मुख्यमंत्री मितानिन
मुख्यमंत्री भूपेश बघेल ह स्वास्थ्य मितानिन अउ छत्तीसगढ़ मनरेगा कर्मचारी महासंघ के मांग उपर एक समिति बनाके रिपोर्ट प्रस्तुत करे बर केहे हे। एखर बर मुख्यमंत्री ह मुख्य सचिव ल निर्देश घलो दीन हे । जेखर बाद स्वास्थ्य मितानिन अउ छत्तीसगढ़ मनरेगा कर्मचारी महासंघ ह हड़ताल खतम करे के बात घलो कीहिन।
एखर पहिली आज मितानिन संघ अउ मनरेगा कर्मचारी महासंघ के प्रतिनिधि मंडल ह मुख्यमंत्री ले मुलाकात करके ओमन ल अपन मांग ल बताइन, जेखर बाद मुख्यमंत्री ह मांग उपर सहानुभूति पूर्वक विचार करे के आश्वासन दीन हे।
प्रधान आदेश दस्तावेज
केन्द्रीय शिक्षा, कौशल विकास अउ उद्यमिता मंत्री धर्मेन्द्र प्रधान ह आज बेंगलुरू म राष्ट्रीय शिक्षा नीति के तहत राष्ट्रीय पाठ्यक्रम के रूपरेखा तियार करे बर एक ठिन जनादेश दस्तावेज जारी करीन। ए दस्तावेज राष्ट्रीय शिक्षा नीति अउ राष्ट्रीय पाठ्यक्रम रूपरेखा के बीच एक कड़ी के काम करही। श्री प्रधान ह जनादेश दस्तावेज ल नवा राष्ट्रीय पाठ्यक्रम तियार करे बर अउ पाठ्यपुस्तक मनके लेखन के दिशा म एक अउ कदम बताइन। ओमन बताइन कि प्ले स्कूल बर राष्ट्रीय पाठ्यक्रम के रूपरेखा सरस्वती पूजा तक तियार हो जाही।
राष्ट्रीय पाठ्यक्रम के बारे म श्री प्रधान ह कीहिन कि ये ह अवइया दिन म देश के नियति ल बदल दीही। ओमन कीहिन कि राष्ट्रीय शिक्षा नीति व्यापक विचार विमर्श अउ सर्व सम्मति ले तियार करे गे एक दस्तावेज हरय। ओमन बताइन कि राष्ट्रीय पाठ्यक्रम तियार करे बर आम लोगन मनले सुझाव देके उद्देश्य ले एक ठिन मोबाइल एप तियार करे बर केहे गेहे। श्री प्रधान ह कीहिन कि राष्ट्रीय शिक्षा नीति भावी पीढ़ी बर अइसन दस्तावेज हे, जउन ह देश म शिक्षा प्रणाली ल मुक्त कर देहे।
स्कूल शिक्षा सचिव निरीक्षण
प्रदेश के नवनियुक्त स्कूल शिक्षा सचिव डॅाक्टर एस.भारतीदासन ह कीहिन कि लईका मन म परीक्षा के डर खतम करे बर ए जरूरी हे कि बोर्ड परीक्षा के पहिली लईका मनके एक अलग परीक्षा ले जाय ताकि ओमन म आत्मविश्वास विकसित हो सकय। काली राज्य शैक्षिक अनुसंधान अउ प्रशिक्षण परिषद एससीई आरटी म राखे गे बइठका म स्कूल शिक्षा सचिव ह कीहिन कि हरएक विसय मन म पांच-पांच के चार ठिन समूह बनाय जाय अउ चार पेपर सेट करे जाय।
ओमन कीहिन कि एमा ले एक पेपर म परीक्षा ले जाय, जेखर ले छात्र अउ शिक्षक मन दूनों के आकलन करे जा सकय। ओमन ये बात उपर जोर दीन कि शिक्षक कोनो भी काम ल औपचारिक न समझय, बल्कि परिणाम मूलक काम उपर ध्यान देवय। स्कूल शिक्षा सचिव ह अंग्रेजी माध्यम के सेल ले कीहिन कि अइसे काम करे जाय जेखर ले छत्तीसगढ़ के लईका मन अंग्रेजी भाषा म होवइया प्रतियोगिता मन म प्रथम आवय अउ धाराप्रवाह अंग्रेजी बोल सकय।
