केन्द्रीय राज्यमंत्री-जगदलपुर
केंद्रीय राज्य संसदीय अउ संस्कृति राज्य मंत्री अर्जुन मेघवाल काली ले दू दिवसीय दउरा म जगदलपुर पहुंचीन। पाछू पत्रकार मनले गोठबात करत केंद्रीय राज्य मंत्री ह कीहिन कि केंद्र सरकार कोति ले घोषित आकांक्षी जिला म बस्तर समेत छत्तीसगढ़ के दस ठिन जिला शामिल हवय।
ओमन कीहिन कि देश के कुछएक जिला म तय मापदंड के अनुपात म विकास नइ हो पाय हे। अइसन जिला के चिन्हारी करके विशेष कार्ययोजना तियार करके विकास के काम ल आगू बढ़ाय जात हे।
केंद्रीय राज्यमंत्री श्री मेघवाल ह आज आंकाक्षी जिला बस्तर म चलत विकास काम के समीक्षा करीन। ये बेरा म ओमन आंकाक्षी जिला के विकास बर शिक्षा, स्वास्थ्य, पोषण, रोजगार, अउ कतकोन क्षेत्र बर जरूरत के मुताबिक प्रस्ताव तियार करे के निर्देश दीन। संगेसंग प्रधानमंत्री किसान सम्मान निधि, फसल बीमा योजना, पशुपालन अउ मछलीपालन ल बढ़ावा देके जरूरत बताइन । बइठका म बस्तर कलेक्टर ह जिला म चलाये जात विकास काम के जानकारी दीन। ओमन बताइन कि जिला ल पाछू फरवरी महीना म नीति आयोग कोति ले जारी आंकाक्षी जिला के सूची म उन्नीसवां अउ कृषि के क्षेत्र म पहिली स्थान दे गेहे।
एखर पहिली श्री मेघवाल के जगदलपुर विमानतल पहुंचे म पूर्व सांसद दिनेश कश्यप, पूर्व विधायक संतोष बाफना, कलेक्टर रजत बंसल समेत कतकोन पदाधिकारी मन ह उंखर स्वागत करीन।
मुख्यमंत्री-दुर्ग
मुख्यमंत्री भूपेश बघेल ह किहीन हे कि दुरूग म रईपुर असन होलसेल कॉरिडोर बनही। ओमन काली दुरूग म जिला व्यापार अउ उद्योग केन्द्र के नवा कार्यालय भवन के लोकार्पण कारीकरम म उद्योगपति मनके मांग म ए घोसना करीन। मुख्यमंत्री ह दुरूग कलेक्टर ल एखर बर भूईंया के चिन्हारी करे के निरदेस दीन हे। ओमन किहीन हे कि जब उद्योग बात आथे, त रोजगार के सेती एखर मांग होथे। फेर कई घांव स्थानीय स्तर म विरोध घलो होथे। ओमन उहां के लोगन ले किहीन कि स्थानीय स्तर म रोजगार होही त कोनों ल पलायन के जरूरत नइ पड़य।
मुख्यमंत्री ह आज दुरूग म अमृत मिशन योजना के फेस-वन के सुभारंभ घलो करीन। एक सौ चालीस करोड़ रूपिया के ए योजना ले बत्तीस हजार परिवार ल शुद्ध पीये के पानी के आपूर्ति करे जा सकही। एखर तहत वाटर ट्रीटमेंट प्लांट के मरम्मत, पाईप लाइन के बढ़वार अउ पांच ठिन टंकी बनाय गेहे।
उहें, मुख्यमंत्री ह आज दुरूग म कामकाजी माईलोगिन मनके सुभीता बर करीबन तीन करोड़ पचपन लाख रूपिया के लागत ले नवा बने हॉस्टल के लोकार्पण करीन। ए हॉस्टल म सौ झिन काम करइया माईलोगिन मनके रेहे के सुभीता मिलही।
व्यापमं-परीक्षा तिथि
छत्तीसगढ़ व्यावसायिक परीक्षा मंडल व्यापमं कोति ले पीपीटी, पीएटी, समेत आने-आने प्रवेश परीक्षा बर संभावित तारीख के घोसना करे गेहे। ए परीक्षा म इहां के स्थानीय परीक्षार्थी मन ले सुल्क नइ ले जाही।
