जनजातीय साहित्य महोत्सव
राजधानी रायपुर के पंडित दीनदयाल उपाध्याय ऑडिटोरियम म काली ले सुरू होय राष्ट्रीय जनजातीय साहित्य महोत्सव म आने-आने लोक कलाकार डहार ले सांस्कृतिक कारीकरम के प्रस्तुति दे जात हे। महोत्सव म काली पहिली दिन क्रांतिवीर गुण्डाधूर उपर आधारित एक ठिन नाटक के मंचन करे गीस। संगेसंग लोक कलाकार डहार ले करमा, सैला, मड़ई अउ ककसार नृत्य के आकर्षक प्रस्तुति दे गीस। एखर अलावा महोत्सव म राज्य स्तरीय जनजातीय नृत्य अउ चित्रकला प्रतियोगिता घलो आयोजित करे जात हे। महोत्सव के चलत काली ‘‘भारत जनजातीय भाषा और साहित्य का विकास तथा भविष्य‘‘ बिसय उपर आयोजित साहित्य परिचर्चा म देस के करीबन बीस झिन प्रख्यात साहित्यकार मन हिस्सा लीन अउ तेईस झन शोधार्थी मन ह अपन सोध पत्र के वाचन करीन।
तीन दिन चलइया ए महोत्सव के समापन काली इक्कीस अप्रैल के होवइया हे। समापन कारीकरम के मुख्य अतिथि राज्यपाल अनुसुईया उइके होही। उहें, कारीकरम के अध्यक्षता केन्द्रीय जनजातीय कार्य राज्यमंत्री रेणुका सिंह करही। संगेसंग आदिम जाति अउ अनुसूचित जनजाति विकास मंत्री डॉक्टर प्रेमसाय सिंह टेकाम ह विशिष्ट अतिथि के रूप म सामिल होही।
गोधन न्याय योजना-अवॉर्ड
छत्तीसगढ़ के गोधन न्याय योजना ल राष्ट्रीय स्तर म एलेट्स इनोवेशन अवॉर्ड ले सम्मानित करे गेहे। एलेट्स आत्मनिर्भर भारत समिति म राज्य ल कृषि म इनोवेशन केटेगरी म ए अवॉर्ड दे गेहे। नई दिल्ली म आयोजित दू दिवसीय एलेट्स आत्मनिर्भर भारत समिट म काली एलेट्स टेक्नो मीडिया प्राईवेट लिमिटेड के संस्थापक सीईओ अउ एडिटर इन चीफ डॉक्टर रवि गुप्ता अउ टेक्सटाईल मंत्रालय के सचिव यू.पी. सिंह ह संयुक्त रूप ले ए अवॉर्ड प्रदान करीन। छत्तीसगढ़ कोति ले ए अवॉर्ड ल संयुक्त संचालक आर.एल. खरे ह प्राप्त करीन।
मुख्यमंत्री भूपेश बघेल अउ कृषि मंत्री रविन्द्र चौबे ह प्रदेसवासी, कृषि विभाग अउ गोधन न्याय मिशन के अधिकारी-करमचारी, गौठान समिति अउ स्व-सहायता समूह के माईलोगिन मन ल बधाई अउ सुभकामना दीन हे।
मुख्यमंत्री-समीक्षा
मुख्यमंत्री भूपेश बघेल ह प्रदेस के कला अउ संस्कृति के संरक्षण अउ संवर्धन बर इंदिरा कला संगीत विश्वविद्यालय खैरागढ़ के जइसे बस्तर, सरगुजा अउ रायपुर म घलो लोक कला अउ संस्कृति महाविद्यालय सुरू करे के प्रस्ताव तैयार करे के निरदेस दीन हे। मुख्यमंत्री ह कहिन कि ए महाविद्यालय के सुरू होय ले बस्तर अउ सरगुजा अंचल के लोककला अउ संस्कृति के संरक्षण अउ संवर्धन ल बढ़ावा मिलही। श्री बघेल ह किहीन कि अमरकंटक के इंदिरागांधी राष्ट्रीय जनजातीय विश्वविद्यालय के एक सेंटर छत्तीसगढ़ म घलो सुरू करे के प्रस्ताव केन्द्र सरकार ल भेजे जाही। मुख्यमंत्री ह काली रईपुर म पर्यटन अउ संस्कृति विभाग के समीक्षा करत रिहीन। ए मउका म ओमन ह कहिन कि लोककला दल के माध्यम ले आदिवासी अंचल म स्वास्थ्य, सिक्षा अउ जन कल्याणकारी योजना बर जन-जागरूकता अभियान चलाय जाही।
दीक्षांत समारोह
बिलासपुर के अटल बिहारी वाजपेयी विश्वविद्यालय के तीसर दीक्षांत समारोह काली आयोजित करे जाही। ए समारोह म उप राष्ट्रपति एम. वेकैंया नायडू के वर्चुअल अभिभाषण के संग सुरू होही। समारोह के मुख्य अतिथि विश्वविद्यालय के कुलाधिपति अउ राज्यपाल अनुसुईया उइके होही। दीक्षांत समारोह म एक सौ अड़सठ झिन पढ़ईया लइका ल स्वर्णपदक दे जाही। समारोह म पहिली घांव दिव्यांग श्रेणी के अभ्यर्थी मन ल घलो स्वर्ण पदक दे जाही।
गारे पेलमा कोल ब्लॉक-अनुशंसा पत्र
रायगढ़ वनमंडल के गारे पेलमा सेक्टर-दू कोल ब्लॉक के वन व्यपवर्तन स्वीकृति बर छत्तीसगढ़ के वन अउ जलवायु परिवर्तन विभाग डहार ले केन्द्र सरकार ह अनुसंसा पत्र भेजे गेहे। जानबा के मुताबिक पाछु अट्ठारह अप्रैल के महाराष्ट्र के ऊर्जा मंत्री नितिन राउत ह मुख्यमंत्री भूपेश बघेल ले ए संबंध म भेंट करके गोठबात करे रिहीन। एखर बर मुख्यमंत्री ह नियमानुसार मदद करे के गोठबात करे रिहीन।