ए दउरान डॅाक्टर एस.भारतीदासन ह बीएड कॉलेज के निरीक्षण घलो करीन। ए मउका म ओमन कीनि कि नियमित बीएड के संग पत्राचार के माध्यम ले बीएड अउ एमएड पाठ्यक्रम ल प्राथमिकता दे जाना चाही। ओमन बीएड कॉलेज म धरोहर कार्यक्रम के तहत राखे गे वस्तु मन ल सहेजे अउ साफ सुथरा राखे के निर्देश घलो दीन।
किसान भागीदारी-प्राथमिकता हमारी
मत्स्य, पशुपालन, अउ डेयरी मंत्रालय ह ए महीना के पच्चीस ले तीस तारीख तक किसान भागीदारी प्राथमिकता हमारी – अभियान के आयोजन करे हे। एला आजादी का अमृत महोत्सव के हिस्सा के रूप म राखे जात हे।
अभियान के चौथा दिन केंद्र सरकार डहार ले लागू आने-आने योजना मनके बारे म मछुआरा, मतस्य पालक, पशुधन अउ दुग्ध पालक अउ दूसर हितधारक मनके बीच जागरूकता पैदा करे बर एक ठिन जागरूकता सत्र के आयोजन करे गीस। ए सत्र म पूरा देश के लगभग दू हजार जगा मनले एक लाख ले जादा किसान ऑनलाईन सत्र म शामिल होइन।
डॅाक्टर रमन-प्रधानमंत्री मुलाकात
प्रदेश के पूर्व मुख्यमंत्री अउ भाजपा के राष्ट्रीय उपाध्यक्ष डॅाक्टर रमन सिंह ह आज नई दिल्ली म प्रधानमंत्री नरेंद्र मोदी ले भेंट करीन। ए दउरान डॅाक्टर सिंह ह चार राज्य मन म होय विधानसभा चुनाव म भाजपा के जीत उपर प्रधानमंत्री ल बधाई दीन। संगरा छत्तीसगढ़ म संगठन के कामकाज ल घलो ओमन ल बताइन । डॅाक्टर सिंह ह प्रधानमंत्री गरीब कल्याण अन्न योजना के तिथि बढ़ाय बर प्रधानमंत्री के आभार घलो व्यक्त करीन।
बताइन कि डॅाक्टर सिंह समेत प्रदेश भाजपा अध्यक्ष विष्णुदेव साय, नेता प्रतिपक्ष धरमलाल कौशिक अउ संगठन महामंत्री पवन साय, भाजपा संगठन के बइठका म शामिल होय बर दिल्ली गे रीहिन।
मुख्यमंत्री भूमिपूजन
मुख्यमंत्री भूपेश बघेल ह आज कोरिया जिला म चंवालिस करोड़ रूपिया के लागत ले बनने वाला नवा जिला अस्पताल के संग मातृ अउ शिशु अस्पताल के वचुअर्ल भूमिपूजन करीन। कार्यक्रम के अध्यक्षता छत्तीसगढ़ विधानसभा के अध्यक्षता डॅाक्टर चरणदास महंत ह करीन।
मुख्यमंत्री ह अपन रायपुर स्थित निवास कार्यालय ले कार्यक्रम ल वीडियो कॅान्फ्रेसिंग के जरिया संबोधित करत कीहिन कि राज्य सरकार ह छत्तीसगढ़ म पाछू तीन बछर म स्वास्थ्य सुविधा मन ल आम लोगन करा पहुंचाय अउ इलाज ल सस्ता बनाये के दिशा म लगातार काम करे हे। ओमन कीहिन कि नवा अस्प्ताल के बने ले प्रदेश के दूरस्थ अउ वनांचल के लोगन मन ल अत्याधुनिक अउ सर्व सुविधायुक्त स्वास्थ्य सुविधा मनके लाभ मिलही। श्री बघेल ह कीहिन कि मातृ अउ शिशु अस्पताल बने ले महिला अउ लईका मनके स्वास्थ्य मन ल नवा दिशा मिलही। ओमन कीहिन कि एखर ले लईका मन ल कुपोषण मुक्त करे म घलो मदद मिलही।
