मुख्यमंत्री-भेंट/मुलाकात
मुख्यमंत्री भूपेश बघेल ह आज ले भेंट-मुलाकात कार्यक्रम म विधानसभा क्षेत्र मनके दौरा शुरू कर दीन। ए कार्यक्रम के पहिली दिन मुख्यमंत्री ह अपन दौरा के शुरूआत बलरामपुर जिला के सामरी विधानसभा क्षेत्र ले करीन। ये मउका म श्री बघेल ह आलू अउ टाउ के खेती ल बढ़ावा दे जाय बर कुसुमी म फूड प्रोसेसिंग प्लांट लगाय के घोषणा करीन। संगेसंग ओमन कीहिन कि कुसुमी ले सामरी बलरामपुर तक आठ किलोमीटर सड़क बनाय जाही।
बलरामपुर विधानसभा क्षेत्र के दौरा करत मुख्यमंत्री ह कुसुमी के सामुदायिक केंद्र म नवा एक्सरे मशीन अउ उंहा के हाईस्कूल म शौचालय निर्माण, बिजली के व्यवस्था अउ मैदान के समतलीकरण के घोषणा करीन।
श्री बघेल ह पीडीएस दुकान मनके जायजा लेके कार्डधारक मनके संख्या अउ हर महीना मिलइया राशन के जानकारी घलो लीन। ए दउरान एक झन माइलोगिन ह मुख्यमंत्री ले शिकायत करीन कि उंखर नाव ल गरीबी रेखा सूची ले काट दे गेहे अउ उंखर तीर राशनकार्ड नइ हे। ए शिकायत म मुख्यमंत्री ह बलरामपुर जिला के कलेक्टर ले ए बारे म गोठबात करीन अउ नगर पंचायत सीएमओ ल निलंबित करे के निर्देश दीन।
उंहे मुख्यमंत्री ह कुसुमी थाना के निरीक्षण करके रोजनामचा के अवलोकन करीन संगेसंग मालखाना के जानकारी घलो लीन। एखर बाद थाना परिसर म पुलिसकर्मी मनके परिवार वाला मनले भेंट करीन।
केंद्रीय राज्यमंत्री छत्तीसगढ़
केंद्रीय गृह राज्यमंत्री नित्यानंद राय एक दिन के दउरा म आज छत्तीसगढ़ पहुंचीन। रायपुर विमानतल म पहुंचे के बाद ओमन ह हेलिकाप्टर ले सीधा बीजापुर बर रवाना होइन। बीजापुर पहुंचके श्री राय ह आने-आने जन प्रतिनिधि अउ सामाजिक संगठन के संग समीक्षा बइठका म शामिल होके विकास काम के जायजा लीन। बीजापुर प्रवास के दउरान ओमन ह जिला के केंद्रीय विद्यालय के निरीक्षण करके उंहा के विद्यार्थी मनले भेंट करीन। एखर अलावा ग्राम पंचायत ईंटपाल के गौठान के निरीक्षण घलो करीन।
जवान शहीद
नारायणपुर जिला म आज सुरक्षा बल अउ माओवादी मनके बीच होय मुठभेड़ म एक झिन जवान शहीद होगे।
बस्तर रेंज के पुलिस महानिरीक्षक सुंदरराज पी. ह बताइन कि भारत-तिब्बत सीमा पुलिस आईटीबीपी अउ डिस्ट्रिक्ट रिजर्व गार्ड डीआरजी के संयुक्त दल ल नारायणपुर जिला के छोटे डोंगर थाना क्षेत्र के छोटे टोंडाबेड़ा अउ मंगारी गांव के जंगल म सर्चिंग बर भेजे गे रीहिस। इही दउरान आज बीहनिया तुलार गुफा अउ मंगारी गांव के जंगल म माओवादी मन ह सुरक्षा बल उपर फायरिंग शुरू कर दीन। सुरक्षा बल ह घलो जवाबी कार्रवाई करीस। माओवादी मन डहार ले करे गे ए गोलीबारी म डीआरजी के एक झन जवान हवलदार सालिकराम मरकाम ह शहीद होगे। ए जवान भानुप्रतापपुर के रहइया रीहिस। घटना के जानकारी मिले के बाद अतिरिक्त पुलिस दल ल मउका बर रवाना करे गेहे।
स्वास्थ्य केंद्र हमर क्लिनिक
राज्य सरकार ह धमतरी शहर के छै ठिन शहरी स्वास्थ्य सुविधा केंद्र मनके चयन करके हमर क्लिनिक के रूप म चलाये के निर्देश दीन हे। जिला कलेक्टर पी.एस. एल्मा ह आज जउन जगा म हमर क्लीनिक बनाये जाही, ओखर दौरा करीन।
भाजपा विस्तारक योजना
