मुख्यमंत्री मितान योजना
प्रदेस म आज ले मुख्यमंत्री मितान योजना सुरू होईस। मुख्यमंत्री भूपेश बघेल ह ए योजना के सुभारंभ करीन। ए मउका म ओमन किहीन कि ए योजना के माध्यम ले सबो नागरिक मन ल खासकर बुजुर्ग, दिव्यांग अउ निरक्षर मन ल घर बइठे आसानी से कई प्रकार के सेवा मिल सकही। योजना के तहत वर्तमान म चौदह नगर निगम मन म तेरह प्रकार के सेवा उपलब्ध कराय जात हे। ए योजना के विस्तार जल्द ही पूरा प्रदेस म कर दे जाही अउ अन्य सेवा मन ल घलो ए योजना के माध्यम ले प्राप्त कराय जाही। योजना के अंतर्गत लोगन मन ल जन्म प्रमाण पत्र, विवाह, निवास, आय, मृत्य प्रमाण पत्र अउ दूसर सेवा मनके घर पहुंच सुविधा मिलही। ए सेवा मनके लाभ ले बर मितान टोल फ्री नंबर – एक चार पांच चार पांच म कॉल करे जा सकत हे।
अंतर्राष्ट्रीय श्रमिक दिवस
आज अंतर्राष्ट्रीय श्रमिक दिवस आय। ये दिवस ल पूरा विश्व म श्रमिक मनके योगदान ल सम्मान दे बर मनाय जाथे। एला मई दिवस के रूप म घलो मनाय जाथे। ये दिन ल मनाय के उद्देश्य पूरा विश्व म आर्थिक अउ सामाजिक अधिकार ल प्राप्त करे म श्रमिक मनके समर्पण के प्रति आभार व्यक्त करना आय।
छत्तीसगढ़ म घलो श्रमिक दिवस उपर अलग-अलग कारीकरम आयोजित करे जात हे। मुख्यमंत्री भूपेश बघेल ह आज रायपुर म आयोजित प्रदेस स्तरीय श्रमिक सम्मेलन म सामिल होईन। ए मउका म ओमन किहीन कि मुख्यमंत्री श्रमिक सियान योजना के तहत बुजुर्ग मजदूर मन ल एक मुश्त दस हजार रूपिया दे जाही। संगेसंग ई-रिक्शा बर महिला मन ल पचास हजार रूपिया के जगह एक लाख रूपिया के अनुदान दे जाही। श्री बघेल ह किहीन कि मुख्यमंत्री नोनी सशक्तिकरण सहायता योजना के अंतर्गत बेटी मनके उमर अट्ठारह बछर छह महीना निर्धारित रिहीस, जेला बढ़ाके इक्कीस बछर कर दे गेहे।
मुख्यमंत्री के आह्वान म श्रमिक दिवस के अवसर उपर आज राजधानी रायपुर सहित प्रदेसभर म लोगन मन बोरे बासी खाके श्रमिक मन ल सम्मान दीन। मुख्यमंत्री ह आज श्रमिक मन संग बइठ के बोरे बासी खईन। गौरतलब हे कि राज्य सरकार ह एक मई मजदूर दिवस ल बोरे बासी दिवस के रूप म मनाय के निर्णय लेहे।
एला देखत संस्कृति विभाग डहार ले गढ़कलेवा म आज ले बोरे बासी थाली के सुभारंभ करे गीस। राज्य प्रशासनिक अधिकारी मन घलो बोरे बासी खाके मजदूर दिवस मनईन। उहें, नारायणपुर जिला म तैनात जिला पुलिस बल, छत्तीसगढ़ सशस्त्र बल अउ डीआरजी के जवान मन घलो बोरे बासी खईन।
मंत्रिमंडल निर्णय-01
प्रदेस म एक नवंबर दू हजार चार से नियुक्त शासकीय सेवक मन बर नवीन अंशदायी पेंशन योजना के जगह म पुराना पेंशन योजना लागू करे के निर्णय के आज अनुमोदन करे गीस। उहें, नवीन अंशदायी पेंशन योजना बर वेतन से ही करे जात दस प्रतिशत के मासिक अंशदान के कटौती एक अप्रैल दू हजार बाईस ले समाप्त कर सामान्य भविष्य निधि नियम के अनुसार मूल वेतन के न्यूनतम बारह प्रतिशत कटौती के प्रस्ताव ल घलो सहमति दे गीस।
मुख्यमंत्री भूपेश बघेल के अध्यक्षता म आज रईपुर म मंत्रिपरिषद के बइठका आयोजित होईस। बइठका म अनुसूचित जाति अउ जनजाति के व्यक्ति मनके मात्रात्मक त्रुटि के कारण जाति प्रमाण पत्र प्राप्त करे म होवत कठिनाई मन ल दूर करे के उद्देश्य ले अंग्रेजी म अधिसूचित जाति ल मान्य करे अउ जाति प्रमाण पत्र म अंग्रेजी म ही अधिसूचित जाति के उल्लेख करे के निर्णय ले गीस। उहें, छत्तीसगढ़ लोक सेवा आयोग, छत्तीसगढ़ व्यावसायिक परीक्षा मंडल अउ विशेष कनिष्ठ कर्मचारी चयन बोर्ड डहार ले आयोजित परीक्षा मनके सुल्क माफ करे के निर्णय के अनुमोदन करे गीस। एखर अलावा मंत्रिमंडल ह छत्तीसगढ़ अमर जवान ज्योति स्मारक के स्थापना बर नवा रायपुर अटल नगर विकास प्राधिकरण ल निर्माण एजेंसी नियुक्त करे के घलो निर्णय लेहे।
