खैरागढ़-उपचुनाव
खैरागढ़ विधानसभा उपचुनाव बर मतदान सांतिपूर्ण रिहीस। आखिरी समाचार मिले तक इहां 75 प्रतिसत मतदान होय रिहीस। मतदान के सही आंकड़ा देर रात तक मिले के उम्मीद करे जात हे।
राजनांदगांव स्थित जिला निर्वाचन कार्यालय के अनुसार मंझनिया तीन बजे तक लगभग 66 प्रतिशत मतदान होगे रिहीस। एमा महिला मतदाता मनके संख्या पुरूष मतदाता मन ले जादा रिहीस। खासबात ए हे कि खैरागढ़ अउ आसपास के इलाका मन म बहुते गर्मी होय के बाद घलो मतदान केन्द्र मनके बाहिर मतदाता मन बड़ संख्या म अपन पारी के अगोरा करत रिहीन। केन्द्र मन म सियान अउ दिव्यांग मतदाता मन बर पर्याप्त व्यवस्था घलो करे गे रिहीस।
छत्तीसगढ़ म 2018 के चुनाव के बाद ए चौथा उपचुनाव हरय। ए उपचुनाव म कांग्रेस डहार ले यशोदा वर्मा अउ भाजपा डहार ले कोमल जंघेल अधिकृत प्रत्यासी हे। उहें, जनता कांग्रेस छत्तीसगढ़ के प्रत्यासी नरेन्द्र सोनी घलो चुनाव मैदान म हे। एखरे संग सात निर्दलीय उम्मीदवार घलो ए उपचुनाव म अपन किस्मत अजमात हे।
राष्ट्रीय पुरस्कार
राष्ट्रीय पंचायत दिवस के मउका म ए दरी छत्तीसगढ़ ल 12 राष्ट्रीय पुरस्कार मिलइया हे। केन्द्रीय पंचायत राज मंत्रालय डहार ले अवइया 24 अप्रैल के आयोजित समारोह म ए पुरस्कार दे जाही। छत्तीसगढ़ के 9 ग्राम पंचायत मन ल घलो सम्मानित करे जाही। दीनदयाल उपाध्याय पंचायत सशक्तिकरण पुरस्कार बर जिला वर्ग म कबीरधाम जिला पंचायत ल चुने गेहे। उहें, विकासखंड वर्ग म पाटन अउ सूरजपुर के चयन करे गेहे। एखर अलावा 9 ग्राम पंचायत मन ल घलो राष्ट्रीय पुरस्कार ले सम्मानित करे जाही। एमा धमतरी जिला के छिपली अउ दर्रीभाटा, कोरिया जिला के चिरमी, बालोद जिला के पैरी, सूरजपुर जिला के बसदई अउ कबीरधाम जिला के केजेदाह ग्राम पंचायत मन ल सामिल करे गेहे।
राज्य के ए उपलब्धि उपर मुख्यमंत्री भूपेश बघेल ह सबो पंचायत संस्था मन ल बधाई अउ सुभाकामना दीन हे।
प्रवेश परीक्षा
छत्तीसगढ़ व्यावसायिक परीक्षा मंडल ह स्नातक स्तर के आने-आने तकनीकी पाठ्यक्रम मन म प्रवेश बर परीक्षा के संभावित तिथि जारी कर देहे। अधिसूचना के अनुसार ए दरी ए परीक्षा मन बर छत्तीसगढ़ के मूल निवासी अभ्यर्थी मन ले कोनों प्रकार के शुुल्क नइ ले जाही।
सुनइया मन ल बतादन कि मुख्यमंत्री भूपेश बघेल ह विधानसभा के बजट सत्र म घोषणा करे रिहीस कि छत्तीसगढ़ व्यावसायिक परीक्षा मंडल अउ छत्तीसगढ़ लोक सेवा आयोग डहार ले आयोजित परीक्षा मन बर प्रदेश के स्थानीय निवासी मन ले कोनों सुल्क नइ ले जाही। व्यापमं डहार ले अवइया मई अउ जून महीना म इंजीनियरिंग, पॉलीटेक्निक अउ कृषि पाठ्यक्रम मन म प्रवेस बर परीक्षा ले जाही।
