जनजातिय साहित्यकार महोत्सव
राजधानी रायपुर के पंडित दीनदयाल उपाध्याय ऑडिटोरियम म आज ले तीन दिन तक चलइया राष्ट्रीय जनजातिय साहित्य महोत्सव के शुरूआत करे गीस। मुख्यमंत्री भूपेश बघेल ल ए कार्यक्रम के माइपहुना बनाय गे रीहिस। ए मउका म श्री बघेल ह कीहिन कि जउन प्रजाति मन ह नंदावत जात हे, ओला बचाना हम सबके जिम्मेवारी हरय ।
ओमन कीहिन कि ए काम खातिर जनजातिय भाषा, संस्कृति, अउ सभ्यता ल बचाना बहुते जरूरी हे। ओमन यहू कीहिन कि छत्तीसगढ़ म पहिली घांव राष्ट्रीय जनजातिय साहित्य महोत्सव के कार्यक्रम राखे गेहे। ए कार्यक्रम के माध्यम ले जनजातिय अउ दिगर समाज के बीच एक ठन भाईचारा बनही। ए कार्यक्रम म मुख्यमंत्री ह पद्मश्री लोक गायक हलधर नाग, साकीनी रामचंद्रा अउ अर्जुन सिंह धुर्वे ल शाल अउ नरियल भेंट करके सम्मानित करीन। ए दउरान तीन दिन तक रंग-रंग के कार्यक्रम करे जाही।
मुख्यमंत्री बैठक
मुख्यमंत्री भूपेश बघेल ह राज्य म जन-जागरूकता बर काली जत्था अउ लोक कलाकार मनके मदद ले कई ठन योजना मनके प्रचार-प्रसार कराय के निर्देश दीन। ओमन कीहिन कि लोक कलाकार मन ह स्थानीय बोली अउ भाषा म योजना मनके जानकारी आम जनता तक पहुंचाय के प्रयास करय।
मुख्यमंत्री ह पर्यटन अउ संस्कृति विभाग के समीक्षा बइठका म ए बात ल कीहिन। ओमन यहू कीहिन कि पर्यटन ल बढ़ावा दे खातिर सतरेंगा अउ गंगरेल बांध म पर्यटक मन बर जादा ले जादा सुविधा देवाय जाही। एखर अलावा अमरकंटक जाय बर नवा सड़क घलो बनाय जाही।
मुख्यमंत्री उर्जा मंत्री मुलाकात
मुख्यमंत्री भूपेश बघेल ह महाराष्ट्र के उर्जा संबंधी जरूरत ल धियान म राखत रायगढ़ जिला के गारे पेलमा सेक्टर – दू कोल ब्लॉक के क्लीयरेंस बर नियम अनुसार जल्दी ले जल्दी मदद करे के आश्वासन दीन।
महाराष्ट्र म बिजली उत्पादन बर कोयला के पूर्ति ए कोल ब्लॉक ले करे जाही। जेखर ले अवइया समय म कोयला के पूर्ति सरलग बने रीही। महाराष्ट्र के उर्जा मंत्री नितिन राउत ह मुख्यमंत्री भूपेश बघेल ले काली रायपुर म भेंट करके गोठबात करीन।
केंद्रीय मंत्री दौरा
केंद्रीय नागरिक उड्डयन मंत्री ज्योतिरादित्य सिंधिया ह कीहिन कि रायपुर के स्वामी विवेकानंद हवाई अड्डा ल अंतर्राष्ट्रीय एयरपोर्ट के दर्जा देके अभी जरूरत नइ हे। ओमन कीहिन कि इंहा ले अंतर्राष्ट्रीय हवाई सेवा बर जम्मों जरूरी सुविधा दे जात हे। केंद्रीय मंत्री ह ये बात आज राजनांदगांव म पत्रकार मनले गोठबात करत कीहिन। ओमन बताइन कि अंतर्राष्ट्रीय विमानतल के मांग कई ठन शहर मन म होवत हे। फेर सरकार डहार ले जोर दे जात हे कि अंतर्राष्ट्रीय दर्जा देके बजाय अंतर्राष्ट्रीय उड़ान के संख्या ल बढ़ाय म जोर देवय।
एखर पहिली केंद्रीय मंत्री ह राजनांदगांव म आंकाक्षी जिला कार्यक्रम के समीक्षा घलो करीन। ओमन कीहिन कि आकांक्षी जिला कार्यक्रम के तहत कोनो कोनो जिला म बहुत बढ़िया काम होय हे। फेर कुपोषण के आंकड़ा ह अभी जिला म जादा हे। नवजात शिशु मनके वजन स्तर ह कमजोर हे। ओमन कीहिन कि दूनो स्थिति म सुधार करे खातिर समस्या ल जड़ ले खतम करे बर पड़ही।
उंहें केंद्रीय संचार राज्यमंत्री देवू सिंह चौहान ह आंकाक्षी जिला के स्थिति ल जाने बर आज बस्तर पहुंचीन। ए दउरान ओमन कीहिन कि बस्तर के गांव गांव म मोबाइल टावर लगाये जाही। ओमन पत्रकार मनले गोठबात करत कीहिन कि दंतेवाड़ा जिला के दू सौ तीस ठन गांव हवय, जिहां इंक्यावन ठन गांव म संचार सुविधा नइ हे।
खबर के मुताबिक भारतीय जनता पार्टी के सामाजिक समरसता कार्यक्रम के तहत केंद्रीय मंत्री ज्योतिरादित्य सिंधिया अउ देवू सिंह चौहान ह काली ले छत्तीसगढ़ प्रवास म हवय। उंहें केंद्रीय राज्यमंत्री भानुप्रताप सिंह वर्मा ह घलो आकांक्षी जिला के समीक्षा करे खातिर आज कांकेर पहुंचीन। ओमन जिला म स्वास्थ्य शिक्षा अउ पोषण के क्षेत्र म होवत काम के बढ़ई करीन। संगेसंग यहू कीहिन कि केंद्र अउ राज्य सरकार के योजना के लाभ गरीब मन ल मिलत हे जेखर ले आत्मनिर्भर बनत हे।
अमृत महोत्सव प्रश्नोत्तरी
आजादी के अमृत महोत्सव के तहत आकाशवाणी समाचार डहार ले राष्ट्रीय स्तर म राखे गे प्रश्नोत्तरी कार्यक्रम के तहत आज के प्रश्न हे –
ओ स्वतंत्रता सेनानी के मूल नाम बतावव, जउन ल गांधी जी ह साबित्री देवी के नवा नाम देगे रीहिस अउ जउन ह कर्शियांग म नजरबंदी ले नेताजी के बाचे म मदद करे रीहिस ?