आज होय मंत्रिमंडल के बइठका म मिट्टी के उर्वरा शक्ति के पुनर्जीवन बर रासायनिक खाद अउ कीटनासक मनके बदला वर्मी कम्पोस्ट खाद के उपयोग के संगेसंग गौ-मूत्र अउ अन्य जैविक पदार्थ मनके उपयोग ल बड़ पैमाना म बढ़ावा देके उद्देश्य ले ए बछर अक्षय तृतीया तीन मई ले प्रदेस म माटी पूजन अभियान के सुभारंभ करे के निर्णय ले गीस। माटी पूजन के कारीकरम ल क्षेत्र बिसेस के परंपरा अनुसार पारंपरिक रूप से मनाय जाही।
मंत्रिमंडल निर्णय-02
मंत्रिपरिषद ह एक अन्य निर्णय म पंचायत अउ ग्रामीण विकास विभाग डहार ले सहायक मानचित्रकार के एक सौ पच्चीस पद बर नियुक्ति बर जारी चयन सूची के एक बछर तक प्रभावसील रेहे के वैधता अवधि ल सिथिल करे के सहमति दीन। उहें, संचालनालय आयुक्त के अंतर्गत स्टेनो टायपिस्ट के रिक्त पद के पूर्ति बर परीक्षा परिणाम के वैद्यता अवधि ल एक बछर बढ़ाय के निर्णय ले गेहे। एखर अलावा वाणिज्यक कर विभाग के अंतर्गत चतुर्थ श्रेणी कर्मचारी मन से सहायक वर्ग-तीन के पद बर पदोन्नति प्रदान करे जाय बर पदोन्नति के कोटा एक बार पच्चीस प्रतिसत के स्थान म पचास प्रतिसत करे के निर्णय ले गेहे।
पावरलिफ्टिंग प्रतियोगिता
राष्ट्रीय पावरलिफ्टिंग प्रतियोगिता म छत्तीसगढ़ के दुर्ग जिला के संतोषी मांझी ह स्वर्ण पदक जीत के राज्य ल गौरवान्वित करे हे। ये स्पर्धा बेंगलुरू म सत्ताईस से तीस अप्रैल तक आयोजित करे गे रिहीस। एमा संतोषी मांझी ह तिरसठ किलोग्राम वजन समूह म एक सौ अस्सी किलो वजन उठाके छत्तीसगढ़ ल स्वर्ण पदक दिलईन। उहें, संतोषी मांझी ह स्कवॉट म एक सौ अस्सी किलो, बेंच प्रेस म पच्यासी किलो अउ डेड लिफ्ट म एक सौ अस्सी किलो वजन उठाके कुल चार सौ पैंतालीस किलो लिफ्ट म कांस्य पदक घलो हासिल करीन।
लाल श्याम शाह-जयंती
मुख्यमंत्री भूपेश बघेल ह आज स्वतंत्रता संग्राम सेनानी स्वर्गीय लाल श्याम शाह के जयंती म उनला नमन करीन। ए अवसर म मुख्यमंत्री ह उनला श्रद्धांजलि देवत हुए किहीन कि श्री शाह राजनांदगांव जिला के पानबरसा के निवासी रिहीन। ओमन सीपी एन्ड बरार के समय सांसद अउ विधायक के रूप म प्रदेस अउ देस के सेवा करीन। छत्तीसगढ़ राज्य निर्माण आंदोलन म घलो उंखर सक्रियता रिहीस। मध्य भारत के ओमन बड़े आदिवासी नेता रिहीन। मुख्यमंत्री ह किहीन कि क्षेत्र अउ प्रदेस के विकास म उंखर योगदान ल भुलाय नइ जा सकय।
विक्रम उसेंडी-हादसा
राज्य के पूर्व मंत्री विक्रम उसेंडी के कार आज कोंडगांव म दुर्घटनाग्रस्त होगे। हालांकि श्री उसेंडी पूरी तरह सुरक्षित हे।
मिले जानकारी के अनुसार कोंडागांव म आयोजित भाजपा के बइठका म सामिल होय बर श्री उसेंडी सर्किट हाउस डहार जात रिहीन। इही दउरान ट्रक ह पीछू ले उंखर कार ल टक्कर मार दीस, जेखर ले कार क्षतिग्रस्त होगे। कार म सवार श्री उसेंडी सहित सबो झन सुरक्षित हे। पुलिस ह ट्रक चालक ल हिरासत म ले लेहे।
संक्षिप्त समाचार
– बिलासपुर पुलिस ह चिटफंड कंपनी के एक झिन डायरेक्टर ल हरियाणा ले गिरफ्तार करे हे। गिरफ्तार डायरेक्टर उपर करोड़ों रूपिया के धोखाधड़ी करे के आरोप हे।
– रायगढ़ जिला के धरमजयगढ़ वन परिक्षेत्र के अंतर्गत सारगपुर गांव म ग्यारह हाथी मनके दल विचरण करत हे।
अउ
– गरियाबंद पुलिस ह एक ठिन एम्बुलेंस ले करीब तीस किलो गांजा बरामद कर दो झिन आरोपी मन ल गिरफ्तार करे हे।