प्रदेस म आज अक्ती के तिहार पारंपरिक रूप ले मनाय जावत हे। आज के दिन लोगन मन बर-बिहाव अउ सुभ काम करथे। छत्तीसगढ़ म अक्षय तृतीया के परब ‘अक्ति‘ के नाव ले जाने जाथे। आज के दिन पुतरा-पुतरी के बिहाव करे जाथे अउ आजे के दिन ले छत्तीसगढ़ म खेती-किसानी के संग सुभ काम करे जाथे।
अक्षय तृतीया के परब ल प्रदेस म माटी पूजन दिवस के रूप म घलो मनाय जावत हे। रईपुर के इंदिरा गांधी कृषि विश्वविद्यालय म राखे गे माटी पूजन महाभियान म मुख्यमंत्री भूपेश बघेल अउ कृषि मंत्री रविन्द्र चौबे सामिल होईन। ए मउका म मुख्यमंत्री ह कृषि विश्वविद्यालय के खेत म ठाकुर देवता के पूजापाठ करके खेती-किसानी के नवा काम के सुरूवात करीन। ओमन किहीन कि धरती अउ प्रकृति के रक्षा करे बर माटी पूजन महाभियान के सुरूवात करे गेहे। एखर तहत राज्य म जैविक खेती ल बढ़ावा दे जाही। मुख्यमंत्री ह किहीन कि इंदिरा गांधी कृषि विश्वविद्यालय म वैज्ञानिक मन ह पाछु पैंतीस साल म करीबन एक सौ दस किसम के बीजा तैयार करे हे। छत्तीसगढ़ के किसान मन ह तेईस हजार ले जादा बीजा तैयार करके एक ठिन मिसाल कामय करे हे। ए मउका म मुख्यमंत्री ह कृषि अभियांत्रिकी अउ प्रौद्योगिकी महाविद्यालय के नवा बने भवन अउ जैविक दूध उत्पादन बर डेयरी के लोकार्पण करीन। संगेसंग डॉप्लर वेदर राडर के स्थापना के घलो नींव राखीन। मुख्यमंत्री ह कृषि विश्वविद्यालय कोति ले विकसित करे गे कृषि रोजगार मोबाइल एप्लीकेशन के लोकार्पण घलो करीन।
उहें, दुरूग जिला म गृह मंत्री ताम्रध्वज साहू ह बैलागाड़ी म बइठ के माटी तिहार मनाय बर पहुंचीन। श्री साहू ह माटी तिहार के बाद पुतरी-पुतरा के बिहाव म घलो सामिल होईन। ए मउका म ओमन ह गांव वाले मन ल माटी के उरवरता ले जुड़े सपथ घलो देवईन। उहें, बिलासपुर के बैरिस्टर छेदीलाल कृषि महाविद्यालय म अक्ती तिहार के मउका म माटी पूजन करे गीस। एखर अलावा धमतरी जिला म किसान मन ह पूजा-पाठ करके बने फसल अउ बरसा के कामना करीन।
ईद-उल-फितर
ईद-उल-फितर के परब आज छत्तीसगढ़ समेत देसभर म आस्था अउ उल्लास के संग मनाय जावत हे। रमजान के एक महीना के रोजा के बाद काली रतिहा चांद दिखे के संग आज ईद के खुसी मनाय जात हे। कोविड महामारी के सेती दू बछर के बाद ए बखत ईदगाह अउ मस्जिद मन म सामूहिक नमाज पढ़े गीस। एखर अलावा घर मन म घलो नमाज पढ़ के मुस्लिम समुदाय के लोगन मन ह सेवई अउ शिर-खुरमा खाके ईद के खुसी मनावत हे।
राष्ट्रपति रामनाथ कोविंद, उपराष्ट्रपति एम. वेंकैया नायडू, प्रधानमंत्री नरेन्द्र मोदी, छत्तीसगढ़ के राज्यपाल अनुसुईया उइके अउ मुख्यमंत्री भूपेश बघेल ह ईद-उल-फितर के बधाई दीन।
उहें, छत्तीसगढ़ राज्य हज कमेटी के अध्यक्ष मोहम्मद असलम खान ह घलो प्रदेसवासी मन ल ईद-उल-फितर के मुबारकबाद दीन हे।
अंतर्राष्ट्रीय प्रेस स्वतंत्रता दिवस
आज अंतर्राष्ट्रीय प्रेस स्वतंत्रता दिवस हरय। ए मउका म मुख्यमंत्री भूपेश बघेल ह मीडिया संस्थान, प्रतिनिधि अउ पत्रकार मन बधाई अउ सुभकामना देवत किहीन कि मीडिया लोकतंत्र के चौथा स्तंभ हरय। इही स्तंभ के मजबूती, पत्रकारिता के सम्मान, स्वतंत्रता अउ सुरक्षा बर पूरा दुनिया म अंतर्राष्ट्रीय प्रेस स्वतंत्रता दिवस मनाय जाथे। ओमन किहीन कि छत्तीसगढ़ सरकार पत्रकार मनके सुरक्षा अउ स्वतंत्रता बर संकल्पित हवय। श्री बघेल ह किहीन कि छत्तीसगढ़ पहिली अइसन राज्य हरय, जिहां पत्रकार मन ल सुरक्षा दे बर कानून बनाय के पहल करे गेहे।
बालक-हत्या