व्यापमं कोति ले जारी तारीख के मुताबिक पीपीटी अउ प्री-एम.सी.ए. परीक्षा उनतीस मई, पीएटी, पी.व्ही.पी.टी. पांच जून के प्रस्तावित हवय। उहें, प्री-बीएड अउ प्री-डीएलएड के परीक्षा बारह जून के होही। अइसने, प्री-बीए-बीएड, प्री-बीएससी बीएड अउ बीएससी नर्सिंग बर प्रवेस परीक्षा उन्नीस जून के ले जाही। एखर संगेसंग एमएससी नर्सिंग अउ पोस्ट बेसिक नर्सिंग प्रवेश परीक्षा तीन जुलाई के होना प्रस्तावित हवय।
दीक्षांत-समारोह
बिलासपुर के अटल बिहारी वाजपेयी विश्वविद्यालय के तीसर दीक्षांत समारोह काली होईस। समारोह म एक सौ बैसठ झिन पढ़ईया लइका मन ल स्पर्ण पदक दे गीस। उहें, उच्च शिक्षा के विकास अउ प्रबंधन म योगदान दे खातिर आठ झिन विद्वान मन ल विद्या वाचस्पति के मानद उपाधि दे गीस।
दीक्षांत समारोह म वर्चुअल रूप ले बोलत उप राष्ट्रपति एम. वेंकैया नायडू ह किहीन कि देस के भविष्य युवा मनके सपना अउ आसा ले गढ़े जाही। ओमन किहीन कि हम अपन जुन्ना ज्ञान अउ परंपरा ल गंवात जात हन, उही जुन्ना प्रतिष्ठा ल फेर ले पाय बर हमन ल अपन सिक्षण संस्थान मन विश्वस्तरीय बनाय बर पड़ही। श्री नायडू ह किहीन कि हमन ल अपन विश्वविद्यालय के पाठ्यक्रम ल आधुनिक समय के मुताबिक बनाना जाही।
समारोह म राज्यपाल अनुसुईया उइके ह आह्वान करीन कि विद्यार्थी अपन जीवन के लक्ष्य तय करय अउ एला पाय बर सरलग मेहनत करय। एक दिन सफलता जरूर मिलही।
संगीत विश्वविद्यालय-दीक्षांत समारोह
खैरागढ़ के इंदिरा कला संगीत विश्वविद्यालय म सत्ताईस अप्रैल के सोलहवां दीक्षांत समारोह के आयोजन करे जाही। संगेसंग सत्ताईस ले तीस अप्रैल तक खैरागढ़ महोत्सव घलो मनाय जाही।
जनजातीय साहित्य महोत्सव
राजधानी रईपुर के पंडित दीनदयाल उपाध्याय ऑडिटोरियम म राखे गे तीन दिवसीय राष्ट्रीय जनजातीय साहित्य महोत्सव काली सिरा गे। समापन कारीकरम म बोलत राज्यपाल अनुसुईया उइके ह आदिवासी युवा मन ले आह्वान करीन कि ओमन जागरूक होके ए कारीकरम के फायदा लेवय। ओमन किहीन कि ए महोत्सव म सोध, परिचर्चा के बेरा जउन भी गोठबात आदिवासी मनके
सुधार बर आय होही। ओला लागू करे बर राष्ट्रीय स्तर म परयास होही। सुश्री उइके ह किहीन कि आदिवासी साहित्य म उंखर रहन-सहन ल देख के अउ बने असन जाने-समझे जा सकत हे।
उहें, केन्द्रीय जनजातीय राज्यमंत्री रेणुका सिंह ह जनजातीय कला, लोकसंस्कृति ल समृद्ध करे के जरूरत बतईन।
विश्व पृथ्वी दिवस
