राज्यपाल-प्रधानमंत्री मुलाकात
प्रधानमंत्री नरेंद्र मोदी ले आज नई दिल्ली म राज्यपाल अनुसुईया उइके ह भेंट करीन। राज्यपाल ह प्रधानमंत्री ले छत्तीसगढ़ म जनजाति मनके संगेसंग प्रदेश के आने आने समस्या उपर गोठबात करत राज्य के अभी के स्थिति के जानकारी दीन। ओमन पांचवी अनुसूची के अंतर्गत नगरीय क्ष्ेात्र मन म मेसा कानून लागू करे के बात कीहिन ।
राज्यपाल ह आग्रह करीन कि आदिवासी बाहुल्य जिला मन म स्थित विश्वविद्यालय मन ल केंद्रीय जनजाति विश्वविद्यालय के रूप म विकसित करे जाय, जेखर ले जनजाति समुदाय मन ल लाभ मिल सके। बस्तर अउ सरगुजा संभाग म रहवइया जनजाति के समुचित विकास बर सुश्री उइके ह प्रधानमंत्री ले विशेष पैकेज देके घलो अनुरोध करीन। राज्यपाल ह आंगनबाड़ी, शहरी सामाजिक अउ आशाा कार्यकर्ता मनके मानदेय म बढ़ोत्तरी करे के संग उंखर स्थायीकरण के दिशा म घलो विचार करे के आग्रह करीन।
खैरागढ़ उपचुनाव
खैरागढ़ विधानसभा उपचुनाव म ए दिन प्रचार-प्रसार तेजी ले चलत हे। जम्मों प्रत्याशी के पक्ष म प्रचार बर उंखर पार्टी के नेता मनके दउरा चलत हे। इही कड़ी म भाजपा प्रत्यासी के पक्ष म प्रचार बर मध्यप्रदेश के मुख्यमंत्री शिवराज सिंह चौहान घलो खैरागढ़ आवत हे। ओमन काली आठ अप्रैल के मंझनिया रईपुर विमानतल ले हेलीकॉप्टर ले खैरागढ़ जाही, जिहां साल्हेवारा म जनसभा ल संबोधित करही।
उपचुनाव
राज्य निर्वाचन आयोग डहार ले प्रदेश के दू अउ नगरीय निकाय मन म उपचुनाव कराये जाही। एमा रायगढ़ नगर पालिका निगम अउ सूरजपुर जिला के नगर पंचायत प्रेमनगर के एक-एक वार्ड शामिल हे। एखर बर एक जनवरी दू हजार बाईस के आधार म फोटोयुक्त निर्वाचक तियार करे के काम चलत हे। निर्वाचक नामावली के प्रारंभिक प्रकाशन के बाद सात मई तक दावा आपत्ति मंगाये गेहे।
दंड प्रक्रिया पहचान विधेयक
संसद ह दंड प्रक्रिया पहचान विधेयक पारित कर देहे। ए विधेयक म दोसी अउ अपराध के मामला म गिरफ्तार लोगन मनके पहिचान करे अउ उंखर बारे म आने-आने प्रकार के सारीरिक विवरण इकट्ठा करे के प्रावधान करे गेहे। एमा उंगुली, हथेली अउ पांव के छाप, फोटू, आंखी के पुतली, रेटिना अउ लिखावट के नमूना सामिल हवय। एमा राष्ट्रीय अपराध रिकार्ड ब्यूरो ल ए जम्मों जानकारी ल संकलित करे अउ ओमन ल संरक्षित राखे के अधिकार देके घलो व्यवस्था करे गेहे।
भाजपा-सामाजिक न्याय पखवाड़ा
भारतीय जनता पार्टी आज ले सामाजिक न्याय पखवाड़ा मनावत हे। बीस अप्रैल तक चलइया ए पखवाड़ा के दउरान पार्टी कार्यकर्ता सरकार के कल्याणकारी योजना मनके जानकारी देबर बूथ, ब्लॉक अउ जिला स्तर म कार्यक्रम आयोजित करही।