मुख्यमंत्री ह बताइन कि मनेन्द्रगढ़, चिरमिरी, भरतपुर जिला के निर्माण प्रक्रिया चलत हे अउ नवा जिला तुरते अस्तित्व म होही। नवा जिला बर ओएसडी के नियुक्ति घलो कर दे गेहे। बतादन कि जिला म स्वास्थ्य सुविधा मनके विस्तार करत तैंतीस वेंटिलेटर बेड, साठ आईसीयू बेड के संगरा पांच सौ उनतालिस ऑक्सिजनयुक्त बेड जोड़े गेहे।
कोरोना समाचार
प्रदेश म कोरोना संक्रमण ले बचाव खातिर अब तक चार करोड़ एक लाख अस्सी हजार ले जादा कोविड रोधी टीका लगाये जा चुके हे। एमा ले दू करोड़ सतरह लाख सत्तर हजार ले जादा लोगन मन ल टीका के पहिली डोज अउ एक करोड़ उन्यासी लाख तैंतीस हजार ले जादा लोगन मन ल दूनो डोज लगाये जा चुके हे। उंहें चार लाख सतहत्तर हजार दू सौ बीस लोगन मन ल प्रिकाशन डोज लगाये गेहे।
इही बीच प्रदेश म कोरोना संक्रमण के दर म सरलग कमी आय हे। वर्तमान म प्रदेश के पॉजीटिविटी दर शून्य दशमलव एक दू प्रतिशत हवय। प्रदेश म काली कोरोना संक्रमण के छै ठिन नवा मामला आगू आइस। एला मिलाके प्रदेश म अब तक ग्यारा लाख बावन हजार ले जादा कोरोना संक्रमित मरीज मनके पहिचान करे गेहे। एमा ले ग्यारा लाख अड़तीस हजार ले जादा मरीज स्वस्थ होगे हे। उंहें वर्तमान म तीस झिन मरीज मनके प्रदेश के आने आने अस्पताल या होम आइसोलेशन म इलाज चलत हे।
अंबेडकर उपचार सुविधा
प्रदेश के स्वास्थ्य मंत्री टी.एस. सिंहदेव ह रायपुर के पंडित जवाहरलाल नेहरू स्मृति चिकित्सा महाविद्यालय अउ डॅाक्टर भीमराव अंबेडकर स्मृति चिकित्सालय म नेत्र रोग उपचार बर पांच ठिन नवा अउ अत्याधुनिक उपकरण मनके लोकार्पण करीन।
ए मउका म स्वास्थ्य मंत्री ह कीहिन कि आधुनिक अउ नवा उपकरण ले नेत्र चिकित्सा के क्षेत्र म प्रदेश के जम्मों लोगन मन ल लाभ मिलही। संगेसंग चिकित्सा छात्र मन ल शैक्षणिक गतिविधि मन बर घलो मदद मिलही। कार्यक्रम के बाद स्वास्थ्य मंत्री ह मातृ शिशु अस्पताल भवन प्रस्तावित छात्रावास के घलो निरीक्षण करीन।
पीएससी परीक्षा
छत्तीसगढ़ लोक सेवा आयोग डहार ले राखे गे आने-आने पद मन बर परीक्षा एक अउ दू मई के राखे जाही। ए परीक्षा दू पाली मन म बीहनिया नौ बजे ले एक बजे तक अउ मंझनियां दू बजे ले संझा चार बजे तक ले जाही। अइसने सहायक संचालक हथकरघा, सहायक पंजीयक के परीक्षा चार मई के बीहनिया नौ ले बारा बजे तक अउ विधि अधिकारी पद बर मंझनिया दू बजे ले संझा पांच बजे के पाली म परीक्षा राखे जाही। परीक्षा के दउरान कोरोना संक्रमण ले बचाव खातिर जारी दिशा निर्देश मनके पालन करना होही।