चिटफंड कंपनी-कार्रवाई
राज्य म चिटफंड कंपनी मनके खिलाफ प्रसासन डहार ले सरलग काईवाई करे जात हे। चिटफंड कंपनी मन ले निवेसक मनके पूंजी वसूल करे बर प्रसासन ह कंपनी मनके परिसंपत्ति मनके कुर्की अउ नीलामी घलो करत हे। इही कड़ी म धमतरी जिला के कोडेबोड़ म संचालित एक ठिन चिटफंड कंपनी के जमीन ल नीलाम करके प्रसासन ह करीब सवा दू करोड़ रूपिया वसूल करे हे। मुख्यमंत्री भूपेश बघेल ह प्रशासनिक अमला ल स्पष्ट निरदेस देहे कि अपन कमई ल चिटफंड कंपनी म निवेस करके धोखाधड़ी के शिकार होय लोगन मन ल जल्दी ले जल्दी राहत पहुंचाय जाय।
अमृत महोत्सव-प्रश्नोत्तरी
आजादी के अमृत महोत्सव म आकाशवाणी समाचार डहार ले राष्ट्रीय स्तर म राखे गे प्रश्नोत्तरी म आज के प्रश्न हे –
ओ स्वाधीनता सेनानी के नाव बतावव, जउन फिजी म गिरमिटिया मजदूर मन ल संगठित करे रिहीन अउ भारत लहुटे म ओमन अवध म किसान आंदोलन के नेतृत्व करीन।
श्रोता मन अपन उत्तर वाट्स ऐप नंबर आठ आठ दू छह पांच चार छह दू छह दू म या ई-मेल आई-डी अमृत महोत्सव क्वीज एट द रेट प्रसार भारती डॉट जीओवी डॉट इन म भेज सकत हे। ए प्रतियोगिता बर एक झिन भाग्यसाली प्रतिभागी ल विजेता चुने जाही अउ काली के समाचार प्रभात म उंखर नाव के घोसना करे जाही। विजेता ल ई-प्रमाण पत्र अउ सांकेतिक पुरस्कार घलो दे जाही।
सर्व समाज-आंदोलन
बस्तर म रेल सुविधा के विस्तार के मांग करत सर्व समाज के आंदोलनकारी 173 किलोमीटर के पदयात्रा करके अंतागढ़ ले आज जगदलपुर पहुंचीन। ए पदयात्रा 3 अप्रैल के नारायणपुर जिला के अंतागढ़ ले सुरू होय रिहीस। सर्व समाज के आंदोलन के पहिली पड़ाव आज जगदलपुर म पूरा होईस। ए आंदोलन ल सर्व समाज के अंतर्गत सामिल 73 संगठन मन ह समर्थन देहे। आंदोलन के पहिली पड़ाव के तहत ए आंदोलनकारी मन दल्लीराजहरा ले जगदलपुर तक रेल लाइन के विस्तार के संग बस्तर म रेल सुविधा बढ़ाय के मांग करत हे। आंदोलनकारी अंतागढ़ ले पैदल चलत नारायणपुर, कोंडागांव अउ बस्तर जिला के करीब 72 गांव मन ल पार करत आज बिहनिया करीब 10 बजे जगलदपुर पहुंचीन। ए सबो झन जगदलपुर स्थित टाउनशिप क्लब मैदान पहुंचीन अउ एक ठिन जनसभा करीन। ए जनसभा ल पद्मश्री धर्मपाल सैनी अउ बस्तर चेम्बर ऑफ कामर्स के अध्यक्ष मनीष शर्मा सहित आने पदाधिकारी मन ह संबोधित करीन।
सड़क सुरक्षा-बैठक
