स्कूल-उपस्थिति
प्रदेस म चलत जम्मों सरकारी स्कूल मन म कक्षा पहिली ले आठवीं तक के लइका मन ह पन्द्रह अप्रैल के बाद अपन मन के मुताबिक स्कूल जा सकथे। फेर, सिक्षक मन ल स्कूल जाना जरूरी होही। ए बारे म लोक सिक्षण संचालनालय डहार ले निरदेस जारी कर दे गेहे। ए बेरा सैक्षणिक सत्र तीस अप्रैल तक चलही। संगेसंग अवइया सैक्षणिक सत्र के दउरान एक मई ले पन्द्रह दिन के उपरहा सैक्षणिक कामकाज करे जाही।
खैरागढ़-उपुचनाव
खैरागढ़ विधानसभा उपचुनई बर प्रचार अभियान ह अब जोर पकड़ लेहे। जम्मों राजनीतिक दल मन ह अपन-अपन पक्ष म लोगन मनके बीच जाके अपन बात राखत हे। प्रचार अभियान म मुख्यमंत्री ह घलो आज छुईखदान म रोड शो निकाल के पाटी प्रत्याशी के पक्ष म प्रचार करीन।
त उहें, भारतीय जनता पार्टी के प्रदेस अध्यक्ष विष्णुदेव साय ह साल्हेवारा मंडल म लोगन मन ले मिलीन।
ऐति, खैरागढ़ उपचुनई म भाजपा कार्यकर्ता मन ह आरोप लगाय हे कि कांग्रेस डहार ले कतिथ रूप ले चुनाव के पहिली मतदाता मन ल बांटे बर लाय गे साड़ी अउ सराब पकड़े गेहे।
मुख्यमंत्री-रेल मंत्रालय पत्र
मुख्यमंत्री भूपेश बघेल ह रेल मंत्रालय ले दस ठिन पैसेंजर रेलगाड़ी मन ल एक महीना बर रद्द करे के फइसला उपर तुरते फइसला ल बदले के बिनती करे हे। अपन ट्वीट म मुख्यमंत्री ह लिखीन हे कि जउन ट्रेन मन ल एक महीना बर बंद करे जात हे। ओमा ले आठ ठिन रेलगाड़ी ह छत्तीसगढ़ ले होके जाथे। मुख्यमंत्री ह किहीन कि ए रेलगाड़ी मनके बंद होय ले इहां के लोगन मन ल ए बेरा अब्बड़ परेसानी उठाय बर पड़ही। रेल मंत्रालय ले मुख्यमंत्री ह ए रेलगाड़ी मनके जघा म कोनों बिसेस रेलगाड़ी चलाय के बिनती करे हे।
माओवादी-समर्पण/गिरफ्तार
सुकमा जिला म पाछु नौ महीना के दउरान तीन सौ साठ माओवादी मन ह आत्मसमर्पण करे हे। त उहें, सुरक्षा बल मनके संग होय बीस ठन मुठभेड़ म चौदह माओवादी मारे गेहे। ए माओवादी मन उपर तैंतीस लाख रूपिया के इनाम घोसित रिहीस। नौ महीना के दउरान सुरक्षा बल मन ह इक्यासी माओवादी मन ल गिरफ्तार करे म सफलता पाय हे। जेमा ले उन्नीस झिन इनामी माओवादी घलो सामिल हे। पाछु नौ महीना के दउरान आने-आने जगह म करे गे कार्रवाई म बीस हथियार अउ चालीस आईईडी बरामद करे गेहे।
जिला के पुलिस अधीक्षक सुनील शर्मा ह अपन कामकाज के दउरान माओवादी मनके खिलाफ चलाय गे अभियान के जानबा देवत बतईन कि सुकमा जिला के माओवाद परभावित चार जघा म पुलिस कैम्प घलो खोले गेहे।
शिक्षिका-पुरस्कार
दुरूग जिला के सिक्षिका पूनम उर्मलिया ल राष्ट्रीय आई.सी.टी. पुरस्कार ले सम्मानित करे गेहे। केन्द्रीय सिक्षा राज्य मंत्री अन्नपूर्णा देवी ह हालेच म नई दिल्ली म होय एक ठिन कारीकरम म ए सिक्षिका ल प्रमाण पत्र अउ मेडल देके सम्मानित करीन।
जानबा के मुताबिक भिलाई स्थित शासकीय कन्या हायर सेकेंडरी स्कूल कैम्प-एक म लइका मन ल सूचना तकनीक ले जानबा कराय बर दस ठिन कम्प्यूटर दे गे रिहीस। ए स्कूल म पदस्थ सिक्षिका पूनम उर्मलिया ह एकदम सरल ढंग ले लइका मन ल कम्प्यूटर के तकनीक के बारे म समझईन, जेखरे सेती ए सिक्षिका ल राष्ट्रीय स्तर म सम्मानित करे गीस।
मानस गायन-प्रतियोगिता
जांजगीर-चांपा जिला के शिवरीनारायण म ए बेरा राज्य स्तरीय मानस गान प्रतियोगिता चलत हे। ए प्रतियोगिता म पच्चीस ठिन जिला के चुने गे मानस मंडली मनक करीबन तीन सौ पचास प्रतिभागी मन सामिल होवत हे। एमा प्रदेस के संगेसंग आने राज्य के कलाकार मन घलो अपन प्रस्तुति देवत हे। संझा के सांस्कृतिक कारीकरम म काली पद्मश्री डॉक्टर ममता चंद्राकर ह घलो अपन प्रस्तुति दीन।
