खैरागढ़ उपुचनाव-मतगणना
खैरागढ़ विधानसभा उपचुनाव के तहत काली कड़ा सुरक्षा के बीच बिहनिया आठ बजे मतगणना सुरू होही। एला लेके आज अंतिम रिहर्सल करे गीस। इक्कीस राउंड म होवइया मतगणना बर चौदह-चौदह टेबल लगाय गेहे। हर टेबल म तीन अधिकारी मनके नियुक्ति करे गेहे। सबले पहिली पोस्टल बैलेट के गिनती करे जाही। एखर बाद ईव्हीएम के मत के गिनती होही। सुरूवाती रूझान मंझनिया बारह बजे तक अउ अंतिम परिणाम संझा तक आय के उम्मीद हे।
इही बीच, मतगणना के तैयारी मन ल लेके कलेक्टर अउ जिला निर्वाचन अधिकारी तारन प्रकाश सिन्हा ह नोडल अधिकारी मनके बइठका लीन। ओमन किहीन कि काली होइवया मतगणना बर सबो अधिकारी-करमचारी मन ल बिहनिया छह बजे से ड्यूटी म अनिवार्य रूप से उपस्थित रहना हे। मतगणना हॉल म जेखर ड्यूटी लगाय गेहे, ओमन मोबाइल नइ ले जा सकय। उहें, मतगणना स्थल म स्मार्ट वॉच घलो प्रतिबंधित रइही।
जिला निर्वाचन अधिकारी ह मतगणना स्थल म बनाय गे मीडिया सेंटर के व्यवस्था के घलो जानकारी लीन। ओमन किहीन कि मतगणना स्थल के हर गतिविधि के फोटोग्राफी अउ वीडियोग्राफी अनिवार्य रूप से ले जाय। ओमन मतगणना स्थल म चिकित्सा दल अउ एम्बुलेंस सेफ हाउस के घलो व्यवस्था करे के निरदेस दीन।
गौरतलब हे कि पाछु बारह अप्रैल के होय मतदान के बाद मतपेटी मन ल स्ट्रांग रूम म पैरामिलिट्री फोर्स के सुरक्षा म राखे गेहे। एखर बर फोर्स के एक कंपनी के संग ही आईटीबीपी के जवान घलो तैनात हे। एखर अलावा बाहिरी सुरक्षा व्यवस्था बर जिला पुलिस बल के टीम घलो तैनात करे गेहे। उहें, सीसीटीवी कैमरा से स्ट्रांग रूम के गतिविधि मन उपर नजर राखे जात हे।
युवा संसद
नई दिल्ली के संसद भवन म काली सोलह अप्रैल से प्रथम राष्ट्रीय पर्यावरण युवा संसद के आयोजन करे जाही। एमा देसभर के बारह विश्वविद्यालय मनके एक सौ चालीस छात्र प्रतिनिधि मन सामिल होही। पर्यावरणीय मुद्दा मन उपर विमर्स बर होवत ए युवा संसद म छत्तीसगढ़ से गुरू घासीदास विश्वविद्यालय के चार झिन युवा – नंदिनी, शुभम, वीणा अउ सांभवी के चयन करे गेहे।
ए युवा संसद के आयोजन दू सत्र म करे जाही। लोकसभा अध्यक्ष ओम बिरला पहिली सत्र म छात्र मन संग बातचीत करही। उहें, केन्द्रीय पर्यावरण मंत्री भूपेन्द्र यादव के संग घलो छात्र मन पर्यावरण के मुद्दा अउ जलवायु परिवर्तन के विभिन्न पहलु मन उपर चर्चा करही।
केन्द्रीय विद्यालय-प्रवेश रोक
केन्द्रीय विद्यालय संगठन ह विशेष प्रावधान मनके तहत प्रवेस म रोक लगा देहे। ये विशेष प्रावधान मन म सांसद कोटा से प्रवेश घलो सामिल हे। केन्द्रीय विद्यालय संगठन के दिसा-निरदेस के अनुसार अवइया आदेस तक विशेष प्रावधान मनके अंतर्गत विद्यार्थी मनके प्रवेस रोके के निर्णय ले गेहे। राज्यसभा सांसद अउ भारतीय जनता पार्टी के नेता सुशील कुमार मोदी ह ए निर्णय के स्वागत करीन अउ एक ट्वीट म ओमन किहीन कि अब तक प्रत्येक सांसद, प्रत्येक कलेक्टर अउ स्कूल प्रबंधन समिति के अध्यक्ष अपन कोटा से केन्द्रीय विद्यालय म विद्यार्थी मनके प्रवेस करा सकत रिहीन।
