केन्द्रीय मंत्री-महासमुंद
आकांक्षी जिला महासमुंद म विकास योजना मनके जमीनी हकीकत जाने खातिर केन्द्रीय आवास अउ सहरी मामला के मंत्री हरदीप सिंह पुरी ह आज एक दिन के प्रवास म महासमुंद पहुंचीन। ए दउरान ओमन ह पटेवा के आयुष्मान भारत हेल्थ एंड वेलनेस सेंटर प्राथमिक स्वास्थ्य केन्द्र के अवलोकन करीन। केन्द्रीय मंत्री ह महासमुंद के जिला अस्पताल म स्थित शासकीय चिकित्सालय महाविद्यालय के घलो निरीक्षण करीन। श्री पुरी ह जिला पंचायत परिसर म बिहान समूह के माईलोगिन मन डहार ले उत्पादित सामान के स्टॉल के अवलोकन करीन। केन्द्रीय मंत्री ह महासमुंद म आकांक्षी जिला कारीकरम के तहत कामकाज अउ विकास योजना मनके समीक्षा घलो करीन।
बाद म पत्रकार मन ले चरचा करत केन्द्रीय मंत्री ह कहिन कि जिला के विकास म जउन कमी हे, ओला दूरिहाय के प्रयास करे जाही। ओमन कहिन कि अंतर्राष्ट्रीय बाजार म कच्चा तेल के दाम बढ़ाय के सेती ले पेट्रोलियम उत्पाद के दाम म बढ़ोतरी होय हे। आम आदमी उपर बोझ कम पड़य एखर खातिर केन्द्र सरकार ह टैक्स दर घटाय हे। राज्य सरकार घलो समुचित छूट दीहीं त एखर ले आम लोगन ल बड़का राहत मिलही।
राष्ट्रीय ग्राम स्वराज अभियान
प्रधानमंत्री नरेन्द्र मोदी के अध्यक्षता म मंत्रिमंडल के आर्थिक कार्यसमिति ह राष्ट्रीय ग्राम स्वराज अभियान के संसोधित केन्द्र प्रायोजित योजना ल जारी रखे के मंजूरी दे देहे। ए योजना ए महीना के पहिली तारीख ले इकतीस मार्च दू हजार छब्बीस तक जारी रइही। सबो राज्य अउ केन्द्रसासित प्रदेस म ए योजना के विस्तार करे जाही।
काली नई दिल्ली म केन्द्रीय सूचना अउ प्रसारण मंत्री अनुराग सिंह ठाकुर ह कहिन कि ए निर्णय पंचायती राज संस्थान के सासन क्षमता विकसित करे खातिर ले गेहे। ए योजना म पांच हजार नौ सौ ग्यारह करोड़ रूपिया के खर्च आही।
ज्योतिरादित्य सिंधिया-राजनांदगांव
केन्द्रीय मंत्री ज्योतिरादित्य सिंधिया अट्ठारह अप्रैल के दू दिवसीय प्रवास म राजनांदगांव आही। ए दउरान ओमन केन्द्र सरकार के योजना मन ल लेके प्रशासन के संग समीक्षा बैठक करही। श्री सिंधिया जिला म चलत कुछेक प्रोजेक्ट के जायजा घलो लीहीं। ओमन जिला भाजपा कार्यालय म आयोजित कारीकरम म घलो हिस्सा लीहीं।
आत्मानंद-स्कूल प्रवेश
प्रदेस म स्वामी आत्मानंद स्कूल के कक्षा मन म अब पचास विद्यार्थी प्रवेस ले सकही। लोगन के मांग ल देखत मुख्यमंत्री भूपेश बघेल ह ए फइसला लेहे। ए संबंध म ओमन ह सिक्षा विभाग के प्रमुख सचिव ल निरदेस जारी कर देहे। एमा ओमन ह ए स्कूल मनके गुणवत्ता सुनिश्चित करत विद्यार्थी मनके संख्या बढ़ाय बर कहिन हे।
खबर के मुताबिक ए स्कूल मनके कक्षा म पहिली पच्चीस विद्यार्थी मन ल ही प्रवेस दे जात रिहीस।
मुख्यमंत्री-दौरा
मुख्यमंत्री भूपेश बघेल दू मई ले प्रदेस के जम्मों विधानसभा क्षेत्र के दउरा करके सासकीय योजना मनके क्रियान्वयन के समीक्षा करही। ए दउरान मुख्यमंत्री सासन के जन-कल्याणकारी योजना के क्रियान्वयन के जमीनी स्तर म अवलोकन करही। संगेसंग आम लोगन, जनप्रतिनिधि अउ सामाजिक संगठन ले चरचा करके उंखर फीडबैक घलो लीहीं।
महावीर जयंती
चौबीसवां अउ आखिरी जैन तीर्थंकर भगवान महावीर के जयंती आज देसभर म धार्मिक श्रद्धा के संग मनाय जावत हे। ए मउका म छत्तीसगढ़ म घलो जैन समुदाय डहार ले आने-आने कारीकरम आयोजित करे गीस। राष्ट्रपति रामनाथ कोविंद अउ उप राष्ट्रपति एम. वेकैंया नायडू ह ए मउका म लोगन ल सुभकामना देहे। राष्ट्रपति ह अपन संदेस म कहिन कि भगवान महावीर ह अहिंसा, सत्य, संयम अउ अपरिग्रह के संकल्प करके अध्यात्मिक मुक्ति के रद्दा देखइन।
उहें, देस के आने-आने भाग म आज बैशाखी परब ल धूमधाम ले मनाय जात हे।
अंबेडकर जयंती-01
