खैरागढ़ उपचुनाव-01
खैरागढ़ विधानसभा उपचुनाव बर काली मतदान होही। एखर बर सबो प्रसासनिक तैयारी होगे हवय। पुलिस अधीक्षक संतोष सिंह ह बतईन कि निष्पक्ष अउ सांतिपूर्ण ढंग ले मतदान कराय बर कड़ा सुरक्षा-बेवस्था करे गे हवय। ए विधानसभा क्षेत्र म पैरा मिलिट्री फोर्स के बाईस ठन कंपनी संग जिला बल, सीएएफ, होम गार्ड, वनरक्षक अउ कोटवार मनके घलो ड्यूटी लगाय गे हवय। स्ट्रांग रूम आईटीबीपी के एक ठन कंपनी तैनात करे गे हवय। माओवाद प्रभावित इलाका मन म सर्चिंग बढ़ा दे गेहे।
कलेक्टर अउ जिला निर्वाचन अधिकारी तारन प्रकाश सिन्हा ह बतईन कि खैरागढ़ उपचुनाव बर बनाय गे दू सौ इंक्यानवे मतदान केन्द्र म चौंसठ अति संवेदनशील अउ अट्ठारह संवेदनशील मतदान केन्द्र हवय। ए मतदान केन्द्र मन म वेबकास्टिंग अउ माइक्रो ऑब्जर्वर के माध्यम ले नजर राखे जाही।
उहें, आज खैरागढ़ के राज्य बीज अउ कृषि विकास निगम कार्यालय ले मतदान दल के रवानगी के सिलसिला घलो सुरू होगे हे। जिला कलेक्टर ह बतईन कि सबो मतदान दल मन ल मतदान काम के प्रसिक्षण दे गे हवय अउ ओमन ल जरूरी सामान देके मतदान केन्द्र मन म भेजे जावत हे।
ए विधानसभा क्षेत्र म होवइया उपचुनाव बर कांग्रेस, भाजपा अउ जनता कांग्र्रेस छत्तीसगढ़ संघरा दस झिन उम्मीदवार मन मैदान म हवय। इहां कुल दू लाख ग्यारह हजार पांच सौ सोलह मतदाता हवय। उहें, छुईखदान अउ खैरागढ़ म एक-एक मतदान केन्द्र ल संगवारी मतदान केन्द्र बनाय गेहे, जिहां माईलोगिन मतदानकर्मी मनके ड्यूटी लगाय गे हवय। संगेसंग तीन ठन आदर्श मतदान केन्द्र घलो बनाय गेहे।
खैरागढ़ उपचुनाव-02
मुख्य निर्वाचन पदाधिकारी डहार ले जारी निरदेस के अनुसार काली होवइया मतदान बर मतदाता मन ल अपन पहिचान पत्र देखाना होही। भारत निर्वाचन आयोग ह पहचान पत्र के संग बारह प्रकार के दूसर दस्तावेज ल घलो मान्य करे हे। असइन लोगन जउन मन अपन फोटू पहिचान पत्र नइ दे सकय। ओमन ह पहिचान बर आधार कार्ड, मनरेगा जॉब कार्ड, बैंक-डाकघर डहार ले जारी पासबुक, पासपोर्ट, पैन कार्ड, राज्य-केन्द्र सरकार, सार्वजनिक क्षेत्र के उपक्रम या स्थानीय निकाय डहार ले जारी करे गे पहिचान पत्र, पेंशन दस्तावेज, स्वास्थ्य स्मार्ट कार्ड, ड्राइविंग लाइसेंस अउ विकलांगता पहिचान पत्र जइसन कोनों भी पहिचान पत्र ल देखाके वोट डार सकत हे।
उहें, खैरागढ़ विधानसभा क्षेत्र म मतदान ल देखत निर्वाचन आयोग ह काली बिहनिया सात बजे ले संझा सात बजे तक कोनों भी प्रकार के एक्जिट पोल म रोक लगा देहे। संगेसंग प्रिंट अउ इलेक्ट्रॉनिक मीडिया के माध्यम ले परिणाम के प्रकाशन या प्रचार-प्रसार म घलो रोक लगाय गे हवय।
पुरानी पेंशन योजना-बहाल
प्रदेस म पुराना पेंशन योजना लागू करे के दिसा म राज्य सरकार ह परयास सुरू कर देहे। एखर बर वित्त विभाग डहार ले निरदेस जारी करके एक नवंबर दू हजार चार अउ ओखर बाद नियुक्त राज्य के करमचारी मन ले नवीन अंशदायी पेंशन योजना म करे जावत मासिक कटौती ल खतम करे बर केहे हे। वित्त विभाग ह सबो विभाग मन ल निरदेस दीन हे कि चालू अप्रैल महीना म देय कटौती ल समाप्त करे जाथे। करमचारी मनके ए महीना के वेतन के मूल वेतन ले बारह प्रतिशत रासि सामान्य भविष्य निधि म कटौती करे जाही। ए कटौती के ब्यौरा संचालनालय कोष लेखा अउ पेंशन स्तर म अलग ले राखे जाही अउ संबंधित करमचारी के नवीन सामान्य भविष्य निधि खाता क्रमांक आवंटित होय म ए रासि ल ओमा दर्शाय जाही।
मुख्यमंत्री-शिवरीनारायण
रामनवमी के मउका म काली महानदी, शिवनाथ अउ जोंक नदी के संगम म बने शिवरीनारायण म राम वनगमन पर्यटन परिपथ बर कराय गे पहिली चरण के विकास काम के लोकार्पण होईस। इहां राखे गे तीन दिन के राज्य स्तरीय मानस गायन प्रतियोगिता के समापन कारीकरम म मुख्यमंत्री भूपेश बघेल ह सामिल होईन। ए मउका म ओमन ह शिवरीनारायण म एसडीएम कार्यालय खोले के, खरौद के लक्ष्मणेश्वर मंदिर अउ सबरी मंदिर ल सुधारे जाय के घोसना करीन। समापन कारीकरम म प्रसिद्ध भजन गायक अनूप जलोटा के गायन ले पूरा वातावरण भक्तिमय होगे रिहीस।
ओति, रामनवमी के मउका म काली जगदलपुर म सर्व हिन्दू समाज के बैनर म सोभा यात्रा निकाले गीस। ए सोभा यात्रा मां दंतेश्वरी मंदिर चउक ले सुरू होके आने-आने रद्दा ले होके गीस।
अमृत महोत्सव-प्रश्नोत्तरी
सुनइया मन ल बतादन कि आजादी के अमृत महोत्सव म आकाशवाणी समाचार डहार ले राष्ट्रीय स्तर म राखे गे प्रश्नोत्तरी म आज के प्रश्न हे –
मातृभूमि बर सर्वोच्च बलिदान देवइया मणिपुर के वीर सपूत ल श्रद्धांजलि दे बर हर बछर खोंगजॉम दिवस कब मनाय जाथे ?
