खैरागढ़ उपचुनाव
खैरागढ़ विधानसभा उपचुनाव के प्रचार आज संझाकुन थम गीस। एखर बाद उम्मीदवार अउ समर्थन मन घर-घर जाके प्रचार करत हे। एखर पहिली, चुनाव प्रचार के आखिरी दिन आज कांग्रेस, भारतीय जनता पार्टी अउ जनता कांग्रेस छत्तीसगढ़ समेत सबो राजनीतिक दल के पदाधिकारी, कार्यकर्ता अउ उम्मीदवार प्रचार अभियान म जुटे रिहीन। उहें, निष्पक्ष अउ सांतिपूर्ण ढंग ले मतदान कराय बर निर्वाचन आयोग ह प्रशासनिक तैयारी ल अंतिम रूप देवत हे।
बतादन कि खैरागढ़ विधानसभा उपचुनाव बर बारह अप्रैल के मतदान करे जाही। एखर बर दस प्रत्यासी चुनाव मैदान म हे। उहें, सोलह अप्रैल के मतगणना होही।
प्रधानमंत्री किसान सम्मान निधि
प्रधानमंत्री नरेन्द्र मोदी ह किहीन कि प्रधानमंत्री किसान सम्मान निधि अउ कृषि ले जुड़े आने योजना ले देस के करोड़ों किसान मन ल नवा ताकत मिलत हे। श्री मोदी ह ट्वीट संदेस म किहीन कि देस ल अपन किसान उपर गरब हे अउ जब किसान सशक्त होही त देस ह अउ जादा मजबूत होही।
बतादन कि प्रधानमंत्री किसान योजना के तहत पात्र किसान मन ल हरेक बछर 6 हजार रूपिया के वित्तीय लाभ दे जावत हे।
कोविड टीका
आज ले अट्ठारह बछर ले जादा उमर के लोगन ल निजी टीकाकरण केन्द्र मन म कोरोना टीका के बूस्टर डोज लगाय के सुरूवात होगे हे, जेमा 18 बछर ले जादा के ओ सबो लोगन जेला कोरोना के दूसरा टीका लगे हुए नौ महीना हो चुके हे, तेमन एखर पात्र होही। ए सुविधा सबो निजी टीकाककरण केन्द्र म होही।
इही बीच, सीरम इंस्टीट्यूट के कोरोना टीका कोविशील्ड अउ भारत बायोटेक के को-वैक्सीन के दाम म कमी करे गेहे। सीरम इंस्टीट्यूट के सीईओ अडार पूनावाला ह बतईन कि कंपनी ह निजी अस्पताल मन बर टीका के दाम छह सौ रूपिया ले कम करके दू सौ पच्चीस रूपिया कर देगे। ओमन किहीन कि केन्द्र सरकार ले रायशुमारी के बाद निर्णय ले गीस हे।
उहें, भारत बायोटेक के संस्थापक अउ संयुक्त प्रबंध निदेशक सुचित्रा एल्ला ह बतईन कि केन्द्र सरकार के संग गोठबात के बाद कंपनी ह टीका के दाम निजी अस्पताल मन बर प्रति खुराक बारह सौ रूपिया ले घटाके दू सौ पच्चीस रूपिया कर दे हे।
पंचायती राज मंत्रालय-विशेष सप्ताह
केन्द्रीय पंचायत राज मंत्रालय ह आजादी के अमृत महोत्सव ल जन-उत्सव के रूप म मनाय बर काली ग्यारह अप्रैल ले सत्रह अप्रैल तक बिसेस सप्ताह मनाही। मंत्रालय ह ‘‘पंचायतों के नवनिर्माण का संकल्प उत्सव‘‘ बिसय उपर बिसेस सप्ताह बर सम्मेलन के एक श्रृंखता तैयार करे हे। एमा पंचायती राज संस्था मनके माध्यम ले विकास के लक्ष्य ल स्थानीय स्तर लागू करे बर सबो हितग्राहक मनके विचार, तकनीकी प्रयास अउ नवाचार के तालमेल उपर रायशुमारी होही। हफ्ताभर के ए आयोजन काली नई दिल्ली के विज्ञान भवन म राष्ट्रीय हितधारक सम्मेलन के संग होहीं।
विश्व होम्योपैथी दिवस
आज विश्व होम्योपैथी दिवस हे। होम्योपैथी इलाज अउ एखर महत्ता के बारे म लोगन ल जागरूक करे बर हर बछर दस अप्रैल के ए दिवस मनाय जाथे। ए बछर के बिसय – ‘‘होम्योपैथी: स्वास्थ्य के लिए लोगी की पंसद‘‘ हे।
छत्तीसगढ़ म विश्व होम्योपैथी दिवस म आने-आने कारीकरम करे जावत हे। स्वास्थ्य मंत्री टी.एस. सिंहदेव ह आज संचालनालय आयुष डहार ले रईपुर म आयोजित राज्य स्तरीय संगोष्ठी म सामिल होईन। कारीकरम ल संबोधित करत स्वास्थ्य मंत्री ह किहीन कि स्वास्थ्य विभाग डहार ले प्रदेस के सबो जिला अस्पताल अउ सामुदायिक स्वास्थ्य केन्द्र मन म होम्योपैथी डॉक्टर के नियुक्ति बर सासन ल प्रस्ताव भेजे जाही। ए मउका म होम्योपैथी चिकित्सा सिविर के आयोजन करे गीस। सिविर म लोगन मनके जांच करके निःशुल्क दवई बांटे गीस।