सुनइया मन अपन उत्तर ल वाट्सअप नंबर – आठ आठ दू छै पांच चार छै दू छै दू म या ईमेल आई डी – अमृत महोत्सव क्विज एट द रेट प्रसार भारती डॅाट जीओवी डॅाट इन म भेज सकत हव। ए प्रतियोगिता म एक झिन भाग्यशाली प्रतिभागी ल विजेता चुने जाही अउ काली के समाचार प्रभात म उंखर नाव के घोषणा करे जाही। विजेता ल ई-प्रमाण पत्र अउ सांकेतिक पुरस्कार घलो दे जाही।
गुरू तेगबहादुर प्रकाश पर्व
गुरू तेगबहादुर जी के प्रकाश पर्व के मउका म प्रधानमंत्री नरेंद्र मोदी ह बिरस्पत के दिन लालकिला ले राष्ट्र ल संबोधित करही। ए मउका म प्रधानमंत्री ह एक ठन स्मारक सिक्का अउ डाक टिकट घलो जारी करही।
केंद्र सरकार डहार ले राखे गे ए कार्यक्रम के पहिली दिन काली केंद्रीय गृह मंत्री अमित शाह शामिल होही। श्री शाह ह लालकिला म गुरू तेगबहादुर जी के जीवन अउ बलिदान उपर बनाये गे मल्टीमीडिया शो के घलो उद्घाटन करही। काली शबद कीर्तन के कार्यक्रम करे जाही। ए कार्यक्रम के आयोजन आजादी के अमृत महोत्सव के तहत संस्कृति मंत्रालय, दिल्ली सिक्ख गुरूद्वारा प्रबंधक कमेटी के मदद ले करे जात हे।
माओवादी समाचार
बीजापुर जिला म आज सुरक्षा बलके टीम अउ नक्सली मनके बीच होय मुठभेड़ म एक झिन जवान ह घायल होगे। मिले खबर के मुताबिक कोबरा बटालियन, एसटीएफ, सीआरपीएफ अउ जिला पुलिस बल के टीम मन सर्चिंग म निकले रीहिस, उही समय तर्रेम थाना क्षेत्र के पेगड़ापल्ली के जंगल म सुरक्षा बल अउ नक्सली मनके बीच मुठभेड़ एक झिन जवान घायल होगे।
इही जिला म माओवादी मन ह रेती खनाय के काम म लगे करीबन सात ठन गाड़ी मन ल आगी लगा दीन।
एति दंतेवाड़ा जिला के मंगनार गांव म माओवादी मन ह सड़क बनाय के काम म लगे चार ठिन गाड़ी ल आगी लगा दीन।
ओति नारायणपुर जिला के ओरछा रद्दा म रायनार के तीर पाछू रतिहा माओवादी मन ह सड़क ल खोदके नुकसान पहुंचाय हे। माओवादी मन ह बैनर- पोस्टर लगाके बस्तर फाइटर भर्ती के विरोध घलो करीन। माओवादी मन डहार ले सड़क खोदे के सेती ओरछा ले धनोरा थाना के बीच आवाजाही प्रभावित होय के खबर मिले हे, जेखर ले लोगन मन ल अब्बड़ परसानी होवत हे।
दीक्षांत समारोह
बिलासपुर के गुरू घासीदास केंद्रीय विश्वविद्यालय के नौवां दीक्षांत समारोह काली राखे गेहे। ए कार्यक्रम के मुख्य अतिथि केंद्रीय उच्च शिक्षा राज्यमंत्री डॅाक्टर सुभाष सरकार ल बनाय गेहे। उंहें अति विशिष्ट अतिथि के रूप म राज्यपाल अनुसुइया उइके अउ भारतीय शिक्षा संस्कृति उत्थान न्याय नई दिल्ली के राष्ट्रीय सचिव डॅाक्टर अतुल कोठारी ह मौजूद रीही। उंहें कुलपति प्रोफेसर आलोक चक्रवाल ह कार्यक्रम के अध्यक्षता करही।
दीक्षांत समारोह म एक सौ इकतालीस झन मेघावी विद्यार्थी मन ल स्वर्ण पदक ले सम्मानित करे जाही। उंहें दू झिन विद्यार्थी मन ल कुलाधिपति पदक अउ तीन झन विद्यार्थी मन ल गुरू घासीदास पदक ले सम्मानित करे जाही।