भारतीय जनता पार्टी काली पंाच मई ले भाजपा विस्तारक योजना शुरू करही। बीस मई तक चलइया ए कार्यक्रम म भाजपा कार्यकर्ता मन बूथ स्तर म जाके पार्टी के कार्य योजना म काम करही। एखर बर राजनंादगंाव के भाजपा कार्यालय म विधानसभा स्तर के प्रशिक्षण शिविर लगाये गीस। जेमा भाजपा के राष्ट्रीय उपाध्यक्ष डॅाक्टर रमनसिंह, प्रदेश प्रवक्ता संजय श्रीवास्तव अउ सांसद संतोष पांडेय संगरा पार्टी के पदाधिकारी अउ कार्यकर्ता मन मौजूद रीहिन।
वेटलिफ्टिंग प्रतियोगिता
जूनियर वर्ल्ड वेटलिफ्टिंग चैंपियनशिप म राजनांदगांव जिला के ज्ञानेश्वरी यादव ह रजत पदक जीत के छत्तीसगढ़ ल गौरवान्वित करीन हे। ग्रीस म होय ये प्रतियोगिता म ज्ञानेश्वरी यादव ह उनचास किलोग्राम म भारत के प्रतिनिधित्व करत तिहत्तर किलोग्राम स्नैच म अउ तिरासी किलोग्राम क्लीन एंड जर्क म कुल एक सौ छप्पन किलोग्राम वजन उठाके रजत पदक ल अपन नाव कर लीन। ज्ञानेश्वरी यादव वेटलिफ्टिंग म रजत पदक जितइया छत्तीसगढ़ के पहिली वेटलिफ्टर बनगे हवय।
लिफ्ट कारोबारी हत्या
राजधानी रायपुर के देवपुरी इलाका म लिफ्ट कारोबारी के हत्या के मामला म पुलिस ह एक झन आरोपी ल गिरप्तार करे हे । उंहें ए मामला म पुलिस भाजपा नेता लीलाराम भोजवानी के बेटा किशोर भोजवानी ल हिरासत म लेके पूछताछ करत हे। पुलिस के अनुसार हत्या के घटना ल अंजाम देके बाद आरोपी किशोर भोजवानी के कार ले फरार होय रीहिस। पुलिस ए मामला के एक झन दूसर आरोपी के तलाश करत हे।
खबर के मुताबिक देवपुरी के मेडिकल कॉम्पलेक्स म लिफ्ट लगाये गे रीहिस, जेमा खराबी आय के सेती लिफ्ट कारोबारी ल बुलाये गे रीहिस। इही दउरान कोनो बात ल लेके उंखर मनके बीच विवाद होगे अउ आरोपी मन ह लाठी ले पीट-पीटके ए कारोबारी के हत्या कर दीन।
आकांक्षी जिला समीक्षा
कंाकेर जिला के प्रभारी सचिव अउ आयुक्त शम्मी आबिदी ह आज जिला अधिकारी मनके बइठका लेके आकंाक्षी जिला के विकास काम के प्रगति के समीक्षा करीन। बइठका म श्रीमती आबिदी ह अधिकारी मन ल स्वास्थ्य, शिक्षा, पोषण संगरा आने आने क्षेत्र म बने प्रदर्शन करके जम्मों कमी ल दूरिहा करे के निर्देश दीन।
मौसम
प्रदेश म अवइया चौबीस घंटा के दउरान एक दू जगा म हल्का बरसा होय के या गरज-चमक के संग छींटा पड़े के संभावना हे। उंहें कुछएक जगा म अंधड़ घलो चल सकत हे। मौसम विभाग के अनुसार एक ठन उपरी हवा के चक्रीय चक्रवाती घेरा दक्षिण पूर्व उत्तर प्रदेश के उपर बने हे। उंहें एक ठन द्रोणिका पंजाब ले बांग्लादेश तक बने हे। जेखर असर ले राज्य के कुछएक जगा म बरसा हो सकत हे। उंहें अभी प्रदेश के अधिकतम तापमान म जादा परिवर्तन होय के संभावना नइ हे।
संक्षिप्त समाचार
– भगवान परशुराम के जन्मोत्सव के मउका म कवर्धा म युवा ब्राहम्ण समाज ह सामूहिक रक्तदान करीन।
– अखिल भारतीय कंाग्रेस कमेटी के सचिव अउ प्रदेश प्रभारी डॅाक्टर चंदन यादव काली रायपुर के सर्किट हाउस म कंाग्रेसी मनके बइठका लेके उंखर मनले गोठबात करही।
– दुर्ग जिला के भिलाई म इप्टा डहार ले ग्रीष्मकालीन बाल नाट्य शिविर के आयोजन करे जाही। ए शिविर म लईका मन ल नृत्य, चित्रकारी अउ गीत संगीत के प्रशिक्षण घलो दे जाही।
– राजनंादगंाव पुलिस ह एक झन माइलोगिन ल गांजा बेचे के आरोप म गिरप्तार करे हे।
अउ
– राजनंादगांव पुलिस ह प्रतिबंधित दवई नाईट्रोटेन के संग तीन झन आरोपी मन ल गिरफ्तार करे हे। पुलिस ह इंखर तीर ले दू सौ ले जादा दवई जब्त करे हे ।