राज्यपाल-जन्मदिन
छत्तीसगढ़ के राज्यपाल अनुसुईया उइके के आज जन्मदिन हरय। ए मउका म राष्ट्रपति अउ उपराष्ट्रपति ह सुश्री उइके ल टेलीफोन म जन्मदिन के बधाई अउ सुभकामना दीन।
उहें, छत्तीसगढ़ के मुख्यमंत्री भूपेश बघेल ह घलो राजभवन पहुंच के राज्यपाल ल जन्मदिन के सुभकामना दीन।
रामनवमी
रामनवमी के परब आज छत्तीसगढ़ समेत देसभर म उछाह के संग मनाय जात हे। ए परब ह चइत मास के नौवां दिन भगवान श्रीराम के जनम के उपलक्ष्य म मनाय जाथे। ए मउका म राष्ट्रपति, उप राष्ट्रपति अउ प्रधानमंत्री ह देसवासी मन ल रामनवमी के सुभकामना दीन हें।
उहें, छत्तीसगढ़ के राज्यपाल अनुसुईया उइके ह घलो रामनवमीं के मउका म देस अउ प्रदेसवासी मन ल बधाई अउ सुभाकामना दीन हे। ओमन किहीन कि भगवान श्रीराम ह हमन ल त्याग, करूणा अउ परोपकार जइसन नैतिक मूल्य के सिक्षा दीन हे।
रामनवमीं के मउका म आज प्रदेस के आने-आने जघा के राम मंदिर म भगवान श्रीराम के पूजा-अर्चना करे जावत हे। राजधनी रईपुर के दूधाधारी मठ म भगवान श्रीराम के दर्सन बर आज बिहनिया ले श्रद्धालु मनके भीड़ लगे रिहीस। मुख्यमंत्री भूपेश बघेल घलो दूधाधारी मठ पहुंच के भगवान श्रीराम के दर्सन करीन अउ प्रदेसवासी मनके सुख, सांति अउ खुसहाली के कामना करीन।
उहें, देवी मंदिर अउ शक्तिपीठ म पूजा अर्चना करे गीस अउ जसगीत के संग जंवारा के विसर्जन करे जावत हे।
शौर्य-दिवस
केन्द्रीय रिजर्व पुलिस बल-सीआरपीएफ ग्रुप केन्द्र रईपुर ह आरंग के भिलई गांव के परिसर म काली शौर्य दिवस समारोह मनईस। ए मउका म कारीकरम के मुख्य अतिथि कमांडेंट रमेश कुमार ह देस म भाईचारा के संग सांति बनाय राखे के अपील करीन अउ सबो अधिकारी-करमचारी मन ल सपथ घलो देवईन।
मौसम के हाल..
प्रदेस म अवइया चौबीस घंटा के दउरान कुछ जगह म हल्का बारिस होय के संभावना हे। उहें, उत्तर छत्तीसगढ़ म एक-दू जगह म लू चले के स्थिति बन सकथे। हालांकि प्रदेस के अधिकतम तापमान अउ न्यूनतम तापमान म बिसेस परिवर्तन होय के संभावना नइ हे।
इही बीच, प्रदेस म ए बेरा भारी गर्मी पड़त हे। मौसम म घलो सरलग बदलाव के चलत कुछ जगह म गरज-चमक अउ हवा गरेर के संग बूंदाबांदी होवत हे। आज गरियाबंद जिला के अमलीपदर म हवा गरेर के संग पानी गिरीस। ए हवा गरेर के सेती कई ठिन घर के छप्पर उड़ा गीस अउ रूख-राई घलो गिर गे। ए बेरा इलाका के लगभग साठ गांव म बिजली बंद रिहीस।
अउ अब थोरकुन समाचार सार म-
– मीडिया फेडरेशन ऑफ इंडिया डहार ले जनसंपर्क अउ पत्रकारिता के क्षेत्र म बढ़िया कारज करे बर भिलाई इस्पात संयंत्र के महाप्रबंधक जनसंपर्क प्रशांत तिवारी ल नई दिल्ली म आयोजित समारोह म बेस्ट मीडिया प्रोफेशनल अवार्ड ले सम्मानित करे गीस।
– धमतरी के नगरी विकासखंड के अंतर्गत सीतानदी टाईगर रिजर्व क्षेत्र म हाथी के हमला ले दू ग्रामीण के मउत होगीस। ए लोगन जंगल म लकड़ी बीने बर गे रिहीन।
टउ
– राजनांदगांव जिला के खैरागढ़ के ग्राम रेंगाकठेरा म पुलिस ह एक घर ले दू हजार छह सौ सड़सठ लुगरा जब्त करे हे। पुलिस ह ए मामला म गाड़ी मालिक अउ आने के खिलाफ अपराध दर्ज करे हे।