बिजली दर-वृद्धि-01
छत्तीसगढ़ म बिजली लगभग ढाई प्रतिसत महंगा होगे हे। राज्य विद्युत नियामक आयोग ह आज बिजली म बढ़ोतरी के नवा दर जारी कर देहे। एमा घरेलू उपभोक्ता मन ल दस पइसा प्रति यूनिट के दर ले अतिरिक्त भुगतान करना होही। आने सबो श्रेणी के उपभोक्ता मन ल एक यूनिट बर अब पन्द्रह पइसा जादा खरचा करना होही। बिजली के नवा दर पाछु एक अप्रैल ले प्रभावी होगे हे यानि कि अप्रैल महीना के बिजली बिल नवा दर के अनुसार जारी करे जाही। ए बढ़ोतरी म बिजली बिल हाप योजना के अलावा राज्य सरकार डहार ले, ले जाय वाले ड्यूटी अउ सेस ल सामिल नइ करे गेहे। एखर संगेसंग बिजली के स्थिर प्रभार म कोनों बढ़ोतरी नइ करे गेहे। उच्च दाब वाला इस्पात उद्योग बर बिजली दर म पांच पइसा प्रति यूनिट के बढ़ोतरी करे गेहे। फेर, पोहा, मुरमुरा मिल ल दे जाय वाले पांच प्रतिसत के छूट आघू घलो जारी रइही। अइसने, टेक्सटाइल उद्योग के संग पावरलूम, हैंडलूम, जूट अउ एथेनॉल उद्योग ल घलो ऊर्जा प्रभार म पच्चीस प्रतिसत के छूट दे जाही। उहें, गैर सब्सिडी वाले कृषि पंप के उपभोक्ता बर बीस प्रतिशत के छूट पहिली जइसे ही जारी रइही। खेत म लगे बिजली के मोटर पंप बर सौ वॉट के बिजली के उपयोग के सुविधा एसो घलो जारी रइही। एखर अलावा ग्रामीण क्षेत्र बस्तर अउ सरगुजा विकास प्राधिकरण क्षेत्र संचालित अस्पताल अउ पैथालॉजी सेंटर बर घलो सात प्रतिसत के छूट जारी रइही। इही तरीका ले महिला समूह ल व्यावसायिक गतिविधि बर बिजली दर म दस प्रतिसत के छूट दे जाही। ग्रामीण क्षेत्र म बनाय जात गौठान ल घरेलू उपभोक्ता के श्रेणी म बिजली के आपूर्ति करे जाही। पर्यावरण के संरक्षण के प्रोत्साहन बर बिजली वाहन के चार्जिंग इकाई ल पांच रूपिया प्रति यूनिट के छूट जारी रइही। उहें, राज्य के माओवाद प्रभावित दूरस्थ जिला म संचार व्यवस्था ल बेहतर बनाय खातिर नवा मोबाइल टॉवर लगाय म पचास प्रतिसत के छूट घलो जारी रइही। इही तरीका ले ऑक्सीजन संयंत्र बर घलो दस प्रतिशत के छूट जारी रइही।
बिजली दर-वृद्धि-02
छत्तीसगढ़ राज्य विद्युत नियामक आयोग के अध्यक्ष हेमंत वर्मा ह बतईन कि राज्य के तीन बिजली कंपनी ह करीबन एक हजार चार करोड़ रूपिया के राजस्व घाटा के पूर्ति बर बिजली दर बढ़ाय के आग्रह करे रिहीन। नियामक आयोग ह अपन परीक्षण के बाद केवल तीन सौ छियासी करोड़ रूपिया के घाटा स्वीकार करे हे।
कोविड-निर्देश
केन्द्रीय स्वास्थ्य मंत्री मनसुख मांडविया ह कोरोना के नवा वैरियंट के खतरा ल देखत हुए काली नई दिल्ली म महत्वपूर्ण बइठका करीन, जेमा देस के परमुख चिकित्सा बिसेसज्ञ अउ अधिकारी मनके संग कोरोना के नवा वैरियंट एक्स-ई के प्रभावशीलता ल लेके गोठबात करे गीस। बइठका म श्री मांडविया ह कोरोना के इलाज बर जरूरी दवाई अउ ओखर उपलब्धता के सरलग समीक्षा करे के निरदेस घलो दीन।