त उहें, मुख्यमंत्री भूपेश बघेल ह काली शिवरीनारायण म राम वनगमन परिपथ म बनाय गे आने-आने कामकाज के लोकार्पण करही। इही जघा म करीबन छह करोड़ रूपिया के लागत ले मंदिर परिसर ल बनाय के संगेसंग सौंदर्यीकरण अउ आने-आने कामकाज घलो करे गेहे। काली मुख्यमंत्री ह संझा राज्य स्तरीय मानस गायन प्रतियोगिता के विजेता मंडली मन ल पुरस्कार घलो बांटही।
अष्टमी/रामनवमीं
आज चैत नवरात्रि के अठवाहीं म आदि शक्ति मां दुर्गा के आठवां रूप महागौरी के भक्तिभाव के संग पूजापाठ करे जात हे। राज्य के जम्मों शक्तिपीठ अउ देवी मंदिर मन म हवन के संगेसंग कन्याभोज के जघा-जघा कारीकरम करे जात हे। कोरोना संक्रमण के स्थिति म सरलग सुधार होय के बाद एसो जम्मों शक्तिपीठ अउ देवी मंदिर मन म भक्त मनके अवई-जवई बाढ़ गेहे। नवरात्रि के नौवां दिन काली रामनवमीं मनाय जाही अउ संगेसंग ज्योति कलश अउ ज्वारा विजर्सन के दउर घलो सुरू हो जही। डोंगरगढ़ स्थित मां बम्लेश्वरी के संगेसंग रतनपुर के महामाया अउ दंतेवाड़ा के दंतेश्वरी मंदिर मन म ज्योति कलश ल ठंडा करे बर बिसेस तियारी करे गेहे।
ऐति, राजनांदगांव म काली रामनवमीं के मउका के पहिली आज जिला पुलिस बल के जवान मन ह सहर म फ्लैगमार्च निकालीन अउ लोगन मन ले सांति बना के तिहार ल मनाय के अपील करीन हे। त उहें, मुख्यमंत्री ह प्रदेस के लोगन मन ल रामनवमीं के बधाई अउ सुभकामना दे हवय। ओमन किहीन कि ए बड़े उछाह के बात हरय कि कौशल्या माता के धाम प्राचीन दक्षिण कोसल ह श्रीराम के ननिहाल रिहीस। राज्य सरकार डहार ले राम वनगमन परिपथ ल धार्मिक पर्यटन के रूप म विकसित करे जात हे।
बातों-बातों-में
प्रादेशिक समाचार एकांश के समसामयिक बिसय उपर आधारित कारीकरम ‘‘बातों-बातों-में‘‘ ए दारी प्रदेस के सियनहा मन बर सुरू करे गे बिसेस सेवा सियान जतन क्लीनिक अउ गर्मी के मौसम म कइसन ढंग ले सावधानी रखना चाही एखर उपर केन्द्रित रइही। ए बारे म अउ जादा जानबा ले बर आकाशवाणी समाचार ह बात करीन, रईपुर स्थित आयुर्वेदिक कॉलेज के सह-प्राध्यापक अउ रजिस्टार डॉक्टर संजय शुक्ला ले।
ए भेंटवार्ता के प्रसारण आकाशवाणी रईपुर डहार ले काली बिहनिया नौ बजके तीस मिनट म करे जाही, जेला छत्तीसगढ़ स्थित आकाशवाणी के जम्मों केन्द्र रिले करही।
हॉकी-प्रतियोगिता
बिलासपुर म काली ले ऑल इंडिया हॉकी प्रतियोगिता सुरू होगे हे। ए स्पधार्धा म आने-आने राज्य के तीस टीम मन भाग लेवत हे, जेमा पुरूष वर्ग के सोलह टीम अउ महिला वर्ग के चौदह टीम सामिल हे। वन मंत्री मोहम्मद अकबर ह बहतराई स्टेडियम म ए प्रतियोगिता के सुभारंभ करीन। उद्घाटन मैच सुफिया स्पोर्टिंग क्लब अमरावती अउ जिला हॉकी संघ बिलासपुर के बीच खेले गीस।
मौसम
राज्य म उत्तरी अउ दक्षिणी हवा आवत हे, जेखर सेती काली प्रदेस के एक-दू जघा म गरज-चमक अउ हवा-गरेर के संग थोरबहुत बरसा हो सकथे। प्रदेस म अधिकतम अउ न्यूनतम तापमान म कोनों प्रकार के बिसेस परिवर्तन नइ होवय। राज्य के उत्तरी जघा मन म अधिकतम तापमान म बढ़ोतरी होय के संभावना हे अउ संगेसंग प्रदेस के उत्तरी वाले एक-दू जघा म लू घलो चल सकथे।
अउ अब थोरकुन समाचार सार म-
– सुकमा जिला के कुकानार इलाका म पाछु दिन होय एक झिन आरक्षक के हत्या के मामला ल सुलझा ले गेहे।
– शेयर बाजार म रकम दुगुना करे के झांसा देके देसभर म ठगी करइया अंतर्राज्यीय गिरोह के चार झिन आरोपी मन ल गिरफ्तार करे गेहे। मध्यप्रदेश के रहइया ए आरोपी मन ह रईपुर म एक झिन दंपत्ति ले करीबन छह लाख पच्यासी हजार रूपिया के ठगी करे रिहीन।
अउ
– कोंडगांव पुलिस के एंटी नार्कोटिक्स टीम ह तीस किलो गांजा के संग एक झिन आरोपी ल गिरफ्तार करे हे।