ए मउका म छत्तीसगढ़ के दुर्ग जिला म घलो पार्टी कार्यकर्ता मन ह कार्यक्रम के आयोजन करीन। ए मउका म केंद्रीय राज्यमंत्री प्रहलाद सिंह पटेल ह भिलाई के सेक्टर-छै स्थित जन औषधि केंद्र के जायजा लीन। ओमन कीहिन कि गरीब अउ सियान मनखे मन ल सस्ता दवाई देवाय के उद्देश्य ले छत्तीसगढ़ म एक सौ उन्नीस अउ भिलाई म इक्कीस जन औषधि केंद्र संचालित करे जावत हे।
विश्व स्वास्थ्य दिवस
आज विश्व स्वास्थ्य दिवस मनाय जावत हे। ए दिन ल हरेक बछर देसभर म स्वास्थ्य ले जुड़े कोनों बिसेस पहलू के बारे म जागरूकता लाय बर मनाय जाथे। बछर उन्नीस सौ अड़तालीस म सात अप्रैल के विश्व स्वास्थ्य संगठन के स्थापना होय रीहिस। ए बछर विश्व स्वास्थ्य दिवस के विसय हरय- हमारा ग्रह-हमारा स्वास्थ्य ।
प्रधानमंत्री नरेंद्र मोदी ह विश्व स्वास्थ्य दिवस के मउका म लोगन मन ल शुभकामना दीन हे। प्रधानमंत्री ह कीहिन कि सरकार ह देश म स्वास्थ्य सुविधा ल सुघ्घर बनाये बर बड़ मेहनत करत हे ।
एति छत्तीसगढ़ म विश्व स्वास्थ्य दिवस के मउका म आने आने कार्यक्रम के आयोजन करे गेहे। ए मउका म प्रदेश म सियान मन बर विशेष सेवा शुरू करे गेहे। राज्य के पांच जिला आयुर्वेदिक चिकित्सालय अउ बाईस सामुदायिक स्वास्थ्य केंद्र म अब हरएक महीना के पहिली गुरूवार के सियान जतन क्लीनिक ेके आयोजन करे जाही।
मानस मंडली-प्रतियोगिता
जांजगीर-चांपा जिला के शिवरीनारायण म काली आठ अप्रैल ले राज्य स्तरीय मानस गायन प्रतियोगिता के आयोजन करे जाही। तीन दिवसीय ए प्रतियोगिता के दउरान देस-प्रदेस के जाने-माने कलाकार मन ह अपन प्रस्तुति दीहीं। आठ अप्रैल के पद्मश्री ममता चंद्राकर, नौ के गायिका अनुराधा पौंडवाल, अउ दस अप्रैल के जसगीत गायक दिलीप षडंगी अउ भजन गायक अनूप जलोटा कारीकरम प्रस्तुत करही।
प्रतियोगिता म पच्चीस जिला के चुने मानस मंडली के करीबन तीन सौ पचास प्रतिभागी सामिल होही। प्रतियोगिता म पहिली तीन जघा म अवइया रामायण मंडली मन ल इनाम दे जाही। पहिली पुरस्कार पांच लाख रूपिया, दूसर पुरस्कार तीन लाख रूपिया अउ तीसर पुरस्कार के रूप म दू लाख रूपिया विजेता मन ल दे जाही। दस अप्रैल के प्रतियोगिता के समापन मउका म मुख्यमंत्री भूपेश बघेल घलो सामिल होही। ए दउरान मुख्यमंत्री राम वनगमन पर्यटन परिपथ के आने-आने काम के लोकार्पण करही।
विशेष मानसिक स्वास्थ्य इकाई