इही बीच, राज्य सासन ह स्वास्थ्य विभाग डहार ले पाछू बछर पच्चीस मार्च के जारी करे गे ओ आदेस ल तत्काल प्रभाव ले निलंबित कर देहे, जेमा सार्वजनिक जघा म मास्क नइ लगाय म पांच सौ रूपिया के जुर्माना लेके बात केहे गे रिहीस।
यूजीसी-डिग्री
विश्वविद्यालय अनुदान आयोग-यूजीसी ह पढ़ईया लइका मन एक संग दू पूर्णकालिक डिग्री प्राप्त करे के अनुमति दे बर जात हे। आयोग के अध्यक्ष प्रोफेसर एम. जगदीश कुमार ह काली वर्चुअल माध्यम ले मीडिया ल संबोधित हुए ए जानकारी दीन। प्रोफेसर कुमार ह किहीन कि विद्यार्थी एके विश्वविद्यालय या फेर आने-आने विश्वविद्यालय ले एक संग नियमित या ऑनलाइन मोड म दू सैक्षणिक पाठ्यक्रम के पढ़ाई कर सकत हे। आकाशवाणी ले खास गोठबात म शिक्षाविद् संत चौधरी ह किहीन कि यूजीसी के ए निर्णय ले सबो लइका मन ल लाभ होही।
खैरागढ़ उपचुनाव
खैरागढ़ विधानसभा उपचुनई बर लगभग अठहत्तर फीसदी मतदान दरज करे गेहे। राजनांदगांव जिला के ए विधानसभा क्षेत्र म काली सांतिपूर्ण मतदान होईस। ए उपचुनई बर दस झिन उम्मीदवार मन चुनई मैदान म रिहीन। ए सबो के भाग्य के फइसला अवइया सोलह तारीख के मतगणना के दिन होही, जेखर परिणाम इही दिन घोषित करे जाही।
जिला निर्वाचन कार्यालय के अधिकारी मन ह बतईन कि कड़ा सुरक्षा के बीच बिहनिया सात बजे ले मतदान सुरू होय रिहीस, जउन कि संझा पांच बजे तक चलीस। तेज गर्मी के बाद घलो इहां मतदाता मन म बड़का उत्साह देखे बर मिलीस। आखिरी आंकड़ा के अनुसार अठहत्तर दशमलव नौ दो प्रतिशत पुरूष मतदाता मन ह वोट डारीन। उहें, महिला महिला मतदाता मनके प्रतिसत ससत्तर दशमलव सात चार रिहीस। अधिकारी मन ह बतईन कि मतदान के बेरा संझा पांज बजे खतम होगे रिहीस। फेर ए बेरा तक मतदान केन्द्र परिसर म लाइन म लगे सबो मतदाता मन ल वोट डारे के अवसर दे गीस। बछर दू हजार अट्ठारह के विधानसभा चुनई म इहां चौरासी दशमलव पांच नौ प्रतिशत मतदाता मन ह वोट डारे रिहीन। ए दरी मतदान करीबन सात प्रतिशत कम रिहीस।
मतदान होय के बाद सबो केन्द्र ले मिले वोटिंग मसीन ल स्ट्रांग रूम सील बंद कर दे गेहे, जेखर सुरक्षा बर केन्द्रीय पुलिस बल के एक ठिन कंपनी तैनात करे गेहे अउ चारों डहार सरलग निगरानी करे बर छै ठिन सीसीटीवी कैमरा लगाय गेहे।
कोंडागांव-संवेदनशील जिला
केन्द्र सरकार ह कोंडागांव जिला ल माओवाद ले प्रभावित अति-संवेदनशील जिला के सूची ले हटा के संवेदनशील जिला के सूची म सामिल कर देहे। पाछु कुछु बछर के बेरा जिला म माओवाद ले संबंधित घटना म सरलग कमी दरज करे गेहे। पाछु दू बछर म इहां सिरिफ छिटपुट मामला ही आघू आय हे।