श्रोता मन अपन उत्तर वाट्स ऐप नंबर आठ आठ दू छह पांच चार छह दू छह दू म या ई-मेल आई-डी अमृत महोत्सव क्वीज एट द रेट प्रसार भारती डॉट जीओवी डॉट इन म भेज सकत हे। ए प्रतियोगिता बर एक झिन भाग्यसाली प्रतिभागी ल विजेता चुने जाही अउ काली के समाचार प्रभात म उंखर नाव के घोसना करे जाही। विजेता ल ई-प्रमाण पत्र अउ सांकेतिक पुरस्कार घलो दे जाही।
जवान-हत्या
बीजापुर जिला म माओवादी मन ह एक झिन सहायक आरक्षक के हत्या कर दीन। जिला के पुलिस अधीक्षक कमलोचन कश्यप ह बतईन कि मिरतूर थाना क्षेत्र के साप्ताहिक बाजार म सहायक आरक्षक गोपाल कड़ती उपर माओवादी मन ह धारदार हथियार ले हमला कर दीन, जेखर ले उंखर मउत होगे।
जांजगीर-कबड्डी प्रतियोगिता
इक्कीसवां राज्य स्तरीय महिला-पुरूष कबड्डी स्पर्धा आज ले जांजगीर के सक्ती म सुरू होईस। एखर सुरूवात विधानसभा अध्यक्ष डॉक्टर चरणदास महंत ह करीन। ए स्पर्धा म प्रदेस के बीस जिला ले चार सौ ले जादा खिलाड़ी अउ प्रसिक्षक मन भाग लेवत हे। तीन दिन के ए प्रतियोगिता के समापन तेरह अप्रैल के होही। ए प्रतियोगिता के माध्यम ले छत्तीसगढ़ के राज्य स्तरीय टीम बर खिलाड़ी मन ल चुने जाही। चुने गे खिलाड़ी मन ह छत्तीसगढ़ के टीम डहार ले हरियाणा के जिन्द म होवइया राष्ट्रीय कबड्डी स्पर्धा म भाग ले सकही।
मौसम
उत्तर ले आवत शुष्क हवा अउ दक्षिण ले आवत नम हवा के असर ले काली राज्य के एक-दू जघा म हल्का बरसा या छींटा पड़े के संभावना हे। रईपुर के मौसम विज्ञान केन्द्र के मौसम विज्ञानी एच.पी. चन्द्रा ह आकाशवाणी समाचार ले बात करत बतईन कि राज्य के एक-दू हिस्सा म लू जइसन स्थिति बन सकत हे।
अउ अब थोरकुन समाचार सार म-
– धमतरी जिला के नगरी वन परिक्षेत्र के तुमबाहरा गांव के तीर जंगल म महुआ बीने बर गे एक झिन नोनी अउ एक झिन माईलोगिन के हाथी के हमला म मउत होगे। बताय जात हवय कि पाछु तीन दिन के दउरान ए क्षेत्र म हाथी मनके हमला म पांच झन लोगन के मउत होय हे, जेखर ले गांव वाला मन दहसत म हवय।
– राजनांदगांव जिला म खैरागढ़ के पिपरिया तीर तेज रफ्तार कार के एक ठन पेड़ ले टकराय ले एक झिन मनखे के मउत होगे। उहें, दूसर चार झन घायल होगे हवय।
– रायगढ़ जिला के धरमजयगढ़ म आज फटफटी ले टकराय के सेती सइकिल म बइठे एक झिन सियान के मउत होगे अउ दू झन घायल होगे हवय।
– कोंडागांव जिला प्रसासन के पहल म बेंग्लुरू ले उन्नीस झन बंधक श्रमिक मन ल छोड़ा के बस्तर संभाग के आने-आने जिला म उंखर घर बर रवाना करे गेहे।
– बेमेतरा म मनरेगा अधिकारी कर्मचारी संघ डहार ले अपन दू सूत्रीय मांग ल लेके जारी अनिश्चिकालीन हड़ताल म आज रैली निकाल के प्रदर्सन करे गीस।
अउ
– बिलासपुर के सरकंडा पुलिस ह आईपीएल क्रिकेट मैच के दउरान ऑनलाइन सट्टा खेलइया दू झिन आरोपी मन ल गिरफ्तार करे हे। इंखर मन तीर ले पांच ले छह लाख रूपिया के सट्टा-पट्टी अउ नगद रासि संघरा दूसर सामान बरामद करे गेहे।