अमृत महोत्सव-स्वास्थ्य मेला
आजादी के अमृत महोत्सव के चलत काली मुंगेली म निःशुल्क विकासखंड स्तरीय स्वास्थ्य मेला के आयोजन करे गीस। कारीकरम मुख्य अतिथि के रूप म सांसद अरूण साव अउ विधायक पुन्नूलाल मोहले सामिल होईन। ए अवसर म श्री साव ह किहीन कि आजादी के अमृत महोत्सव म केन्द्र सरकार डहार ले देस के हरेक विकासखंड म निःशुल्क स्वास्थ्य मेला के आयोजन करे जात हे। उहें, श्री मोहले ह किहीन कि लोगन मन ल स्वास्थ्य के प्रति जागरूक करे बर जिला अस्पताल म उपलब्ध स्वास्थ्य सुविधा के विस्तृत प्रचार-प्रसार करे जाना चाही। ए मेला म करीबन आठ सौ छत्तीस हितग्राही मनके स्वास्थ्य परीक्षण करे गीस। जरूरतमंद मन ल दवई के अलावा चश्मा अउ छड़ी निःशुल्क बांटे गीस।
राजनांदगांव-समस्या निवारण शिविर
राजनांदगांव जिला म बाईस अप्रैल ले समस्या निवारण सिविर के आयोजन करे जाही, जेखर सुरूवात जिला के सुकुलदैहान गांव ले होही। ए सिविर म जिला प्रसासन डहार ले ग्रामीण मनके समस्या ल सुन के उंखर तुरते निराकरण करे के प्रयास करे जाही। एखर बर जिला प्रशासन डहार ले सबो विभाग प्रमुख ल तैयारी करे संग पहुंचे के निरदेस दे गेहे।
लोक सेवा दिवस-उत्कृष्टता पुरस्कार
प्रधानमंत्री नरेन्द्र मोदी ह काली लोक सेवा दिवस म लोक प्रसासन म उत्कृष्टता पुरस्कार दीहीं। ए पुरस्कार बछर दू हजार इक्कीस बर दे जाही। जन कल्याण खातिर केन्द्र अउ राज्य सरकार के जिला अउ संगठन डहार ले करे गे असाधारण अउ नवीन कार्य के सम्मान बर ए पुरस्कार दे जाथे।
लोक सेवा दिवस के अवसर म आज नई दिल्ली म दू दिन के कारीकरम के उद्घाटन करे गीस। ए अवसर म विज्ञान अउ प्रौद्योगिकी मंत्री डॉक्टर जितेन्द्र सिंह ह कहिन कि पहिली लोक प्रसासन म उत्कृष्टता बर प्रधानमंत्री पुरस्कार अधिकारी के व्यक्तिगत काम म आधारित होवत रिहीस। फेर अब ए पुरस्कार ह आने-आने जिला के परमुख कारीकरम के प्रदर्सन म आधारित होथे।
माओवादी-समाचार
सुकमा जिला म सुरक्षा बल मन ह एक आईईडी बरामद करे हे। पुलिस अधीक्षक सुनील शर्मा ह बतईन कि कोबरा बटालियन अउ सीआरपीएफ के जवान मन आज बिहनिया सर्चिंग म निकले रिहीन। इही बेरा जिला के करीगुंडम इलाका ले ए आईईडी ल बरामद करे गीस। माओवादी मन ह ए आईईडी जवान मन ल नुकसान पहुंचाय के उद्देश्य ले लगाय रिहीस। बाद म सुरक्षा बल मन ह आईईडी ल मउका म ही ब्लास्ट करके नष्ट कर दीन। घटनास्थल ले वायर समेत आने जिनीस बरामद करे गेहे।
भाजपा महिला मोर्चा-पोषण अभियान
भारतीय जनता पार्टी महिला मोर्चा के आह्वान म सामाजिक न्याय पखवाड़ा के चलत काली मुंगेली म पोषण अभियान कारीकरम के आयोजन होईस। कारीकरम म मुख्य रूप ले सांसद अरूण साव अउ विधायक पुन्नूलाल मोहले सामिन होईन। ए मउका म मितानिन, आंगनबाड़ी कार्यकर्ता, सहायिका अउ गर्भवती माईलोगिन मनके सम्मान करे गीस। ए माईलोगिन मन ल पोषण आहार के रूप म फल, बिस्कुट अउ दूध बांटे गीस।
मौसम
मौसम विभाग ह अवइया चौबीस घंटा के बेरा प्रदेस के कुछु जगह म लू चले के चेतावनी दीन हे। विभाग ह रायपुर, सरगुजा, दुरूग अउ बिलासपुर संभाग के कुछु हिस्सा म ग्रीष्म लहर चले के संभावना जतईन हे।
मौसम विभाग के अनुसार ए बेरा प्रदेस के उत्तर दिसा म उत्तर-पश्चिमी अउ दक्षिण दिसा म दक्षिणी हवा के आगमन होय हे। एखरे सेती काली दक्षिण छत्तीसगढ़ म एक-दू जगह म हल्का बारिस होय या गरज-चमक के संग आकाशीय बिजली गिरे के संभावना हे। उहें, प्रदेस के अधिकतम अउ न्यूनतम तापमान म बिसेस परिवर्तन होय के आसार नइ हे। रईपुर संभाग म अधिकतम तापमान म थोड़ा गिरावट होय के संभावना हे।