देस ह आज भारतीय संविधान के मुख्य शिल्पी भारतरत्न डॉक्टर भीमराव अंबेडकर ल उंखर एक सौ इकतीसवां जयंती म श्रद्धांजलि अर्पित करत हे। ए मउका म देसभर म कतकोन कारीकरम के आयोजन करे जात हे। राष्ट्रपति रामनाथ कोविंद, उप राष्ट्रपति एम. वेकैंया नायडू, प्रधानमंत्री नरेन्द्र मोदी संग कतकोन राजनीतिक लोगन ह आज बिहनिया संसद परिसर म बाबा साहेब अंबेडकर के मूर्ति म फूलमाला चढ़ईन।
ऐति, छत्तीसगढ़ म घलो डॉक्टर अंबेडकर के जयंती म कतकोन कारीकरम आयोजित करे जात हे। राज्यपाल अनुसुईया उइके ह राजभवन म डॉक्टर अंबेडकर के जयंती म उंखर चित्र म फूलमाला चढ़ा के ओमन ल श्रद्धासुमन अर्पित करीन।
उहें, मुख्यमंत्री भूपेश बघेल ह रईपुर म आयोजित अंबेडकर जयंती समारोह म सामिल होइन। ए मउका म ओमन मंगलभवन अउ ऑडिटोरियम निर्माण बर पचास-पचास लाख रूपिया देके घोसना करीन। संगेसंग ओमन अंबेडकर चउक म बाबा साहेब के बीस फीट ऊंचा नवा मूर्ति स्थापित करे के घोसना करीन। उहें, विधानसभा अध्यक्ष डॉक्टर चरणदास महंत ह अंबेडकर जयंती म आज विधानसभा परिसर के सेंट्रल हॉल म बाबा साहेब के चित्र म फूलमाला चढ़ईन अउ ओमन ल नमन करीन।
इही बीच, भाजपा के राष्ट्रीय महामंत्री डी. पुरंदेश्वरी अउ पूर्व मुख्यमंत्री डॉक्अर रमन सिंह ह पार्टी कार्यकर्ता के संग आज रईपुर के कलेक्ट्रेट पहुंचीन अउ उहां स्थित डॉक्टर भीमराव अंबेडकर के मूर्ति म फूलमाला चढ़ाके श्रद्धांजलि दीन।
उहें, भारतीय जनता पार्टी डहार ले रईपुर स्थित प्रदेस कार्यालय म डॉक्टर भीमराव अंबेडकर के जयंती के मउका म एक ठिन विचार गोष्ठी के आयोजन करे गीस। ए विचार गोष्ठी ल भाजपा के राष्ट्रीय सह संगठन महामंत्री शिवप्रकाश, प्रदेश प्रभारी डी. पुरंदेश्वरी, प्रदेश अध्यक्ष विष्णु देव साय, नेता प्रतिपक्ष धरमलाल कौशिक संग कतकोन पार्टी पदाधिकारी मन ह संबोधित करीन।
अंबेडकर जयंती-02
इही बीच, दक्षिण-पूर्व रेलवे रईपुर मंडल म घलो अंबेडकर जयंती मनाय गीस। ए मउका म मंडल रेल प्रबंधक श्यामसुंदर गुप्ता संग सबो अधिकारी अउ कमरचारी ह बाबा साहब ल श्रद्धा-सुमन अर्पित करीन।
ओति, बस्तर जिला भाजपा अनुसूचित जाति मोर्चा डहार ले डॉक्टर अंबेडकर के जयंती म उंखर चित्र म फूलमाला चढ़ाके मिठाई बांटे गीस।
ऐति, अंबिकापुर के मेडिकल कॉलेज म स्काउड्स अउ गाईड्स छत्तीसगढ़ के निरदेस म महा रक्तदान शिविर के आयोजन करे गीस।
माओवादी-समाचार
सुकमा जिला म एक झिन इनामी सहित चार माओवादी मन ह आत्मसमर्पण कर देहे। पुलिस अधीक्षक सुनील शर्मा ह बतईन कि ए माओवादी मन ह कोबरा बटालियन सीआरपीएफ अउ जिला पुलिस बल के अधिकारी मनके आगू आत्मसमर्पण करीन। एमा ले एक झिन माओवादी बासागुड़ा एल.ओ.एस. के सदस्य रिहीस, जेखर उपर एक लाख रूपिया के इनाम घोसित रिहीस।
इही बीच, बीजापुर जिला के मिरतुर थाना क्षेत्र म आज पुलिस अउ माओवादी के बीच मुठभेड़ होइस। भैरमगढ़ एरिया कमेटी मिलिट्री इंटेलिजेंस इंचार्ज मोहन कड़ती के उपस्थिति के सूचना मिले म डीआरजी के टीम ल मउका बर भेजे गीस। ए दउरान एंड्रीपाल के जंगल मन म माओवादी मनके संग जवान मनके मुठभेड़ होगे। जवान मन डहार ले जवाबी कार्रवाई के बाद माओवादी भाग गीस। डीआरजी के टीम ह मउका ले टिफिन बम, डेटोनेटर, माओवादी साहित्य अउ सामान बरामद करे हे।
अउ अब पेस हे मौसम के हाल..
मौसम विभाग ह प्रदेस के कुछेक जगह म अवइया चौबीस घंटा के दउरान बरसा होय अउ गरज-चमक के संग हवा गरेर चले के संभावना जताय हे। मौसम विज्ञानी एस.पी. चन्द्रा ह बतईन कि ए समय कर्नाटक ल लेके पश्चिमी विदर्भ तक एक ठिन द्रोणिका बने हे। संगेसंग प्रदेस म उत्तरी अउ दक्षिणी हवा आवत हे। एखर असर ले प्रदेस के मौसम म बदलाव के आसार हे। फेर, प्रदेस के तापमान म बिसेस परिवर्तन होय के संभावना नइ हे।