प्रश्नोत्तरी-प्रतियोगिता
देस के सबले बड़े प्रश्नोत्तरी प्रतियोगिता ‘‘सबका विकास महाक्विज‘‘ के काली सुभारंभ होईस। एखर उद्देश्य केन्द्र सरकार के अलग-अलग योजना अउ सुशासन के प्रति नागरिक मन म जागरूकता पैदा करना आय। ए महीना के अट्ठाईस तारीख तक चलने वाला ए प्रश्नोत्तरी म बीस ठन प्रश्न होही, जेखर उत्तर तीन सौ सेकेंड म देना होही। प्रतियोगिता म सबले जादा अंक हासिल करने वाला एक हजार विजेता मन ल दो-दो हजार रूपिया दे जाही। बारह भासा मन म होवत ये प्रश्नोत्तरी म डब्ल्यू.डब्ल्यू.डब्ल्यू. डॉट माई जीओवी डॉट इन म भाग ले जा सकत हे।
इलेक्ट्रॉनिक अउ सूचना प्रौद्योगिकी मंत्री अश्वनी वैष्णव ह सबो भारतीय नागरिक मन ले ए विकास पर्व म भागीदारी करे आग्रह करीन।
महाविद्यालय-परीक्षा
पंडित रविशंकर शुक्ल विश्वविद्यालय के परीक्षा काली सोलह अप्रैल ले ऑनलाइन सुरू होही। ए परीक्षा म विश्वविद्यालय से संबंद्ध कॉलेज मनके डेढ़ लाख ले जादा विद्यार्थी मन सामिल होही। विश्वविद्यालय डहार ले काली बिहनिया आठ बजे ले विद्यार्थी मन ल उंखर ई-मेल आईडी या मोबाइल के वाट्सऐप नंबर म प्रश्न पत्र भेजे जाही। जेन दिन प्रश्न पत्र भेजे जाही, उही दिन मंझनिया तीन बजे तक संबंधित कालेज या विश्वविद्यालय म उत्तर पुस्तिका जमा कराना होही। विद्यार्थी मन ल उत्तर लिखे बर लगभग सात घंटा के समय मिलही। विद्यार्थी मन ल उत्तर पुस्तिका के वितरण पहिली ही करे जा चुके हे।
ओति, हेमचंद यादव विश्वविद्यालय दुर्ग म घलो काली ले स्नातक बीएससी नियमित अउ स्वाध्यायी परीक्षार्थी मनके ऑनलाइन परीक्षा सुरू होही। एमा लगभग उनचालीस हजार परीक्षार्थी मन सामिल होही।
माओवादी-समाचार
सुकमा जिला के किस्टाराम थाना क्षेत्र म आज सुरक्षा बल अउ माओवादी मनके बीच मुठभेड़ होगे। हालांकि एमा काखरो हताहत होय के खबर नइ हे। मिले जानकारी के अनुसार कोबरा बटालियन के जवान सर्चिंग म निकले रिहीन। इही दउरान किस्टाराम थाना क्षेत्र के पोटकपल्ली इलाका म माओवादी मन जवान मन उपर हमला कर दीन। उहें, सुरक्षा बल डहार ले करे गे जवाबी कार्रवाई के बाद माओवादी मन भाग गीन।
उहें, इही जिला के इंजरम-भेज्जी मार्ग म कोत्ताचेरू अउ गोरखा के बीच एक ठिन पुल ल माओवादी मन विस्फोट कर उड़ा दीन। घटना के सूचना मिलते ही सीआरपीएफ अउ डीआरजी के जवान मन मउका म पहुंचीन। एखर बाद माओवादी मन उहां ले भाग गीन। पुल के मरम्मत बर दल रवाना कर दे गेहे।
आईपीएल सट्टा-कार्रवाई
आईपीएल क्रिकेट मैच के दउरान ऑनलाइन सट्टा खिलाने वाला आरोपी मनके खिलाफ कार्रवाई करे जात हे। इही कड़ी म बलौदाबाजार जिला के भाटापारा पुलिस ह तीन आरोपी मन ल गिरफ्तार करे हे। ए आरोपी मनके बैंक खाता मनके जांच करे जात हे। संगेसंग जेन-जने खाता मन म ट्रांजेक्शन होय हे, ओखरों जानकारी ले जात हे। पुलिस ह इंखर करा ले एक लैपटॉप, आठ मोबाइल, बारह एटीएम कार्ड अउ दो लाख रूपिया नगद बरामद करे हे।