आज विश्व पृथ्वी दिवस हरय। पर्यावरण संरक्षण ल बढ़ावा देबर हर बछर बाईस अप्रैल के ये दिवस मनाये जाथे। एसो के विसय हरय- अपने ग्रह मे निवेश करना। उप राष्ट्रपति एम. वेंकैया नायडू ह लोगन ले पर्यावरण ल होय नुकसान के भरपाई करे बर ठोस प्रयास करे के बात कीहिन । उंहें प्रधानमंत्री नरेंद्र मोदी ह कीहिन कि पृथ्वी दिवस धरती बर अपन आभार जताय के मउका हे। ओमन पृथ्वी के देखभाल बर अपन प्रतिबद्धता दोहराइन।
माओवादी-समाचार
राजनांदगांव जिला के सीमा ले लगे महाराष्ट्र के गढ़चिरौली म पुलिस ह एक बिहाव कारीकरम म संघरे एक महिला समेत चार झिन इनामी माओवादी ल गिरफ्तार करे हे। गढ़चिरौली के नक्सल डीआईजी संदीप पाटिल ह बतईन कि पुलिस ल खबर मिले रिहीस कि कुछेक माओवादी नेलगोंडा के भामरागढ़ क्षेत्र म एक ठिन बिहाव कारीकरम म सामिल होय रिहीन। एखर बाद पुलिस ह ओ जगह के घेराबंदी करके ए माओवादी मन गिरफ्तार कर ले गीस। पकड़े गे माओवादी मन म दू एरिया कमेटी सदस्य घलो सामिल हे, जिखर उपर दू-दू लाख रूपिया के इनाम घोसित रिहीस।
ऐति, सुकमा जिला के एल्मागुंडा क्षेत्र म कोबरा बटालियन के जवान मन ह आईईडी बरामद करीन, जउन ल मउकाच म निष्क्रिय कर दे गीस।
दुर्घटना
राजनांदगांव जिला म पाछु रतिहा होय रद्दा दुर्घटना एके परिवार के पांच झिन लोगन के मउत होगे।
खबर के मुताबिक खैरागढ़ के रहवइया ए परिवार के पांच झिन सदस्य पाछु रतिहा चौपहिया गाड़ी म बइठ के बालोद ले खैरागढ़ लहुटत रिहीन। इही बेरा रतिहा के करीबन दू बजे सिंगारपुर के गणेश मंदिर तीर उंखर गाड़ी ह अनते-तनते होके पुलिया ले टकरा गे अउ गाड़ी म आगी लग गे, जेखर ले एमा बइठे परिवार के जम्मों पांच झिन सदस्य के जले ले मउत होगे।
जांजगीर स्वास्थ मेला
जांजगीर चांपा जिला के पामगढ़, बम्हनीडीह, अउ सक्ति म विकासखंड स्तर म आयुष्मान स्वास्थ्य मेला लगाय गेहे। ये बेरा म बड़ संख्या म लोगन के स्वास्थ्य के जांच करके ओमन ल मुफत म दवाई बांटे गीस। स्वास्थ्य मेला म आयुष्मान कार्ड अउ डिजिटल कार्ड घलो बनाय गेहे। एखर पहिली जिला के अकलतरा अउ नवागढ़ विकासखंड म घलो आयुष्मान स्वास्थ्य मेला लगाये गे रीहिस।
मौसम
अवइया चौबीस घंटा म प्रदेश के एक दू जगा म छुटपुट बरसा या फेर गरज चमक संग छींटा बौछार होय के संभावना हवय। मौसम विभाग के मुताबिक प्रदेश म उत्तर अउ दक्षिणी क्षेत्र ले हवा आवत हे जेखर प्रभाव ले छींटा बौछार अउ हवा गरेर चले के आसार हवय।
उंहें प्रदेश के अधिकतम अउ न्यूनतम तापमान म काली ले बढ़वार हो सकत हे। इही बीच काली रतिहा रायपुर, राजनांदगांव समेत प्रदेश के कुछएक जिला म हवा गरेर अउ गरज चमक संग बरसा होइस।
संक्षिप्त समाचार
– बलरामपुर कलेक्टर कुंदन कुमार कोति ले जांच के बेरा स्कूल अउ आश्रम म अव्यवस्था पाय जाय म दू झिन सहायक शिक्षक ल निलंबित कर दे गेहे।
– जिला रोजगार अउ स्व रोजगार मार्गदर्शन केंद्र दुर्ग म पच्चीस अप्रैल के प्लेसमेंट कैम्प राखे जाही।