दुरूग के बाल संप्रेषण गृह ले पाछु दिन सात झिन बालक मन फरार होगे रिहीन। एमा ले एक झिन बालक के सव आज बिलासपुर के अमरव्या चउक के तीर ले बरामद करे गेहे। पुलिस के मुताबिक बाल संप्रेषण गृह ले फरार ए जम्मों बालक मनके बीच चोरी के रकम ल लेके विवाद होगे गे रिहीस, जेखर चलत ए बालक मन ह एक झिन बालक के हत्या कर दीन। ए मामला म पुलिस ह पांच बालक मन ल गिरफ्तार कर लेहे।
मुख्यमंत्री-भेंट/मुलाकात
मुख्यमंत्री भूपेश बघेल ह काली चार मई ले प्रदेस के जम्मों नब्बे विधानसभा क्षेत्र के दउरा करके आम लोगन मन ले भेंट करही। ए दउरान ओमन आम नागरिक मनके संगेसंग जनप्रतिनिधि अउ सामाजिक संगठन मन ले चरचा करही अउ सासन के आने-आने जन कल्याणकारी योजना के क्रियान्वयन के जमीनी स्तर म जांच घलो करही। मुख्यमंत्री काली सरगुजा संभाग ले ए भेंट-मुलाकात कारीकरम के सुरूवात करही। एखर बर व्यापक तैयारी करे जावत हे। एखर बाद ओमन बस्तर संभाग के विधानसभा क्षेत्र के दउरा करही। मुख्यमंत्री हर दिन हरेक विधानसभा क्षेत्र के कोनों तीन गांव म जाही।
भाजपा-प्रशिक्षण शिविर
भारतीय जनता पार्टी ह अवइया बछर होवइया विधानसभा चुनाव ल देखत मैदानी स्तर म अभियान सुरू कर दे हे। इही कड़ी म काली राजनांदगांव म पार्टी कार्यकर्ता मन बर राखे गे प्रसिक्षण सिविर म भाजपा के राष्ट्रीय उपाध्यक्ष अउ प्रदेस के पूर्व मुख्यमंत्री डॉक्टर रमन सिंह सामिल होईन। ओमन बतईन कि प्रसिक्षित कार्यकर्ता, राज्य सरकार के वादाखिलाफी ल लेके सक्ति केन्द्र मनके माध्यम ले मतदान केन्द्र स्तर के कार्यकर्ता अउ मतदाता मन तक पहुंचही। डॉक्टर सिंह ह किहीन कि जब कार्यकर्ता सक्ति केन्द्र के माध्यम ले बूथ मन म जाही, त ओमन ल राज्य सरकार के खिलाफ जनता म पनपे गुस्सा अउ केन्द्र सरकार के योजना मन ल तीर ले देखे के मउका मिलही अउ अवइया चुनाव म ए अनुभव ल ओमन जनता ले साझा करही।
मौसम
प्रदेस म अवइया चौबीस घंटा के दउरान एक-दू जघा म हल्का बरसा होय या फेर गरज-चमक के संग सिटिर-साटर पानी गिरे के संभावना हे। उहें, कुछेक जघा म हवा-गरेर घलो चल सकत हे।
मौसम विभाग के मुताबिक एक उपरी हवा के चक्रीय चक्रवाती घेरा दक्षिण पूर्व उत्तरप्रदेश के उपर स्थित हवय। एखर असर ले राज्य के कुछेक हिस्सा म बरसा हो सकत हे। उहें, प्रदेस के अधिकतम तापमान म हल्का गिरावट के दउर सरलग जारी रेहे के संभावना हे।
इही बीच, महासमुंद जिला के पिथौरा थाना क्षेत्र के जम्हर गांव म काली संझा गाज गिरे ले एक झिन पढ़ईया लइका के मउत होगे।
संक्षिप्त समाचार
– आज भगवान परशुराम के जन्म उत्सव हरय। ए मउका म मुख्यमंत्री भूपेश बघेल ह प्रदेसवासी मन ल सुभकामना देवत किहीन कि भगवान परशुराम पराक्रम के प्रतीक माने जाथे।
– स्वतंत्रता संग्राम सेनानी अउ पूर्व सांसद केयूर भूषण के पुण्यतिथि म मुख्यमंत्री भूपेश बघेल ह ओमन ल नमन करीन हे।
– राज्य के प्रमुख सचिव डॉक्टर आलोक शुक्ला ल ग्रामीण औद्योगिक पार्क, सी-मार्ट अउ गोधन न्याय मिशन के समन्वय के उपरहा प्रभार सौंपे गेहे।
– प्रदेस कांग्रेस अध्यक्ष मोहन मरकाम के निरदेस म पार्टी के पूर्व सचिव अजय सिंह ल विरोधी गतिविधि म संलिप्त होय के सेती पार्टी के प्राथमिक सदस्यता ले छह बछर बर निष्कासित कर दे गेहे।
– राजनांदगांव जिला म जालबांधा के तीर एक ठिन कार अनते-तनते होके पलट गे। ए हादसा म एक झिन मनखे के मउत होगे। उहें, छह झिन मनखे गंभीर रूप ले घायल होगे हे।
अउ
– कोरबा जिला के बालको म पाछु रतिहा तेज रफ्तार एक ठिन कार अनते-तनते होके नहर म जा गिरीस। ए हादसा म एक झिन मनखे के मउत होगे अउ दू झिन घायल होगे।