ऐति, दुरूग जिला के सुपेला थाना पुलिस ह एक झिन व्यक्ति के बैंक अकाउंट म अचानक बड़े रकम आय के सिकायत मिले के बाद मामला के जांच सुरू करे देहे। पुलिस के अनुसार खाताधारक ह थाना म जानकारी देहे कि ई-मेल के जरिया सुपेला ब्रांच म खुलवाय गे उंखर बैंक खाता म अचानक बड़े रकम जमा होय के सूचना मिलीस। पुलिस ह रिपोर्ट दर्ज कर मामला के जांच सुरू कर देहे। जांच के दउरान एक झिन व्यक्ति ह बतईस कि उंखर खाता के उपयोग ऑनलाइन सट्टा बर करे जात रिहीस।
पावर लिफि्ंटग प्रतियोगिता
राष्ट्रीय पावर लिफि्ंटग प्रतियोगिता म दुरूग जिला के धनंजय यादव ह दो कांस्य पदक अपन नाव कर लीन। केरल के अल्लेप्पे म नौ से तेरह अप्रैल तक आयोजित राष्ट्रीय क्लासिक सब जूनियर, सीनियर अउ मास्टर राष्ट्रीय पावर लिफ्टिंग प्रतियोगिता म छत्तीसगढ़ के टीम म सामिल धनंजय यादव ह जूनियर वर्ग के स्क्वॉट अउ डेड लिफ्ट इवेंट म कांस्य पदक जीत के राज्य ल गौरवान्वित करे हे।
गुड फ्राइडे
आज गुड फ्राइडे आय। प्रभू ईसा मसीह ल सलीब म चढ़ाय जाय के स्मृति म ए दिन ल मनाय जाथे। इही दिन प्रभु यीशू ह मनुष्यता ल पाप से मुक्ति दिलाय बर अपन जीवन उत्सर्ग करे रिहीन। प्रधानमंत्री नरेन्द्र मोदी ह आज गुड फ्राइडे के दिन ईसा मसीह के साहस अउ बलिदान ल याद करीन। एक ट्वीट संदेस म ओमन किहीन कि प्रभु यीशु के सेवा अउ भाईचारा के आदर्श ह मानव जाति बर पथ-प्रदर्शक बने रइही।
प्रभु ईसा मसीह के बलिदान दिवस म राजधानी रायपुर सहित छत्तीसगढ़ के विभिन्न गिरिजाघर म विशेष प्रार्थना सभा मनके आयोजन करे गीस। इही कड़ी म दुर्ग-भिलाई म ईसाई समुदाय के लोगन मन गुड फ्राइडे उपर रैली निकालीन।
एखर पहिली, काली रायपुर म पुण्य गुरूवार यानि मॉन्डी-थर्स-डे उपर प्रभु भोज के पवित्र संस्कार होईस। मान्यात हे कि प्रभु ह इही दिन अपन शिष्य मन संग अंतिम भोज करे रिहीन।
दक्षिण-पश्चिम मानसून
दक्षिण-पश्चिम मानसून के वर्षा पूरा देस म कुल मिलाके सामान्य रेहे के संभावना हे। मौसम विभाग के अनुसार दीर्घावधि औसत के आधार म जून ले सितंबर माह तक निन्यानवे प्रतिशत वर्षा होय के अनुमान हे।
मौसम विभाग ह बतईन कि अब तक के आंकलन से स्पष्ट हे कि देस के उत्तरी भाग के कई स्थान, मध्य भारत, हिमालय के तराई वाले क्षेत्र अउ पश्चिम उत्तर हिस्सा म वर्षा सामान्य या सामान्य से कुछ ज्यादा रइही। पूर्वोत्तर के कई स्थान मन म, पश्चिम उत्तर के कुछ क्षेत्र अउ दक्षिणी भाग म वर्षा सामान्य से कम रेहे के संभावना हे। मौसम विभाग के महानिदेशक मृत्युंजय महापात्रा ह काली नई दिल्ली म संवाददाता मन ल बतईन कि विभाग डहार ले मई महीना के आखिरी सप्ताह म मानसून के वर्षा के अद्यतन अनुमान जारी करे जाही।