प्रदेस म सड़क दुर्घटना मन ल रोके बर सड़क सुरक्षा उपाय के कड़ई ले पालन कराय जाही। मुख्य सचिव अमिताभ जैन ह बैठक म किहीन कि दुर्घटना मन ल रोके बर सरकारी वाहन चालक मनके नियमित रूप ले स्वास्थ्य परीक्षण कराय जाही। ओमन किहीन कि सरकारी वाहन चालक मन ल सड़क सुरक्षा के ब्रांड एम्बेसडर के रूप म प्रदर्सित करे जाही। सड़क दुर्घटना मन ल नियंत्रित करे बर सबो प्रकार के वाहन चलइया मन ल सड़क सुरक्षा नियम के प्रसिक्षण घलो दे जाही। यातायात जागरूकता के कार्यक्रम म एनसीसी, स्काउट अउ गाइड के कैडेट मनके सेवा घलो ले जाही। दुर्घटना मन ल रोके बर सार्वजनिक परिवहन सेवा के भूमिका ल देखत सिटी बस सेवा दुबारा सुरू करे के प्रयास करे जाही। एमा अवइया परेसानी ल दुरिहा करे बर घलो जरूरी कदम उठाय जाही।
बइठका म बताय गीस कि ए बछर के पहिली तिमाही म सड़क दुर्घटना म करीब बारह प्रतिसत के कमी आय हे। उहें, सड़क हादसा म हताहत होवइया मनके संख्या म घलो कमी देखे गे हे। मुख्य सचिव ह किहीन कि घायल मनके त्वरित इलाज बर अस्पताल मनके ट्रामा सेंटर मन ल अउ आधुनिक बनाय जाही। एखरे संग सरकारी अउ निजी एम्बुलेंस के उपलब्धता बर पोर्टल बनाय जाही।
किसान-मेला
राज्य स्तरीय किसान मेला बिलासपुर के साईंस कॉलेज मैदान म काली ले सुरू होही। 15 अप्रैल तक चलइया ए 3 दिवसीय मेला के सुरूवात मुख्यमंत्री भूपेश बघेल करही। ए मेला म प्रदेसभर ले बड़ संख्या म किसान सामिल होही। उहें, उन्नत खेती के संग उद्यानिकी, पशुपालन अउ मछलीपालन के जानकारी प्रदर्सनी के माध्यम ले दे जाही। मेला म कृषि विभाग के अलावा एखर ले जुड़े आने विभाग अउ संस्था मनके स्टॉल लगाय जाही।
मंडी बोर्ड के अपर प्रबंध संचालक महेन्द्र सिंह सवन्नी ह बतईन कि ए मेला म कृषि अउ एखर ले जुड़े क्षेत्र मनके सौ ले जादा कंपनी मन घलो अपन उत्पाद के प्रदर्सनी लगाहीं। ए किसान मेला म बिलासपुर जिला के प्रगतिशील किसान मनके उत्पाद के संग महिला समूह मनके उत्पाद के प्रदर्सनी घलो लगाय जाही। मेला के माध्यम ले किसान मन ल वर्मी कम्पोस्ट बनाय बर अउ रासायनिक खातू मन उपर निर्भरता कम करे उपर जागरूक करे जाही।
दुर्घटना
बेमेतरा जिला के नांदघाट क्षेत्र म आज छत्तीसगढ़ विधानसभा के अध्यक्ष डॉक्टर चरणदास महंत के काफिला म सामिल पायलेंटिग वाहन के चपेट म आय ले मोटरसाइकिल सवार एक मनखे के मउत होगे। डॉक्टर महंत के काफिला बिलासपुर ले रईपुर आत रिहीस। तभे नांदघाट के तीर म ए हादसा होईस। मृतक नांदघाट क्षेत्र के करमसेन गांव के रहवइया हरय।