियो गांव के दौरा करीन। ए दौरान ओमन ह बरियो म विद्युत सब स्टेशन, पंजीयन कार्यालय, मंगल भवन, हायर सेकेंडरी स्कूल, गौठान अउ रूरल इंडस्ट्रीयल पार्क बनाये के घोषणा करीन। एखरे संग ओमन ह पहाड़ी कोरबा गांव तक बीस किलोमीटर सड़क बनाये के घलो बात कीहिन। मुख्यमंत्री ह कीहिन कि आरा क्षेत्र म धान खरीदी केंद्र खोले जाही। संगेसंग भिलाईखुर्द म गौठान बनाये जाही।
सुरक्षा जवान विमान सेवा
बस्तर संभाग के माओवाद प्रभावित क्षेत्र मन म तैनात सुरक्षा बलके जवान अउ अधिकारी मन बर सात मई ले विशेष हवाई सेवा शुरू करे जाही। ये हवाई सेवा छुट्टी म जवइया जवान अउ अधिकारी मन बर होही। एखर तहत एक निजी एयरलाईंस के बहत्तर सीटर विमान सप्ताह म तीन दिन – बुधवार, शनिचर अउ ईतवार के जगदलपुर ले रायपुर होके दिल्ली तक उड़ान भरही।
ये विमान सेवा सिरिफ नक्सल मोर्चा म तैनात अर्द्धसैनिक बल मनके जवान अउ अधिकारी मन बर उपलब्ध होही। आम नागरिक मन ल ये सुविधा नइ मिलही। ए हवाई सुविधा के शुरू होये ले माओवाद प्रभावित क्षेत्र म तैनात जवान मन ल छुट्टी म आये जाये बर बड़ सुविधा होही। संगेसंग बेरा के घलो बचत होही।
ट्रेन परिचालन
रेलवे बोर्ड के निर्देश म सतरह गाड़ी मन ल रद्द करे जावत हे। एखर सेती कुछएक यात्री ट्रेन के अवई जवई प्रभावित रीही। एमा बिलासपुर-भोपाल-बिलासपुर एक्सप्रेस, बिलासपुर-रीवा-बिलासपुर एक्सप्रेस, जबलपुर-अंबिकापुर-जबलपुर एक्सप्रेस शामिल हे। एखरे संग कुछएक मेमू गाड़ी घलो रद्द रही। एमा बिलासपुर-रायगढ़-बिलासपुर, डोंगरगढ़-मेमू पैंसेंजर स्पेशल, डोंगरगढ़-रायपुर-बिलासपुर, इतवारी-रामटेक मेमू पैंसेंजर अउ रामटेक-नागपुर मेमू पैसेंजर शामिल हे।
उंहें रेलवे डहार ले यात्री मनके सुविधा ल धियान म राखत टाटानगर-इतवारी -टाटानगर के बीच दैनिक एक्सप्रेस ट्रेन के परिचालन आज ले शुरू करे जावत हे।
ओति ओडिशा के बृजराजनगर म रेल रोके आंदोलन के सेती बीहनिया छै बजे ले मुंबई-हावड़ा मेन लाइन ले होके जवइया गाड़ी के अवई जवई के बाधित होय के खबर मिले हे। बृजराजनगर म ट्रेन के ठहराव ल लेके स्थानीय लोगन मन रेल पटरी उपर प्रदर्शन करत हे।
लेप्टिनेंट चैतन्य दुबे श्रद्धांजलि
शहीद लेप्टिनेंट चैतन्य दुबे ल आज उंखर सुरता दिवस म रायपुर स्थित स्मृति वन म श्रद्धांजलि दे गीस। ए मउका म छत्तीसगढ़-ओडिशा उपक्षेत्र मुख्यालय के अधिकारी मनके संग ग्रुप कमांडर एनसीसी रायपुर अउ आने आने अधिकारी मौजूद रीहिस।
रायपुर निवासी लेप्टिनेंट चैतन्य दुबे बछर उन्नीस सौ संतानवे म मध्यम एसपी रेजीमेंट म शामिल होइस। पांच मई दू हजार के राजस्थान म भारत-पाक सीमा म अपन टेंक ल रेतीला बवंडर ले बाहिर निकाले के बेरा शहीद होगे रीहिन।
विषाक्त भोजन बच्चे बीमार
महासमुंद जिला के सरायपाली विकासखंड के पुटका गांव म जहरीला खाना खाये ले करीबन सोला लईका मन बीमार होगे हे। मिले खबर के मुताबिक पुटका गांव के आंगनबाड़ी केंद्र म आज लईका मन बर खाना बनाये गे रीहिस हे। रांधत बेरा एमा छिपकली गिर गे रीहिस, जेखर ले खाना जहरीला होगे। ए खाना ल खाये के बाद लईका मनके तबीयत अचानके बिगड़े बर लगीस। जम्मों लईका मन ल सरायपाली के सामुदायिक स्वास्थ्य केंद्र म भर्ती कराये गीस।
हादसा
रायपुर के सिलतरा के स्टील संयंत्र म जेसीबी के टायर म हवा भरे के बेरा टायर फटे ले दू झिन मनखे के मउत होगे।
एति जशपुर जिला के लोदाम चौकी के अंतर्गत रूपसेरा गांव के तीर पुलिया ले टकराके चारपहिया एक वाहन कोक नदिया म गिर गे। ए हादसा म एक मनखे के मउकाच म मउत होगे, उंहें घायल मनखे मन ल अस्पताल म भर्ती कराय गेहे।
उंहें बेमेतरा जिला म बेतर के तीर एक तेज रफ्तार कार अंते तंते होके पेड़ ले टकरा गे। ए हादसा म एक मनखे के मउत होगे, फेर दू झिन आने मनखे मन गंभीर रूप ले घायल होगे।
संक्षिप्त समाचार
– प्रदेश के आयुर्वेदिक चिकित्सालय अउ केंद्र मन म सियान जतन क्लीनिक म आज साठ बछर ले जादा उमर के सियान मनके निशुल्क जांच अउ इलाज करे गीस। ए अस्पताल मन म ये सुविधा हर महीना के पहिली गुरूवार के मिलही।
– महासमुंद जिला के पिथौरा वन परिक्षेत्र के अंतर्गत बेलडीही गांव म आज बीहनिया तेंदूपत्ता तोड़े बर गे गांव वाले मन उपर लकड़बग्घा ह हमला कर दीस। ए हमला म सात झिन ग्रामीण मन घायल होगे हे, जेमा ले एक के हालत गंभीर बने हुए हे, जेला रायपुर रेफर करे गेहे।
– राजनांदगांव जिला के पुलिस ह एक चिटफंड कंपनी के संपत्ति कुर्क कर लेहे। एखर ले मिले तिरसठ लाख रूपिया के राशि निवेशक मन ल लहुटाये जाही।
– दुर्ग पुलिस ह एसबीआई बैंक मैनेजर ले ठगी करे के मामला म एक आरोपी ल गिरप्तार कर लेहे। आरोपी ह बैंक मैनेजर ले धोखाधड़ी करके करीबन अट्ठारह लाख रूपिया अपन बैंक खाता म ट्रांसफर करा ले रीहिस।
अउ
– भिलाई पुलिस ह एक झिन व्यवसायी ल मशीन देके नाम म ओखर ले धोखाधड़ी करे के आरोप म एक उद्योगपति ल कर्नाटक ले गिरप्तार करे हे। ए उद्योगपति उपर करीबन चौंसठ लाख रूपिया के ठगी करे के आरोप हे ।