अंबेडकर-जयंती
संविधान निर्माता डॉक्टर भीमराव अंबेडकर के जयंती म काली प्रदेसभर म आने-आने कारीकरम होही। प्रदेस भाजपा डहार ले काली बिहनिया साढ़े नौ बजे राजधानी रईपुर के कलेक्ट्रेट चौक म स्थापित डॉक्टर अंबेडकर के प्रतिमा पुष्पांजलि अर्पित करे जाही। ए कारीकरम म भाजपा के राष्ट्रीय सह-संगठन महामंत्री शिव प्रकाश, छत्तीसगढ़ प्रभारी डी. पुरंदेश्वरी अउ प्रदेश के सह-प्रभारी नितिन नबीन समेत कई झिन पदाधिकारी मन सामिल होही।
राज्यपाल अनुसुईया उइके अउ मुख्यमंत्री भूपेश बघेल ह प्रदेसवासी मन ल डॉक्टर अंबेडकर के जयंती म बधाई अउ सुभकामना दीन हे।
काली जैन धर्म के चौबीसवां तीर्थंकर महावीर स्वामी के जयंती घलो मनाए जाही। ए मउका म प्रदेसभर के जैन मंदिर म नवकार पाठ के संगेसंग पारंपरिक कार्यक्रम के आयोजन करे जाही।
कालिच फसल कटई के परब बैसाखी मनाय जाही। राज्यपाल अउ मुख्यमंत्री ह बैसाखी परब म प्रदेसवासी मन ल बधाई अउ सुभकामना दीन हे।
पुलिसकर्मी-निलंबित
प्रदेस के स्कूल सिक्षा मंत्री डॉक्टर प्रेमसाय सिंह टेकाम के सुरक्षा म होय चूक के मामला म कबीरधाम जिला के छह झिन पुलिसकर्मी मन ल तत्काल प्रभाव ले निलंबित कर देहे। जिला के अतिरिक्त पुलिस अधीक्षक मनीषा ठाकुर ह ए सबो पुलिसकर्मी मन ल माओवाद प्रभावित क्षेत्र कुंडपानी कैम्प म अटैच करे हे। जानबा के मुताबिक पाछु दस अप्रैल के सिक्षामंत्री के कवर्धा दउरा के बेरा ए सबो पुलिसकर्मी मन ड्यूटी के बेरा नसा म पाय गे रिहीन।
मुख्यमंत्री-आकांक्षी जिला
मुख्यमंत्री भूपेश बघेल ह आकांक्षी जिला के विकास ल परखे बर सांस्कृतिक उत्थान ल घलो पैमाना बनाय जाय के अनुरोध करीन। प्रधानमंत्री नरेन्द्र मोदी ल लिखे गे चिट्ठी म श्री बघेल ह किहीन कि आकांक्षी जिला के विकास के मूल्यांकन करत बेरा संबंधित क्षेत्र म स्थानीय बोली म सिक्षा के अलावा मलेरिया अउ एनीमिया के मामला म कमी अउ समर्थन मूल्य वनोपज के खरीदी के उत्पाद ल घलो जरूर देखे जाय। मुख्यमंत्री ह किहीन कि ए क्षेत्र म लोक कला, लोक नृत्य अउ पुरातत्व के संरक्षण अउ संवर्धन ल घलो अवलोकन म सामिल करे जाय।
अउ अब पेस हे मौसम के हाल..
प्रदेस के एक-दू जगह म गरज-चमक के संग पानी गिरे अउ आकाशीय बिजली गिरे के चेतावनी दे गेहे, जेमा बिलासपुर, कोरबा, जशपुर, सरगुजा, कांकेर, धमतरी, गरियाबंद, महासमुंद, पेण्ड्रा अउ एखर ले लगे जिला सामिल हवय। उहें, प्रदेस के अधिकतम अउ न्यूनतम तापमान म बिसेस परिवर्तन होय के आसार नइ हे।