रईपुर अउ बिलासपुर के सासकीय आयुर्वेदिक महाविद्यालय चिकित्सालय म काली आठ अप्रैल के विशेष मानसिक स्वास्थ्य इकाई ओपीडी के आयोजन करे जाही। आयुष संचालनालय के सहायक संचालक डॉक्टर विजय साहू ले मिले जानकारी के मुताबिक ए बिसेस ओपीडी म मानसिक समस्या ले परेसान मनखे मन ल आयुर्वेद के माध्यम ले इलाज अउ स्वस्थ जीवनसैली ले जुड़े निःशुल्क मार्गदर्शन दे जावत हे। जरूरत पड़े म पंचकर्म के सेवा घलो दे जावत हे।
खबर के मुताबिक ए बिसेस ओपीडी के सुरूवात पाछु एक अप्रैल ले करे गेहे, जउन ह हरेक सुक्रवार के आयोजित करे जात हे।
अमृत महोत्सव-वेबीनार
पत्र सूचना कार्यालय अउ प्रादेशिक लोकसंपर्क कार्यालय रईपुर अउ बिलासपुर के संयुक्त तत्वावधान म आजादी के अमृत महोत्सव के तहत ‘‘परीक्षा पर चर्चा, माध्यम समस्या नहीं‘‘ बिसय उपर वेबीनार के आयोजन करे गीस। बिलासपुर म राखे गे ए कारीकरम ल संबोधित करत गुरू घासीदास केन्द्रीय विश्वविद्यालय के कुलपति प्रोफेसर डॉक्टर आलोक चक्रवाल ह किहीन कि भारतीय शिक्षा व्यवस्था म माध्यम कभी समस्या नइ रिहीस। ओमन किहीन कि राष्ट्रीय शिक्षा नीति-दू हजार बीस देस के सिक्षा व्यवस्था के अकादमिक रूप ले आजाद करत हे।
यूजीसी-भीमा भोई पीठ
विश्वविद्यालय अनुदान आयोग-यूजीसी बिलासपुर के गुरू घासीदास विश्वविद्यालय म भीमा भोई पीठ स्थापित करही। ए फइसला केन्द्रीय शिक्षा मंत्री धर्मेन्द्र प्रधान के सुझाव म करे गेहे। ओमन यूजीसी ले केहे रिहीन कि ओड़िसा के संत कवि भीमा भोई के जिनगी अउ दर्सन म अनुसंधान बनावय।
नीट परीक्षा-जेईई मेन्स
देस के जम्मों आयुर्विज्ञान संस्थान मन म चिकित्सा स्नातक पाठ्यक्रम म प्रवेस बर दू हजार बाईस के नीट परीक्षा सत्रह जुलाई के होही। राष्ट्रीय परीक्षा एजेंसी-एन.टी.ए. ह वेबसाइट म नीट के पंजीकरण सुरू कर देहे। आवेदक ए वेबसाइट के माध्यम ले ऑनलाइन आवेदन जमा करा सकत हे।
उहें, एन.टी.ए. ह काली संयुक्त प्रवेश परीक्षा जे.ई.ई. मेन्स दू हजार बाईस बर घलो संसोधित कारीकरम जारी करे हे। पहिली अउ दूसर दूनों सत्र के तारीख म बदलाव करे गेहे। पहली सत्र बीस ले उनतीस जून तक आयोजित करे जाही। उहें, दूसइया सत्र इक्कीस ले तीस जुलाई तक होही।
अधोसंरचना विकास मद
नगरीय प्रशासन अउ विकास विभाग ह जम्मों नगर पालिका अउ नगर पंचायत मन ल अधोसंरचना विकास मद ले कराये जाने वाला काम बर पंद्रह दिन के विशेष वाहक ले प्रस्ताव भेजे के निर्देश देहे।
खबर के मुताबिक मुख्यमंत्री भूपेश बघेल ह पाछू इकतीस मार्च के जम्मों नगर पालिका मन ल पांच करोड़ रूपिया अउ नगर पंचायत मन ल तीन करोड़ रूपिया अधोसंरचना विकास मद म देके घोषणा करे रीहिस।